पुणे – सिम्बायोसिस इंटरनॅशनलने आयोजित केलेला दोन दिवसीय आंतरराष्ट्रीय युवा आणि शाश्वतता महोत्सव 2023 आज पुण्यात सुरू झाला. पुण्यात 10 आणि 11 मार्च रोजी नियोजित आगामी Y20 सल्लामसलत बैठकीची पूर्वतयारी म्हणून सिम्बायोसिस सेंटर फॉर वेस्ट रिसोर्स मॅनेजमेंट आणि एक्सप्लोरइट द्वारे संयुक्तपणे आयोजित, या महोत्सवाचे उद्दिष्ट, तरुणांना   शाश्वतता आणि पर्यावरणावर चर्चा करण्यासाठी आणि शिक्षित करण्यासाठी एकत्र आणणे हेच आहे. महोत्सवाचे उद्घाटन “वॉटर मॅन ऑफ इंडिया” डॉ. राजेंद्र सिंह आणि मुंबई आयकर विभागाचे अतिरिक्त आयुक्त डॉ. उज्ज्वल चौहान यांच्या हस्ते झाले. या महोत्सवाच्या सह-यजमानांमध्ये सिम्बायोसिस इन्स्टिट्यूट ऑफ मॅनेजमेंट स्टडीज, पुणे, सिम्बायोसिस सेंटर फॉर क्लायमेट चेंज अँड सस्टेनेबिलिटी, सिम्बायोसिस सेंटर फॉर आउटरीच प्रोग्राम अँड एक्स्टेंशन, एपीसीसीआय आणि क्लायमेट रिॲलिटी प्रोजेक्ट यांचा समावेश आहे.

अतिथी डॉ. उज्ज्वल चौहान यांनी जळगावातील अनेक गावांमधील पाणीटंचाई आणि संवर्धनाचा त्यांचा प्रेरणादायी प्रवास शब्दरुपात मांडला. एका शेतकऱ्याच्या मृत्यूच्या बातमीने प्रेरित होऊन हे कार्य सुरू केल्याचे त्यांनी सांगितले. 40,000 हून अधिक शेतकर्‍यांना फायदा मिळवून देणाऱ्या तसेच 70 हून अधिक गावांना दुष्काळमुक्त करण्यासाठी 500 कोटी लिटर क्षमतेचे जलसाठे यशस्वीपणे बांधण्याच्या त्यांच्या सफल कामगिरीचा प्रवास त्यांनी वर्णित केला.

आपल्या प्रमुख भाषणात प्रमुख पाहुणे डॉ. राजेंद्र सिंह यांनी त्यांचे बालपणीचे अनुभव आणि निसर्गावर आधारित शिक्षणाबाबत सांगितले. तरुणांना पर्यावरणाची जबाबदारी घेण्या उचलण्यासाठी  त्यांनी प्रेरित केले. मुख्य प्रवाहातील शिक्षण पद्धतींपेक्षा निसर्गाकडून मिळणारे वास्तविक शिक्षण हे शिकण्यासाठीचे अनेक मार्ग खुले करते यावर त्यांनी भर दिला.

भारत आणि दक्षिण आशियातील क्लायमेट रिॲलिटी प्रोजेक्टचे प्रमुख आदित्य पुंडीर उद्घाटन सत्राला उपस्थित होते. सिम्बायोसिस इंटरनॅशनल (डीम्ड युनिव्हर्सिटी)चे कुलसचिव डॉ. एम.एस. शेजूळ यांनी या कार्यक्रमात स्वागतपर भाषण केले तसेच पाहुण्यांचा सत्कार केला. सिम्बायोसिस सेंटर फॉर वेस्ट रिसोर्स मॅनेजमेंटचे संचालक डॉ. माणिकप्रभू धानोरकर आणि एक्स्प्लोरायटीचे मुख्य कार्यकारी अधिकारी शिवम सिंग हे देखील या वेळी उपस्थित होते.

सेवा भवन उद्घाटन कार्यक्रमात सरसंघचालकांचे प्रतिपादन
पुणे, ४ मार्च–
स्वार्थ हा सेवेची प्रेरणा कधीही होऊ शकत नाही. सेवा धर्म गहन आहे परंतु तो माणुसकीचा धर्म आहे, असे प्रतिपादन राष्ट्रीय स्वयंसेवक संघाचे सरसंघचालक मा. डॉ. मोहन भागवत यांनी शनिवारी केले.
जनकल्याण समितीच्या सुवर्ण महोत्सवी वर्षाच्या सांगता वर्षानिमित्त राष्ट्रीय स्वयंसेवक संघ जनकल्याण समिती, जनकल्याण सेवा फाउंडेशन आणि डॉ. हेडगेवार स्मारक सेवा निधी या संस्थांनी मिळून ‘सेवा भवन’ या सेवा प्रकल्पाची निर्मिती केली आहे. या प्रकल्पाचे उद्घाटन सरसंघचालक डॉ. मोहन भागवत यांच्या हस्ते शनिवारी करण्यात आले. यानिमित्त आयोजित कार्यक्रमात सरसंघचालक बोलत होते.

संघाचे पश्चिम महाराष्ट्र प्रांत संघचालक सुरेश उर्फ नाना जाधव, ‘जनकल्याण समिती’चे प्रांत अध्यक्ष डॉ. रवींद्र साताळकर, ‘जनकल्याण सेवा फाऊंडेशन’चे संचालक महेश लेले आणि ‘डॉक्टर हेडगेवार स्मारक सेवा निधी संस्थे’चे कोषाध्यक्ष माधव (अभय) माटे यावेळी व्यासपीठावर उपस्थित होते. जनकल्याण समितीच्या ५० वर्षांच्या वाटचालीचा आढावा घेणाऱ्या ‘अहर्निशं सेवामहे’ याग्रंथाचे प्रकाशन या प्रसंगी सरसंघचालकांच्या हस्ते करण्यात आले. तसेच हरीओम काका मालशे यांचा सामाजिक कार्याबद्दल सत्कार करण्यात आला.
यावेळी सरसंघचालक म्हणाले, “जनकल्याण समितीने ५० वर्षे सेवेचे हे कार्य चालविले त्याचा हा उत्सव आहे. संकटकाळात कोणी तरी उभे राहण्याची गरज असते आणि समाज संकटात असला की त्यासाठी काही ना काही करणाऱ्या व्यक्ती समाजात असतातच. देशात सर्वत्र सेवाकार्य चालू आहेत. जनकल्याण समितीचे कार्य हा त्यातील एक भाग आहे.”
ते पुढे म्हणाले, समरसता हे सेवेचे तत्त्व आहे आणि सद्भावना हा सेवेचा व्यवहार आहे. मात्र सेवेचा परिणाम सेवा हाच आहे. सेवा करताना हे आम्ही केलं हा अहंकार नसावा. समाज भरभरून देतो मात्र समाजाला हे कळावं लागतं की ही माणसं विश्वासार्ह आहेत. सेवा शब्दा हा भारतीय आहे आणि सर्व्हिस या शब्दात मोबदल्याची अपेक्षा आहे.
ते म्हणाले,”सेवा ही मजबूरी नाही किंवा ती भीतीने होऊ शकत नाही. सेवा ही आपली सहज प्रवृत्ती आहे. माणूस म्हटले की संवेदना असतेच. हे अस्तित्वाच्या एकतेचे रहस्य आहे.हे आध्यात्मिक असले तरी वास्तविक सत्य आहे. सर्वांमध्ये असलेल्या चैतन्यामुळे करूणा हा गुण येतो.”
प्रास्ताविक करताना डॉ. रवींद्र साताळकर म्हणाले, “जनकल्याण समिती गेली ५९ वर्षे कार्यरत आहे. सध्या विदर्भ वगळता उर्वरित महाराष्ट्रात समितीचे १८८० प्रकल्प सुरू आहेत.”
तुकाराम नाईक यांनी प्रमुख पाहुण्यांचा परिचय करून दिला. जनकल्याण समितीचे प्रांत सहमंत्री विनायक डंबीर यांनी ग्रंथाची माहिती दिली. अभय माटे यांनी आभार प्रदर्शन केले.

संगीताचार्या डॉ अलका देव मारुलकर यांच्या कसदार गायकीने रसिकांनी अनुभविली स्वरमयी सायंकाळ

पुणे दि. ४ मार्च, २०२३ : गानसरस्वती किशोरी आमोणकर यांच्या भारतीय शास्त्रीय संगीतातील अलौकिक योगदानाला मानवंदना देण्यासाठी नाट्यसंपदा प्रतिष्ठानच्या वतीने आयोजित करण्यात येणाऱ्या  गानसरस्वती महोत्सवाला आज मिलिंद तुळाणकर यांच्या सुमधुर जलतरंग वादनाने सुरुवात झाली. महोत्सवाचे हे ९ वे वर्ष असून राजाराम पुलाजवळील डी पी रस्ता येथील केशवबाग या ठिकाणी महोत्सव संपन्न होत आहे. मिलिंद तुळाणकर यानंतर डॉ अलका देव मारुलकर यांच्या कसदार गायकीने रसिकांनी स्वरमय अशा सायंकाळचा सुखद अनुभव घेतला.  

वेदमूर्ती स्वरूप दीक्षित आणि ऋषिकेश कोल्हटकर यांनी केलेल्या मंत्रपठनाने महोत्सवाला औपचारिक सुरुवात झाली. किशोरी आमोणकर यांचे सुपुत्र निहार आणि बिभास आमोणकर, महोत्सवाचे आयोजक पं रघुनंदन पणशीकर, अपर्णा पणशीकर, जाई काजळचे राजेश गाडगीळ, फ्लीटगार्ड फिल्ट्रमचे निरंजन किर्लोस्कर आणि बेलवलकर हाउसिंगचे अजित बेलवलकर आदी यावेळी उपस्थित होते.

जलतरंग हे एक अतिप्राचीन वाद्य असून वेदांमध्ये याचा उल्लेख आढळतो असे सांगत मिलिंद तुळाणकर यांनी राग मधुवंतीने आपल्या वादनाला सुरुवात केली. राग मधुवंतीमध्ये आलाप, जोड, झाला यांचे दमदार सादरीकरण त्यांनी केले. यांनतर त्यांनी दोन बंदिशी प्रस्तुत केल्या.

महोत्सवाला सुरूवात करताना आनंद होतोय असे सांगत ते पुढे म्हणाले की, १० व्या शतकात पोर्सेलिनचा शोध लागेपर्यंत धातूच्या भांड्यावर लाकडी काठीने कलाकार जलतरंग सादर करीत असत. त्यानंतर वापरायला नाजूक अशी पोर्सिलिनची भांडी वापरली जाऊ लागली. आज मी मागील ३३ वर्षे माझ्या आजोबांचा म्हणजे पं. शंकरराव कान्हेरे यांचा ८५ वर्षे जुना जलतरंग वाजवतो आहे.” हा जलतरंग जपण्यासाठी खास प्रयत्न करावे लागत असून मी अनेक प्रकारच्या स्टीक्स आणि प्रत्येक बाऊलसाठी वेगळी बैठक व्यवस्था करीत हा जपत आहे, असेही तुळाणकर म्हणाले. राग हंसध्वनीमध्ये मध्यलय तीनतालातील ‘वातापी गणपती ‘ ही बंदिश आणि सवाल जवाब सादर करीत मिलिंद तुळाणकर यांनी आपल्या सादरीकरणाचा समारोप केला. त्यांना पं रामदास पळसुले (तबला) व गणेश पापळ (पखावज) यांनी साथसंगत केली.  

यानंतर विदुषी डॉ अलका देव मारुलकर यांचे गायन झाले. त्यांनी श्री रागाने आपल्या गायनाला सुरुवात केली. यामध्ये पारंपरिक विलंबित तीनताल मध्ये त्यांनी ‘साँझ भयीं…’ ही बंदिश सादर केली. यांनतर त्यांनी द्रुत अध्दा मध्ये ‘ सुंदर सुभग बदन श्याम…’ ही स्वरचित रचना प्रस्तुत केली. यानंतर त्यांनी राग सावनी नट मधील
स्वरचित मध्य द्रुत रूपकमधील ‘ झुलत सीर…’ ही रचना सादर केली. त्याला जोड म्हणून दृत एकतालात त्यांनी स्वतः तयार केलेल्या राग आनंद कल्याणचे सादरीकरण केले. यामध्ये त्यांनी ‘फुलन लाई, कलियन लाई, मालनिया लाई ही बंदिश’ प्रस्तुत केली. यानेच त्यांनी आपल्या गायनाचा समारोप केला. त्यांना संजय देशपांडे (तबला) व सुयोग कुंडलकर (संवादिनी), शिवानी व कल्याणी (स्वर व तानपुरा) यांनी साथसंगत केली

विघ्नेश जोशी यांनी कार्यक्रमाचे सूत्रसंचलन केले.तर कार्यक्रमाच्या सुरुवातील श्री राघवेंद्र स्वामी यांनी दिलेल्या शाल व श्रीफळाने पं रघुनंदन पणशीकर आणि अपर्णा पणशीकर यांचा सन्मान करण्यात आला.

पुणे-पुण्यात ‘भांडणातील मुलांची नावे सांग’ असे म्हणत अल्पवयीन गुडांच्या टोळक्याने 16 वर्षीय मुलाचे अपहरण करत त्याला धमकावले व त्याचे नग्न करत फोटो काढल्याचा धक्कादायक प्रकार उघडकीस आला आहे. याप्रकरणी चार आरोपींवर दत्तवाडी पाेलिस ठाण्यात गुन्हा दाखल करण्यात आला आहे.

या घटनेनंतर पीडित मुलाच्या 40 वर्षीय वडीलांनी पाेलिसांकडे आराेपी मुलांविराेधात तक्रार दाखल केली आहे. ही घटना गुरूवारी (2 मार्च) दुपारी 2 ते सायंकाळी 6 वाजण्याच्या सुमारास शाहू काॅलेज परिसराजवळ घडला आहे.

पोलिसांच्या माहितीनुसार, घटनेच्या दिवशी लक्ष्मीनगर परिसरातील शाहू काॅलेज जवळून पिडित मुलास आराेपींनी जबरदस्तीने गाडीवर वसवून साई सिध्दी चाैकापासून सुर्या चाैकात नेले. तेथून आंबेगाव तळजाई पठारावरील मोकळया मैदानात नेले व ‘कालच्या भांडणातील मुलांना घेऊन ये’ असे म्हणत धारदार शस्त्र गळयास लावले व खल्लास करुन टाकण्याची धमकी दिली.पीडित मुलास नग्न करुन आरोपींनी त्याचे फाेटाे काढले.

घडलेला सर्व प्रकार मुलाने घाबरलेल्या अवस्थेत कुटुंबियांना सांगितल्यावर याप्रकरणी दत्तवाडी पाेलिस ठाण्यात आराेपींविराेधात तक्रार दाखल करण्यात आली. पाेलिसांनी चारही अल्पवयीन आरोपींना नोटीस बजावली आहे. याबाबत पुढील तपास पाेलिस उपनिरीक्षक एस.कामे करत आहेत.

पुणे-बस प्रवासात ओळख झाल्यानंतर पुण्यात पुस्तके खरेदीसाठी आलेल्या तरुणीला शीतपेयातून गुंगीचे ओैषध देऊन तिच्यावर अत्याचार करण्यात आल्याची धक्कादायक घटना उघडकीस आली आहे. तरुणीवर अत्याचार केल्यानंतर व्हिडिओ सोशल मिडियावर पोस्ट करुन तिच्याकडून 16 लाख रुपये उकळणाऱ्या एकास अटक करण्यात आली.

तरुणी मूळगावी गेल्यानंतर फईमने तरुणीशी संपर्क साधला. समाजमाध्यमावर व्हिडिओ तसेच फोटो पोस्ट करण्याची धमकी दिली. तरुणीला धमकावून त्याने तिच्याकडे पैशांची मागणी केली. घाबरलेल्या तरुणीने एका बँकेकडून कर्ज काढून त्याला 16 लाख 86 हजार रुपये दिले. त्यानंतर तो तरुणीला धमकावत होता. त्याच्या धमकीमुळे घाबरलेल्या तरुणीने पोलिसांकडे तक्रार दिली. फईमला अटक करण्यात आली असून सहायक पोलिस निरीक्षक भोलेनाथ अहिवळे तपास करत आहेत.

या प्रकरणी फईम नईम सय्यद याला अटक करण्यात आली आहे. याबाबत एका 27 वर्षीय तरुणीने शिवाजीनगर पोलिस ठाण्यात फिर्याद दिली आहे. पिडित तरुणी मूळची परगावची आहे. ती पुण्यात पुस्तके खरेदीसाठी बसने येत होती. बस प्रवासात तिची आरोपी फईम याच्याशी ओळख झाली. दोघांनी एकमेकांचे मोबाइल क्रमांक दिले. मोबाइलवरुन दोघांमधील संपर्क वाढला. गेल्या वर्षी 2 नोव्हेंबर रोजी ती पुण्यात आली होती. तिने पुस्तके खरेदी केली. त्यानंतर तिने फईमशी संपर्क साधला. तेव्हा फईमने तिला जेवायला जाऊ असे सांगून जंगली महाराज रस्त्यावरील एका उपहारगृहात नेले. तेथे तिला शीतपेयातून गुंगीचे ओैषध दिले. त्यानंतर तरुणीला एका लाॅजमध्ये नेऊन त्याने तिच्यावर अत्याचार केला. तरुणीचे फोटो काढले तसेच व्हिडिओ तयार केली.

पुणे- पुण्यात एका व्यावसायिक दांपत्याने हॉटेल चालवण्यासाठी उधारीवर दूध, भाजीपाला व किराणा घेऊन तब्बल 73 लाख 66 हजार रूपयांची फसवणूक केली आहे. याप्रकरणी आरोपी दाम्पत्यावर चंदननगर पोलिस ठाण्यात फसवणुकीचा गुन्हा दाखल करण्यात आल्याची माहिती पाेलिसांनी शनिवारी दिली.

शाैकत अली खान, रेणुरतन शाैकतअली खान (रा. खराडी, पुणे) अशी आरोपींची नावे आहेत. याबाबत व्यावसायिक अवधेश कुमार रामलुलारक उपाध्याय (वय-३९,रा.मुंढवा, पुणे) यांनी पाेलिसांकडे तक्रार दाखल केली आहे. ही घटना 2016 वर्षांपासून डिसेंबर 2022 पर्यंत घडली आहे.

याबाबत चंदननगर पाेलिस ठाण्याचे वरिष्ठ पाेलिस निरीक्षक राजेंद्र लांडगे म्हणाले, आराेपी शाैकत अली खान व रेणुरतन खान यांची हिंजवडी, औंध, खराडी, मगरपट्टा- हडपसर या ठिकाणी स्काय हाय, स्काय फ्लाय नावाची तीन ते चार हाॅटेल आहेत. या हॉटेलकरता या दाम्पत्याने वेगवेगळया व्यावसायिकांकडून सामान उधारीवर घेतले. उधारीचे पैसे वेळाेवेळी पैसे परत करू असे सांगून पैसे न देता फसवणुक केली आहे. सदर जाेडप्याचा पाेलिस शाेध घेत आहेत.

पाेलिसांनी दिलेल्या माहितीनुसार, आराेपी शाैकत खान व त्यांची पत्नी रेणुरतन खान यांनी हाॅटेल चालविण्याकरता तक्रारदार अवधेश कुमार उपाध्याय यांच्याकडून वेळाेवेळी दूध व दुधाचे पदार्थ उधारीवर नेले. ही उधारी न देता त्यांची 39 लाख रुपयांची आर्थिक फसवणूक केली आहे.

सिमरजित जसबिरसिंग अराेरा (वय-29) यांच्याकडून काेळसा घेऊन त्यांची 6 लाख 85 हजार रुपयांची फसवणूक करण्यात आली आहे. अश्विन अनिल परदेशी (वय-40) यांच्याकडून मासे घेऊन त्यांची 6 लाख 82 हजार 800 रुपयांची फसवणूक केली गेली. विजय कृष्णा शिवले (36 ,रा. गणेश पेठ, पुणे) यांना भाजीपाला घेऊन त्यांची 19 लाख 23 हजार 772 रुपयांचा गंडा घालण्यात आला आहे.

श्रीकांत विजय कापसे (40,रा.महंमदवाडी,, पुणे) यांचेकडून एक लाख 74 हजार रुपयांचा किराणा घेऊन त्यांची ही फसवणूक आराेपींनी केली आहे. अशाप्रकारे विविध व्यवसायिकांकडून एकूण 73 लाख 66 हजार रुपयांचा माल घेऊन आराेपींनी त्यांचे पैसे न देता आर्थिक फसवणुक केलेली आहे. याबाबत चंदननगर पाेलिस ठाण्याचे सहाय्यक पाेलिस निरीक्षक एस खांडेकर पुढील तपास करत आहे.

पुणे-खासदार सुप्रिया सुळे यांनी देखील हा काय कॉमेडी शो आहे का? ही राज्याची विधानसभा आहे, मुख्यमंत्री अधिवेशनात महागाईशी संबंधित विषयावर बोलतील अशी अपेक्षा होती. पण टीका आणि इतर गोष्टींवर बोलण्यातच त्यांनी वेळ घालवला. अशी खोचक टीका करत सुप्रिया सुळे यांनी मुख्यमंत्री एकनाथ शिंदे यांची खिल्ली उडवली आहे. . हांडेवाडीतील सुप्रियाताई लोकसेवा प्रतिष्ठानच्या वतीनं आज जागतिक महिला दिनाच्या निमित्ताने विविध क्षेत्रातील महिलांचा सन्मान करण्यात आला. यावेळी सुप्रिया सुळे बोलत होत्या.

मुख्यमंत्री एकनाथ शिंदे यांनी शुक्रवारी विधानसभेत ‘मविआ’ सरकारची कुंडलीच काढली. रवी राणांच्या पत्नीला आत घातले. कंगना राणावतचे घर तोडले. गिरीश महाजन, नारायण राणे, देवेंद्र फडणवीसांच्या कुटुंबाची चौकशी लावली. आशिष शेलारांवर खोटे गुन्हे दाखल करण्याचा प्रयत्न झाला. आपण असे केले. काय? जयंतराव मला माहिती आहे. दादांनाही माहिती आहे. असे प्रकार केले. हे जास्त काळ चालत नसल्याचे शिंदेंनी सुनावले.आम्हाला महाराष्ट्र द्रोही म्हणता. आमचे सरकार घटनाबाह्य म्हणता. मग तुम्ही घटनाबाह्य विरोधी पक्षनेते आहात का, असा सवाल मुख्यमंत्री एकनाथ शिंदे यांनी विधानसभेत विरोधी पक्षनेते अजित पवार यांना विचारला. घटनाबाह्य सरकारच्या जाहिराती, सगळ्या सुविधा तुम्हाला चालतात, हे कसे, असे म्हणत उद्धव ठाकरे यांना चिमटा काढला.

मुख्यमंत्री एकनाथ शिंदे यांचे भाषण चांगलेच गाजले. यावर सुप्रिया सुळे म्हणाल्या, महाविकास आघाडी सरकारमध्ये कोणती गोष्ट मिळाली नाही असे झाले नाही. कोरोना काळात कोणी उपाशी झोपले नाही. इंदापूर तालुक्यातील भांडगावमध्ये दारू बंदी झाली नाही तर देवेंद्र फडणवीस यांच्या ऑफिस समोर आंदोलनाला बसणार असल्याचा इशाराही सुप्रिया सुळे यांनी यावेळी दिला आहे.

पुणे, दि. ०४ मार्च २०२३:‘अतिशय जोखमीच्या व धकाधकीच्या वीज क्षेत्रात २४ तास सुरळीत वीजपुवरठ्यासाठी ग्राहकांना अविश्रांत सेवा देणारे जनमित्र हे महावितरणचे आधारस्तंभ आहेत. ग्राहकांशी थेट संपर्क व संवाद साधून त्यांना तत्पर सेवा देणारे जनमित्र खरे ‘प्रकाशदूत’ आहेत’ अशा शब्दांत पुणे परिमंडलाचे मुख्य अभियंता श्री. राजेंद्र पवार यांनी जनमित्रांचा शनिवारी (दि. ४) गौरव केला.

केंद्र शासनाच्या निर्देशानुसार दि. ४ मार्च हा दिवस ‘लाईनमन दिन’ म्हणून महावितरणसह देशभरात साजरा करण्यात आला. यानिमित्त रास्तापेठ येथील प्रशासकीय इमारतीमध्ये आयोजित पुणे परिमंडलाच्या कार्यक्रमात मुख्य अभियंता श्री. पवार बोलत होते. यावेळी प्रमुख पाहुणे म्हणून अधीक्षक अभियंता श्री. प्रकाश राऊत यांची उपस्थिती होती.

मुख्य अभियंता श्री. राजेंद्र पवार म्हणाले की, देशभरात ‘लाईनमन दिन’ साजरा होत असल्याचा एक सहकारी म्हणून विशेष आनंद झाला आहे. लाईनमन म्हणजेच जनमित्र हा वीज वितरण यंत्रणा तसेच ग्राहकसेवेचा अविभाज्य घटक आहे. वीजपुरवठा खंडित झाल्यानंतर तो सुरळीत होईपर्यंत जनमित्रांना कोणत्या दिव्यातून जावे लागते याची फारशी माहिती कोणाला नसते. परंतु ‘निसर्ग’, ‘तौक्ते’ ही मोठी चक्रीवादळे तसेच कोरोना संसर्गाचा कालावधीमध्ये शहरी भागांसह दऱ्याखोऱ्यातील अतिदुर्गम भागातील सुरळीत वीजपुरवठ्यासाठी अभियंत्यांसह जनमित्रांनी केलेली कामगिरी हा उत्कृष्ट ग्राहकसेवेचा मानदंड आहे, असे श्री. पवार यांनी सांगितले. अत्यावश्यक असलेल्या सार्वजनिक सेवा क्षेत्रात काम करताना थोडा ताणतणाव येणे स्वाभाविक आहे. परंतु वीजयंत्रणेमध्ये काम करताना जनमित्रांनी सुरक्षा साधनांचा वापर करून शांतचित्ताने व एकाग्रतेने काम करावे. कोणत्याही प्रकारचा धोका पत्करू नये असे आवाहन मुख्य अभियंता श्री. पवार यांनी केले.

यावेळी अधीक्षक अभियंता श्री. प्रकाश राऊत यांनी सांगितले की, विविध सेवा देण्यासाठी थेट ग्राहकांशी संपर्क साधणारे जनमित्र हे महावितरण व ग्राहक यांच्यामध्ये महत्वाचा दुवा आहे. जनमित्रांनी दिलेल्या ग्राहकसेवेवरच महावितरणची प्रतिमा अवलंबून आहे. ते करीत असलेल्या उत्कृष्ट कामगिरीच्या बळावरच महावितरणची मोठी प्रगती झाली आहे. त्यामुळे महावितरणसह एकूणच वीज क्षेत्रात जनमित्रांचे योगदान मोलाचे आहे असे गौरवोद्गार श्री. राऊत यांनी काढले. कार्यक्रमात अनेक जनमित्रांनी प्रातिनिधिक मनोगत व्यक्त केले.

अतिशय उत्साहात झालेल्या या कार्यक्रमामध्ये प्रातिनिधिक स्वरुपात महिला व पुरुष जनमित्रांचा गौरव करण्यात आला. यावेळी वीजसुरक्षेची शपथ घेण्यात आली तसेच सुरक्षेसंदर्भात प्रबोधन करण्यात आले. कार्यक्रमाचे सूत्रसंचालन डॉ. संतोष पटनी यांनी केले व आभार मानले. अतिशय उत्साहात झालेल्या या कार्यक्रमाला सहायक महाव्यवस्थापक ज्ञानदा निलेकर (मानव संसाधन) व माधुरी राऊत (वित्त व लेखा), उपमुख्य औद्योगिक संबंध अधिकारी शिरीष काटकर, कार्यकारी अभियंता भाऊसाहेब सावंत, मधुकर घुमे, बाळासाहेब हळनोर, मनीष सूर्यवंशी, भागवत थेटे, संजय वाघमारे, माणिक राठोड आदींसह अभियंते, अधिकारी व जनमित्रांची मोठ्या संख्येत उपस्थिती होती.