हैद्राबाद येथील महाअंतिम फेरीत प्रथम क्रमांकसह पटकावले एक लाखाचे पारितोषिक
पुणे (दि. २९ डिसेंबर २०२३) – पिंपरी चिंचवड अभियांत्रिकी महाविद्यालयाच्या इलेक्ट्रॉनिक्स अँड टेलिकम्युनिकेशन विभागाच्या ‘हायड्रोमाइनेक्स’ संघाने भारत सरकारद्वारे आयोजित आणि नल्ला मल्ला अभियांत्रिकी महाविद्यालय, हैद्राबाद, तेलंगणा यांच्या सहकार्याने आयोजित ‘स्मार्ट इंडिया हॅकाथॉन २०२३’ च्या महाअंतिम फेरीत प्रथम पारितोषिक पटकावले.
पीसीईटीच्या संघाने ‘डिफिकल्टी इन ऑपरेटिंग हेवी अर्थ मूव्हिंग मशिनरीज ड्यूरिंग द रेनी सीजन’ या समस्येचा अभ्यास करून अभिनव प्रकल्प सादर केला. या प्रकल्पाला खाण मंत्रालयाच्या अंतर्गत हार्डवेअर प्रकारात एक लाख रुपयांचे पहिले पारितोषिक मिळाले. हायड्रोमाइनेक्स संघाचे नेतृत्व इ ॲण्ड टीसी विभागाच्या कौशल लवांडे याने तर आंचल गुल्हाने, अदिती चंदनवार, प्रथमेश चव्हाण, यश जाधव आणि संगणक विभागातून प्रथमेश चौगले यांचा समावेश होता. एनएमआरसीचे अध्यक्ष नल्ला मल्ला रेड्डी, संचालक डॉ. दिव्या नल्ला, खाण मंत्रालयाचे सदस्य राजेश विंचूरकर, एनएमआरसीचे प्राचार्य डॉ.एम.एन.व्ही. रमेश यांच्या हस्ते विजेत्या संघाला गौरवण्यात आले.
संघ मार्गदर्शक डॉ. वर्षा हरपळे, प्रा. प्रमोद सोनवणे, प्रा. वैशाली पाटील, डॉ. महेश कोलते विभाग प्रमुखांचे पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्षा पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई, पीसीसीओईचे संचालक डॉ. गोविंद कुलकर्णी, उपसंचालक डॉ. नीळकंठ चोपडे यांनी अभिनंदन केले.

पुणे–

येरवडा मध्यवर्ती कारागृहात गुरुवारी दुपारी एका बंद्याचा कात्री आणि दरवाजाच्या बिजागिरीने भोसकून खून करण्यात आला. याप्रकरणी चौघा बंद्याविरुध्द गुन्हा दाखल करण्याचे काम रात्री उशीरापर्यंत सुरु होते. दरम्यान या घटनेने खळबळ उडाली असून कारागृह प्रशासनाच्या कारभारावर प्रश्‍नचिन्ह निर्माण झाले आहे. ललित पाटील प्रकरणामुळे येरवडा कारागृह मागील काही दिवसांपासून चर्चेत आहे. काही महिण्यापूर्वीच एका बंद्याने नाडीने गळफास घेत आत्महत्या केली होती.

महेश महादेव चंदनशिवे ( रा.चखिली, पुणे ) असे खून झालेल्या बंद्याचे नाव आहे. त्याच्या खून प्रकरणी बंदी असलेले अनिकेत श्रीकृष्ण समदुर, महेश तुकाराम माने, आदित्य संभाजी भुरे, गणेश हनुमंत मोटे यांच्याविरुध्द गुन्हा दाखल करण्याचे काम येरवडा कारागृहात सुरु होते. दरम्यान चंदनशिवे याचा मृतदेह ससून रुग्णालयात शवविच्छेदनासाठी आणल्यावर तेथे मोठा पोलिस बंदोबस्त तैनात करण्यात आला होता.

पोलिसांनी दिलेल्या माहितीनूसार चंदनशिवेविरुध्द पिंपरी पोलिस ठाण्यात दरोड्याची तयारी आणि आर्म ॲक्टचा गुन्हा दाखल झाला होता. याप्रकरणी तो 30 नोव्हेंबर 2022 पासून कारागृहात शिक्षा भोगत आहे. गुरुवारी दुपारी सव्वा तीनच्या सुमारास सर्कल नंबर 2 मधील बराक नंबर एकमध्ये आरोपींनी त्याला गाठले. त्याच्यावर हजामकामासाठी वापरण्यात येणारी कैची आणि दरवाजाच्या बीजागरीच्या तुकड्याने मानेवर आणि पोटावर वार केले. गंभीर जखमी चंदनशिवेला कारागृहातील रक्षकांनी तातडीने कारागृह रुग्णालया नेले. तेथे वैद्यकीय अधिकाऱ्यांनी उपचार करुन ससून रुग्णालयात पाठवले. ससून रुग्णालयात उपचारादरम्यान त्याचा मृत्यू झाला.

पुणे- बकाल झालेले, अन गुन्हेगारुने वेढलेले पुण्याचे दक्षिण द्वार आता मद्य विक्रीच्या गैर प्रकारात देखील आघाडीवर असल्याचे दिसून येत असून या परिसरात ओरीजनल मद्य विकण्याऐवजी गोव्याची स्वस्तातील दारू विकून संपत्ती जमविण्याच्या व्यवसायाचा पर्दाफाश आता होऊ लागला आहे.

राज्य उत्पादन शुल्क राज्य आयुक्त विजय सुर्यवंशी , संचालक सुनिल चव्हाण ,यांच्या आदेशान्वये व विभागीय उपआयुक्त श्री. विजय चिंचाळकर तसेच अधीक्षक, राज्य उत्पादन शुल्क, पुणे चरणसिंग राजपूत ,उप-अधीक्षक संजय पाटील यांच्या मार्गदर्शनाखाली निरीक्षक, राज्य उत्पादन शुल्क, एच विभाग, पुणे या विभागाने बिबवेवाडी गावच्या हद्दीत, शिवतेज नगर, अप्पर, बिबवेवाडी, या ठिकाणी छापा घातला असता, सदर ठिकाणी गोवा राज्य निर्मित व विक्रीस परवानगी असलेला परंतू महाराष्ट्र राज्यात विक्री व बाळगण्याकरीता प्रतिबंदीत असलेले विदेशी मद्य १८० मिली क्षमतेचे ९६ सिलबंद बाटल्या एक दुचाकी वाहनासह आढळून आले. सदर आरोपीकडे अधिक चौकशी केली असता सदरचा मुद्देमाल सदरचा मुद्देमाल आरोपी क्र. १ हा त्याच्या स्वतःच्या घरात साठा करुन ठेवला असल्याचे सांगितले, त्यानुसार अप्पर, बिबवेवाडी, पुणे-३७ या ठिकाणी छापा घातला असता सदर ठिकाणी विविध ब्रॅण्डचे ७५० मिलीचे ३६ सिलबंद बाटल्या व १८० मिली क्षमतेचे ४८० सिलबंद बाटल्या (१३ बॉक्स) आढळून आले. सदर आरोपी इसमांना अवैध विदेशी मद्याबद्दल आधिक चौकशी केली असता, सदर गोवा बनावटीचे विदेशी मद्य त्यांनी आरोपी क्र. ३. रा. कात्रज पुणे याच्या राहत्या घरातून दुचाकी/तीनचाकी प्रवासी वाहनाने आणल्याचे सांगितले. त्यांच्या सांगण्यावरुन या कार्यालयाच्या स्टाफसह आरोपी क्र. ३, रा. कात्रज पुणे याच्या राहत्या घरी छापा टाकला असता सदर ठिकाणी गोवा राज्य निर्मित व विक्रीस परवानगी असलेला परंतू महाराष्ट्र राज्यात विक्री व बाळगण्याकरीता प्रतिबंदीत असलेले अवैध विविध ब्रॅण्डचे विदेशी मद्य ७५० मिली क्षमतेचे ८० सिलबंद बाटल्या आढळून आले. आरोपी क्र. ३ च्या सांगण्यावरुन कात्रज, पुणे या ठिकाणी छापा घातला असता सदर ठिकाणी विदेशी मद्याचे विविध ब्रॅण्डचे ७५० मिलीचे ३०१ सिलबंद बाटल्या (२५ बॉक्सेस) तसेच १८० मिली क्षमतेचे ३४८ सिलबंद बाटल्या (७ बॉक्सेस) आढळून आले. तीनही ठिकाणी छापे घातले असता सदर ठिकाणी अवैध विविध ब्रॅण्डचे विदेशी मद्य ७५० मिली क्षमतेचे ४१७ सिलबंद बाटल्या (३५ बॉक्सेस) व १८० मिली क्षमतेचे ८२८ सिलबंद बाटल्या (एकुण १७ बॉक्सेस) असे एकुण (५३ बॉक्सेस), एक होंडा कंपनीची अॅक्टीव्हा दुचाकी वाहन क्र. MH-१२-LY-८५३१ व एक अॅपल कंपनीचा आयफोन मोबाईल असा एकुण अंदाजे किमंत रू.५.८५,८५०/- चा मुद्देमाल जप्त करण्यात आला आहे. सदर गुन्ह्यात निरीक्षक, अशोक एम. कटकम, दुय्यम निरीक्षक प्रशांत दळवी, संजय राणे सी विभागाचे नवनाथ मारकड, विशेष भरारी पथकाचे दुय्यम निरीक्षक प्रियंका राठोड व राहूल खाडगीर सहा. दु.नि. राजेश पाटील जवान सर्वश्री विशाल गाडेकर, माधव माडे, गोपाल कानडे, शरद भोर व महिला जवान शामल शिंदे यांनी सहभाग घेतला आहे. सदर गुन्हयाचा तपास राज्य उत्पादन शुल्क, एच विभागाचे निरीक्षक अशोक एम. कटकम हे करीत आहे.

सदरची कारवाई ३१ डिसेंबर व नववर्षांच्या पार्श्वभूमीवर करण्यात आली असुन अवैध विदेशी मद्य व बिअर वाहतुक व विक्री करणाऱ्यांना विरुध्द कारवाई करण्यासाठी या विभागाने विशेष भरारी पथके तयार केलेली असुन त्यांच्या मार्फत पुणे जिल्ह्यात ठिक ठिकाणी तपासणी करुन कारवाई करण्यात येत आहे.

पुणे बाजार समितीवर संचालक मंडळ आल्यानंतर मांजरी बाजारात खोतीवर स्वस्तात माल घेऊन तेथेच तो चढ्या भावाने विक्री करणार्‍या खोती आणि दुबार शेतमाल विक्रीला बंदी घातली. दुसरीकडे काही संचालकांच्या माणसांनी चक्क हफ्ते घेऊन दुबार शेतमाल विक्री सुरू ठेवल्याची माहिती समोर आली आहे. याबाबतचे ‘गुगल पे’वरून पैसे घेतल्याचे स्क्रीनशॉट व्हायरल झाल्याने बाजारात खळबळ उडाली आहे.

एका बाजूला बाजार समितीचे संचालक सुदर्शन चौधरी दुबार विक्री होऊ नये म्हणून सातत्याने प्रयत्नशील होते. तसेच त्यांनी मोठ्या प्रमाणावर जनजागृती केली होती. पुणे बाजार समितीचा मांजरी बाजार हा शेतकरी ते ग्राहक थेट विक्रीसाठी बाजार उपलब्ध करून दिलेला आहे. या बाजारात खोतीवर स्वस्तात माल घेऊन तेथेच तो चढ्या भावाने विक्री करणारांची साखळी निर्माण झाली होती.

या बाजारात हवेली तालुक्यासह इंदापुर, बारामती, पुणे, पुरंदर, दौंड तालुक्यातील वरवंड, पाटस, खुटबाव, केडगाव, वाखारी, खोर, भांडगाव, खुटबाव, यवत, कासुर्डी, खामगाव, सहजपूर, नांदूर, बोरीऐंदी, डाळिंब, भरतगाव, ताम्हाणवाडीसह नगर रस्त्यावरील शेतकर्‍यांचा शेतमाल बाजारात विक्रीस येतो. एकीकडे शेतकर्‍यांसाठी चांगला निर्णय घेतल्याचे दाखवायचे आणि दुसरीकडे हफ्ते घेण्याचा प्रकार झाल्याने शेतकर्‍यांमध्ये नाराजीचे वातावरण आहे.

बाजार समितीवर संचालक मंडळ निवडुण आल्यानंतर मांजरी बाजारातील प्रकाराबाबत अनेक तक्रारी सुरू झाल्या होत्या. त्यामुळे शेतकर्‍यांना मारक असलेली खोती आणि दुबार शेतमाल विक्रीची प्रथा बंद करण्याचा निर्णय बाजार समितीचे सभापती दिलीप काळभोर आणि संचालक मंडळाने घेतला होता.

त्याची तातडीने काटेकोर अंमलबजावणीही सुरू केल्याचा परिणाम शेतकर्‍यांच्या मालाला चांगला भाव मिळण्यावर झाला. यामध्ये काही कार्यकर्त्यांनी हफ्ते घेत दुबार विक्री सुरू ठेवली. त्यामुळे संचालक मंडळाच्या दुटप्पी भुमीकेमुळे शेतकरी वर्गात प्रचंड नाराजी आहे.

संचालक मंडळाच्या काही माणसांनी चक्क गुगल पेवरून हफ्ते घेण्यास सुरूवात केली होती. एखाद्याने वेळेत हफ्ता न दिल्यास संबंधितांची दुबार विक्री बंद केली जात होती. गुगल पेवरून पैसे दिल्याचे स्क्रीनशॉट बाजारात व्हायरल झाले आहेत. तसेच याबाबतचे चॅटींगही समोर आल्याने खळबळ उडाली आहे.यासंबंधीत पैसे घेतल्याच्या तक्रारी माझ्याकडे आल्या होत्या. त्यानंतर खोती आणि दुबार शेतमाल विक्रीची प्रथा बंद करण्याचा निर्णय घेण्यात आला आहे. निर्णय घेण्याआधीच हा प्रकार घडलेला आहे. अश्या प्रकारच्या तक्रारी प्राप्त झाल्यानंतर त्यांच्यावर कडक कारवाई करण्यात येईल.

– दिलीप काळभोर, सभापती, कृषी उत्पन्न बाजार समिती, पुणे.

पुणे दि. २९ : कौशल्य, रोजगार, उद्योजकता व नाविन्यता विभाग पुणे व सुभाष बाबुराव कुल महाविद्यालय, केडगाव, ता. दौंड यांच्या संयुक्त विद्यमाने सुभाष बाबुराव कुल महाविद्यालय येथे आयोजित पंडीत दीनदयाल उपाध्याय रोजगार मेळाव्यात १०४ उमेदवारांची निवड करण्यात आली.

रोजगार मेळाव्याच्या उद्घाटन प्रसंगी आमदार राहुल कुल, कौशल्य विकास, रोजगार व उद्योजकता व नाविन्यता विभागाचे सहायक आयुक्त सचिन जाधव, परिविक्षाधिन सहायक आयुक्त सागर मोहिते, सुभाष बाबुराव कुल महाविद्यालयाचे प्राचार्य डॉ. नंदकुमार जाधव उपस्थित होते.

रोजगार मेळाव्यासाठी २२३ विद्यार्थ्यांनी नोंदणी केली होती. त्यापैकी उपस्थित १० उद्योजकांनी रोजगार मेळाव्याच्या ठिकाणी उमेदवारांच्या मुलाखती घेतल्या आणि १०४ उमेदवारांची निवड केली. या मेळाव्यात बारावी उत्तीर्ण, पदवीधर, आयटीआय उत्तीर्ण विद्यार्थ्यांनी सहभाग घेतला.

यावेळी प्राचार्य डॉ. जाधव यांनी उपस्थित कंपनी प्रतिनिधींना महाविद्यालयाशी सामंजस्य करार करण्याचे आवाहन करून महाविद्यालयातून प्रशिक्षित मनुष्यबळ निर्माण करण्यासाठी उद्योगक्षेत्राने पुढाकार घ्यावा, असे सांगितले. श्री. जाधव यांनी नोकरीच्या संधीची माहिती दिली.

पुण्यातील कात्रज बोगद्यात मोठा अपघात झाला आहे. या बोगद्यात पाच गाड्या एकमेकांना धडकल्या आहेत. बोगद्यातील गाड्या बाजूला काढण्याचे काम सुरू आहे. घटनेची माहिती मिळताच वाहतूक पोलिस घटनास्थळी दाखल झाले आहेत.

दरम्यान अपघातानंतर बोगद्यातील गाड्या बाजूला काढण्याचे काम सुरू आहे. घटनास्थळी वाहतूक पोलिस दाखल झाले आहेत. सध्या दोन्ही बाजूंनी वाहनांच्या रांगा लागलेल्या आहेत. साताऱ्यावरून मुंबईच्या दिशेने गाड्या जात होत्या. त्याचवेळी बोगद्यात अचानक एका वाहनाने ब्रेक लाव्याने पाठीमागून येणाऱ्या गाड्या एकमेकांना धडकल्या. या अपघातात एक महिला जखमी झाली आहे.

शिवसेनेच्या सत्ताधारी शिंदे गटाने महाराष्ट्र नवनिर्माण सेनेचे अध्यक्ष राज ठाकरे यांच्यापुढे मैत्रीचा हात पुढे केला आहे. राज ठाकरे आमच्यासोबत आले तर महाराष्ट्राच्या राजकारणात मोठा बॉम्बस्फोट होऊन महायुतीला लोकसभेच्या 45 हून अधिक जागा मिळतील, असे शिंदे गटाचे आमदार संजय शिरसाट यांनी म्हटले आहे.

लोकसभेच्या 45 जागा जिंकायच्या असतील तर राज ठाकरे महायुतीत आले पाहीजे असे विधान शिंदे गटाचे प्रवक्ते आमदार संजय शिरसाट यांनी व्यक्त केले आहे. तर मुख्यमंत्री आणि राज ठाकरे यांची ही सहावी भेट आहे. राजकीय चर्चा झाली नाही, अशा बातम्या समोर आल्या. पण माझे मत आहे की, राजकीय चर्चा झाली पाहीजे असेही त्यांनी यावेळी बोलताना म्हटले आहे.

दरम्यान संजय शिरसाट पुढे बोलताना म्हणाले की,आगामी लोकसभा निवडणुकीत संपूर्ण ताकदीने आम्हाला विजय मिळवायचा आहे. राज ठाकरे हे लोकनेते आहेत. त्यांच्या सभांना लाखोंची गर्दी होते. भाजपा, शिवसेना (शिंदे गट) आणि राज ठाकरे यांची ताकद एकत्र आली तर लोकसभेत 45 हून अधिक जागा जिंकणे अवघड नाही. जानेवारी महिन्यात जेव्हा महायुतीची जागावाटपाची चर्चा होईल, तेव्हा या मुद्द्यावरही चर्चा होईल, असा माझा अंदाज आहे.

निकालाची आम्हाला चिंता नाही

संजय शिरसाट म्हणाले की, 10 जानेवारीच्या निकालाची आम्हाला चिंता नाही. आम्ही सर्व कायदेशीर प्रक्रिया पूर्ण केलेली आहे. या प्रकरणाचा निकाल आमच्या बाजूने लागणार याचा आम्हाला पूर्ण विश्वास आहे.एकनाथ शिंदेंचा दौरा सहा जानेवारीपासून सुरू होणार आहे. 11 जानेवारीला छत्रपती संभाजीनगरला सभा येणार आहे. मुख्यमंत्री एकनाथ शिंदेचा हा कार्यकर्ता मेळावा असून जाहीर सभा नाही. आगामी लोकसभेच्या पार्श्वभूमीवर कार्यकर्त्यांना मार्गदर्शन करण्यात येण्यात येणार. या मेळाव्याला जाहीर सभेचे स्वरुप देण्यात येणार नाही, असेही शिरसाट म्हणाले. आगामी काळातील युतीची नांदी अशी जोरदार चर्चा सध्या राजकीय वर्तुळात पुन्हा एकदा रंगू लागली आहे. बंद दाराआड झालेल्या या चर्चेमुळे पुन्हा एकदा राजकीय वर्तुळात चर्चांना उधाण आले आहे.