पुणे: १३५ वर्षांचा ऐतिहासिक वारसा लाभलेली महात्मा फुले मंडई पुण्याचा मानबिंदू आहे. येथील व्यापाऱ्यांना भेडसावणाऱ्या विद्युत दिवे आणि स्वच्छतेच्या समस्या तातडीने मार्गी लावण्यात येतील. येथील विद्युत दिव्यांच्या समस्या येत्या दोन दिवसात सोडविली जाईल, असे आश्वासन प्रभाग २५ चे नवनिर्वाचित नगरसेवक मा. राघवेंद्र बाप्पू मानकर यांनी दिले. महात्मा फुले मंडई येथील व्यापाऱ्यांच्या समस्या जाणून घेण्यासाठी सायंकाळी आयोजित करण्यात आलेल्या आढावा दौऱ्यात ते बोलत होते.

यावेळी व्यापाऱ्यांनी सांगितले की, मंडईतील जुने झालेले विद्युत दिवे आणि अपुऱ्या प्रकाशव्यवस्थेमुळे व्यापारी तसेच खरेदीसाठी येणाऱ्या नागरिकांच्या सुरक्षेचा प्रश्न निर्माण होत आहे. तसेच स्वच्छतेच्या समस्येबाबतही व्यापाऱ्यांनी गारऱ्हाणे मांडले. यावर बोलताना राघवेंद्र बाप्पू मानकर म्हणाले की, “व्यापाऱ्यांच्या आणि नागरिकांच्या सुरक्षेच्या दृष्टीने प्रकाशव्यवस्थेचा प्रश्न अत्यंत महत्त्वाचा आहे. त्यामुळे तातडीने हे दिवे बदलण्याचे काम येतोय दोन दिवसात पूर्ण केले जाईल. तसेच मंडईच्या स्वच्छतेसाठी प्रशासनासोबत यंत्रणा कार्यरत करून कचरा साठणार नाही याची काळजी घेतली जाईल, असे बाप्पू मानकर यांनी सांगितले.

• मुख्यमंत्री देवेंद्र फडणवीस यांचे गौरवोद्गार; सामंजस्य करारानंतर वर्षभरात उद्योग उभारणीचे दावोस येथे कौतुक

दावोस (स्वित्झर्लंड): “जागतिक आर्थिक परिषदेत (वर्ल्ड इकॉनॉमिक फोरम) गेल्या वर्षी करण्यात आलेल्या ५०० कोटी रुपयांच्या सामंजस्य कराराची ‘अ‍ॅल्युमिनियम मॅन ऑफ इंडिया’ म्हणून ओळखले जाणारे उद्योजक भरत गीते यांनी अवघ्या एका वर्षात यशस्वी अंमलबजावणी करून प्रत्यक्ष उत्पादन सुरू केले आहे. वर्षभरात उद्योग उभारणी करणाऱ्या गीते यांच्यासारख्या मराठी उद्योजकांचा मला अभिमान वाटतो,” असे गौरवोद्गार मुख्यमंत्री देवेंद्र फडणवीस यांनी काढले.

दावोस येथे सुरु असलेल्या जागतिक आर्थिक परिषदेत देवेंद्र फडणवीस आणि भरत गीते यांच्यातील संवादावेळी ते बोलत होते. या भेटीदरम्यान उद्योग उभारणीतील नियोजन, वेगवान अंमलबजावणी, प्रशासन आणि उद्योजकांमधील समन्वय तसेच उत्पादन क्षेत्राचे अर्थव्यवस्थेतील वाढते महत्त्व यावर सविस्तर चर्चा झाली. ‘आत्मनिर्भर भारत’, ‘मेक इन इंडिया’ आणि ‘व्होकल फॉर लोकल’ या केंद्र सरकारच्या उपक्रमांना बळ देणाऱ्या या उपक्रमांतून कमी कालावधीत उद्योग उभारणी शक्य असल्याचा प्रेरणादायी संदेश देशभरातील उद्योजकांना मिळाला आहे.

देवेंद्र फडणवीस म्हणाले, “अहिल्यानगर जिल्ह्यातील सुपा एमआयडीसी येथे उभारण्यात आलेल्या ‘तौरल इंडिया’च्या अत्याधुनिक अ‍ॅल्युमिनियम कास्टिंग्ज उत्पादन प्रकल्पाने अल्पावधीतच उत्पादन सुरू करत राज्यासमोर आदर्श औद्योगिक मॉडेल उभे केले आहे. या प्रकल्पामुळे परिसरातील स्थानिक तरुणांना रोजगाराच्या संधी उपलब्ध झाल्या असून, स्थानिक औद्योगिक विकासाला मोठी चालना मिळाली आहे.”

“सामंजस्य करार कागदापुरता न राहता एका वर्षात प्रत्यक्ष उत्पादनात रूपांतरित होऊ शकतो, याचे भरत गीते आणि तौरल इंडिया हे उत्तम उदाहरण आहे. मराठी उद्योजकांमध्ये जागतिक स्तरावर स्पर्धा करण्याची क्षमता आहे. त्यांना योग्य धोरणात्मक पाठबळ दिल्यास महाराष्ट्र उद्योग क्षेत्रात नवे शिखर गाठेल,” असा विश्वासही मुख्यमंत्री फडणवीस यांनी व्यक्त केला.

भरत गीते म्हणाले, “तौरल इंडियाने २०१६ पासून औद्योगिक विस्तार करत ऊर्जा क्षेत्र, संरक्षण उत्पादन, आरोग्य उपकरणे तसेच एरोस्पेस क्षेत्रासाठी आवश्यक अचूक अ‍ॅल्युमिनियम कास्टिंग्ज निर्मितीत भरीव योगदान दिले आहे. विविध क्षेत्रांतील या योगदानामुळे राज्याच्या औद्योगिक प्रगतीला बळ मिळत असून, आर्थिक वाढीस हातभार लागत आहे.

“उत्पादन क्षेत्र हे मजबूत अर्थव्यवस्थेचा कणा असून, वाहन उद्योग, अभियांत्रिकी, पायाभूत सुविधा, इलेक्ट्रॉनिक्स, इलेक्ट्रिक मोबिलिटी, संरक्षणपूरक उद्योग, कृषी प्रक्रिया आणि उच्च-मूल्य निर्यातक्षम उत्पादन क्षेत्र मजबूत झाल्यास राज्याचा औद्योगिक पाया अधिक भक्कम होईल,” असा विश्वास गीते यांनी व्यक्त केला.

अमनोरा कप जिल्हा मानांकन बॅडमिंटन स्पर्धा : पीवायसी आणि हवेली तालुका बॅडमिंटन संघटनेच्या वतीने आयोजन

पुणे: अनन्या गाडगीळ, जुई जाधव, ओजस जोशी यांनी पीवायसी-एचटीबीए १६व्या अमनोरा कप जिल्हा मानांकन सुपर-५०० बॅडमिंटन स्पर्धेत आपापल्या गटाचे विजेतेपद पटकावले.

पीवायसी आणि हवेली तालुका बॅडमिंटन संघटनेच्या वतीने आयोजित ही स्पर्धा पीवायसी हिंदू जिमखान्याच्या बॅटमिंटन कोर्टवर ही स्पर्धा झाली. या स्पर्धेत महिला एकेरीच्या अंतिम फेरीत अनन्या गाडगीळने एस. डाखणेवर १५-७, १५-३ अशी सहज मात केली आणि जेतेपद पटकावले. यानंतर १९ वर्षांखालील मुलींच्या अंतिम फेरीत दुस-या मानांकित जुई जाधवने अग्रमानांकित नाव्या रांकाला १५-८, ६-१५, १५-१३ असा पराभवाचा धक्का दिला आणि जेतेपद पटकावले. स्पर्धेतील ११ वर्षांखालील मुलींच्या अंतिम फेरीत केयारा साखरेने आपल्या लौकिकाला साजेसा खेळ केला. तिने चौथ्या मानांकित काश्वीसिंहला १५-९, १५-१० असे सहज पराभूत केले.

स्पर्धेतील १७ वर्षांखालील मुलांच्या एकेरीत अभिज्ञान सिंघाने बाजी मारली. त्याने अंतिम फेरीत माधव कामतला ७-१५, १५-५, १५-५ असे नमविले. १३ वर्षांखालील मुलांच्या गटात अद्वैत फेरेने विजेतेपद पटकावले. त्याने अग्रमानांकित अर्चित खान्देशेला १७-१५, १५-१३ असा पराभवाचा धक्का दिला. त्यामुळे अर्चितचे दुहेरी यशही हुकले. स्पर्धेतील १५ वर्षांखालील मुलांच्या गटात अर्जुन श्रीगडीवारने विजेतेपद पटकावले. त्याने अंतिम फेरीत अग्रमानांकित हृदान पाडवेला १५-१२, १५-१० असे नमविले आणि जेतेपद निश्चित केले. १९ वर्षांखालील मुलांच्या गटात ओजस जोशीने विजेतेपद पटकावले. त्याने अंतिम फेरीत अग्रमानांकित सार्थक पाटणकरचे आव्हान १५-१२, १५-९ असे परतवून लावले.

स्पर्धेचे पारितोषिक वितरण हवेली तालुका बॅडमिंटन संघटनेचे अध्यक्ष अविनाश जाधव, सचिव उदय साने, सिटी कॉर्पोरेशनचे व्यवस्थापकिय संचालक अनिरुद्ध देशपांडे, कॉर्पोरेट अॅथलिट्सचे संस्थापक आणि स्पर्धेचे संयोजन सचिव अभिजीत चांदगुडे आणि पीवायी हिंदू जिमखान्याचे सचिव सारंग लागू यांच्या प्रमुख उपस्थितीत झाले.

निकाल – अंतिम फेरी – १७ वर्षांखालील मुले दुहेरी – दिव्यान कौशिक-रेहान सय्यद वि. वि. अवनीश-अयांश यारागट्टी १५-१०, १५-११,

१३ वर्षांखालील मिश्र दुहेरी – परस्मय राणे-ऋत्वा पांडे वि. वि. हिमांश हरगुणानी-अनिशा पिंगे १५-१२, १५-९, १५-१३.

१३ वर्षांखालील मुली दुहेरी – अनिशा पिंगे-ऋत्वा पांडे वि. वि. पूर्वा हांडे – तेजस्वी १६-१४, १५-१२.

४० वर्षांवरील गट – हर्षद भागवत वि. वि. आदित्य काळे १५-५, १५-५.

महिला दुहेरी – अदिती काळे – योगिता साळवे वि. वि. अर्पिता अर्डेय-ज्योती रावत १५-१०, १५-८.

३० वर्षांवरील पुरुष एकेरी – अजय कैठ वि. वि. गुरुप्रसाद राऊत १५-६, १५-११.

एडवर्ड पार्क (अध्यक्ष, कमिसार पॅनेल – UCI) यांनी बजाज पुणे ग्रँड टूर संदर्भात दिलेले अधिकृत पत्रक:
​अधिकृत निवेदन

​”सायकलस्वारांच्या मुख्य घोळक्यामध्ये (Peloton) एक अपघात झाला. मोठ्या संख्येने सायकलस्वार एकत्र असताना, शर्यतीचे बदलते स्वरूप, मोठे आव्हान आणि वेगवान वातावरण यामुळे रोड सायकलिंग शर्यतींमध्ये अशा घटना घडणे सामान्य आहे.
​ठरलेल्या नियमावलीनुसार (Protocol), शर्यत २३ मिनिटांसाठी थांबवण्यात (Neutralize) आली होती. या घटनेत अडकलेल्या खेळाडूंना ताफ्यातील वैद्यकीय पथकाद्वारे तातडीने प्रथमोपचार देण्यात आले आणि त्यांना त्यांच्या सायकली बदलण्याची परवानगी देण्यात आली.
​या अपघातात कोणालाही गंभीर दुखापत झालेली नाही आणि कोणालाही रुग्णालयात दाखल करण्याची गरज भासली नाही.
​शर्यत अधिकाऱ्यांनी ही परिस्थिती अत्यंत व्यावसायिक पद्धतीने हाताळली. जास्तीत जास्त सायकलस्वार पुन्हा रस्त्यावर उतरून शर्यत पूर्ण करू शकले, यावरूनच ही परिस्थिती किती वेगाने आणि कार्यक्षमतेने हाताळली गेली हे स्पष्ट होते.
​केवळ मलेशिया राष्ट्रीय संघाचा सायकलस्वार क्रमांक १६१, अब्दुल हलिल मोहम्मद इझत हा शर्यत पूर्ण करू शकला नाही. मात्र, सायकलस्वार क्रमांक १९१ एन्झो फुएन्टेस कॅपरोली आणि क्रमांक १९५ मार्टी रियारा कॅसानोव्हा (दोघेही प्रो सायकलिंग स्टॅट्स संघाचे) यांनी सायकल बदलल्यानंतर आपली शर्यत यशस्वीरित्या पूर्ण केली.”

सामाजिक कार्यकर्ते डॉ.राजेंद्र धामणे व डॉ.सुचेता धामणे मानकरी 

पुणे : वसंतपंचमीच्या दिवशी सन १९५२ साली स्थापन झालेल्या पुणे पीपल्स को-आॅप बँक लि., पुणे अमृतमहोत्सवी वर्षात (७५) पदार्पण करीत आहे. त्यानिमित्त शुक्रवार, दि. २३ जानेवारी रोजी दुपारी ४ वाजता गणेश कला क्रीडा रंगमंच येथे विषेश कार्यक्रमाचे आयोजन करण्यात आले असून अमृतमहोत्सवानिमित्त बोधचिन्ह अनावरण आणि पुणे पीपल्स पुरस्कार प्रदान सोहळा होणार आहे, अशी माहिती बँकेचे अध्यक्ष श्रीधर गायकवाड यांनी पत्रकार परिषदेत दिली.

पत्रकार परिषदेला बॅकेचे उपाध्यक्ष बिपीनकुमार शहा, व्यवस्थापकीय समिती अध्यक्ष अ‍ॅड.सुभाष मोहिते, संचालक सीए जनार्दन रणदिवे, बबनराव भेगडे, सुभाष नडे, डॉ. रमेश सोनवणे, सुभाष गांधी, मिलिंद वाणी, वैशाली छाजेड, निशा करपे, संजीव असवले, डॉ.विश्वनाथ जाधव, स्वीकृत तज्ञ संचालिका श्वेता ढमाळ, मुख्य कार्यकारी अधिकारी संजय भोंडवे, व्यवस्थापकीय मंडळ सदस्य सीए अजिंक्य रणदिवे, कौस्तुभ भेगडे, उदय जग्ताप, राजेंद्र गांगर्डे, अरुण डहाके आदी उपस्थित होते.

कार्यक्रमात अमृत महोत्सवाच्या बोधचिन्हाचे अनावरण मान्यवरांच्या हस्ते होणार असून मनोरुग्ण महिलांसाठी अजोड कार्य करणा-या माऊली सेवा प्रतिष्ठान, अहिल्यानगरचे संस्थापक डॉ.राजेंद्र धामणे व डॉ.सुचेता धामणे यांना पुणे पीपल्स पुरस्काराने सन्मानित करण्यात येणार आहे. रुपले १ लाख १ हजाराचा धनादेश, सन्मानपत्र, सन्मानचिन्ह असे पुरस्काराचे स्वरुप आहे. राज्याचे सहकार आयुक्त व सहकारी संस्था निबंधक दीपक तावरे आणि सावित्रीबाई फुले पुणे विद्यापीठाचे प्र-कुलगुरु डॉ.पराग काळकर यांची प्रमुख उपस्थिती असणार आहे.

व्यवस्थापकीय समिती अध्यक्ष अ‍ॅड.सुभाष मोहिते म्हणाले, छोटे उद्योजक, छोटे व्यापारी व ठेवीदार यांना हक्काचे ठिकाणे वाटावे, आधार वाटावा, याकरीता ३१ जानेवारी १९५२, वसंत पंचमी च्या दिवशी पुणे पीपल्स बँकेची स्थापना झाली. ही केवळ बँक न राहता समाजसेवेचे व्रत व्हावे, जनसामान्यांचा तो एक विश्वस्त न्यास असावा या भूमिकेतून बँक सुरु झाली. तसेच आज अखंड ७४ वर्षे व्रतस्थपणे खातेदारांच्या सेवेत कार्यरत आहे. यंदा अमृतमहोत्सवी वर्षात पदार्पण करताना उपस्थितांसाठी खास मनोरंजनपर संकर्षण व्हाया स्पृहा या विशेष कार्यक्रमाचे देखील आयोजन करण्यात आले आहे.  आजपर्यंत स्वत:च्या मालकीचे बँकेचे मुख्य कार्यालय नव्हते, आता या संचालक मंडळाच्या प्रयत्नातून अमृतमहोत्सवी वर्षात स्वत:च्या मालकीच्या वास्तूत मुख्य कार्यालय स्थलांतरीत होणार आहे. हे मुख्य कार्यालय तब्बल २६ हजार चौरस फूटांच्या वास्तूत असणार आहे.

बँकेचे अध्यक्ष श्रीधर गायकवाड म्हणाले, संचालक मंडळाच्या नेतृत्वाखाली गेल्या १७ वर्षात एकूण व्यवसाय ४०० कोटीवरुन रु.२७५० कोटी इतकी प्रगती केली आहे. ०% एनपीए, सभासदांना १२ ते १५ टक्के दराने लाभांश ही बँकेची वैशिष्टे आहेत. यंदा बँक अमृत महोत्सवी वर्षात पदार्पण करीत आहे. तज्ञ संचालक सदस्यांच्या मार्गदर्शनाने व निष्ठावंत अधिकारी- सेवकांच्या सहकार्य बँक आर्थिक दृष्टया अधिक सक्षम करण्यासाठी आम्ही प्रयत्न करीत आहोत. मार्च २०२६ अखेर किमान ५०० कोटी व्यवसाय वाढीचे उद्दिष्ट ठेवण्यात आले आहे तर आगामी २/३ वर्षात बँकेचा एकूण व्यवसाय रु.५००० कोटी करण्याचा संकल्प आहे. लवकरच बँकेला डायरेक्ट मेंबरशीप व शेडयुल्ड दर्जा मिळविण्यात आम्ही यशस्वी होऊ, असेही त्यांनी सांगितले.

ग्रामदैवत श्री कसबा गणपती मंदिर देवस्थान ; शेकडो वर्षांची परंपरा आजही अव्याहतपणे सुरू

पुणे : चिंचवड मधून श्री मोरया गोसावी पालखीचे प्रस्थान झाल्यानंतर पालखी सोहळा पुण्याचे ग्रामदैवत श्री कसबा गणपती मंदिरात माघ शुद्ध प्रतिपदेला श्री जयति गजाननाच्या दर्शनासाठी थांबण्याची गेल्या शेकडो वर्षांची परंपरा आहे. श्रीमन्महासाधू मोरया गोसावी पालखी सोहळा यावर्षी देखील ग्रामदैवत श्री कसबा गणपती मंदिरात विसावला.

प्रथेनुसार ग्रामदैवत श्री कसबा गणपती मंदिराचे सांप्रत ठकार, महिला, वहिवाटदार, पुजारी पालखीचे औक्षण करतात. त्यानुसार यंदा सांप्रत ठकार पुजारी, पल्लवी आल्हाद ठकार यांनी पालखीचे औक्षण केले. शेकडो वर्षांची ही परंपर आजही अव्याहतपणे चालू आहे.

यावेळी मंदिराचे प्रमुख विश्वस्त  विनायक बाजीराव ठकार, विश्वस्त स्वानंद ठकार, आशापूरक ठकार, मंदिराच्या विश्वस्त  संगीता ठकार, मधुरा ठकार, सीमा ठकार, सुधा ठकार, गायत्री ठकार उपस्थित होत्या. चिंचवड देवस्थानचे प्रमुख विश्वस्त मंदार महाराज देव यांनी ग्रामदैवत श्री कसबा गणपती चे  दर्शन घेतल्यानंतर सध्याचे पुजारी वहिवाटदार आल्हाद ठकार यांनी मंदार महाराज देव यांचे शाल, श्रीफळ देऊन स्वागत केले. मंदिरात मंदार महाराज देव यांचे औक्षण पल्लवी आल्हाद ठकार यांनी केले. 

दरवर्षी माघ आणि भाद्रपद महिन्यच्या शुद्ध प्रतिपदा ते शुद्ध चतुर्थी दरम्यान श्रीमन्महासाधू मोरया गोसावी यांची चिंचवड ते मोरगाव अशी पायी पालखी यात्रा संपन्न होते. यंदाच्या वर्षी दिनांक १९ जानेवारी रोजी माघ शु. प्रतिपदेला या पालखी सोहळ्याने चिंचवड येथून मोरगावकडे प्रस्थान केले.  यानंतर पालखी सोहळा मुक्कामी मार्गस्थ झाला. चिंचवड देवस्थान आयोजित या पालखी यात्रेतील ग्रामदैवत श्री कसबा गणपती दर्शन हा एक अतिशय महत्त्वाचा टप्पा आहे.

ग्रामदैवत श्री कसबा गणपती मंदिर ट्रस्टच्या वतीने माघ गणेश जन्मोत्सवाला डॉ. पं. प्रमोद प्रभाशंकर गायकवाड आणि शिष्यांनी सनई वादनाने सुरुवात केली. त्यानंतर महाडकर गुरुजी यांचे गणेश पुराण झाले. सायंकाळी उस्ताद बिस्मिल्ला खा यांचे पट्ट शिष्य पंडित शैलेश भागवत यांचे शहनाई वादन झाले. त्यांना तबल्यावर महेश केंगार यांनी तर हार्मोनियम वर सुधीर टेकाळे यांनी साथ दिली.

विजयानंतर आता विकास अजेंड्यावर, गणेश बिडकरांची महापालिका आयुक्तांशी विकासकामांवर चर्चा

पुणे: महापालिका निवडणुकीचे निकाल जाहीर होताच प्रभाग क्रमांक २४ मधून विजयी झालेले भाजप नगरसेवक व माजी सभागृह नेते गणेश बिडकर यांनी कोणताही विलंब न करता कामाला सुरुवात केली आहे. विजयाचा जल्लोष बाजूला ठेवत बिडकर यांनी प्रभागातील विकासकामांना प्राधान्य देत थेट पुणे महापालिकेचे आयुक्त कार्यालय गाठले.

प्रभाग २४ मधील प्रलंबित व प्रस्तावित विकासकामांची सविस्तर यादी घेऊन गणेश बिडकर यांनी महापालिका आयुक्त नवल किशोर राम यांची भेट घेतली. यावेळी प्रभागातील रस्ते, पाणीपुरवठा, ड्रेनेज यांसारख्या मूलभूत सुविधांबरोबरच महापालिकेच्या कमला नेहरू रुग्णालयातील सुविधा अधिक सक्षम करण्याबाबत सविस्तर चर्चा करण्यात आली.

या बैठकीला प्रभागातून विजयी झालेले भाजपचे नगरसेवक देवेंद्र उर्फ छोटू वडके, उज्वला यादव आणि कल्पना बहिरट हे देखील उपस्थित होते. प्रभागातील नागरिकांना भेडसावणाऱ्या समस्या तातडीने सोडवण्यावर भर देण्यात आला.

यावेळी बोलताना गणेश बिडकर म्हणाले, “निवडणुकीत मिळालेला विजय हा माझ्यासाठी आनंदाचा क्षण असला तरी खरी जबाबदारी आता सुरू झाली आहे. नागरिकांचा विश्वास सार्थ ठरण्यासाठी प्रभागासह पुणेकरांच्या मूलभूत सुविधा, आरोग्यसेवा आणि पायाभूत विकासकामांना प्राधान्य देणार आहे. सर्व नगरसेवकांना सोबत घेऊन प्रभागाचा सर्वांगीण विकास हाच आमचा संकल्प आहे.”

नवनिर्वाचित नगरसेवक सनी निम्हण यांनी घेतली विरोधकांची भेट

पुणे : निवडणूक म्हटलं की प्रतिस्पर्धी उमेदवावर टीका करायची, मात्र त्या पलीकडे जाऊन निवडणूक संपल्यावर दोन परस्पर विरोधी निवडणूक लढवलेले उमेदवार एकमेकांना भेटतात हे अलीकडे दुर्मिळ झाले आहे.  मात्र लढाई संपली आता सर्वजण एकत्र येऊ… आपल्या औंध बोपोडीला विकासात अग्रेसर ठेऊ , असे म्हणत औंध – बोपोडी प्रभागातील नवनिर्वाचित नगरसेवक चंद्रशेखर उर्फ सनी निम्हण यांनी घेतली विरोधकांची भेट घेतली. 

या विषयी बोलताना सनी निम्हण म्हणाले, निवडणूका येतात जातात. निवडणुकीची लढाई हि व्यक्तीशी नसून विचारांची लढाई असते असे मी मानतो. हाच विचार पुढे नेत आज निवडणुकीच्या धामधुमीनंतर  प्रकाश ढोरे यांची सदिच्छा भेट घेतली. या प्रसंगी  विनायक रणपिसे उपस्थित होते.

येत्या काळात औंध बोपोडी परिसराचा नियोजनबद्ध विकास करण्यासाठी विचारांची देवाणघेवाण झाली. या परिसराविषयी त्यांचा ध्यास आणि कार्य पाहता पुढील काळात औंध बोपोडीच्या विकासासाठी त्यांचे सहकार्य आणि मार्गदर्शन मोलाचे ठरणार आहे. शेवटी वैचारिक भूमिका जरी वेगळी असली तरी औंध बोपीडीच्या विकासासाठी आपण सर्व मतभेद बाजूला ठेऊन एकत्र यायला पाहिजे असे मानणारा मी एक कार्यकर्ता आहे.

सगळ्यांना सोबत घेऊन सर्वांच्या सहभागातून विकास हि स्वर्गीय कार्यसम्राट आमदार विनायक निम्हण यांची शिकवण अशाच संस्कारांची नित्य प्रेरणा देत असते असेही सनी निम्हण यांनी नमूद केले.