- नेहरू युवा केंद्रातील एकूण ७८ युवकांनी साजरा केला “जागतिक बाल दिन”
मुंबई, २१ नोव्हेंबर, २०२३: जागतिक बालदिनानिमित्त स्त्री-पुरुष समानता साजरी करताना, महाराष्ट्र विधानसभेच्या उपसभापती डॉ. नीलम गोर्हे यांनी, केंद्र शासनाच्या युवा कार्य आणि क्रीडा मंत्रालयाच्या अधिपत्याखाली असणाऱ्या नेहरू युवा केंद्रातील युवकांना लिंग समानतेचे पुरस्कर्ते बनून समाजातील उपेक्षित लोकांसाठी काम करण्याचे आवाहन केले. सोमवारी महाराष्ट्रातील विविध जिल्ह्यांतील एकूण ७८ युवकांनी राजभवन आणि विधानभवन येथे भेट देऊन तेथील कामकाज समजून घेतले आणि पिठासीन अधिकारी व अधिकाऱ्यांशी संवाद साधला.
याप्रसंगी तरुणांच्या समुहाला मार्गदर्शन करताना डॉ. गोर्हे म्हणाल्या, ” जीवनातील प्रत्येक संधीचे सोने करा. मला तरुणांशी संवाद साधायला आवडते,कारण ते मोठ्या उत्साहाने कामे करतात. त्यांच्याकडे नवीन संकल्पना आहेत, समाजासाठीचे त्यांचे योगदान निर्विवाद आहे. मला आनंद आहे की विधानभवनाने त्यांना सर्व गोष्टींची चांगली माहिती करून दिली आहे. विधान भवनाची ही वास्तू महाराष्ट्राच्या इतिहासाची साक्ष देते आणि या युवकांमधून मी भविष्यातील नेते पाहत आहे.”
नेहरू युवा केंद्र संघटनेचे महाराष्ट्र आणि गोव्याचे राज्य संचालक,प्रकाश मानुरे यांनी तरुणांना सामाजिक प्रश्नांसाठी खुले राहण्यास प्रोत्साहित केले. “सामाजिक प्रश्नांसाठी काम करणे आणि समाजात सूयोग्य बदल घडवून आणणे ही तरुणांची जबाबदारी आहे,”असे ते म्हणाले.
स्वाती महापात्रा, कम्युनिकेशन स्पेशालिस्ट, युनिसेफ यांनी तरुणांना समाजासाठी चिंतेचे विषय असलेल्या सामाजिक समस्यांवर लक्ष केंद्रित करण्यासाठी प्रोत्साहित केले.
निलेश मदाने, वि.स.पागे संसदीय शिक्षण केंद्राचे संचालक यांनी लोकशाही प्रक्रियेतील विधानसभा व परिषदेचे महत्त्व विशद केले. ममहाराष्ट्र अनेक कायदे पारित करण्यात अग्रेसर आहे. अनेक महाराष्ट्राचे कायदे सर्व राज्यांनी आणि केंद्रानेही स्वीकार केला असल्याबाबत श्री मदाने यांनी सांगितले.
नेहरू युवा केंद्राच्या गटाने राजभवनालाही भेट दिली आणि अधिकाऱ्यांशी संवाद साधला. त्यांनी लोकशाही प्रक्रियेतील राज्यपाल कार्यालयाच्या भूमिकेवर चर्चा केली.
नेहरू युवा केंद्रांतर्गत , या महिन्यात एक राज्यस्तरीय निवडणूक घेण्यात आली. त्यात ३००० हून अधिक मतदाते सहभागी झाले आणि २० सदस्य हे मंत्री, विरोधी पक्षनेते आणि सभापती म्हणून निवडले गेले. मुंबईत आलेले एकूण ७८ तरुण यापैकी एक मुलगी आणि एक मुलगा यांनी महाराष्ट्रातील प्रत्येक जिल्ह्याचे प्रतिनिधित्व केले.
रविवारी,मुंबई विद्यापीठाच्या कॅम्पसमध्ये युनिसेफ आणि नेहरू युवा केंद्रातर्फे मॉक संसदेचे आयोजन करण्यात आले होते. सत्ताधारी व विरोधी पक्षाच्या सदस्यांनी विविध समस्या व जनतेच्या हिताच्या मुद्द्यांवर चर्चा केली.
बुलढाणा येथील सुमित वाकोडे, याने विधानसभेचे अध्यक्ष म्हणून भूमिका बजावली. त्यांनी सांगितले की, “संसदेच्या कामकाजात खूप काही शिकण्यासारखे होते आज राजभवन आणि विधानभवनाला भेट देणे हा आयुष्यातील अविस्मरणीय अनुभव होता,” असे तो म्हणाला.
दरम्यान, जागतिक बालदिनानिमित्त मुंबईतील बीएमसी इमारत, छत्रपती शिवाजी महाराज टर्मिनस, चर्चगेट स्टेशन,छत्रपती शिवाजी महाराज आंतरराष्ट्रीय विमानतळ, मुंबई आणि राजभवन या इमारतींवर निळ्या रंगाची रोषणाई करण्यात आली.