रूपे वस्तीतील घटना : पीडीआरएफ पथकाकडूनही शर्तीचे प्रयत्न

पुणे (दि.१५) : पुणे शहर आणि जिल्ह्यात रात्रभर सुरू असलेल्या पावसामुळे बहुतांश ठिकाणच्या पाणी पातळीत वाढ झाल्याने पूर परिस्थिती उद्भवत आहे. सोमवारी पहाटे ३ वाजता थेऊर (ता. हवेली) गावातील रुपे वस्ती परिसरातील ओढ्याला पूर आल्याने यात अडकलेल्या ग्रामस्थांना पीएमआरडीए व पीडीआरएफ पथकातील जवानांनी मदतकार्य करून सुमारे ७० पेक्षा अधिक जणांना सुखरूप बाहेर काढले.

हवेली तालुक्यातील थेऊर गावातील रूपे वस्ती परिसरात ओढ्याला पूर आल्याने जवळपास १५० लोकांच्या वस्तीत सोमवारी पहाटे ३ वाजता पाणी शिरले होते. या घटनेची माहिती मिळतात पुणे महानगर प्रदेश विकास प्राधिकरणाच्या वाघोली अग्निशमन केंद्रातील जवान आणि पीडीआरफ पथकाने तातडीने घटनास्थळी धाव घेतली. यादरम्यान जवानांनी शर्तीचे प्रयत्न करून घरांमध्ये अडकलेल्या सुमारे ७० पेक्षा अधिक ग्रामस्थांना सुरक्षित स्थळी हलव‍िण्यात आले.

या पुरामध्ये म्हशी, शेळ्या, कोंबड्या हे पाळीव प्राणी काही प्रमाणात वाचवण्यात आले. तर काही वाहून गेले आणि काहींचा मृत्यू झाल्याची नोंद आहे. मात्र, जीवितहानी झाली नाही, अशी माहिती पीएमआरडीएकडून देण्यात आली. या बचाव पथकात अग्निशमन केंद्र आध‍िकारी विजय महाजन, जितेंद्र तळेले, महेश आव्हाड, शुभम बढे, शुभम चौधरी, उमेश फाळके, सुरज इंगवले, साईनाथ मोरे, किरण राठोड, अभिषेक पावर, प्रकाश मदने, तेजस डांगरे, सिद्धांत जाधव, शुभम पोटे, दिग्विजय नलावडे, सागर जानकर, करण पाडुळे, राजेंद्र फुंदे, प्राणिल दराडे, लहू मुंडे, राहुल शिंदे आदी जवानांचा समावेश होता.

• डॉ. ज्ञानेश्वर भाले, जनसंपर्क अधिकारी, पीएमआरडीए

पुणे-रोटरी क्लब ऑफ कोरेगाव पार्क आणि रोटरी क्लब ऑफ पुणे सेंट्रल यांनी आयोजित केलेला ‘‘पुणे ओणम महोत्सव २०२५’’ आज कोरेगाव पार्क येथील रोही व्हिला पॅलेस येथे मोठ्या उत्साहात आणि आनंदाने साजरा करण्यात आला.  या कार्यक्रमाने केरळच्या सर्वात प्रिय उत्सवाच्या उत्साही भावनेचा अनुभव घेण्यासाठी पुण्यातील विविध प्रेक्षकांना एकत्र आणले.  हा कार्यक्रम रोटरी क्लब, कोरेगाव पार्क अध्यक्षा श्रीमती. शानी नौशाद आणि रोटरी क्लब, पुणे सेंट्रल अध्यक्षा श्रीमती. लेखा नायर यांच्या नियोजनाने कार्यक्रम यशस्वी करण्यात आला.

या कार्यक्रमाचे उद्घाटन बिशप नरेश अंबाला, गुरूजी बाळकृष्ण जोशी, ज्ञानी अमरजीत सिंग, मौलाना डॉ. शबीह अहसान काझमी, पुजारी बालचंद बठीजा या पाच वेगवेगळ्या समुदायातील मान्यवर धार्मिक प्रमुखांच्या हस्ते करण्यात आले. जे धर्मनिरपेक्षता, सौहार्द आणि परस्पर आदराचे प्रतीक आहेत. विशेष म्हणजे रोटरीच्या शांतीच्या प्रोत्साहनाच्या मार्गावर वाढत्या विभाजनाचा सामना करत असलेल्या जगात, या उत्सहाच्या उद्घाटनाने एकता आणि सहअस्तित्वाचे महत्त्व अधोरेखित केले.

दिवसभर, पाहुण्यांनी केरळच्या समृद्ध वारशाचे सुंदरपणे प्रदर्शन करणाऱ्या रंगीत सांस्कृतिक कार्यक्रमांचा आनंद घेतला – ज्यामध्ये पारंपारिक नृत्य प्रकार, संगीत आणि पूकलम प्रदर्शनांचा समावेश होता. केरळच्या शेफनी विचारपूर्वक तयार केलेला प्रामाणिक ओणम साध्या हा मुख्य आकर्षण होता, ज्यामध्ये सर्व उपस्थितांना आनंद झाला.

 या कार्यक्रमाने केवळ ओणमच्या परंपरा यशस्वीरित्या साजरे केल्या नाहीत तर हा सण एकता आणि समावेशकतेचे एक अद्वितीय प्रतीक आहे हा संदेशही बळकट केला. उपस्थितांनी उबदार वातावरण, उत्सवाची भावना आणि समुदायांमध्ये जोडण्याची संधी यांचे कौतुक केले.

पुणे, दि. १५ : समृद्धी महामार्गावरील अपघात कमी करण्यासाठी मर्सिडीज कंपनीने घेतलेला पुढाकार हा अत्यंत स्तुत्य उपक्रम असून इतर संस्थांनी देखील त्यांचा आदर्श घ्यावा, असे प्रतिपादन परिवहन मंत्री प्रताप सरनाईक यांनी केले. ते आज चाकण येथे मर्सिडीज कंपनीच्या शिष्टमंडळाशी झालेल्या चर्चेनंतर बोलत होते.

मंत्री सरनाईक म्हणाले की, “रोड हिप्नोसिस” (रोड संमोहन) ही अवस्था अनेकदा अपघातास कारणीभूत ठरते. ही अवस्था टाळून अपघाताचे प्रमाण कमी करण्यासाठी मर्सिडीज कंपनीने समृद्धी महामार्ग पुढील तीन वर्षांसाठी दत्तक घेतला आहे. या उपक्रमांतर्गत चालकांना प्रशिक्षण देणे, अपघात प्रवण क्षेत्रांवर दिशादर्शक लावणे, अपघातग्रस्तांना तात्काळ मदत मिळण्यासाठी जवळपासच्या ट्रॉमा सेंटरची साखळी निर्माण करणे, तसेच चालकांना मार्गदर्शन करणे या उपाययोजना करण्यात येत आहेत. या माध्यमातून कंपनीने राज्याच्या रस्ता सुरक्षा अभियानात मोलाचे योगदान दिले आहे, असे त्यांनी नमूद केले.

यावेळी मंत्री सरनाईक यांनी मर्सिडीज कंपनीच्या प्रतिनिधींशी राज्याच्या ई-वाहन धोरणाबाबत चर्चा केली. भविष्यात कंपनीने ई-वाहन क्षेत्रामध्ये भरारी घ्यावी, अशा सदिच्छाही त्यांनी व्यक्त केल्या.

मुंबई, दि. १५ सप्टेंबर २०२५ : महाराष्ट्राचे नवनियुक्त राज्यपाल मा. आचार्य देवव्रत यांचा शपथविधी सोहळा आज राजभवन, मुंबई येथील दरबार हॉलमध्ये पार पडला. सकाळी ११.०० वाजता झालेल्या या शपथविधी प्रसंग मुख्यमंत्री देवेंद्र फडणवीस, उपमुख्यमंत्री एकनाथ शिंदे, विधानपरिषद सभापती राम शिंदे, विधानसभा अध्यक्ष राहुल नार्वेकर, विधानपरिषद उपसभापती डॉ. नीलम गोऱ्हे, मंत्री मंगल प्रभात लोढा, मंत्री माणिकराव कोकाटे आणि राज्यातील मान्यवर उपस्थित होते.

या वेळी विधानपरिषद उपसभापती डॉ. नीलम गोऱ्हे यांनी राज्यपाल आचार्य देवव्रत यांना डॉ. जयसिंगराव पवार लिखित राजर्षी शाहू छत्रपती पुस्तक व पुष्पगुच्छ देऊन हार्दिक अभिनंदन केले. नव्या जबाबदारीसाठी त्यांनी राज्यपालांना शुभेच्छा दिल्या आणि महाराष्ट्राच्या प्रगतीसाठी त्यांचे कार्य फलदायी ठरो, अशी सदिच्छा व्यक्त केली.

राज्यपाल शपथविधी सोहळा ही घटना लोकशाही परंपरेतील एक महत्त्वाची पायरी असल्याचे प्रतिपादन करताना डॉ. नीलम गोऱ्हे यांनी त्यांच्या नेतृत्वामुळे राज्याच्या शासनव्यवस्थेत नवी ऊर्जा आणि दिशा निर्माण होईल, असा विश्वास व्यक्त केला.

पुणे-भारत फोर्ज लिमिटेड अभिमानाने जाहीर करत आहे की त्यांचे अध्यक्ष आणि व्यवस्थापकीय संचालक श्री. बाबा कल्याणी यांना अमेरिकन सोसायटी ऑफ मेकॅनिकल इंजिनिअर्स (ASME) कडून अत्यंत प्रतिष्ठेचे हॉले मेडल प्रदान करण्यात आले आहे. सर्वसामान्य लोकांच्या भल्यासाठी अभियांत्रिकी नाविन्यपूर्णता क्षेत्रातील सर्वाधिक सन्माननीय जागतिक मान्यतापैकी एक असा हा सन्मान आहे.

ASME हॉले अवार्डला 1924 मध्ये सुरुवात झाली. या सन्मानाद्वारे एक किंवा अधिक व्यक्तींनी एकाच कामगिरीतून लक्षणीय आणि समयोचित अशा सर्वसामान्य लोकांच्या भल्यासाठी केलेल्या उत्कृष्ट आणि अद्वितीय अभियांत्रिकी कार्याची दखल घेतली जाते.

सध्याच्या वाढलेल्या अमेरिकन टॅरीफच्या परिस्थितीत या सन्मानाला विशेष महत्त्व आहे. भारत फोर्ज अमेरिकेत आणि जागतिक स्तरावर अभियांत्रिकी-आधारित मूल्यनिर्मितीद्वारे व्यापारातील बदलत्या घडामोडींना कसे सामोरे जात आहे हे यातून अधोरेखित होते. प्रगत उत्पादनाचे स्थानिकीकरण करून आणि स्थानिक उद्योगांच्या गरजा पूर्ण करून भारत फोर्ज श्री. कल्याणी यांचा  मजबूत पुरवठा साखळी निर्माण करण्याचा आणि राष्ट्रीय कार्यक्षमतेत योगदान देण्याचा दृष्टीकोन प्रतिबिंबीत करत आहे.

हा सन्मान केवळ श्री. कल्याणींच्या नेतृत्वाचा गौरव करत नाही तर अमेरिकेच्या औद्योगिक परिसंस्थेला बळकटी देण्यात मूळच्या भारतीय अभियांत्रिकी उत्कृष्टतेची भूमिकाही अधोरेखित करतो. यातून भारत फोर्जच्या अमेरिकेशी असलेल्या दीर्घकालीन संबंधांना अधोरेखित केले जात असून आव्हानात्मक कठीण व्यापारचक्रात देखील सीमापार सहयोग कसा फुलू शकतो याचे हे द्योतक आहे.

नव संशोधनासाठी उच्च व तंत्रशिक्षण देणाऱ्या संस्थेला स्वायतत्ता देणे ही काळाची गरज – मुख्यमंत्री देवेंद्र फडणवीस

▪️ सीओईपी जीवन गौरव व अभिमान पुरस्कारांचे वितरण

पुणे, दि. १४ सप्टेंबर: देशातील उच्च व तंत्रशिक्षण देणाऱ्या संस्थांना नव संशोधन आणि सक्षम मनुष्यबळ निर्माण करण्यासाठी स्वायतत्ता देणे ही काळाची गरज असून त्यादृष्टीने केंद्र व राज्य पातळीवर शासनातर्फे प्रयत्न सुरू असल्याचे प्रतिपादन मुख्यमंत्री देवेंद्र फडणवीस यांनी केले.

सीओईपी तंत्रज्ञान विद्यापीठात ग्रंथालय व संगणक अभियांत्रिकीच्या नूतन इमारतीचे उद्घाटन व अभियांत्रिकी दिनानिमित्त आयोजित ‘सीओईपी अभिमान पुरस्कार’ सोहळ्याप्रसंगी मुख्यमंत्री श्री. फडणवीस बोलत होते. यावेळी उच्च व तंत्रशिक्षण मंत्री चंद्रकांतदादा पाटील, सीओईपी तंत्रज्ञान विद्यापीठाचे कुलगुरू सुनील भरुड, कुलसचिव डॉ. दयाराम सोनवणे, माजी संचालक शैलेश सहस्त्रबुद्धे, माजी विद्यार्थी संघटनेचे अध्यक्ष भरत गीते, सचिव सुजीत परदेशी आदी उपस्थित होते.

मुख्यमंत्री फडणवीस म्हणाले, स्वायतत्ता मिळाल्यामुळे सीओईपीसारख्या संस्था जागतिक स्तरावर भागीदारी करू शकतील, तंत्रज्ञान देवाण-घेवाण व सहयोगी संशोधन करू शकतील. यामुळे महाराष्ट्राची ३ ट्रिलियन आणि भारताची ५ ट्रिलियन अर्थव्यवस्थेकडे वाटचाल करताना सक्षम मानव संसाधनाचा सेतू उभा राहील. आगामी काळात अधिकाधिक संस्थांना स्वायतत्ता देण्याचा राज्य शासनाचा धोरणात्मक निर्णय आहे,असे मुख्यमंत्री श्री. फडणवीस यांनी स्पष्ट केले.

ते म्हणाले, सीओईपी तंत्रज्ञान विद्यापीठाच्या विस्तारासाठी चिखली येथे २८ एकर जागा दिली आहे. अशा संस्थांना अधिक सक्षम करण्यासाठी शासन स्तरावरून मदत केली जाईल. तसेच संशोधन उभारण्यासाठी आवश्यक निधी उपलब्ध करून दिला जाईल. भारतातील प्रतिष्ठित आणि ज्येष्ठ संस्था म्हणून सीओईपीकडे बघितले जाते. या संस्थेला १७२ वर्षांचा इतिहास असून २०२८ मध्ये संस्थेला १७५ वर्षे पूर्ण होणार आहेत. हा भारताच्या शैक्षणिक इतिहासातील विलक्षण प्रवास आहे. सीओईपीमधून शिक्षण घेऊन आज विविध क्षेत्रात माजी विद्यार्थी कार्यरत असून समाजातील सर्व क्षेत्रांना समृद्ध करण्याचे कार्य ते करत आहेत.

मुख्यमंत्री पुढे म्हणाले, १९९० च्या संगणकीकरणाच्या काळात अनेक शंका-कुशंका निर्माण झाल्या होत्या, मात्र हळूहळू मानव संसाधनाची निर्मिती होत गेली, भारतीय तरुणांनी सिलीकॉन व्हॅली व्यापली. माहिती तंत्रज्ञानाच्या क्षेत्रात आपली क्षमता दाखवून दिल्यामुळे भारताकडे जागतिक पातळीवर बघण्याचा दृष्टीकोन बदलला. त्याचे सर्व श्रेय अभियंत्यांनाच जाते. कृत्रिम बुद्धिमत्ता आणि कम्प्युटिंगमुळे आज जगात वेगाने बदल होत आहेत. या बदलांसोबतच नवनवीन संधी निर्माण होत असून हॅकेथॉनसारख्या उपक्रमांतून त्याची झलक दिसते. पुण्यातील कृषी हॅकेथॉनमध्ये बदलत्या हवामानामुळे उद्भवणाऱ्या नव्या किडींवर मात करण्यासाठी एआयच्या साहाय्याने अंदाज दर्शविणारे मॉडेल विकसित झाले असून हे निश्चितच आशादायक आहे.

तांत्रिक संस्था व अभियांत्रिकी महाविद्यालयांनी बदलत्या तंत्रज्ञानानुसार मानव संसाधन तयार करण्यासाठी पुढाकार घ्यावा. नवीन शैक्षणिक धोरण पारंपरिक विषयांना आधुनिकतेसह नव्या संधी उपलब्ध करून देत असल्याने तरुणाई हा बदल स्वीकारेल अशी आशाही मुख्यमंत्र्यांनी व्यक्त केली.

मंत्री चंद्रकांतदादा पाटील म्हणाले, देशाचे प्रधानमंत्री नरेंद्र मोदी यांच्या नेतृत्वाखालील नवीन शैक्षणिक धोरणात भारतीय ज्ञानपरंपरेचा समावेश झाला आहे. यामध्ये संशोधन, पेटंट व रॉयल्टी यावर भर देण्यात आला आहे. २०४७ मध्ये विकसित भारतामध्ये या बाबींचे योगदान महत्त्वाचे राहील. सीओईपीसारख्या संस्थांचे बळकटीकरण करण्यास शासन सहकार्य करेल.

मुख्यमंत्र्यांच्या हस्ते जीवन गौरव व सीओईपी गौरव पुरस्कार वितरण
मुख्यमंत्री देवेंद्र फडणवीस यांच्या हस्ते यंदाचा जीवन गौरव पुरस्कार ए.आर.डी.ई.च्या माजी शास्त्रज्ञ श्रीमती वसंथा रामास्वामी यांना देण्यात आला. सीओईपी अभिमान पुरस्कार विलास जावडेकर डेव्हलपर्स, पुणेचे संस्थापक व अध्यक्ष विलास जावडेकर, एएसएमईचे माजी अध्यक्ष डॉ. महांतश हिरेमठ, स्ट्रडकॉम कन्सल्टंट्स प्रा. लि.चे व्यवस्थापकीय संचालक जयंत इनामदार, जेएनपीएचे अध्यक्ष उमेश वाघ , इलेक्ट्रोमेक मटेरियल हँडलिंग सिस्टीम्स प्रा. लि.चे व्यवस्थापकीय संचालक तुषार मेहेंदळे आणि महाराष्ट्र मेट्रो रेल कॉर्पोरेशन लि.चे व्यवस्थापकीय संचालक श्रवण हार्डीकर यांना प्रदान करण्यात आला.

कार्यक्रमाचे प्रास्ताविक माजी विद्यार्थी संघटनेचे अध्यक्ष भरत गीते यांनी केले. कुलगुरू सुनील भरुड यांनी विद्यापीठाची माहिती दिली.

ग्रंथालय व संगणक अभियांत्रिकी विभागाच्या नूतन इमारतीचे उद्घाटन

सीओईपी तंत्रज्ञान विद्यापीठातील नव्याने बांधलेल्या ग्रंथालय व संगणक अभियांत्रिकी विभागाच्या इमारतीचे उद्घाटन मुख्यमंत्र्यांच्या हस्ते झाले.
१५० वर्षांचा अभिमानास्पद वारसा असलेले केंद्रीय ग्रंथालय आता आधुनिक, विशेष उद्देशाने उभारलेल्या इमारतीत स्थलांतरित झाले आहे. हे ग्रंथालय ४ हजारपेक्षा अधिक विद्यार्थ्यांच्या ज्ञानार्जनाची गरज भागवेल. येथे गेल्या शतकातील मौल्यवान साहित्य, संदर्भग्रंथांचे जतन, आधुनिक डिजिटल साधने, सहयोगी अध्ययन व संशोधनासाठी आवश्यक सुविधा उपलब्ध करून देण्यात आल्या आहेत.
नवीन संगणक अभियांत्रिकी विभाग अत्याधुनिक प्रयोगशाळा व पायाभूत सुविधांनी सुसज्ज असून नाविन्यपूर्ण संशोधन आणि उदयोन्मुख तंत्रज्ञानातील नवकल्पनांचे केंद्र ठरणार आहे.

राष्ट्रीय लोकअदालतीत एकाच दिवशी सुमारे दीड लाख प्रकरणे निकाली–पुणे जिल्हा राष्ट्रीय लोकअदालतमध्ये राज्यात अव्वल

एकूण १३५ पॅनेलच्या माध्यमातून कामकाज

पुणे, १४ सप्टेंबर: प्रमुख जिल्हा व सत्र न्यायाधीश तथा पुणे जिल्हा विधी सेवा प्राधिकरणाचे अध्यक्ष एम.के. महाजन यांच्या मार्गदर्शनाखाली शनिवारी (१३ सप्टेंबर) जिल्हा व सत्र न्यायालयाच्या अशोका सभागृहामध्ये आयोजित राष्ट्रीय लोकअदालतमध्ये तडजोडीसाठी दाखल २ लाख ४३ हजार ४२४ प्रकरणांपैकी १ लाख २७ हजार ५४१ प्रकरणे आणि विशेष मोहिमेत १७ हजार ५६० याप्रमाणे १ लाख ४५ हजार १०१ प्रकरणे यशस्वीपणे निकाली काढत पुणे जिल्हा राज्यात अव्वल ठरला आहे, या माध्यमातून ६६५ कोटी ४४ लाख ८१ हजार ६२१ रुपये तडजोड शुल्क वसूल करण्यात आले.

प्रमुख जिल्हा व सत्र न्यायाधीश महेंद्र के. महाजन यांच्या हस्ते लोकअदालतचे उद्धघाटन करण्यात आले. या उपक्रमास मुंबई उच्च न्यायालयाचे न्यायाधीश रेवती डेरे-मोहिते आणि संदीप मारणे यांनी दुरदृष्यप्रणालीद्वारे शुभेच्छा दिल्या.

दाखल-पूर्व प्रकरणाला मोठे यश
लोकअदालतमध्ये दाखल-पूर्व प्रकरणाला मोठे यश प्राप्त झाले असून एकूण ९८ कोटी २५ लाख ६२ हजार ३९४ रक्कम तडजोडीपोटी जमा झाले आहेत. यामध्ये दाखल पूर्व (प्रि-लिटिगेशन) १ लाख ८४ हजार ७४४ दाखल प्रकरणांपैकी १ लाख ३ हजार ६६ प्रकरणे यशस्वीपणे निकाली काढण्यात आली आहेत. याशिवाय तडजोडीसाठी घेण्यात आलेल्या एकूण ५८ हजार ६८० दाखल दाव्यापैकी (पोस्ट लिटिगेशन) २४ हजार ४७५ प्रकरणे यशस्वीपणे निकाली काढण्यासह विशेष मोहिमेंतर्गत १७ हजार ५६० प्रलंबित प्रकरणे निकाली काढण्यात आली. यामध्ये ५६७ कोटी १९ लाख १९ हजार २२७ रुपये तडजाेड वसूल शुल्क करण्यात आले आहे.

लोक अदालतीमध्ये बँकेचे कर्जवसूली ५० हजार ३८०, तडजोड पात्र फौजदारी १८ हजार ३७४, वीज देयक १६२, कामगार विवाद खटले ७, भुसंपादन ३७, मोटार अपघात दावे न्यायाधिकरण ३५, वैवाहिक विवाद ६८, निगोशिएबल इन्स्ट्रूमेंट ॲक्ट २ हजार ४, इतर दिवाणी ४६३, महसूल १ हजार ३७६, पाणी कर ४८ हजार १६७, ग्राहक विवाद ५ आणि इतर ६ हजार ४६३ प्रकरणे निकाली काढण्यात आली आहेत.एकूण १३५ पॅनेलच्या माध्यमातून कामकाज करण्यात आले.

एम.के. महाजन, प्रमुख जिल्हा व सत्र न्यायाधीश: लोक अदालत ही केवळ वाद निपटाऱ्याची पद्धत नसून ती एक लोकाभिमुख चळवळ आहे. लोक अदालत ही न्यायव्यवस्थेवरचा विश्वास दृढ करते. लोक अदालतीमध्ये ठेवण्यात आलेल्या प्रकरणांचा विक्रमी निपटारा हा सर्व घटकांच्या एकत्रित प्रयत्नांचे फलित आहे.

श्रीमती सोनल पाटील, सचिव, जिल्हा विधी सेवा प्राधिकरण: या ऐतिहासिक यशामागे सर्व न्यायमूर्ती, वकीलवृंद, न्यायालयीन कर्मचारी आणि स्वयंसेवकांचे अथक योगदान आहे. लोक अदालतीत एकाच दिवशी सुमारे एक लाख ४५ हजार प्रकरणांचा निपटारा होणे ही एक उल्लेखनीय कामगिरी आहे. हा उपक्रम यशस्वी करण्याकरिता पुणे महानगरपालिका आयुक्त नवल किशोर राम, पुणे शहर पोलीस आयुक्त अमितेश कुमार, पिंपरी-चिंचवड महानगर पालिका आयुक्त शेखर सिंह, जिल्हा परिषदेचे मुख्य कार्यकारी अधिकारी गजानन पाटील यांच्यासह न्यायमूर्ती, वकीलगण, पक्षकार, न्यायालयीन कर्मचारी, बँक, इतर वित्तीय संस्था आदींचे सहकार्य लाभल्याबद्दल जिल्हा विधी सेवा प्राधिकरणाच्यावतीने आभार व्यक्त करते.

पुणे :  जनरल प्रॅक्टिशनर्स बहुतेक वेळा मल्टीस्पेशालिस्ट असतात. त्यांचे काम सगळ्यात जास्त अवघड असते. आयुर्वेदापासून सुरुवात करत ते अॅलोपथी च्या पुढे आज आले आहेत. अॅलोपथी आणि आयुर्वेद अशी एकात्मक औषधोपचार प्रणाली आपल्याला हवी आहे. जनरल प्रॅक्टिशनर्स हे शक्य करतील, असे मत पुणे महापालिकेच्या आरोग्यप्रमुख डाॅ. नीना बोराडे यांनी व्यक्त केले.

जनरल प्रॅक्टिशनर्स असोसिएशन व जनरल प्रॅक्टिशनर्स प्रियदर्शिनी यांच्या वतीने महिला परिषद व लेडी जीपी ऑफ द इयर पुरस्कार समारंभा चे आयोजन टिळक रस्त्यावरील मराठा चेंबर ऑफ कॉमर्सच्या सभागृहात करण्यात आले होते. डॉ. रूपा अगरवाल यांना लेडी जीपी ऑफ द इयर पुरस्काराने सन्मानित करण्यात आले.  यावेळी प्रमुख पाहुण्या म्हणून पहिल्या महिला लॅप्रोस्कोपिक सर्जन डॉ. ज्योत्स्ना कुलकर्णी, जनरल प्रॅक्टिशनर्स असोसिएशनचे अध्यक्ष डॉ. सुनील भुजबळ, असोसिएशनच्या सचिव डॉ. भाग्यश्री मुनोत-मेहता, प्रियदर्शिनीच्या अध्यक्षा डॉ. मनीषा खेडकर, सह-अध्यक्षा डॉ. रश्मी खैरनार व डॉ. अमृता महाजन, सचिव डॉ. सीमा पाटील व डॉ. हर्षला बाबर तसेच संयुक्त सचिव डॉ. सयानी गांधी व डॉ. तेजश्री गुरव उपस्थित होत्या.

कार्यक्रमाच्या सुरुवातीला डॉ. अमोल लुंकड यांनी पीसीओएस विषयावर मार्गदर्शन केले. त्यानंतर डॉ. मधुसूदन असावा यांनी हृदय व महिला आरोग्य या विषयावर माहिती दिली. सीए रोहन गुप्ता यांनी आर्थिक साक्षरता व महिला यावर मार्गदर्शन केले. डॉ. अमोल लुंकड यांनी शेवटी वंध्यत्वावरील प्रकरणाधारित चर्चा केली.

डॉ. नीना बोराडे म्हणाल्या की, वैद्यकीय क्षेत्रात महिला डॉक्टरांची वाढ फक्त संख्यात्मक नाही तर गुणात्मकही आहे. महिलांचे योगदान मोठे असून संवेदनशीलतेची जोड मिळाल्यास वैद्यकीय सेवा अधिक सुंदर होते. महिला डॉक्टरांमध्ये बाईपणाबरोबर आईपण देखील महत्त्वाचा गुण आहे, आईपण हा विचार, वृत्ती आणि सेवाभाव आहे.  

आज काही डॉक्टर १२ तासांपेक्षा जास्त काम करतात, ज्यामुळे कामाचे तास वाढतात आणि तणावही येतो. त्यामुळे स्वतःची आरोग्य काळजी घेणे आवश्यक आहे. मेंटल हेल्थसाठी डॉक्टरांनी एकत्र येणे गरजेचे आहे. समाजाचे आरोग्य अबाधित ठेवणाऱ्या डॉक्टरांनी स्वतःची देखील काळजी घ्यावी.

डॉ. ज्योत्स्ना कुलकर्णी म्हणाल्या की, ओपन सर्जरीपासून लेप्रोस्कोपीकडे जाणे रुग्णांसाठी मोठा बदल ठरला. आताच्या काळात रोबोटिक शस्त्रक्रियेच्या सहाय्याने अत्यंत अचूकता आणि कौशल्यामुळे क्लिष्ट लेप्रोस्कोपी शस्त्रक्रिया शक्य झाल्या आहेत. रोबोटिक उपकरणांवर खर्च येतो कारण प्रत्येक उपकरणाची ठरलेली जीवनमर्यादा असते. काही खर्च रुग्णाला पास करावा लागतो, पण काळानुसार हा खर्च कमी होईल. सध्या या तंत्रज्ञानामुळे आधी अशक्य वाटणाऱ्या क्लिष्ट शस्त्रक्रिया आता शक्य झाल्या आहेत.

डॉ. सुनील भुजबळ, डॉ. मनीषा खेडकर यांनी मनोगत व्यक्त केले. डॉ. भाग्यश्री मुनोत-मेहता व डॉ. राजेश दोशी यांनी कार्यक्रमाचे सूत्रसंचलन केले. डॉ.राजेश दोषी यांनी आभार मानले.