पुणे :महाराष्ट्र गांधी स्मारक निधी आणि युवक क्रांती दल यांच्या संयुक्त विद्यमाने २४ वे गांधी दर्शन शिबिर गांधी भवन, कोथरूड येथे यशस्वीपणे पार पडले. १४ सप्टेंबर २०२५ रोजी सकाळी ९.३० ते सायंकाळी ५ वाजेपर्यंत चाललेल्या या शिबिरात विविध विषयांवर विचारप्रवर्तक मार्गदर्शन झाले.मुंबई विद्यापीठ राज्यशास्त्र विभाग प्रमुख डॉ. दीपक पवार यांनी ‘भारतातील भाषेचा प्रश्न’ या विषयावर सखोल विचार मांडले. ज्येष्ठ सर्वोदयी कार्यकर्ते विजय दिवाण यांनी ‘गांधी, विनोबा आणि सद्य-परिस्थिती’ या विषयावर प्रेरणादायी भाष्य केले. इतिहास अभ्यासक पांडुरंग बलकवडे यांनी ‘शिवरायांची अष्टक्रांती’ या विषयावर उपस्थितांना ऐतिहासिक दृष्टिकोन दिला. 

महाराष्ट्र गांधी स्मारक निधीचे विश्वस्त सचिव अन्वर राजन यांनी प्रास्ताविक केले. शिबिराचे अध्यक्षस्थान डॉ. कुमार सप्तर्षी (अध्यक्ष, महाराष्ट्र गांधी स्मारक निधी) यांनी भूषविले. या प्रसंगी  डॉ. मच्छिंद्रनाथ गोर्डे,डॉ.प्रकाश परब,डॉ.प्रवीण सप्तर्षी,अॅड. स्वप्नील तोंडे,अप्पा अनारसे,तेजस भालेराव,राजेश तोंडे,संदीप बर्वे  यांची विशेष उपस्थिती होती.शिबिरात विद्यार्थी, संशोधक, सर्वोदयी कार्यकर्ते तसेच नागरिकांनी मोठ्या संख्येने सहभाग घेतला.

विजय दिवाण म्हणाले,’ विनोबा भावे यांच्यावर सरकारी संत असल्याचे आरोप झाले. परंतु, राष्ट्रीय स्वयंसेवक संघाचा कावा पुरेपूर ओळखल्याने त्यांनी संघासोबत जाण्याची भूमिका स्वीकारली नाही. आणीबाणीत ज्यांनी संघाला मोठे केले,त्यांनी ज्या चुका केल्या,त्या विनोबा भावे आणि सर्वोदयी कार्यकर्त्यांनी केल्या नाहीत. विनोबांची दूरदृष्टि आज मान्य करायला हरकत नाही. काँग्रेसला पाठिंबा देऊनच भाजपचा पराभव आगामी काळात होईल. 

‘आजची परिस्थिती उत्तर पेशवाईसारखी आहे.तेव्हाही धर्मसत्ता,अर्थसत्ता,राज्यसत्ता एकत्र होती आणि ती जाचक झाली होती.राज्यसत्ता,अर्थसत्ता यांचा पराभव करता येईल.मात्र, संघाचा आणि धर्मसत्तेचा पराभव करायला परिश्रम घ्यावे लागतील.कारण ती एकाच जातीच्या हातात आहे.धर्म न नाकारता, धर्मात सुधारणा करीत पुढे जावे लागणार आहे. फॅसिस्ट राजसत्ता, अर्थसत्ता उलथवून टाकता येईल, मात्र, धर्मसत्ता उलथवून टाकणे अवघड आहे. त्यामुळे खऱ्या  द्वेषरहित,मानवतावादी  धर्माच्या मार्गाने जाण्याचा आग्रह धरला पाहिजे. स्वामी विवेकानंद, केवलानंद सरस्वती, स्वामी रामानंद तीर्थ ही उदाहरणे डोळयासमोर ठेवली पाहिजेत’, असेही ते म्हणाले.

डॉ.दीपक पवार म्हणाले,’हिंदी ही राष्ट्रभाषा आहे,हा गैरसमज निर्माण करण्यात आला आहे.हिंदी भाषा सक्तीच्या आग्रहामागे हिंदी-हिंदुस्थान-हिंदुत्ववाद मानणाऱ्यांचे राजकारण असून मराठी माणसाने त्याला बळी पडू नये.भाषा टिकली नाही तर प्रदेश टिकणार नाही,बोली टिकणार नाही.महाराष्ट्रात मराठी भाषेलाच प्राधान्य मिळाले पाहिजे.त्यासाठी प्रत्यक्ष लढ्यात मराठी माणसाने उतरले पाहिजे.अभिजात भाषेचा दर्जा दिल्याने मराठीच्या प्रसारासाठी ५०० कोटी मिळतील,असे समजणाऱ्यानी केंद्र सरकारने अशा कारणासाठी पूर्वी किती निधी दिला,याचा हिशेब काढून पाहिले पाहिजे.सकाळी मराठी आणि सायंकाळी हिंदुत्ववादी झाल्याने मराठी माणसाचे शिवसेना आणि मनसेचे झाले तसे नुकसान होणार आहे. 

‘इतिहासातील थरारक प्रसंग आपण आठवत राहतो मात्र त्याकाळातील भाषा व्यवहार आठवत नाही.मराठी माणसाने दिल्लीवर राज्य केले पण मराठी भाषेला मोठे केले नाही.मराठी शाळेत शिकणे,मराठीत बोलणे आवश्यक आहे,नोकरी-व्यवसायात प्रतिनिधित्वाचा आग्रह धरला पाहिजे.परप्रांतीयांनी मराठी बोलण्याचा आग्रह धरला पाहिजे.मराठी फक्त आडनावाचे मराठी राहून उपयोगी नाही.मराठी समाजाचे अघोषित हिंदीकरण होतेय,हिंदूकरण होते आहे,त्याला विरोध केला पाहिजे.हिंदी भाषेच्या पोटातून देशांतर्गत वसाहतवाद येत आहे.त्याबाबत सावध राहिले  पाहिजे’,असेही डॉ.पवार यांनी सांगितले. 

अन्वर राजन म्हणाले,’आणीबाणी आणि त्यापूर्वी जनसंघाला अनेक पक्षांनी तत्कालिन कारणांनी जवळ केले.काँग्रेसचा वैचारिक घसरण झाल्याने आणीबाणीत पराभव झाला.पण, त्यानंतर काँग्रेस मध्ये सुधारणा झाल्या. पराभवानंतर सुधारणा होत जातात’.

पिंपरी :ईशा नेत्रालय आणि वर्षा सातुर्डेकर सोशल फाउंडेशन यांच्या संयुक्त विद्यमाने दिवंगत सौ. वर्षा नंदकुमार सातुर्डेकर यांच्या स्मृतिप्रत्यर्थ येत्या बुधवार दि. 17 सप्टेंबर रोजी महिलांसाठी मोफत नेत्र चिकित्सा शिबिराचे आयोजन करण्यात आले आहे. संयोजक ज्येष्ठ पत्रकार नंदकुमार सातुर्डेकर यांनी ही माहिती दिली.

बुधवार दि. 17 सप्टेंबर 2025 रोजी सकाळी 11 ते 2 या वेळेत ईशा नेत्रालय, प्रीमियर प्लाझा, पहिला मजला,बिग बाजार, कार्निवल सिनेमाच्या बाजूला जुना पुणे मुंबई महामार्ग, चिंचवड स्टेशन पुणे येथे हे शिबिर होणार आहे.नेत्रचिकित्सा शिबिराचे उद्घाटन ईशा नेत्रालयाचे पुणे ब्रांच इन्चार्ज दीपक कदम यांच्या हस्ते होणार आहे. यावेळी आधुनिक पद्धतीने नेत्र तपासणी करण्यात येणार असून त्याबरोबरच डोळ्यांचे आजार तसेच डोळ्यांची काळजी कशी घ्यावी याबाबत डॉ. वैभव अवताडे,डॉ. जयशील नाझरे मार्गदर्शन करणार आहेत. नेत्रालयाचे मार्केटिंग एक्झिक्युटिव्ह यशवंत बो-हाडे यांचे शिबिरासाठी विशेष सहकार्य लाभले असल्याची माहिती संयोजक नंदकुमार सातुर्डेकर यांनी दिली. शिबिराच्या आयोजनासाठी सौ. राधा सातुर्डेकर, सौ. कोमल माटे, सौ.रेश्मा बोबडे यांनी पुढाकार घेतला आहे.

पुणे-साताऱ्यात होणाऱ्या 99 व्या अखिल भारतीय मराठी साहित्य संमेलनाच्या अध्यक्षपदी प्रसिद्ध कादंबरीकार विश्वास पाटील यांची निवड झाली आहे. आज पुण्यात झालेल्या अखिल भारतीय मराठी साहित्य महामंडळाच्या बैठकीत त्यांच्या नावावर शिक्कामोर्तब करण्यात आले.

या अध्यक्षपदाच्या शर्यतीत ‘कोसला’कार भालचंद्र नेमाडे आणि मराठी भाषेला अभिजात दर्जा देणाऱ्या समितीचे अध्यक्ष रंगनाथ पठारे यांची नावे चर्चेत होती, परंतु या सर्वांनी आधीच नकार दिल्याने विश्वास पाटील यांच्या नावाची निवड निश्चित मानली जात होती.

जानेवारीत पार पडणार साहित्य संमेलन

साताऱ्यात जानेवारी महिन्यात 99 व्या अखिल भारतीय मराठी साहित्य संमेलनाचे आयोजन करण्यात आले आहे. महाराष्ट्र साहित्य परिषद, शाहूपुरी शाखा आणि मावळा फाऊंडेशन यांच्या संयुक्त विद्यमाने हे संमेलन पार पडेल. नुकतेच मराठी भाषा मंत्री उदय सामंत आणि संमेलनाचे स्वागताध्यक्ष शिवेंद्रराजे भोसले यांच्या हस्ते संमेलनाच्या बोधचिन्हाचे अनावरण करण्यात आले होते.

मराठी साहित्यातील एक मोठे नाव

विश्वास पाटील हे मराठी साहित्यातील मोठे नाव असून, ते एक प्रसिद्ध व लोकप्रिय कादंबरीकार आहेत. ते त्यांच्या संशोधनपूर्ण आणि प्रभावी लेखनशैलीसाठी ओळखले जातात. ‘पानिपत’ ही त्यांची गाजलेली ऐतिहासिक कादंबरी आहे. या कादंबरीसाठी त्यांनी केलेला सखोल अभ्यास, भाषेतील ओघवतेपण, आणि ऐतिहासिक घटनांचे नाट्यमय चित्रण यामुळे त्यांचे लेखन वाचकांना आकर्षित करते. त्यांच्या लेखनात मानवी भावनांचे आणि पात्रांच्या मानसिक संघर्षाचे जिवंत दर्शन घडते.

विश्वास पाटलांच्या उल्लेखनीय कांदबऱ्या

पानिपत – मराठ्यांच्या पानिपतवर झालेल्या पराभवावर ऐतिहासिक कादंबरी

झाडाझडती – राजकारण आणि समाज यामधील संघर्षाचे चित्रण.

सिंहासन – राजकीय सत्तासंघर्षावर आधारित.

चंद्रमुखी – समाजाच्या तळागाळातील वास्तव दाखवणारी प्रेमकहाणी.

महाड – अस्पृश्यता आणि सामाजिक अन्यायावर भाष्य करणारी कादंबरी.

स्मरणगंध – आत्मकथनात्मक आणि चिंतनशील लेखन.

पुणे – पालकमंत्री आणि राज्याचे उपमुख्यमंत्री अजित पवार आज सकाळपासून पुण्यातील हडपसर मुंढवा भागात पाहणी दौरा करत आहेत. हा पाहणी दौरा सुरू असताना, अजित पवारांना स्थानिक नागरिकांच्या तीव्र प्रश्नांचा सामना करावा लागला. मुंढवा आणि केशवनगरमधील रहिवाशांनी पिण्याच्या पाण्याची समस्या, रस्त्यांची दुरवस्था आणि प्रचंड वाहतूक कोंडी यांसारख्या समस्या थेट त्यांच्यासमोर मांडल्या. एका स्थानिक महिलेने तर वाहतूक कोंडीच्या मुद्द्यावरून थेट गोव्याचे माजी मुख्यमंत्री मनोहर पर्रीकर यांच्यासारखी ‘न सांगता’ पाहणी करण्याचा सल्ला अजित पवारांना दिला. त्यावर पर्रीकर कोण? असा प्रतिप्रश्न अजित पवारांनी त्या महिलेला विचारला.

उपमुख्यमंत्री अजित पवार यांनी आज केशवनगर-मुंढवा येथे नव्याने बांधल्या जाणाऱ्या पुलाची पाहणी करून त्यांनी कामाच्या गुणवत्तेची माहिती घेतली आणि संबंधित अधिकाऱ्याला आवश्यक सूचना दिल्या. पुलाचे काम अंतिम टप्प्यात असल्याने लवकरच या भागातील वाहतूक कोंडीतून नागरिकांची सुटका होण्याची शक्यता आहे. याशिवाय, त्यांनी कोंढवा आणि हडपसर येथील वाहतूक कोंडीच्या प्रश्नांवर लक्ष घालून अधिकाऱ्यांना तातडीने उपाययोजना करण्याचे निर्देश दिले. सकाळी सकाळी विकासकामांची पाहणी करायला आलेल्या पवारांना आज पुणेकरांच्या प्रश्नांचा आणि रोषाचा चांगलाच अनुभव आला.

हा पाहणी दौरा सुरू असताना, अजित पवारांना स्थानिक नागरिकांच्या तीव्र प्रश्नांचा सामना करावा लागला. मुंढवा आणि केशवनगरमधील रहिवाशांनी पिण्याच्या पाण्याची समस्या, रस्त्यांची दुरवस्था आणि प्रचंड वाहतूक कोंडी यांसारख्या समस्या थेट त्यांच्यासमोर मांडल्या. एका स्थानिक महिलेने तर ‘तुम्ही सांगून येऊ नका जसे गोव्याचे माजी मुख्यमंत्री मनोहर पर्रीकर न सांगता रहदारीचा आढावा घ्यायचे तसेच तुम्ही या, असा सल्ला अजित पवारांना दिला.

स्थानिक नागरिकांनी आपल्या व्यथा मांडताना, “इथल्या समस्या पाहता आम्ही इथे राहायचे की नाही?” असा संतप्त सवाल विचारला. यावर अजित पवारांनी हा भाग पीएमआरडीए आणि पुणे महानगरपालिकेच्या वादात अडकल्याचे स्पष्टीकरण दिले. त्यांनी तात्काळ अधिकाऱ्यांना फोन करून नागरिकांना सुविधा पुरवण्यासाठी काय उपाय करता येतील यावर चर्चा केली.

यावेळी एक स्थानिक महिला आणि उपमुख्यमंत्री अजित पवार यांच्यात झालेला संवाद

अजित पवार : तुम्ही येण्याआधीच आम्ही तुमच्या समस्या ऐकल्या आहेत. निवेदन मिळाले आहे. पीएमसी आणि पीएमआरडीए या वेगवेगळ्या एजन्सीज असल्या तरी, नागरिकांना त्यांच्या सुविधांशी देणेघेणे आहे आणि आम्ही त्यांच्या मागणीशी पूर्णपणे सहमत आहोत. यावर आमचे काम सुरू आहे. उशीर झाल्याबद्दल आम्ही दिलगिरी व्यक्त करतो. आम्ही कामांना गती देण्यासाठी आणि प्राथमिकता देण्यासाठी प्रयत्नशील आहोत.

महिला : आम्हाला तुमच्याकडून खूप आशा आहेत. पर्रीकर ज्याप्रमाणे दिवसा वाहतूक कोंडी पाहण्यासाठी फिरायचे, त्याचप्रमाणे तुम्हीही कधीतरी अचानक येऊन पाहा.

अजित पवार : पर्रीकर कोण?

महिला : गोव्याचे मुख्यमंत्री मनोहर पर्रीकर. ते जसे अचानक फिरायचे, तसेच तुम्हीही फिरून पाहा आणि न सांगता भेट द्या. आम्ही प्रश्न विचारू आणि तुम्ही उत्तर द्याल, असे नको.

अजित पवार : मी इथे प्रश्न विचारायला आलेलो नाही. इथला परिसर ठीक व्हावा आणि समस्या सुटाव्यात यासाठीच मी स्वतः प्रयत्न करत आहे.

महिला : असे नाही सर, इथल्या समस्या पाहता इथे राहायचे की नाही, असा प्रश्न आम्हाला पडला आहे.

अत्याधुनिक तंत्रज्ञानाचा वापर करुन वाहतूक कोंडी सोडवा-उपमुख्यमंत्री

पुणे, दि.१४ सप्टेंबर : रुंद करण्यावर शासनाचा भर आहे, वाढत्या वाहनामुळे वाहतूक कोंडी मोठ्या प्रमाणात होत असून अत्याधुनिक तंत्रज्ञानाचा वापर करुन ती सोडवा, असे निर्देश राज्याचे उपमुख्यमंत्री तथा जिल्ह्याचे पालकमंत्री अजित पवार यांनी दिले.

श्री. पवार यांनी खराडी ते केशवनगर पुलाच्या कामांसह मुंढवा चौक आणि हडपसर गाडीतळ येथे वाहतूक कोंडी सोडवण्याकरिता स्थळ पाहणी करत संबंधित अधिकाऱ्यांकडून माहिती घेतली.
यावेळी आमदार चेतन तुपे, पुणे महानगरपालिका आयुक्त नवल किशोर राम, अपर पोलीस आयुक्त मनोज पाटील, महानगरपालिका अतिरिक्त आयुक्त पृथ्वीराज बी. पी. यांच्यासह स्थानिक लोकप्रतिनिधी, नागरिक उपस्थित होते.
श्री. पवार म्हणाले, खराडी ते केशवनगर पुलाचे काम करतांना अत्याधुनिक, दर्जेदार साहित्य वापरावे. या पुलामुळे चंदननगर, केशव नगर, खराडी परिसरातील नागरिकांना वाहतूक कोंडीपासून सुटका मिळणार असल्याने कामे गतीने पूर्ण करावे.

या भागातील नागरिकांनी पाणी, रस्ते, पथदिवे, कायदा व सुव्यवस्था, बसेस व्यवस्था आदींच्या अनुषंगाने विविध मागण्या केल्या असता त्या प्राधान्याने मार्गी लावण्यात येईल, अशी ग्वाही श्री. पवार यांनी दिली.

मूढंवा चौक आणि हडपसर गाडीतळ येथील वाहतूक कोंडी सोडविण्याकरिता आवश्यक त्या सर्व पर्याय विचारात घेऊन पुणे महानगर पालिका, पोलीस प्रशासन, पीएमपीएल, लोकप्रतिनिधींनी मिळून बैठक आयोजित करुन योग्य ती कार्यवाही करावी, अशी सूचना श्री. पवार यांनी केली.

ना. चंद्रकांतदादा पाटील यांचा उपक्रम

लास्ट माईल कनेक्टिविटीसाठी बससेवेसोबतच रिक्षा सेवा देखील उपलब्ध करुन देणार!- ना. पाटील

पुणे:

कोथरुडकरांना मेट्रोने प्रवास करणं अजून सोपं आणि सुरक्षित होणार आहे. कारण कोथरुडचे आमदार आणि राज्याचे उच्च व तंत्रशिक्षणमंत्री चंद्रकांतदादा पाटील यांच्या प्रयत्नातून कोथरुडकरांसाठी घर ते मेट्रो स्थानक विशेष बससेवा सुरु करण्यात आली आहे. ना. पाटील आणि मेट्रोचे व्यवस्थापकीय संचालक श्रावण हर्डीकर यांच्या उपस्थितीत या बसचे लोकार्पण करण्यात आले. लास्ट माईल कनेक्टिविटीसाठी रिक्षा सेवा देखील उपलब्ध करुन देण्याचा प्रयत्न असल्याची घोषणाही ना. पाटील यांनी यावेळी केली.

यावेळी भाजप पुणे शहर सरचिटणीस पुनीत जोशी, विठ्ठलआण्णा बराटे, पुणे जिल्हा नियोजन समिती सदस्य डॉ. संदीप बुटाला, भाजप कोथरुड दक्षिण मंडल अध्यक्ष कुलदीप सावळेकर, मतदारसंघ समन्वयक नवनाथ जाधव, माजी नगरसेवक दीपक पोटे, नगरसेविका माधुरी सहस्रबुद्धे, मंजुश्री खर्डेकर, वृशाली चौधरी, नगरसेवक जयंत भावे, रिक्षावाला संघटनेचे केशव क्षीरसागर यांच्यासह उपस्थित होते.

पुणे आणि पिंपरी-चिंचवड शहरातील नागरिकांना आधुनिक, सुरक्षित आणि आरामदायी सार्वजनिक वाहतूक सेवा पुरवण्याच्या उद्देशाने 2022 पासून पुणे मेट्रोची सेवा शहरात कार्यरत आहे. सदर सेवा सुरु झाल्यापासून पुणेकरांचा वेळ आणि पैसा यामध्येही बचत होत असल्याचे वेळोवेळी निदर्शनास आले आहे. तरीही वाढत्या लोकसंख्येमुळे आणि मेट्रो स्टेशनपर्यंत पोहोचण्यासाठी नागरिकांना आवश्यक सुविधा उपलब्ध नसल्याने, अनेकजण या सुविधेचा वापर करण्याकडे दुर्लक्ष करत असल्याचे वारंवार समोर आले आहे.

त्यामुळे कोथरुडकरांनी मेट्रोचा मोठ्या प्रमाणात वापर करावा; यासाठी कोथरुड विधानसभा मतदारसंघाचे आमदार आणि राज्याचे उच्च व तंत्रशिक्षण मंत्री चंद्रकांतदादा पाटील यांच्या मार्गदर्शनाखाली लोकसहभागातून मोफत शटल बससेवा सुरु करण्यात येत आहे. या सुविधेमुळे मेट्रोच्या प्रवाशांच्या संख्येत वाढ होण्यासोबतच, कोथरुड मधील वाहतूककोंडीवर मार्ग काढण्याचा प्रयत्न आहे.

सदर सेवा सोमवार ते शनिवार सुरु राहणार असून, नागरिकांच्या मागणीनुसार, बसचे थांबे निश्चित करण्यात आले आहे. या सेवेमुळे सर्वसामान्य कोथरुडकरांना अधुनिक, सुरक्षित आणि आरमदायी सार्वजानिक वाहतूक सेवा पुरवण्याच्या पुणे मेट्रोच्या उद्देशास हातभार लागेल, असा विश्वास व्यक्त मेट्रोचे व्यवस्थापकीय संचालक श्रावण हर्डीकर यांनी व्यक्त केला.

ना. चंद्रकांतदादा पाटील म्हणाले की, लोकप्रतिनिधी हा लोकाभिमुख काम करण्यासाठी नागरिकांना सोईसुविधा उपलब्ध करुन देण्यासाठी निवडून दिला जातो. त्यामुळे लोकाभिमुख सेवेची शिकवण असल्याने जनतेच्या सेवेसाठी सदैव तत्पर आहे. मेट्रोसाठी लास्ट माईल कनेक्टिविटी निर्माण करण्यासाठी आणि मेट्रो प्रवाशांची संख्या वाढविण्यासाठी रिक्षा सेवा देखील सुरु करण्याचा प्रयत्न असल्याची घोषणा त्यांनी यावेळी केली.

ना. पाटील यांच्या संकल्पनेतून सुरु झालेली पहिली शटल बस सेवा राजाराम पूल- माळवे चौक, वनदेवी- कर्वेनगर, डहाणूकर- कर्वे पुतळा- करिश्मा चौक- एसएनडीटी मार्गावर रोज सकाळी ८.३० ते १ आणि सायंकाळी ४ ते ८ वेळेत सुरु असणार आहे. दरम्यान, सार्वजानिक वाहतूक व्यवस्थेचा जास्तीत जास्त नागरिकांनी वापर करावा, यासाठी अशा पद्धतीने मोफत शटल बससेवा सुरु करण्याच्या ना. चंद्रकांतदादा पाटील यांच्या उपक्रमाचे कोथरुडमधून कौतुक होत आहे.

अजित दादा पवार यांच्या हस्ते झेंडा दाखवून पूरग्रस्तांना मदतीचा ट्रक रवाना
पुणे : पंजाब राज्यातील अनेक भागांत आलेल्या महापुरामुळे स्थानिक जनजीवन पूर्णपणे विस्कळीत झाले असून, असंख्य नागरिक बेघर आणि अन्न-पाण्याविना संकटात सापडले आहेत. या नैसर्गिक आपत्तीच्या पार्श्वभूमीवर “माणुसकी हीच खरी ताकद” या तत्त्वाधिष्ठित भूमिकेतून राष्ट्रवादी काँग्रेस पार्टीच्या वतीने पाणी, गहू, तांदूळ, कांदे, बटाटे, डाळी इत्यादी जीवनावश्यक वस्तूंची मदतगाडी पंजाबकडे रवाना करण्यात आली.

ही मदत उपमुख्यमंत्री व राष्ट्रवादी काँग्रेस पार्टीचे राष्ट्रीय अध्यक्ष श्री. अजितदादा पवार यांच्या हस्ते हिरवा झेंडा दाखवून रवाना करण्यात आली.
राष्ट्रवादीचे पर्वती विधानसभा मतदारसंघाचे अध्यक्ष संतोष नांगरे, सौ. शोभा नांगरे तसेच मार्केट यार्डमधील व्यापारी व आडत बांधवांच्या माध्यमातून ही मदत पाठविण्यात आली.