पुणे, दि.२१ : पुणे ग्रँड चॅलेंज टूर-२०२६ आंतरराष्ट्रीय सायकलिंग स्पर्धेच्या अनुषंगाने चौथ्या टप्प्याच्याअनुषंगाने पुणे महानगरपालिकेच्या हद्दीतील सर्व सरकारी व खाजगी शाळा २३ जानेवारी रोजी दुपारी १२ वाजेपर्यंत सुरु ठेवाव्यात; त्यांनतर शाळा बंद करण्याचे आदेश जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष जितेंद्र डूडी यांनी जारी केले आहेत.

स्पर्धेचा चौथा टप्पा हा बालेवाडी ते बालगंधर्व रंगमंदिर या दरम्यान आयोजित करण्यात आला असून त्याचे एकूण ५८ कि.मी अंतर आहे. त्यामुळे पुणे शहरातील होणारी वाहतूक कोंडी तसेच बहुतेक शाळेतील विद्यार्थ्यांची गैरसोय टाळण्याच्यादृष्टीने आदेश जारी करण्यात आल्याचेही आदेशात नमूद करण्यात आले आहे.

पुणे -२४ तास पाणी पुरवठ्याचे गेली १२ वर्षे स्वप्ने दाखविणाऱ्या महापालिका भवनात आता रोज पार्किंग मध्येच ‘टँकर’ दिसणार असल्याचे सांगितले जाते आहे. महापालिकेत असलेली प्रचंड मोठी पार्किंग व्यवस्था अपुरी पडत असताना यात आता रोज एका टँकर ची भर पडणार असल्याची शक्यता निर्माण झाली आहे. आता हा टँकर लावायला जागा महापालिका कुठे उपलब्ध करून देणार हे पाहण्याची उत्सुकता देखील आहेच.त्याचे असे झालेय,एका नगरसेवकाने जोपर्यंत माझ्या भागात नागरिकांना पिण्याच्या पाण्यासाठी टँकरवर अवलंबून राहावे लागतेय तोपर्यंत मी रोज महापालिकेत टँकर नेच येणार असल्याच घोषणा केली आहे.
नऱ्हेगाव परिसरात तीव्र पाणीटंचाई निर्माण झाली असून नागरिकांना पिण्याच्या पाण्यासाठी टँकरवर अवलंबून राहावे लागत आहे. अनेक कुटुंबांना पैसे देऊन टँकरने पाणी खरेदी करावे लागत असल्याने नागरिकांमध्ये तीव्र संताप आहे.या पार्श्वभूमीवर नवनिर्वाचित नगरसेवक हरिदास चरवड यांनी ठाम भूमिका जाहीर केली आहे.“जोपर्यंत नऱ्हेगावचा पाण्याचा टँकर बंद होत नाही, म्हणजेच पाणी प्रश्न कायमस्वरूपी सुटत नाही, तोपर्यंत मी पुणे महानगरपालिकेत स्वतःच्या गाडीने जाणार नाही; मी पाण्याचा टँकर घेऊनच महापालिकेत जाणार,” असा निर्धार त्यांनी व्यक्त केला.

महापालिकेच्या वतीने नऱ्हेगावासाठी अधिक क्षमतेचा व नियमित पाणीपुरवठा तातडीने उपलब्ध करून द्यावा, नागरिकांना मुबलक पाणी मिळावे, अशी ठाम मागणी त्यांनी केली. जोपर्यंत हा प्रश्न मार्गी लागत नाही, तोपर्यंत आंदोलनात्मक भूमिका सुरूच राहील, असेही त्यांनी स्पष्ट केले.

नऱ्हे ग्रामस्थांच्या वतीने सर्व नवनिर्वाचित नगरसेवकांचा सत्कार कार्यक्रम आयोजित करण्यात आला होता. याच कार्यक्रमात ते बोलत होते. यावेळी नगरसेवक काकासाहेब चव्हाण, नगरसेवक राजाभाऊ लायगुडे, नगरसेविका जयश्रीताई भूमकर, नगरसेविका कोमलताई नवले तसेच मोठ्या संख्येने ग्रामस्थ उपस्थित होते.

मराठी भाषा, संस्कृतीचा सेवक म्हणून विनोद कुलकर्णी यांचे संमेलनात कार्य : डॉ. श्रीपाल सबनीस

पुणे : सांस्कृतिक लोकशाही जपण्यासाठी साहित्य संमेलनांची आवश्यकता असून राजकीय लोकशाही सदृढ करण्यासाठी आधी सांस्कृतिक लोकशाही बळकट करणे गरजेचे आहे. मराठी साहित्य संमेलनांच्या माध्यमातून संस्कृती व साहित्य क्षेत्रात संवादाचे वातावरण घडते. अशा साहित्य संमेलनात कार्याध्यक्षाची भूमिका बजाविताना विनोद कुलकर्णी यांनी मराठी भाषा, संस्कृतीचा सेवक म्हणून कार्य केले हे अभिनंदनीय आहे, असे गौरवोद्‌गार अखिल भारतीय मराठी साहित्य संमेलनाचे माजी अध्यक्ष, ज्येष्ठ विचारवंत डॉ. श्रीपाल सबनीस यांनी काढले.

सातारा येथील ९९व्या अखिल भारतीय मराठी साहित्य संमेलनाचे यशस्वीरित्या आयोजन केल्याबद्दल सावित्रीबाई फुले पुणे विद्यापीठ, मराठी अभ्यास मंडळ व अक्षर भारती आणि लोकमंगल ग्रुप शिक्षण संस्था यांच्या संयुक्त विद्यमाने संमेलनाचे कार्याध्यक्ष विनोद कुलकर्णी यांचा आज (दि. २०) नागरी सत्कार करण्यात आला. त्या वेळी डॉ. श्रीपाल सबनीस बोलत होते. सावित्रीबाई फुले पुणे विद्यापीठाचे प्र-कुलगुरू डॉ. पराग काळकर, ज्येष्ठ विचारवंत प्रा. जे. पी. देसाई, सावित्रीबाई फुले पुणे विद्यापीठातील मराठी अभ्यास मंडळाचे अध्यक्ष प्रा. डॉ. संदीप सांगळे, मराठी साहित्य परिषदेचे कार्यवाह, लोकमंगल ग्रुप शिक्षण संस्थेचे अध्यक्ष शिरीष चिटणीस, अविनाश सांगोलेकर मंचावर होते. शाल, ग्रंथ आणि भेटवस्तू असे सन्मानाचे स्वरूप होते.

मराठी भाषेसाठी सर्व जातीधर्मातील साहित्यिकांचे अनमोल योगदान लाभले आहे. विनोद कुलकर्णी यांनी कार्यकुशलतेने साहित्य संमेलनांच्या माध्यमातून सामान्य जनतेसह सर्व जातीधर्माच्या साहित्यिक, साहित्यप्रेमी व्यक्तींना एकत्रित केले, असे सांगून डॉ. श्रीपाल सबनीस पुढे म्हणाले, आपले व्यवस्थापन कौशल्य पणाला लावत कार्यकर्ता ते नेता अशा भूमिका निभावत विनोद कुलकर्णी महाराष्ट्रातील बारा कोटी मराठी जनतेच्या विश्वासास पात्र ठरले आहेत. अभिव्यक्ती स्वातंत्र्याच्या माध्यमातून विनोद कुलकर्णी यांनी हिंदी भाषा सक्तीला राजकीय व्यक्तींसमोर ठामपणे विरोध करत आपली भूमिका विनम्रपणे मांडली हे कौतुकास्पद आहे. 

मराठी भाषा ही भाकरीची आणि ज्ञानाची व्हावी या दोन टोकांच्या अपेक्षांमध्ये साहित्य संमेलने अडकलेली आहेत. असे असतानाही प्राणापेक्षा भाषेला मान देण्याचे कार्य साहित्य संमेलनांच्या माध्यमातून घडत आहे, असेही डॉ. श्रीपाल सबनीस यांनी आवर्जून नमूद केले.

साहित्य क्षेत्रातील एव्हरेस्ट सर केल्याचा आनंद : विनोद कुलकर्णी..

साताऱ्यात साहित्य संमेलन व्हावे ही मागणी ते संमेलनाच्या यशस्वी आयोजनापर्यंतचा प्रवास उलगडताना विनोद कुलकर्णी म्हणाले, साहित्य संमेलन आयोजनाच्या स्वप्नाचा पाठलाग करत त्या करीता अखंडितपणे कृती करत वाटचाल सुरू ठेवली. सातारा येथील साहित्य चळवळीला पुन्हा एकदा सक्रिय करत साहित्य परिषदेशी एकरूप होऊन विरोधी पक्षाला सामावून घेत अखंडितपणे कार्य करत राहिलो. यातूनच पाहिलेल्या एका स्वप्नामुळे न पाहिलेली अनेक स्वप्ने देखील साकार झाली. मराठी भाषेला अभिजात दर्जा मिळावा याकरिता केलेले प्रयत्न, आंदोलने यांसह शतकपूर्व संमेलन साकारताना आधीच्या संमेलनांमधील त्रुटी व उणीवा दूर करण्यासाठी केलेला अट्टाहास याविषयीही त्यांनी अवगत केले. साताऱ्यातील संमेलन सर्वच बाबतीत विक्रमी ठरावे यासाठी सहकाऱ्यांसह केलेले अविरत प्ररिश्रम, साहित्यिकांना व मान्यवरांना चांदीच्या ताटात दिलेले भोजन, माजी संमेलनाध्यक्षांचा यथोचित सन्मान, ग्रंथविक्रेत्यांच्या अपेक्षांची पूर्तता, अभूतपूर्व ग्रंथदिंडी, चित्ररथ, शंभरी पार केलेल्या शि. द. फडणीस यांनी साकारलेले बोधचिन्ह, निधी संकलन, सुरक्षा व्यवस्था आदी बाबींवर त्यांनी प्रकाश टाकला.  नकारात्मक घटनेतून विरोधक,  द्वेष करणाऱ्यांनाही आनंद दिला, असे सांगत साहित्य संमेलन यशस्वी केले हा साहित्य क्षेत्रातील एव्हरेस्ट शिखर सर केल्याचा आनंद आहे, असेही ते आवर्जून म्हणाले.

मराठी भाषेसाठी दीर्घकालीन नियोजन आवश्यक : डॉ. पराग काळकर

डॉ. पराग काळकर म्हणाले, विनोद कुलकर्णी यांच्या नेतृत्वातून ९९व्या अखिल भारतीय मराठी साहित्य संमेलनाचे नियोजन उत्तम झाले. प्रत्येक व्यवस्था चोख ठेवण्याचा निर्धार पूर्ण करण्यात आला. साताऱ्याची कीर्ती जगभरात वाढविण्याचे कार्य या संमेलनाद्वारे झाले आहे. ते पुढे म्हणाले, मराठी भाषेला अभिजाततेचा दर्जा मिळाल्यानंतर अनेक उत्सव, समारंभ झाले. परंतु मराठी भाषा जनमानसापर्यंत जाण्यासाठी दीर्घकालीन नियोजन करणे आवश्यक असून संशोधनाव्यतिरिक्तही मराठी भाषेसाठी कार्य व्हावे, याकरिता विद्यापीठ स्तरावर भविष्यात विविध उपक्रम राबवू.

प्रा. जे. पी. देसाई म्हणाले, विनोद कुलकर्णी हे आदर्श प्रशासक असून त्यांनी संमेलनाच्या यशस्वीतेतून त्यांची कार्यक्षमता, कर्तव्यदक्षता आणि सृजनशीलता दर्शविली आहे. पुढील संमेलनांसाठी नवीन वाटा निर्माण करण्याचे कार्य केले असून आपले साध्य पूर्ण करण्यासाठी पवित्र साधनांचा वापर केलेल दिसतो. प्रा. संदीप सांगळे यांनी मनोगत व्यक्त केले.

कार्यक्रमाची भूमिका शिरीष चिटणीस यांनी मांडली तर प्रास्ताविक स्वप्नील पोरे यांनी केले. आभार अविनाश सांगोलेकर यांनी मानले.

पुणे महानगराच्या नियोजनाला ‘हायटेक’ स्पर्श; ‘पीएमआरडीए’ प्रशासनात ‘ब्लॉकचेन’ आणि ‘जीआयएस’ प्रणालीचा यशस्वी वापर!

पुणे : पुणे महानगर प्रदेश विकास प्राधिकरणाने (पीएमआरडीए) नागरी सेवा अधिक सुलभ, पारदर्शक आणि तत्पर करण्यासाठी २९ सेवा पूर्णपणे ऑनलाइन उपलब्ध करून दिल्या आहेत. त्यामुळे नागरिकांना कार्यालयात प्रत्यक्ष येण्याची आवश्यकता राहिलेली नाही. शहरी नियोजन अधिक अचूक व प्रभावी करण्यासाठी ‘जीआयएस पोर्टल’ सुरू करण्यात आले असून, उपग्रह प्रतिमा व प्रगत जीआयएस तंत्रज्ञानाच्या माध्यमातून विकास आराखडा, पूररेषा, जागांची सद्यस्थिती तसेच विविध विभागांची माहिती एकत्रित करण्यात आली आहे. यामुळे निर्णय प्रक्रिया अधिक वेगवान व शास्त्रीय झाली आहे. ब्लॉकचेन प्रणालीमुळे माहिती सुरक्षित, अपरिवर्तनीय ठेवली जात असून, पारदर्शकता वाढली आहे आणि माहितीची पडताळणी सुलभ झाली आहे.

महानगर आयुक्त डॉ. योगेश म्हसे यांच्या मार्गदर्शनाखाली पीएमआरडीएने डिजिटल तंत्रज्ञानाचा प्रभावी वापर करून प्रशासन लोकाभिमुख, पारदर्शक आणि वेळेत सेवा देणारे बनवले आहे. या उपक्रमांमुळे नागरिकांचा वेळ व खर्च वाचला असून, अनावश्यक कार्यालयीन फेऱ्यांना आळा बसला आहे.

टीडीआर ब्लॉकचेन प्रणाली : पीएमआरडीएने टीडीआर नोंदी सुरक्षित ठेवण्यासाठी ब्लॉकचेन प्रणाली कार्यान्वित केली आहे. ही प्रणाली बनावट कागदपत्रे व फसवणूक रोखण्यास मदत करते. सर्व नोंदी पारदर्शक, अपरिवर्तनीय आणि सुरक्षित स्वरूपात उपलब्ध आहेत.
TDR Blockchain: https://tdr-main.pmrda.gov.in

सुविधा भूखंड ब्लॉकचेन : ॲमेनिटी प्लॉट्सच्या निर्मिती, विक्री व विकास प्रक्रियेत ब्लॉकचेन प्रणालीचा वापर करण्यात आला आहे. यामुळे नागरिकांना जमिनीच्या वास्तविक मालकीचा तपशील, सार्वजनिक सुविधांचा अंतिम विकास तसेच लिलाव करण्यात आलेल्या जमिनीशी संबंधित संपूर्ण माहिती पारदर्शकपणे उपलब्ध होते. ‘आरटीआय’शिवायही माहिती पडताळता येत असल्याने प्रशासनावरील विश्वास वाढला आहे.
Amenity Plot Development Blockchain: https://amenity-main.pmrda.gov.in

जीआयएस पोर्टल : महानगराचे नियोजन अधिक अचूक व परिणामकारक करण्यासाठी जीआयएस पोर्टल विकसित करण्यात आले आहे. हे पोर्टल प्रगत जीआयएस तंत्रज्ञान व उपग्रह प्रतिमांवर आधारित असून, विकास आराखडा, पूररेषा, जागांची सद्यस्थिती तसेच विविध विभागांची माहिती एकत्रित करते. नागरिकांना जमीन, सार्वजनिक सुविधा, नैसर्गिक आपत्तींचे धोके आणि विकास प्रकल्पांबाबत माहिती सहज उपलब्ध होते.
GIS Portal: https://gis.pmrda.gov.in/

पीएमआरडीए आरटीएस पोर्टल : झोन दाखला, भाग नकाशा, बांधकाम परवाने आदींसह जमीन व मालमत्ता, अग्निशमन तसेच विकास परवानगी विभागाशी संबंधित दाखले, यांसारख्या महत्त्वाच्या सेवा ऑनलाइन उपलब्ध करून देण्यात आल्या आहेत. मानवी हस्तक्षेप कमी झाल्यामुळे सेवा वितरण अधिक पारदर्शक व गतिमान झाले आहे.
RTS Portal: https://rts.pmrda.gov.in

डिजिटल तंत्रज्ञानाचा नियोजनबद्ध वापर करून पीएमआरडीएने प्रशासन आणि नागरिक यांच्यातील अंतर लक्षणीयरीत्या कमी केले आहे. ‘घरबसल्या सेवा’ ही संकल्पना प्रत्यक्षात यशस्वीपणे राबवण्यात आल्याबद्दल नागरिकांकडून सकारात्मक प्रतिसाद मिळत आहे.

▪️ खासदार मेधा कुलकर्णी, आमदार उमा खापरे, अमित गोरखे, शंकर जगताप यांच्या हस्ते खेळाडुंचा गौरव

पुणे : भारतातील पहिल्यावहिल्या ‘UCI २.२’ श्रेणीतील आंतरराष्ट्रीय बहु-स्तरीय सायकलिंग स्पर्धा ‘बजाज पुणे ग्रँड टूर २०२६’ च्या मुळशी–मावळ टप्प्यात चीनच्या ‘ली निंग स्टार’ संघाच्या ल्यूक मडग्वे याने दमदार कामगिरी करत निर्विवाद वर्चस्व गाजवले, तर भारतीय राष्ट्रीय संघाच्या हर्षवीर सिंग सेखॉन याने सर्वोत्तम भारतीय सायकलपटू ठरण्याचा मान पटकावला.
हिंजवडी येथील टी.सी.एस. (TCS) सर्कल येथून सुरू झालेल्या ८७.२ किलोमीटरच्या ‘मुळशी–मावळ माईल्स’ या पहिल्या टप्प्यात ल्यूक मडग्वे याने अवघ्या २ तास २१ सेकंदात शर्यत पूर्ण करत विजेतेपद मिळवले. सुरुवातीपासूनच वेगवान आणि तांत्रिक खेळाचे दर्शन घडवणाऱ्या या टप्प्यात शेवटच्या काही क्षणांत मडग्वे याने निर्णायक आघाडी घेत विजयावर शिक्कामोर्तब केले.
एस्टोनियाच्या ‘क्विक प्रो टीम’चा अँड्रियास मॅटिल्डास (०२:००:२७) दुसऱ्या, तर बेल्जियमच्या ‘टार्टलेटो–इसोरेक्स’ संघाचा योर्बेन लॉरीसन (०२:००:३०) तिसऱ्या क्रमांकावर राहिला. UCI नियमांनुसार पहिल्या तीन क्रमांकाच्या खेळाडूंना अनुक्रमे १०, ६ आणि ४ सेकंदांचा टाइम बोनस देण्यात आला असून, तो पुढील टप्प्यांसाठी महत्त्वाचा ठरणार आहे.
दरम्यान, शर्यत सुरू झाल्यानंतर पहिल्या चेकपॉईंटनंतर दुसऱ्या गटातील काही सायकलपटूंमध्ये अपघात झाला. सुरक्षिततेच्या दृष्टीने आणि UCI च्या सुरक्षा प्रोटोकॉलनुसार स्पर्धा सुमारे २३ मिनिटे थांबवण्यात आली होती. वैद्यकीय आणि तांत्रिक पथकाने तातडीने मदत केल्यानंतर शर्यत पुन्हा सुरू करण्यात आली.
पहिल्या टप्प्यानंतर विविध श्रेणींतील आघाडीवर असलेल्या खेळाडूंना जर्सी प्रदान करण्यात आल्या. सर्वसाधारण वर्गीकरण आणि पॉइंट्स वर्गीकरणात ल्यूक मडग्वे याने यलो आणि ग्रीन जर्सी मिळवली. बेस्ट क्लायंबर म्हणून क्रिस्टियन रायलेनु (चीन) याला पोलका डॉट जर्सी, सर्वोत्तम आशियाई खेळाडू म्हणून जंबालजाम्ट्स सैनबयार (मंगोलिया) याला ऑरेंज जर्सी, सर्वोत्तम युवा खेळाडू म्हणून तामर स्पिएरो (नेदरलँड) याला व्हाईट जर्सी, तर सर्वोत्तम भारतीय खेळाडू म्हणून हर्षवीर सिंग सेखॉन याला ब्लू जर्सी प्रदान करण्यात आली.
या टप्प्यातील विजेत्या खेळाडूंचा गौरव खासदार मेधा कुलकर्णी, आमदार उमा खापरे, अमित गोरखे, शंकर जगताप, पिंपरी-चिंचवड महानगरपालिका आयुक्त श्रावण हर्डीकर, पिंपरी-चिंचवड शहरचे पोलीस आयुक्त विनयकुमार चौबे यांच्यासह आदी मान्यवर यांच्या हस्ते करण्यात आला.
आता सर्वांचे लक्ष उद्या, २१ जानेवारी रोजी होणाऱ्या ‘मराठा हेरिटेज सर्किट’ या दुसऱ्या टप्प्याकडे लागले आहे. १०५.३ किलोमीटरच्या या खडतर मार्गात सायकलपटूंना १,०५१ मीटरची उंची सर करावी लागणार असून, पुरंदर किल्ला, सिंहगड आणि खडकवासला तलाव परिसरातून जाणारा हा टप्पा खेळाडूंच्या सहनशक्तीची कसोटी पाहणारा ठरणार आहे.
पुणे जिल्हा प्रशासन, महाराष्ट्र शासन आणि सायकलिंग फेडरेशन ऑफ इंडिया यांच्या संयुक्त विद्यमाने आयोजित या पाच दिवसांच्या स्पर्धेत ३५ देशांतील १७१ आंतरराष्ट्रीय सायकलपटू सहभागी झाले असून, एकूण ४३७ किलोमीटरच्या या स्पर्धेमुळे पुण्याच्या सांस्कृतिक व ऐतिहासिक वारशाचे जागतिक स्तरावर दर्शन घडत आहे.
पुढील टप्प्यांचे वेळापत्रक :
▪️ २१ जानेवारी : टप्पा २ – मराठा हेरिटेज सर्किट (१०५.३ किमी)
▪️ २२ जानेवारी : टप्पा ३ – पश्चिम घाट प्रवेशद्वार (१३४ किमी)
▪️ २३ जानेवारी : टप्पा ४ – पुणे प्राईड लूप (९५ किमी)

पुणे: १३५ वर्षांचा ऐतिहासिक वारसा लाभलेली महात्मा फुले मंडई पुण्याचा मानबिंदू आहे. येथील व्यापाऱ्यांना भेडसावणाऱ्या विद्युत दिवे आणि स्वच्छतेच्या समस्या तातडीने मार्गी लावण्यात येतील. येथील विद्युत दिव्यांच्या समस्या येत्या दोन दिवसात सोडविली जाईल, असे आश्वासन प्रभाग २५ चे नवनिर्वाचित नगरसेवक मा. राघवेंद्र बाप्पू मानकर यांनी दिले. महात्मा फुले मंडई येथील व्यापाऱ्यांच्या समस्या जाणून घेण्यासाठी सायंकाळी आयोजित करण्यात आलेल्या आढावा दौऱ्यात ते बोलत होते.

यावेळी व्यापाऱ्यांनी सांगितले की, मंडईतील जुने झालेले विद्युत दिवे आणि अपुऱ्या प्रकाशव्यवस्थेमुळे व्यापारी तसेच खरेदीसाठी येणाऱ्या नागरिकांच्या सुरक्षेचा प्रश्न निर्माण होत आहे. तसेच स्वच्छतेच्या समस्येबाबतही व्यापाऱ्यांनी गारऱ्हाणे मांडले. यावर बोलताना राघवेंद्र बाप्पू मानकर म्हणाले की, “व्यापाऱ्यांच्या आणि नागरिकांच्या सुरक्षेच्या दृष्टीने प्रकाशव्यवस्थेचा प्रश्न अत्यंत महत्त्वाचा आहे. त्यामुळे तातडीने हे दिवे बदलण्याचे काम येतोय दोन दिवसात पूर्ण केले जाईल. तसेच मंडईच्या स्वच्छतेसाठी प्रशासनासोबत यंत्रणा कार्यरत करून कचरा साठणार नाही याची काळजी घेतली जाईल, असे बाप्पू मानकर यांनी सांगितले.

• मुख्यमंत्री देवेंद्र फडणवीस यांचे गौरवोद्गार; सामंजस्य करारानंतर वर्षभरात उद्योग उभारणीचे दावोस येथे कौतुक

दावोस (स्वित्झर्लंड): “जागतिक आर्थिक परिषदेत (वर्ल्ड इकॉनॉमिक फोरम) गेल्या वर्षी करण्यात आलेल्या ५०० कोटी रुपयांच्या सामंजस्य कराराची ‘अ‍ॅल्युमिनियम मॅन ऑफ इंडिया’ म्हणून ओळखले जाणारे उद्योजक भरत गीते यांनी अवघ्या एका वर्षात यशस्वी अंमलबजावणी करून प्रत्यक्ष उत्पादन सुरू केले आहे. वर्षभरात उद्योग उभारणी करणाऱ्या गीते यांच्यासारख्या मराठी उद्योजकांचा मला अभिमान वाटतो,” असे गौरवोद्गार मुख्यमंत्री देवेंद्र फडणवीस यांनी काढले.

दावोस येथे सुरु असलेल्या जागतिक आर्थिक परिषदेत देवेंद्र फडणवीस आणि भरत गीते यांच्यातील संवादावेळी ते बोलत होते. या भेटीदरम्यान उद्योग उभारणीतील नियोजन, वेगवान अंमलबजावणी, प्रशासन आणि उद्योजकांमधील समन्वय तसेच उत्पादन क्षेत्राचे अर्थव्यवस्थेतील वाढते महत्त्व यावर सविस्तर चर्चा झाली. ‘आत्मनिर्भर भारत’, ‘मेक इन इंडिया’ आणि ‘व्होकल फॉर लोकल’ या केंद्र सरकारच्या उपक्रमांना बळ देणाऱ्या या उपक्रमांतून कमी कालावधीत उद्योग उभारणी शक्य असल्याचा प्रेरणादायी संदेश देशभरातील उद्योजकांना मिळाला आहे.

देवेंद्र फडणवीस म्हणाले, “अहिल्यानगर जिल्ह्यातील सुपा एमआयडीसी येथे उभारण्यात आलेल्या ‘तौरल इंडिया’च्या अत्याधुनिक अ‍ॅल्युमिनियम कास्टिंग्ज उत्पादन प्रकल्पाने अल्पावधीतच उत्पादन सुरू करत राज्यासमोर आदर्श औद्योगिक मॉडेल उभे केले आहे. या प्रकल्पामुळे परिसरातील स्थानिक तरुणांना रोजगाराच्या संधी उपलब्ध झाल्या असून, स्थानिक औद्योगिक विकासाला मोठी चालना मिळाली आहे.”

“सामंजस्य करार कागदापुरता न राहता एका वर्षात प्रत्यक्ष उत्पादनात रूपांतरित होऊ शकतो, याचे भरत गीते आणि तौरल इंडिया हे उत्तम उदाहरण आहे. मराठी उद्योजकांमध्ये जागतिक स्तरावर स्पर्धा करण्याची क्षमता आहे. त्यांना योग्य धोरणात्मक पाठबळ दिल्यास महाराष्ट्र उद्योग क्षेत्रात नवे शिखर गाठेल,” असा विश्वासही मुख्यमंत्री फडणवीस यांनी व्यक्त केला.

भरत गीते म्हणाले, “तौरल इंडियाने २०१६ पासून औद्योगिक विस्तार करत ऊर्जा क्षेत्र, संरक्षण उत्पादन, आरोग्य उपकरणे तसेच एरोस्पेस क्षेत्रासाठी आवश्यक अचूक अ‍ॅल्युमिनियम कास्टिंग्ज निर्मितीत भरीव योगदान दिले आहे. विविध क्षेत्रांतील या योगदानामुळे राज्याच्या औद्योगिक प्रगतीला बळ मिळत असून, आर्थिक वाढीस हातभार लागत आहे.

“उत्पादन क्षेत्र हे मजबूत अर्थव्यवस्थेचा कणा असून, वाहन उद्योग, अभियांत्रिकी, पायाभूत सुविधा, इलेक्ट्रॉनिक्स, इलेक्ट्रिक मोबिलिटी, संरक्षणपूरक उद्योग, कृषी प्रक्रिया आणि उच्च-मूल्य निर्यातक्षम उत्पादन क्षेत्र मजबूत झाल्यास राज्याचा औद्योगिक पाया अधिक भक्कम होईल,” असा विश्वास गीते यांनी व्यक्त केला.