पुणे:हिराबाग हाउसिंग सोसायटी येथील एसआरए प्रकल्पातील अस्वच्छतेचा प्रश्न अवघ्या २४ तासांत, नवनिर्वाचित नगरसेवक राघवेंद्र बाप्पु मानकर यांनी मार्गी लावला आहे. या इमारतीतील डक्टमध्ये साठणाऱ्या कचऱ्याला अटकाव करण्यासाठी संपूर्ण इमारतीत जाळ्या लावण्याच्या कामाला, आचारसंहिता संपल्यानंतर तातडीने सुरुवात करण्यात आली आहे.

निवडणुकीदरम्यान या इमारतीतील रहिवाशांनी कचऱ्याची गंभीर समस्या बाप्पु मानकर यांच्या निदर्शनास आणून दिली होती. ही समस्या निवडणुकीनंतर प्राधान्याने सोडविण्याचे आश्वासन त्यांनी नागरिकांना दिले होते. त्या अनुषंगाने काल त्यांनी प्रत्यक्ष सोसायटीला भेट देऊन परिस्थितीची पाहणी केली. या समस्येवर कायमस्वरूपी उपाय म्हणून संपूर्ण इमारतीत कचरा टाकण्याची जागा बंद करण्यासाठी जाळ्या लावण्याचा निर्णय घेण्यात आला. विशेष म्हणजे, निर्णय झाल्यापासून अवघ्या २४ तासांच्या आत या कामाला प्रत्यक्ष सुरुवात देखील करण्यात आली आहे. या कामाची पाहणी करून, समस्या पूर्णपणे सुटेपर्यंत त्याचा पाठपुरावा करण्याचाशब्द बाप्पु मानकर यांनी नागरिकांना दिला आहे.
या सोसायटीतील डक्टमध्ये मोठ्या प्रमाणावर कचरा साठत असल्याने दुर्गंधी आणि डासांचा प्रादुर्भाव वाढला होता, ज्यामुळे रहिवाशांच्या आरोग्याचा प्रश्न गंभीर बनला होता. वारंवार स्वच्छता करूनही पुन्हा कचरा साठत असल्याने, प्रत्येक मजल्यावर जाळ्या लावण्याची उपाययोजना करण्यात आली आहे.

सर्वप्रथम डक्टच्या संपूर्ण भागाची स्वच्छता करून घेण्यात आली असून, इमारतीतील ९ मजल्यांवर ६०० हून अधिक जाळ्या बसवल्या जाणार आहेत. याचसोबत नागरिकांना डस्टबिनचे वाटप करून, ओला व सुका कचरा वर्गीकरणाबाबत जनजागृतीही केली जाणार आहे. दिलेल्या शब्दाची त्वरित पूर्तता केल्याबद्दल रहिवाशांनी राघवेंद्र बाप्पु मानकर यांचे आभार मानले. यावेळी हिराबाग सोसायटीमधील शंकर तावरे, सचिन मुजुमले, संदीप गायकवाड, संतोष वाटमकर, पांडुरंग जावळकर, दत्ता इंगळे यांसह सोसायटीतील सदस्य व रहिवासी उपस्थित होते.

पुणे-सत्ताधारी राष्ट्रवादी काँग्रेसचे अध्यक्ष तथा राज्याचे उपमुख्यमंत्री अजित पवार कोणत्याही कार्यक्रमासाठी जात असताना तेथील आयोजक सर्वकाही ठिकठाक आहे की नाही याची दहावेळी तपासणी करतात. पण अनेकदा काही ना काही तरी राहून जाते आणि मग अजित पवार संबंधितांची चांगलीच कानउघाडणी करतात. असाच प्रकार आज पुण्यातील एका बैठकीपूर्वी घडला.

अजित पवार सध्या जिल्हा परिषद व पंचायत समितीच्या निवडणुकांची रणनीती आखण्यात व्यस्त आहेत. ते नियोजित भेटींसाठी आज सकाळीच पुण्यातील बारामती हॉस्टेलवर धडकले. ते येणार म्हणून कार्यकर्त्यांचा मोठा फौजफाटा व भेटीसाठी आलेले नागरीक तिथे गोळा झाले होते. पण एवढी गर्दी असूनही हॉस्टेलच्या कार्यालयाचे कुलूप उघडण्यात आले नव्हते. कार्यालयाचे दार बंदच होते. तेवढ्यात अजित पवारांचा ताफा हॉस्टेलवर पोहोचला. तेव्हाही दरवाजा उघडण्यात आला नाही. यामुळे अजित पवारांवरही काही वेळ ताटकळत उभे राहण्याची वेळ आली.

राज्याचा उपमुख्यमंत्री तथा पुण्याचे पालकमंत्री बारामती हॉस्टेलच्या बाहेर उभे असूनही दरवाजा उघडत नव्हता. अखेर हा प्रकार पाहून अजित पवारांचा पारा चढला. त्यांनी तिथे उपस्थित कर्मचारी व कार्यकर्त्यांची चांगलीच कानउघाडणी केली. त्यानंतर त्यांनी आपल्या पीएलाही बोलावून या प्रकाराची विचारणा केली. कार्यालय उघडून कार्यकर्त्यांना आत बसू का दिले नाही? कार्यालय कशाला बंद ठेवले? चावी आणायला त्रास होत आहे का? अशा कडक शब्दांत त्यांनी आपली नाराजी व्यक्त केली. त्यांचा हा रौद्रावतार पाहून उपस्थित कार्यकर्ते व कर्मचाऱ्यांची एकच धावपळ उडाली.

अखेर घाईघाईने कार्यालय उघडण्यात आले. त्यानंतर अजित पवार आत गेले व पुढील कार्यक्रम सुरू झाला. या घटनेचा एक व्हिडिओ समोर आला आहे. त्यात अजित पवार बारामती हॉस्टेलच्या बाहेर पांढऱ्या पेहरावात उभे असल्याचे व कर्मचारी दार उघडताना कावरेबावरे झाल्याचे दिसून येत आहे.

पुणे-सांस्कृतिक राजधानी असलेल्या पुणे महापालिकेत इतर समित्यांप्रमाणे “सांस्कृतिक समिती” देखील स्थापन करावी अशी मागणी राष्ट्रवादी चित्रपट व सांस्कृतिक विभागाचे प्रदेशाध्यक्ष बाबासाहेब पाटील यांनी केली आहे.
बाबासाहेब पाटील यांनी यासंदर्भात म्हटले आहेकी,’पुणे महानगरपालिकेची निवडणूक पार पडून नवीन सत्तास्थापना होत असताना, शहराच्या प्रशासनात शिक्षण मंडळ, वृक्ष प्राधिकरण समिती, PMPML समिती, जिल्हा नियोजन इत्यादी विविध महत्त्वाच्या समित्या कार्यरत असतात. मात्र, महाराष्ट्राची सांस्कृतिक राजधानी म्हणून ओळख असलेल्या पुणे शहरात आजपर्यंत स्वतंत्र “सांस्कृतिक समिती” अस्तित्वात नाही, ही अत्यंत खेदजनक बाब आहे.
पुणे शहर हे केवळ शैक्षणिक किंवा औद्योगिक नव्हे, तर ऐतिहासिक, सांस्कृतिक आणि कलात्मक वारशाचे केंद्र आहे. पुण्याने महाराष्ट्राला आणि देशाला अनेक दिग्गज कलाकार दिले आहेत. नाट्य, चित्रपट, संगीत आणि साहित्य क्षेत्रातील अनेक मान्यवर कलाकार पुण्यात घडले, वाढले आणि आजही येथे वास्तव्य करीत आहेत. या शहरातील नाट्यगृहे, सांस्कृतिक केंद्रे, संगीत-नृत्य परंपरा, उत्सव-समारंभ आणि कलाकारांचे प्रश्न यांचा योग्य विचार आणि संवर्धन करण्यासाठी महानगरपालिकेत स्वतंत्र सांस्कृतिक समिती असणे अत्यावश्यक आहे.
आजच्या घडीला मुंबईप्रमाणेच पुणे शहरातही मोठ्या प्रमाणावर चित्रपट, वेब सिरीज, मालिका आणि जाहिरातींचे शूटिंग होत आहे. या शूटिंगसाठी आवश्यक असलेल्या परवानग्या, नियोजन, कलाकार आणि तंत्रज्ञांना सुविधा मिळाव्यात यासाठीदेखील महानगरपालिकेत सांस्कृतिक समिती असणे काळाची गरज आहे. यामुळे पुण्याच्या सांस्कृतिक आणि चित्रपट क्षेत्राला अधिक चालना मिळेल.
त्यामुळे, नवीन सत्ताधाऱ्यांनी तात्काळ पुढाकार घेऊन पुणे महानगरपालिकेत इतर जशा विविध समित्या आहेत, त्याचप्रमाणे स्वतंत्र “सांस्कृतिक समिती” स्थापन करावी, अशी मागणी आम्ही राष्ट्रवादी चित्रपट व सांस्कृतिक विभागाच्या वतीने पुणे जिल्ह्याचे पालकमंत्री अजित दादा पवार, पुणे महानगरपालिकेचे आयुक्त, तसेच केंद्रीय मंत्री मुरलीधर मोहोळ यांच्याकडे करीत आहोत.
ही समिती शहराच्या सांस्कृतिक वारशाचे संवर्धन, सांस्कृतिक उपक्रमांना चालना, कलाकारांच्या प्रश्नांना न्याय आणि पुण्यात वाढत्या शूटिंग व्यवस्थापनासाठी महत्त्वाची ठरेल, असा आमचा ठाम विश्वास आहे.

वाडिया, डीवायपीएटीयू, कीस्टोन स्कूल, एमआयटी एसओसीचे दमदार विजय

लोणी काळभोर : एमआयटी आर्ट, डिझाईन आणि टेक्नॉलॉजी विद्यापीठ, विश्वराजबाग, पुणे यांच्या वतीने आयोजित आठव्या विश्वनाथ स्पोर्ट्स मीट (व्हीएसएम–२०२६) अंतर्गत क्रिकेट स्पर्धेत रविवारी थरारक, एकतर्फी तसेच अत्यंत नाट्यमय सामने पाहायला मिळाले. रविवारी खेळल्या गेलेल्या चार सामन्यांत एमईएस वाडिया,  डीवाय शेतकी व तांत्रिक विद्यापीठ (पीएटीयू), कीस्टोन स्कूल ऑफ इंजिनिअरिंग आणि एमआयटी स्कुल ऑफ कम्पुटींग (एसओसी) संघांनी प्रभावी विजय नोंदवत स्पर्धेची रंगत वाढवली.

एमआयटी एडीटी विद्यापीठ मैदानावर झालेल्या सामन्यात एमईएस वाडिया, पुणे संघाने कमी धावसंख्येचा यशस्वी बचाव करत मुंबईच्या पाटकर वर्धे कॉलेजला २१ धावांनी पराभूत केले. प्रथम फलंदाजी करताना एमईएस वाडियाने १८ षटकांत ७ बाद ११९ धावा केल्या. हर्षवर्धन पाटील (२९), प्रथमेश कुवर (२७) आणि कर्णधार अभि जाधव (नाबाद २४) यांनी संघाची धावसंख्या सावरली. प्रत्युत्तरात पाटकर वर्धे कॉलेजचा संघ ९८ धावांत गारद झाला. हर्षवर्धन गलांडे आणि सिद्धांत अग्वान यांनी प्रत्येकी ३ बळी घेत कमी धावसंख्येच्या बचावात निर्णायक भूमिका बजावली.

उरुळीकांचन येथील निकम स्टेडियमवर डीवायपीएटीयू संघाने एमआयटी एसबीएसआरवर १० गडी राखून दणदणीत विजय मिळवला. प्रथम फलंदाजी करताना एमआयटी एसबीएसआर संघ १६ षटकांत ११०/७ अशी धावसंख्या उभारू शकला. प्रत्युत्तरात डीवायपीएटीयूच्या सलामीवीरांनी सामन्यावर पूर्ण वर्चस्व गाजवले. पार्थ गणबावले (१८ चेंडूत नाबाद ५१) आणि कर्णधार रोहित पवार (२९ चेंडूत नाबाद ५१) यांनी अवघ्या ७.३ षटकांत एकही विकेट न गमावता सामना संपवला.

एमआयटी एडीटी मैदानावर दुसऱ्या सत्रात झालेला कीस्टोन स्कूल ऑफ इंजिनिअरिंग विरुद्ध डी.वाय. आंतरराष्ट्रीय विद्यापीठ(पीआययू) आकुर्डी हा सामना स्पर्धेतील सर्वाधिक नाट्यमय ठरला. दोन्ही संघांनी १०२ धावा केल्यानंतर सामना बरोबरीत सुटला. त्यानंतर झालेल्या सुपर ओव्हरमध्ये कीस्टोन स्कूलने बाजी मारली. कर्णधार मोहन कदमने सुपर ओव्हरमध्ये केवळ ३ धावा देत सामना आपल्या संघाच्या बाजूने झुकवला आणि नंतर फलंदाजीतही निर्णायक चौकार मारत विजय निश्चित केला.

दुसऱ्या फेरीतील आणखी एका चुरशीच्या सामन्यात एमआयटी एसओसीने क्राइस्ट कॉलेजवर १५ धावांनी रोमांचक विजय मिळवला. एमआयटी एसओसीने प्रथम फलंदाजी करताना १६ षटकांत १३५ धावा केल्या. सुजल पडवळने ४७ धावांची आक्रमक खेळी केली. प्रत्युत्तरात क्राइस्ट कॉलेजने १०२ धावांची भक्कम सलामी भागीदारी करत विजयाच्या आशा पल्लवित केल्या, मात्र सिद्धांत सोलटच्या अचूक डेथ बॉलिंगमुळे सामना एमआयटी एसओसीच्या बाजूने वळला.

संक्षिप्त धावफलक :

एमईएस वाडिया, पुणे – १८ षटकांत ७ बाद ११९ (हर्षवर्धन पाटील २५ चेंडूत २९, प्रथमेश कुवर २२ चेंडूत २७, अभि जाधव* २४ चेंडूत २४; पवनप्रसाद चौलकर २/१९, अवन प्रसाद २/३०)  वि.वि. पाटकर वर्धे कॉलेज, मुंबई – १५.५ षटकांत सर्वबाद ९८ (शिवम घोष २४ चेंडूत २८, प्रथम पवार १९ चेंडूत १८; हर्षवर्धन गलांडे ३/१५, सिद्धांत अग्वान ३/२५, अभि जाधव २/१६) निकाल : एमईएस वाडिया, पुणे २१ धावांनी विजयी.

एमआयटी एसबीएसआर – १६ षटकांत ७ बाद ११० (अमित बालाजी भोयटे २३ चेंडूत २७, सिद्धांत पाटील १७; मयूर यादव १/१०, ओम अनुसे १/१) पराभूत वि. डीवायपीएटीयू – ७.३ षटकांत बिनबाद ११५ (पार्थ गणबावले* १८ चेंडूत ५१, रोहित पवार* २९ चेंडूत ५१) निकाल : डीवायपीएटीयू १० गडी राखून विजयी.

कीस्टोन स्कूल ऑफ इंजिनिअरिंग – १५.५ षटकांत सर्वबाद १०२ (निलेश ३६ चेंडूत ३६, दत्तप्रसाद तानावडे २१, मोहन कदम २१; अंकुर शर्मा ४/५) वि.वि. डीवायपीआययू – १७.३ षटकांत सर्वबाद १०२ (यश उंबरे ३० चेंडूत ३१, सुजल रायके १२ चेंडूत १८; रोहन कदम ३/५, मोहन कदम २/१३) सुपर ओव्हर : डीवायपीआययू – ३/२ पराभूत वि. कीस्टोन – ५/१ निकाल : सुपर ओव्हरमध्ये कीस्टोन स्कूल ऑफ इंजिनिअरिंग विजयी.

एमआयटी एसओसी – १६ षटकांत ९ बाद १३५ (सुजल पडवळ २७ चेंडूत ४७, रोहित शर्मा ३४ चेंडूत २९; ओवेस अन्सारी २/२०, यश जाधव २ बळी, दिनेश एच २ बळी) पराभूत वि. क्राइस्ट कॉलेज – १६ षटकांत ४ बाद १२० (शेल्डन जोसेफ ४६ चेंडूत ५६, विपुल ओसवाल ३८ चेंडूत ३७; सिद्धांत सोलट २/२४) निकाल : एमआयटी एसओसी १५ धावांनी विजयी.

पुणे,
पुणे शहरात १९ ते २३ जानेवारी २०२६ या कालावधीत आयोजित करण्यात येणाऱ्या आंतरराष्ट्रीय सायकलिंग स्पर्धा ‘पुणे ग्रँड चॅलेंज टूर २०२६’ च्या पार्श्वभूमीवर, सोमवार दि. १९ जानेवारी २०२६ रोजी शहरातील प्रमुख भागांतील शाळा, महाविद्यालये व शैक्षणिक संस्थांना सुट्टी जाहीर करण्यात आली आहे. जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष जितेंद्र डुडी यांनी यासंदर्भातील अधिकृत आदेश निर्गमित केले आहेत.
या स्पर्धेतील ‘प्रोलॉग रेस’ सोमवार, १९ जानेवारी रोजी पुणे शहरात होणार असून, त्यानिमित्त सकाळी ९.०० ते सायंकाळी ६.०० या वेळेत शहरातील प्रमुख रस्ते वाहतुकीसाठी पूर्णतः बंद ठेवण्यात येणार आहेत. यामध्ये फर्ग्युसन कॉलेज रोड (एफ.सी. रोड), गणेशखिंड रोड, जंगली महाराज रस्ता (जे.एम. रोड) तसेच या मार्गांना जोडणारे उपरस्ते यांचा समावेश आहे. रस्ते बंद राहिल्यामुळे विद्यार्थ्यांना व पालकांना मोठ्या प्रमाणावर गैरसोय होण्याची शक्यता लक्षात घेऊन खबरदारीचा उपाय म्हणून हा निर्णय घेण्यात आला आहे.
यानुसार, पुणे महानगरपालिकेच्या छत्रपती शिवाजीनगर-घोले रोड, विश्रामबागवाडा-कसबा, ढोले पाटील रोड, भवानी पेठ, औंध-बाणेर, कोथरूड-बावधन, सिंहगड रोड तसेच वारजे-कर्वेनगर या क्षेत्रीय कार्यालयांच्या हद्दीतील सर्व अंगणवाड्या, शासकीय व खासगी प्राथमिक-माध्यमिक शाळा, कनिष्ठ व वरिष्ठ महाविद्यालये तसेच व्यावसायिक शिक्षण संस्था सोमवार, १९ जानेवारी रोजी बंद राहतील.
हा सुट्टीचा आदेश केवळ सोमवार, १९ जानेवारी २०२६ या एका दिवसापुरताच लागू राहणार असून, मंगळवार दि. २० जानेवारीपासून सर्व शैक्षणिक संस्था नियमित वेळेनुसार सुरू राहतील. नागरिकांनी व पालकांनी वाहतूक व्यवस्थेतील बदल लक्षात घेऊन आपले नियोजन करावे, असे आवाहन जिल्हा प्रशासनाच्या वतीने करण्यात आले आहे.