पुणे, दि. २७: देशात निरक्षरता ही एक प्रमुख सामाजिक समस्या असून तिच्या समूळ उच्चाटनासाठी शासन, प्रशासनाच्या प्रयत्नांना सर्व समाजघटकांनी साथ द्यावी; त्या अंतर्गत ‘नवभारत साक्षरता कार्यक्रमा’त निरक्षर आणि स्वयंसेवकांनी लगतच्या शाळेकडे नोंदणी करावी, असे आवाहन शिक्षण संचालक (योजना) डॉ. महेश पालकर यांनी केले आहे.

चालू वर्षी ८ सप्टेंबर जागतिक साक्षरता दिनापासून राज्यात नवभारत साक्षरता कार्यक्रमाची प्रत्यक्ष सुरुवात झाली. परंतु विविध कारणामुळे त्यास अत्यल्प प्रतिसाद मिळाल्याने या कार्यक्रमात आघाडी घेणे महाराष्ट्राला शक्य झाले नाही. या पार्श्वभूमीवर महात्मा फुले यांच्या पुण्यतिथीनिमित्त महाराष्ट्रवासियांना शिक्षण विभागाने भावनिक आवाहन केले आहे. ही लोकचळवळ उभारुन राज्याला शंभर टक्के साक्षर करण्यासाठी संकल्प करण्याचेही आवाहन त्यांनी केले आहे.

राष्ट्रीय शैक्षणिक धोरण २०२० मधील शिफारशीनुसार व संयुक्त राष्ट्रांच्या शाश्वत विकास ध्येयांनुसार २०३० पर्यंत १०० टक्के साक्षरतेचे उद्दिष्ट प्राप्त करावयाचे आहे. महाराष्ट्रामध्ये १५ व त्या वरील वयोगटातील १ कोटी ६३ लाख निरक्षर व्यक्ती असल्याचे सन २०११ च्या जनगणनेतून निदर्शनास आले आहे.

केंद्र शासनाने राज्यांच्या मदतीने नव भारत साक्षरता कार्यक्रम एप्रिल २०२२ पासून सुरू केला आहे. यासाठी ‘उल्लास’ ॲपची निर्मिती करण्यात आली असून त्यामध्ये निरक्षर व्यक्ती, स्वयंसेवक व्यक्ती व सर्वेक्षक यांची नोंदणी करण्याची सुविधा उपलब्ध करून देण्यात आली आहे. राज्यासाठी मागील व चालू वर्षांचे एकत्रित १२ लक्ष ४० हजार उद्दिष्ट आहे.

या कार्यक्रमासाठी उद्दिष्टांनुसार निरक्षर स्वयंसेवकांची नोंदणी झालेली नाही, तसेच अध्ययन-अध्यापन वर्गही अल्पप्रमाणात सुरू झाल्याचे दिसून आले आहे. नागरिकांनी सहकार्य केल्यास अधिकाधिक निरक्षर नागरिक या अभियानाद्वारे साक्षर होऊ शकतात.

स्वातंत्र्यानंतर देशामध्ये एकूण ९ साक्षरता मोहिमा राबविण्यात आल्या. भारतात २ ऑक्टोबर १९७८ रोजी केंद्र शासनाने राष्ट्रीय प्रौढ शिक्षण कार्यक्रम घोषित केला आणि त्याची अंमलबजावणी सन १९७९ पासून सुरू झाली. पुढे सन २०११ च्या जनगणनेनुसार देशात प्रौढ निरक्षरांची संख्या २५ कोटी ७८ लाख होती. आजही देशात १८ कोटी निरक्षर व्यक्ती आहेत.

डॉ.महेश पालकर, शिक्षण संचालक (योजना), शिक्षण संचालनालय- राज्यातील नागरिकांनी कुटुंबातील असाक्षरांची नोंदणी लगतच्या शाळेकडे करावी. समाजातील शिक्षित असलेल्या घटकांपैकी जे वेळ देऊ शकतात, अशांनी लगतच्या शाळेकडे स्वयंस्फूर्तीने विनामोबदला काम करण्यासाठी स्वयंसेवक म्हणून नोंदणी करावी. असाक्षरांना शिक्षित सदस्यांनी साक्षर करण्याचा संकल्प करावा. ही मोहीम यशस्वी करण्यासाठी शिक्षित घटकांनी सहभाग द्यावा.

शेतकऱ्यांना नुकसान भरपाई मिळवून देण्यासाठी प्रयत्नशील- सहकारमंत्री

पुणे, दि.२७: सहकार मंत्री दिलीप वळसे-पाटील यांनी आंबेगाव व शिरुर तालुक्यात काल झालेल्या गारपिटीसह मुसळधार पावसामुळे नुकसानग्रस्त भागाची पाहणी करून शेतकऱ्यांना दिलासा दिला. महसूल यंत्रणेने नुकसानग्रस्त भागाचे तात्काळ पंचनामे करावेत, असे निर्देश त्यांनी दिले.

यावेळी  माजी आमदार पोपटराव गावडे, आंबेगावचे तहसीलदार संजय नागटिळक, शिरुरचे तहसीलदार बाळासाहेब म्हस्के, भीमाशंकर सहकारी कारखान्याचे अध्यक्ष बाळासाहेब बेंडे, उपाध्यक्ष प्रदीप वळसे पाटील, घोडगंगा सहकारी साखर कारखान्याचे संचालक सोपान भाकरे आदींसह शेतकरी उपस्थित होते.

श्री. वळसे-पाटील म्हणाले, आंबेगाव व शिरुर तालुक्यात काल झालेल्या गारपिटीसह मुसळधार पावसामुळे पिकांचे मोठे नुकसान झाले आहे. अडचणीत आलेल्या शेतकऱ्यांना मदत करणे आवश्यक असल्यामुळे संबंधित यंत्रणेने नुकसानग्रस्त भागांचे पंचनामे करुन जिल्हा प्रशासनाकडे सादर करावे. शेतकऱ्यांना सामुग्रह अनुदान मिळवून देण्यासाठी मंत्रिमंडळात प्रस्ताव मांडण्यात येईल. शेतकऱ्यांना अधिकाधिक नुकसान भरपाई मिळवून देण्यासाठी प्रयत्नशील राहू असे श्री. वळसे पाटील म्हणाले.

यावेळी श्री. वळसे-पाटील यांनी आंबेगाव तालुक्यातील कुरवंडी (सातगाव पठार), जारकरवाडी, धामणी, लोणी, वडगावपीर, वाळूंजनगर, रानमळा, खडकवाडी, पोंदेवाडी आणि शिरुर तालुक्यातील वडनेर,सविंदणे,कवठे येमाई, मलठण,माळवाडी,म्हसे,निमगाव दुडे व टाकळी हाजी परिसरातील होणेवाडी,साबळेवाडी, शिनगरवाडी,ऊचाळेवस्ती,डोंगरगण तामखरवाडी या नुकसानग्रस्त भागाची पाहणी केली.

कै.श्रीमती लक्ष्मीबाई दगडूशेठ हलवाई दत्तमंदिर ट्रस्ट तर्फे आयोजन 
पुणे : विविध प्रकारची मिठाई, फळे, खाद्यपदार्थ, चॉकलेट, बिस्किटे, लाडू, जिलेबी, पेढे, काजूकतली अशा सुमारे १०१ पदार्थांचा अन्नकोट दत्तमहाराजांसमोर मांडण्यात आला. बुधवार पेठेतील कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे मंदिरात त्रिपुरारी पौर्णिमेनिमित्त अन्नकोट व धार्मिक कार्यक्रमांचे आयोजन करण्यात आले. 
यावेळी ट्रस्टचे विश्वस्त, पदाधिकारी आणि कर्मचारी उपस्थित होते. मंदिरात फुलांची आकर्षक सजावट देखील करण्यात आली. त्रिपुरारी पौर्णिमेनिमित्त मंदिराच्या प्रवेशद्वारात आकर्षक रांगोळी काढण्यात आली होती़.  तसेच गाभारा फुलांच्या माळांनी सजविण्यात आला होता.
दत्तमंदिरातील अन्नकोटामध्ये ठेवण्यात आलेले पदार्थ ट्रस्टतर्फे तसेच भाविकांनी दिलेल्या पदार्थांमधून मांडण्यात आले. मंदिरातील सेवेक-यांनी अन्नकोटाची मांडणी केली. अन्नकोटासाठी मांडण्यात आलेले पदार्थ सामाजिक संस्थांना देण्यात येणार असून उर्वरित पदार्थ मंदिरामध्ये भक्तांना प्रसाद म्हणून देण्यात येणार असल्याचे ट्रस्टचे अध्यक्ष युवराज गाडवे यांनी सांगितले.

पुणे-पुण्यात अल्पवयीनमुलांमध्ये वाढणारे गुन्हेगारीचे प्रमाण चिंताजनक असून काल भरती विद्यापीठ पोलिसांनी एका १६ वर्षीय मुलाला दक्षिण पुण्यात पकडले त्याच्याकडून चोरीच्या ८ दुचाक्या आणि १२ मोबाईल हस्तगत केले . हा मुलगा सराईत बाल गुन्हेगार वर्गवारीत मोडला जातो आहे. पोलिसांनी सांगितले कि,’भारती विद्यापीठ पोलीस स्टेशन हद्दीत चोरींच्या गुन्हयांतील अज्ञात आरोपीतांचा शोध घेण्याबाबत वरीष्ठ पोलीस अधिकारी यांना तपास पथकाचे पोलीस अधिकारी व पोलीस अंमलदार यांना सुचना दिल्या होत्या. त्यानुसार भारती विद्यापीठ पोलीस स्टेशनचे तपास पथकाचे अधिकारी व अंमलदार हे भारती विद्यापीठ पोलीस स्टेशन गुन्हा रजि नंबर ७६८/२०२३, भादंवि कलम ३७९ या गुन्हयातील अज्ञात आरोपीताचा शोध घेत असताना, पोलीस अंमलदार, मितेश चोरमोले, अभिनय चौधरी, अवधुत जमदाडे, आशिष गायकवाड यांना सदरचा गुन्हा हा रेकॉर्डवरील विधीसंघर्षीत बालकाने केला असल्याची बातमी मिळाली. त्याअनुशंगाने भारती विद्यापीठ पोलीस स्टेशनचे तपास पथकाचे पोलीस अधिकारी व पोलीस अंमलदार सदर बालकाचा शोध घेत असताना, तो कात्रज कोंढवा रोड, गोकुळनगर, गल्ली नं.४, पुणे येथे दुचाकी गाडी क्रमांक एम.एच.१२./एन.क्यु./४६७६ व १२ मोबाईल फोनसह मिळुन आल्याने त्याचेकडे त्याबाबत तपास करता, त्याने दुचाकी गाडी व मोबाईल फोन हे चोरी केल्याची कबुली दिल्याने ते जप्त केले आहेत.
सदर विधीसंघर्षीत बालकाकडे अधिक तपास करता, त्याने पुणे शहर व आजुबाजुच्या भागातुन आणखीन दुचाकी गाड्या चोरी केल्याची कबुली दिल्याने त्याने सांगितल्या ठिकाणाहुन एकुण ०८ दुचाकी गाड्या जप्त केल्या आहेत. वरीलप्रमाणे त्याचेकडुन एकुण ०८ दुचाकी वाहने व १२ मोबाईल फोन असा एकुण ४,१५,०००/- रुपये किचा ऐवज जप्त केला असुन, भारती विद्यापीठ पोलीस स्टेशनकडील एकुण ०४ गुन्हे उघडकीस आणण्यात यश आले आहे.
सदरची कामगिरीअपर पोलीस आयुक्त, पश्चिम प्रादेशीक विभाग, पुणे, प्रविणकुमार पाटील,पोलीस उप आयुक्त परिमंडळ ०२, श्रीमती स्मार्तना पाटील, सहाय्यक पोलीस आयुक्त स्वारगेट विभाग, पुणे, नारायण शिरगावकर यांचे मार्गदर्शनाखाली भारती विदयापीठ पोलीस स्टेशनकडील वरिष्ठ पोलीस निरीक्षक, विनायक गायकवाड, पोलीस निरीक्षक, (गुन्हे), विजय पुराणिक, गिरीश दिघावकर, सहा. पोलीस निरीक्षक, अमोल रसाळ, पोलीस उपनिरीक्षक, धिरज गुप्ता, पोलीस अंमलदार, मितेश चोरमोले, अवधतु जमदाडे, आशिष गायकवाड, अभिनय चौधरी, सचिन सरपाले, शैलेश साठे, चेतन गोरे, महेश बारावकर, मंगेश पवार, निलेश ढमढेरे, हर्षल शिंदे, अभिजीत जाधव, निलेश खैरमोडे, धनाजी धोत्रे, सचिन गाडे, राहुल तांबे, विक्रम सावंत यांच्या पथकाने केली आहे.

पुणे- चतुःश्रृंगी पोलिसांच्या हद्दीतील बंगला नं.६२, मिथीला बंगला, अशोकनगर, रेंजहिल रोड, भोसलेनगर, पुणे येथे दिनांक २५/११/२०२३ रोजी रात्री १०/३० वा. ते दि.२६/११/२०२३ दुपारी १२/०० वा.चे दरम्यान साडेबत्तीस लाखाची घरफोडी झाली आहे. या संदर्भात येथील ५२ वर्षे वयाच्या रहिवाश्याने फिर्याद नोंदविली असून चतुःश्रृंगी पोलिसांनी त्यानुसार गुन्हा दाखल केला आहे.
यातील फिर्यादी यांचा राहता बंगला कुलुप लावुन बंद असताना, कोणीतरी अज्ञात इसमाने त्यांचे राहते बंगल्याच्या कीचनच्या खिडकीचे स्लायडींग कशाचे तरी सहाय्याने उघडुन, त्यावाटे आंत प्रवेश करून, दुस-या मजल्यावरील बेडरूम मधील वॉर्डरोब उचकटुन, दोन लॉकर मधील कपाटातील ९,००,०००/- रू रोख रक्कम डायमंड व सोन्या-चांदीचे दागिने असा एकुण ३२,५०,०००/- रूपये किमतीचा ऐवज घरफोडी चोरी करून नेला. सहायक पोलीस निरीक्षक, नरेंद्र पाटील ९०११७१९१०० याप्रकरणी पुढील तपास करत आहेत .

पुणे -येथे घरफोडी व जबरी चोरी करणारे परप्रांतीय सुंदरसिंग भायानसिंग भुरीया (टोळी प्रमुख) व त्यांचे इतर ०३ साथीदार यांचेवर मकोका अंतर्गत कारवाई करण्यात आली आहे . या संदर्भात पोलिसांनी सांगितले कि,’दि.०६/१०/२०२३ रोजी आयोध्यानगरी, भाऊ पाटील रोड, बोपोडी, पुणे येथे फिर्यादी हे सिक्युरिटी गार्ड म्हणुन काम करीत असताना, यातील नमुद इसम१) सुंदरसिंग भयान सिंग भुरीया, वय-२५ वर्षे, रा. ग्राम पिपराणी, थाना तांडा, तहसिल कुक्षी, जि. धारा, मध्य प्रदेश (टोळी प्रमुख) २) मुकेश ग्यानसिंग भुरीया, वय-२७ वर्षे, रा. ग्राम पिपराणी, थाना तांडा तहसिल कुक्षी, जि. धारा, मध्य प्रदेश ३) सुनिल कमलसिंग आलावा, वय-२८ वर्षे, रा. ग्राम २२ वर्षे, रा. गांव तहसिल कुक्षी, थाना बागमेर, जि. धारा, मध्य प्रदेश राज्य ४) हरसिंग वालसिंग ओसनिया, वय-२२ वर्षे, रा. गांव तहसिल कुक्षी, थाना बागमेर, जि. धारा मध्य प्रदेश (टोळी सदस्य) यांनी संगनमत करुन, फिर्यादी यांना धक्का-बुक्की करुन जबरदस्तीने फिर्यादी यांचेकडील २१००/- रुपये रोख रक्कम चोरी करुन घेवुन गेले. त्याबाबत फिर्यादी यांनी खडकी पोलीस स्टेशन येथे फिर्याद दिल्याने खडकी पोलीस स्टेशन गुन्हा रजि नं. ३७४/२०२३ भा.द.वि. कलम ३९२,३४ अन्वये गुन्हा दाखल करण्यात आला आहे.
दाखल गुन्ह्याचे तपासा दरम्यान अटक करण्यात आली आहे. सुंदरसिंग भयानसिंग भुरीया आणि त्याच्या साथीदारांची पुर्व रेकॉर्ड पाहणी करता त्याने चोरी करणे, घरफोडी करणे व जबरी चोरी करणे असे गंभीर गुन्हे केलेले असुन, त्याने संघटित गुन्हेगारी टोळी तयार केली असुन बेकायदेशीर मार्गाने स्वतःसाठी किंवा अन्य कोणत्याही व्यक्तीसाठी गैरवाजवी आर्थिक फायदा व इतर फायदा मिळविण्याच्या उद्देशाने संघटीत गुन्हेगारी संघटनेचा सदस्य म्हणुन किंवा संघटनेच्या वतीने एकट्याने किंवा संयुक्तपणे हिसांचाराचा वापर करुन किंवा हिंसाचार करण्याची धमकी देवुन किंवा धाकदपटशा दाखवुन किंवा जुलुम जबरदस्ती करुन किंवा अन्य अवैद्य मार्गाने आपले बेकायदेशीर कृत्य चालु ठेवुन संघटना किंवा टोळी म्हणुन संयुक्तपणे गुन्हेगारी कृत्य करणारा गट तयार केला असुन त्याचेवर वेळोवेळी प्रतिबंधात्मक कारवाई करुन देखील त्याचे वर्तनात सुधारणा होत नसलेने त्यांनी पुन्हा-पुन्हा गंभीर स्वरूपाचे गुन्हे केलेले आहेत.दाखल गुन्ह्याचे तपासामध्ये आरोपीनी संघटीतरित्या सदरचा गुन्हा केल्याचे निदर्शनास आल्याने प्रस्तुत गुन्ह्यास महाराष्ट्र संघटीत गुन्हेगारी नियंत्रण कायदा सन १९९९ चे कलम ३ (१) (ii) ३(२), ३ (४) चा अंतर्भाव करणे कामी खडकी पोलीस ठाणेचे वरिष्ठ पोलीस निरीक्षक,राजेंद्र सहाणे यांनी पोलीस उप- आयुक्त, परि-४, पुणे शहर, शशिकांत बोराटे यांचे मार्फतीने अपर पोलीस आयुक्त, पूर्व प्रदेशिक विभाग, पुणे रंजनकुमार शर्मा यांना प्रस्ताव सादर केला होता.

सदर प्रकरणाची छाननी करुन खडकी पोलीस स्टेशन येथे गु.नं. ३७४/२०२३ भा.द.वि. कलम ३९२, ३४ अन्वये दाखल असलेल्या गुन्ह्यामध्ये महाराष्ट्र संघटित गुन्हेगारी नियंत्रण कायदा सन १९९९ चे कलम ३(१) (ii)३ (२), ३ (४) प्रमाणेचा अंतर्भाव करण्याची अपर पोलीस आयुक्त पूर्व प्रादेशिक विभाग, पुणे रंजनकुमार शर्मा यांनी मान्यता दिलेली आहे.
सदर गुन्हयाचा पुढील तपास सहा. पोलीस आयुक्त, खडकी विभाग, पुणे शहर, श्रीमती. आरती बनसोडे ह्या करीत आहेत
सदरची कामगिरी पोलीस आयुक्त, पुणे शहर, रितेश कुमार, तत्कालीन पोलीस सह आयुक्त संदिप कर्णिक, अपर पोलीस आयुक्त, पूर्व प्रादेशिक विभाग, रंजनकुमार शर्मा, पोलीस उप आयुक्त, परिमंडळ ४, शशिकांत बोराटे, सहा. पोलीस आयुक्त, खडकी विभाग, पुणे, श्रीमती आरती बनसोडे यांचे मार्गदर्शनाखाली खडकी पोलीस स्टेशनचे वरिष्ठ पोलीस निरीक्षक, श्री. राजेंद्र सहाणे, पोलीस निरीक्षक (गुन्हे), श्री.मानसिंग पाटील, पोलीस उप-निरीक्षक, वैभव मगदुम, संतोष भांडवलकर, सर्वेलन्स पथकाचे पोलीस अंमलदार, रमेश जाधव, महिला पोलीस अमंलदार, किरण मिरकुटे व स्वाती म्हस्के यांनी केली आहे.
पोलीस आयुक्त, पुणे शहर, रितेश कुमार यांनी पुणे शहर पोलीस आयुक्तालयाचा कार्यभार स्विकारल्यानंतर गुन्हेगारी नियंत्रणावर बारकाईने लक्ष देवून शरीराविरुध्द व मालमत्तेविरुध्द गुन्हे करणारे व समाजामध्ये दहशत निर्माण करणारे सराईत गुन्हेगार यांचे हालचालीवर बारकाईने लक्ष ठेवून गुन्हेगारीचे समूळ उच्चाटन होईल यावर भर देण्याबाबत सर्व पोलीस अधिकारी व अंमलदार यांना निर्देश दिले आहेत. त्यांचे मार्गदर्शनाखाली मकोका अंतर्गत केलेली ही ९० वी कारवाई आहे.

पुण्यातही या शुगर डॅडीचा ट्रेंड वाढत आहे.
पुणे हे शिक्षणाचे आणि रोजगाराचे हब आहे. येथे मोठ्या प्रमाणात तरुणी शिक्षणसाठी येतात. यामध्ये त्या शुगर डॅडीचा अशा रिलेशनशिपमध्ये, शुगर बेबी बहुतेकदा अशा मुली असतात ज्यांना पैसा किंवा विलासी जीवन आवडते. पुण्यातील ज्येष्ठाना त्या जाळ्यात ओढू पाहत आहेत. त्यासाठी ज्येष्ठानी आणि घरातल्या सदस्यांनी सावध राहावे.

पुणे: शिक्षणासाठी पुण्यात आलेली पंचवीस वर्षीय करिना पुण्यातील एका उच्चभ्रू ज्येष्ठ जोडप्यांच्या घरात ‘पेयिंग गेस्ट’ म्हणून राहत होती. या ज्येष्ठ दांपत्याची मुले परदेशात सेटल झालेली. परंतु, करीना घरभाडे देत होती ना तिचा वैयक्तिक कुठला खर्च स्वतःच्या पैशातून करत होती. हा खर्च तिचा घरमालक असलेला 75 वर्षीय ज्येष्ठ (प्रियकर) करत होता. थोडक्यात दोघे रिलेशन मध्ये होते. याची कुणकुण लागताच पुरावे गोळा करण्यासाठी त्या ज्येष्ठाच्या पत्नीने स्विफ्ट डिटेक्टिव्ह एजन्सीची मदत घेतली आणि सत्य समोर आले. प्रकरण पोलिसांत जाणार होते पण आपलीच इज्जत जाईल म्हणून घरातील सदस्यांनी या प्रकरणावर पडदा टाकला. पुण्यातील ही एक सत्य घटना असून हा सर्व प्रकार दुसरे तिसरे काही नसून ‘शुगर डॅडी’ हा आहे.

‘शुगर डॅडी’ म्हणजे आपली हौस – मौज (आर्थिक, शारीरिक) भूक भागवण्यासाठी ज्येष्ठ व्यक्तीच्या सोबत डेटिंग, शरीरसंबंध ठेवणाऱ्या तरुणी या जेष्ठांना शुगर डॅडी म्हणतात. आर्थिक मोबदला देऊन तरुणींकडून आपली भावनिक व शारीरिक गरज भागवनारे ज्येष्ठ नागरिक असतात. तसेच अशा तरुणींना शुगर बेबी असे म्हटले जाते. हे नाते ठराविक काळासाठी असते. ही संकल्पना खरी पाश्चात्य देशांमध्ये आहे. पण, सध्याच्या बदलत्या काळात, बदलत्या नातेसंबंधात ही संकल्पना पुण्यासारख्या शहरातही मूळ धरू पाहत आहे. परंतु यामध्ये शिक्षण किंवा कामाच्या निमित्ताने पुण्यात येणाऱ्या तरुणी अशा शुगर डॅडीच्या शोधात असून त्यांना जाळ्यात ओढू पाहत आहेत.

पुण्यातील स्विफ्ट डिटेक्टिव्ह एजन्सीकडे अशा शुगर डॅडींची माहिती काढण्यासाठी घरातील ज्येष्ठ महिला येत आहेत. काहींमध्ये तर या तरुणीचा उद्देश हा ज्येष्ठाना जाळ्यात ओढून त्यांची आर्थिक फसवणूक तसेच त्यांची प्रॉपर्टी देखील हडपण्याचा डाव असल्याची माहिती स्विफ्ट डिटेक्टिव्ह एजन्सीच्या संचालिका प्रिया काकडे यांनी दिली. यावरून हा प्रकार किती गंभीर आहे याची माहिती कळते.

पुण्यात अशा श्रीमंत, सधन ज्येष्ठ जोडप्यांची संख्या मोठ्या प्रमाणात आहे. बहुतेक जोडप्यांची मुले परदेशांत सेटल झाली आहेत. ही ज्येष्ठ जोडपे देखील नोकरीतून निवृत्त झालेली असतात. त्यांचे हक्काचे घर किंवा बंगला असतो. तसेच त्यांची अनेक घरे असतात. मग, अशा ज्येष्ठाच्या शिक्षण किंवा कामाच्या निमित्ताने पुण्यात आलेल्या तरुणी शुगर बेबी बनतात. गडगंज संपत्ती पाहून अशा ज्येष्ठाना प्रेमाच्या जाळ्यात ओढले जाते. यामागे त्यांचा हेतू हा पैसे काढण्याबरोबरच त्यांची संपत्ती हडप करण्याचाही असतो.

यामध्ये त्या त्यांच्यापेक्षा अनेक वर्षांनी मोठ्या पुरुषांसोबत (शुगर डॅडी) डेटवर जातात. त्या बदल्यात त्यांच्याकडून पैसे आणि विविध सुविधा घेतल्या जातात. ते त्यांच्या शुगर डॅडीसह इतर देशांच्या सहलीला देखील जातात, महागड्या भेटवस्तू मिळवतात, सुट्टीवर जातात आणि शारीरिक संबंध देखील ठेवतात.

या प्रकारचे नाते का तयार होते?
हे बहुतेक ते लोक असतात ज्यांचे वैयक्तिक जीवन एकाकी असते. शुगर डॅडी किंवा शुगर बेबी शोधण्यासाठी एक विशेष वेबसाइट आहे जी 2023 पासून अधिक लोकप्रिय होत आहे. अशा डेटिंग साइटला शुगर डॅडी साइट म्हणतात. अनेकदा या प्रकारच्या नातेसंबंधात, दोन्ही भागीदार त्यांच्या गरजेनुसार नाते तयार करतात, जे पारंपारिक डेटिंगपेक्षा पूर्णपणे वेगळे असते.

बनू पाहतोय व्यवसाय
अनेकदा अशे नाते जास्त काळ टिकत नाही. कधी कधी चांगल्या शुगर डॅडीच्या शोधात शुगर बेबी पहिल्याला सोडून दुसऱ्याकडे जाते. याचा अर्थ हा संबंध एखाद्या व्यवसायाप्रमाणे केला जातो, जो अल्पकालीन असतो ज्यामध्ये नेहमी चांगल्या संधी आणि नातेसंबंधांचा शोध असतो.

(अधिक माहितीसाठी संपर्क – प्रिया काकडे 78418 77478)