पुणे- वारजे येथील माई मंगेशकर रुग्णालय, NDA चौक,आंबेडकर चौकाची आणि सर्व्हिस रस्त्यांची व रस्त्यांवर होणाऱ्या वाहतूक कोंडीची पाहणी खासदार सुप्रिया सुळे आणि महापालिका आयुक्त नवल किशोर राम यांनी सोबतीला स्वप्नील दुधाने आणि सचिन दोडके यांना घेऊन केली .याबाबत खासदार सुळे म्हणाल्या,’वारजे येथील चर्च जवळील सेवा रस्त्याची पुणे महापालिका आयुक्त नवल किशोर राम यांच्यासोबत पाहणी केली. वारजे येथील माई मंगेशकर रुग्णालय, NDA चौक आणि त्यापुढील परिसरात होणारी वाहतूक कोंडी टाळण्यासाठी या ठिकाणी एकात्मिक दुमजली उड्डाणपूल प्रस्तावित आहे. त्याचबरोबर पर्यायी मार्ग म्हणून सर्व्हिस रस्ते रुंद करावेत आणि वारजे येथील चर्चजवळील सर्व्हिस रस्त्याचे रुंदीकरण नियोजित वेळेत पूर्ण करावे, अशी मागणी केली. आयुक्तांनी याबाबत सकारात्मक प्रतिसाद दिला.वारजे येथील आंबेडकर चौकाची पुणे महापालिका आयुक्त नवल किशोर राम यांच्यासोबत पाहणी केली. आंबेडकर चौक ते चौधरी विठ्ठल मंदिर दरम्यान उड्डाणपुलाचे काम नियोजित वेळेत पूर्ण व्हावे, यासाठी आवश्यक त्या उपाययोजना करण्यात याव्यात, अशी मागणी यावेळी केली. यावेळी आयुक्तांनी याबाबत सकारात्मक प्रतिसाद दिला.

दुधाने यांनी सांगितले कि,’आपल्या प्रभाग क्र. ३० कर्वेनगर-हिंगणे होम कॉलनी या ठिकाणी मुख्य NDA रोड येथील भारतरत्न डॉ. बाबासाहेब आंबेडकर चौक येथे गेल्या अनेक दिवसांपासून वाहतूक कोंडीचा नागरिकांना सामना करावा लागत आहे. या मुख्य चौकातून अनेक नागरिक वाहतूक करत असून सकाळी आणि सायंकाळी होणाऱ्या या कोंडीवर मनपातर्फे कार्यवाही केली जावी, अशी वेळोवेळी संवाद साधत मागणी केली करीत आलो आहे, तसेच वेळप्रसंगी आंदोलनही करत प्रशासनाचे लक्ष वेधून घेतले आहे.या मागणीला प्रशासनाने अपेक्षित प्रतिसाद न दिल्याने सदर समस्या अधिकच जटील बनत गेली आहे. या अनुषंगाने गेल्या पंधरा दिवसांपूर्वी खा. सुप्रियाताई सुळे यांच्यातर्फे मनपा आयुक्त यांच्याकडे सदर समस्येवर उपाययोजना करण्यात यावी, यासाठी वेळ मागितली होती. आज सुप्रियाताई यांच्या सोबत मनपा आयुक्त नवलकिशोर राम आणि अतिरिक्त मनपा आयुक्त ओमप्रकाश दिवटे यांच्यासमवेत सविस्तर चर्चा केली.

यावेळी त्यांना प्रत्यक्ष ठिकाणी नेऊन परिस्थितीचे गांभीर्य ध्यानात आणून दिले असून सदर चौकातून प्रस्तावित मेट्रो रूट असल्याने मेट्रोचे अधिकारी – पणे मनपा पथ विभागाचे अधिकारी – पणे मनपा प्रकल्प विभागाचे अधिकारी यांची एकत्रित महत्वपूर्ण बैठक आयोजित करण्यात यावी, अशी मागणीही करण्यात आली. सदर बैठकीमध्ये रस्त्यांचे काम करणारा मनपाचा पथ विभाग, शहरातील उड्डाणपुलांचे काम करणारा प्रकल्प विभाग आणि मेट्रो विभाग यांनी उपस्थित राहून एकमेकांशी समन्वय साधत सदर विषयावर सूचना घेऊन पुढील उपाययोजना करिता त्वरित हालचाली चालू करण्यात याव्यात अशी विनंती केली.याप्रसंगी खा. सुप्रिया आणि अधिकारी वर्गाने सकारात्मक प्रतिसाद दिला असून लवकरच सदर बैठक आयोजित करत यावर विचारविनिमय केला जाईल, अशी ग्वाही दिली. येत्या काळात सदर समस्या अधिक उग्र स्वरूप प्राप्त करणार असून ही परिस्थिती टाळण्यासाठी दुभाजक, उड्डाणपूल याचसह सर्वच गोष्टींचा विचार करत निर्णय घ्यावा, अशी मागणी करण्यात आली. या समस्याचे गांभीर्य लक्षात घेऊनसुप्रिया ताईंनी यामध्ये पुढाकार घेतला, याबद्दल त्यांचे मनःपूर्वक धन्यवाद आणि प्रशासन लवकरच यावर योग्य ती कार्यवाही करेल, अशी अपेक्षा आहे यावेळी माझे सहकारी मित्र माजी नगरसेवक सचिन दोडके, अनिताताई इंगळे, त्र्यंबक अण्णा मोकाशी, प्रमोदजी शिंदे, किशोरजी शेडगे, वैभवजी कोठुळे उपस्थित होते

पुणे येथे महाराष्ट्र राज्य कृषी पणन मंडळ संचालक मंडळाची बैठक संपन्न

पुणे, दि.१७ सप्टेंबर- राज्यातील फळे, भाजीपाला व इतर शेतमाल निर्यात वृध्दी करून शेतकऱ्यांचे आर्थिक सक्षमीकरण करण्यासाठी राज्य सरकार प्रयत्नशील आहे, शेतमालाचे नुकसान टाळण्यासाठी अत्याधुनिक तंत्रज्ञानाचा वापर करण्यात यावा. भाजीपाला व फळे निर्यात करण्यासाठी जगात ज्या बाजारपेठेत मागणी त्याचा अभ्यास करून तेथे निर्यात करण्यासाठी सुविधा केंद्रांनी तत्परतेने काम करावे. भौगोलिक मानांकनानुसार राज्यातील फळांचे ब्रँडिंग करावे.निर्यात मार्गदर्शन केंद्र सुरू करण्यात यावे. राज्यातील निर्यात सुविधा केंद्र सक्षम करून ही सुविधा केंद्रे पूर्ण क्षमतेने २४x७ सुरु ठेवावेत, असे निर्देश राज्याचे पणन मंत्री जयकुमार रावल यांनी दिले.

पुणे येथील महाराष्ट्र राज्य कृषी पणन मंडळ संचालक मंडळाच्या बैठकीत ते बोलत होते. यावेळी आमदार चरणसिंग ठाकूर, महाराष्ट्र राज्य बाजार समिती सहकारी संघाचे सभापती प्रविणकुमार नहाटा, दोडाईचा कृषी उत्पन्न बाजार समितीचे सभापती नारायण पाटील, मलकापूरचे संजय काजळे-पाटील, सहकार आयुक्त दीपक तावरे, विपणन व तपासणी संचालनालयाचे विपणन अधिकारी व्ही. एस. यादव, कृषी पणन संचालक विकास रसाळ, महाराष्ट्र राज्य कृषी पणन मंडळाचे कार्यकारी संचालक संजय कदम, मुख्य व्यवस्थापक विनायक कोकरे, नाबार्डचे उप महाप्रबंधक हेमंत कुंभारे आदी उपस्थित होते.

श्री. रावल म्हणाले, शेतकऱ्यांच्या शेतमालाला स्पर्धात्मक दर देण्यासाठी जागतिक बाजार व्यवस्थेचा अभ्यास करावा.राज्यात उत्पादित होणाऱ्या फळे व भाजीपाला उत्पादनाला जगाच्या बाजारपेठेत जेथे मागणी असेल तेथे निर्यात करण्यासाठी सुविधा केंद्रांनी तत्परतेने काम करावे.तसेच पणन सुविधा सक्षम करून प्रभावीपणे काम करणाऱ्या राज्यातील कृषी उत्पन्न बाजार समित्यांच्या पाठीशी सरकार सक्षमपणे उभे आहे. अशा बाजारसमित्यांना अधिक काम करण्यासाठी प्रोत्साहित करण्यात येईल.बाजार समितीच्या क्षेत्रीय पीकपद्धती, त्यादृष्टीने उपलब्ध पायाभूत सुविधा, आधुनिकीकरणाची गरज, भविष्यात आवश्यक असणाऱ्या सर्व सुविधांचा अभ्यास करुन आगामी १० वर्षाचा व्यवसाय विकास आराखडा तयार करावा. बाजार समितीने ५, १० आणि १५ एकर जागेत बाजारपेठ निर्मितीकरिता विविध पायाभूत सुविधांचा समावेश करुन आदर्श पायाभूत आराखडा तयार करा.

राज्यातील सर्व कृषी उत्पन्न बाजार समितीचे १०० टक्के संगणकीकरण करण्यात यावे, यादृष्टीने काम करणाऱ्या बाजार समितीला पणन मंडळाच्यावतीने प्रोत्साहन देण्यात येईल, असे निर्देश मंत्री श्री. रावल यांनी दिले.

मॅग्नेट प्रकल्पाअंतर्गत राज्यात फळे व भाजीपाला हाताळणी सुविधा केंद्र निर्माण करण्यात आले असून शेतकऱ्यांना त्याचा मोठया प्रमाणात लाभ झाला पाहिजे. काजू सोलरबेस ड्राय काजू प्रक्रिया केंद्र प्रकल्प तयार करा. शेतमालाचे अधिकाधिक निर्यातीकरणाच्यादृष्टीने नवीन योजना तयार करावा.

जागतिक दर्जाच्या पणन सुविधांचा विचार करुन ठाणे जिल्ह्यातील बापगाव आणि नागपूर जिल्ह्यातील काळडोंगरी येथील जागा विकसित करण्याकरिता प्रकल्प अहवाल तयार करावा, एकूणच बाजार समित्यांना बळकट करण्याकरिता नियोजन करावे.

कृषी उत्पन्न बाजार समिती समित्याकडील अंशदान व कर्जवसुली झाल्याशिवाय इतर परवानग्या देवू नये, वसुली नियमित होईल याकरीता मंडळाने आढावा घ्यावा, एकरकमी कर्ज परतफेड धोरणाची प्रभावी अंमलबजावणी करावी. केंद्राच्यावतीने राबविण्यात येणाऱ्या विविध योजनांचा अधिकाधिक लाभ कृषी उत्पन्न बाजार समितीला मिळण्याच्यादृष्टीने कार्यवाही करावी, अशी सूचना त्यांनी केली.

मुख्यालय तसेच विभागीय अधिकाऱ्यांनी क्षेत्रीय भेटी देऊन बाजार समितीच्या अडीअडीचणी सोडवण्यासाठी प्रयत्न केले पाहिजे. समिती पदाधिकाऱ्यांशी नियमित संवाद साधला पाहिजे. कृषी पणन मंडळ मंडळाने कायद्याच्या चौकटीत राहून प्रकरणनिहाय पारदर्शक निर्णय घ्यावा. पीकाची वैशिष्ट्ये, बाजारभाव, योजनांची माहिती आदींबाबत समाज माध्यमे, प्रसार माध्यमे, दिनदर्शिकाच्या माध्यमातून व्यापक जनजागृती करावी, याकरीता एक पथक निर्माण करा. अधिकाधिक शेतमालाच्या निर्यातीकरणाच्यादृष्टीने नवीन योजना तयार करावी. बैठकीत केलेल्या सूचनानुसार कृती आराखडा तयार करुन सर्व संबंधितानी कार्यवाही करावी, अशी सूचना श्री. रावल यांनी दिली.

⁠प्रत्येक फळाच्या हंगामाच्या वेळी त्याची भौगोलिक वैशिष्ट्ये असलेली माहिती व जाहिरात करावी.राज्यात शेतमालाच्या बाजारभावबद्दल अफवा पसरवल्या जातात व शेतमालाचे भाव पडण्याचा प्रयत्न केला जातो.यावर आळा घालण्यासाठी बाजार समित्यांनी खोट्या अफवांचे प्रसिद्धी माध्यमांतून खंडन करावे,जेणे करून बाजार भावावर परिणाम होणार नाही.

या बैठकीत कर्ज मागणी प्रस्ताव, अंशदान आणि कर्ज वसुली, एक रकमी परतफेड योजना, प्रशिक्षण योजना, देशांतर्गत व्यापार विकास, स्मार्ट प्रकल्प, बाजार समिती बळकटीकरण, काजू फळबाग प्रक्रिया प्रकल्प आदी विषयाबाबत चर्चा करण्यात आली.

श्री शिवाजी मराठा सोसायटीच्या जेधे महाविद्यालयातर्फे आयोजन

पुणे : सावित्रीबाई फुले पुणे विद्यापीठ राष्ट्रीय सेवा योजना व श्री शिवाजी मराठा सोसायटीचे समाजभूषण बाबूराव ऊर्फ अप्पासाहेब जेधे कला, वाणिज्य व विज्ञान महाविद्यालय यांच्या संयुक्त विद्यमाने ‘सृजनरंग’ जिल्हास्तरीय सांस्कृतिक स्पर्धेचे आयोजन करण्यात आले होते.  या स्पर्धेत पुणे व पिंपरी चिंचवड मधील १८२ महाविद्यालयातील ५०० पेक्षा अधिक विध्यार्थी सहभागी झाले होते.

कार्यक्रमाचे उद्घाटन आबासाहेब गरवारे महाविद्यालयाचे प्राचार्य, डॉ. विलास उगले यांच्या हस्ते झाले. यावेळी प्रमुख पाहुणे म्हणून सावित्रीबाई फुले पुणे विद्यापीठ अधिसभा सदस्य प्रसेनजित फडणवीस, व्यवस्थापन परिषद सदस्य बागेश्री  मंठाळकर आणि संचालक, राष्ट्रीय सेवा योजना डॉ. सदानंद भोसले उपस्थित होते. या सोहळ्याचे अध्यक्षस्थानी श्री शिवाजी मराठा सोसायटी सहसचिव विकास गोगावले यांच्यासह खजिनदार जगदीश जेधे, नियामक मंडळ अध्यक्ष सत्येंद्र कांचन, नियामक मंडळ सदस्य कमल व्यवहारे, जेधे महाविद्यालयाच्या प्राचार्य डॉ. दिपाली पाटील यावेळी उपस्थित होते.

पथनाट्य स्पर्धेतून अवयवदान, व्यसनमुक्ती, योग साधनेचे महत्त्व, लोकसंख्यावाढ या सामाजिक प्रश्नांवर विद्यार्थ्यांनी प्रकाश टाकला. काव्यवाचन, निबंध स्पर्धा, वक्तृत्व, भित्तीचित्र, पोवाडा गायन, पथनाटय या स्पर्धांमध्ये मोठ्या संख्येने विद्यार्थ्यांनी भाग घेतला.

प्राचार्य डॉ. दिपाली पाटील यांनी प्रास्ताविक केले. कार्यक्रमाचे सूत्रसंचालन जिल्हा समन्वयक डॉ. अमित गोगावले यांनी केले. डॉ. शिवाजी पाचारणे यांनी आभार मानले.

विद्या महामंडळ संस्थेच्या मूक-बधिर शिक्षण संशोधन व विकास केंद्रातर्फे उपक्रम

पुणे : विद्या महामंडळ संस्थेच्या मूक-बधिर शिक्षण संशोधन व विकास केंद्रातर्फे कर्णबधिर विद्यार्थ्यांसाठी आंतरशालेय एकांकिका स्पर्धेचे आयोजन करण्यात आले आहे. ही स्पर्धा  शुक्रवार, १९ सप्टेंबर २०२५ रोजी दुपारी १२ वाजता घोले रस्त्यावरील पं. जवाहरलाल नेहरू सांस्कृतिक भवन येथे होणार आहे, अशी माहिती  डॉ. अ.ल. देशमुख यांनी पत्रकार परिषदेत दिली.

 कार्यवाह विद्या महामंडळ लिलाधर गाजरे, मुक बधिर विभागाचे महेंद्र अर्विकर व अश्विनी जोशी
यावेळी उपस्थित होते. या स्पर्धेत एकूण ८ कर्णबधिर शाळा शाळांचा
 सहभाग असून १०५ कर्णबधिर विद्यार्थी आपली कला सादर करणार आहेत. स्पर्धा दुपारी १२ ते ३.३० या वेळेत होणार असून, त्यानंतर लगेचच बक्षिस वितरण समारंभ ३.३० वाजता होणार  आहे.

आधार मूकबधिर विद्यालय, धायरी मूकबधिर विद्यालय, भावे हायस्कूल, चिंचवड बधिर मूक विद्यालय, हडपसर बधिर मूक विद्यालय, आपटे प्रशाला मूकबधिर विद्यालय, अयोध्या चॅरिटेबल ट्रस्ट, बधीर मूक विद्यालय सुऱ्हुद मंडळ या शाळा स्पर्धेत सहभागी होणार आहेत.

या स्पर्धेचे परीक्षण प्रख्यात नाट्य व कला क्षेत्रातील मान्यवर करणार असून, उषा उंडे, विनिता पिंपळखरे आणि सुधांशु पानसे परीक्षक म्हणून काम पाहणार आहेत.  
या मध्ये प्रथम व द्वितीय क्रमांकास मोमेंटो व उत्कृष्ट संगीत, उत्कृष्ट अभिनय, उत्कृष्ट दिग्दर्शन आणि उत्कृष्ट लेखनाला मोमेंटो व रोख रकमेचे पारितोषीक देण्यात येणार आहे.
कर्णबधिर विद्यार्थ्यांच्या कलेला उत्तेजन मिळावे व त्यांना प्रोत्साहन देण्यासाठी ही स्पर्धा भरविण्यात येते.

पुणे: प्रादेशिक सिनेमांची अनोखी सफर घडवणाऱ्या ‘लाईमलाईट प्रादेशिक’ या पुस्तकाचे प्रकाशन ज्येष्ठ अभिनेते डॉ. मोहन आगाशे यांच्या हस्ते येत्या शनिवारी (ता. २७) सायंकाळी ५ वाजता लजपतराय भवन संकुल, विद्यार्थी सहायक समिती, सेनापती बापट रस्ता पुणे येथे होणार आहे. रुद्र पब्लिशिंग हाऊस प्रकाशित अच्युत गोडबोले व सतीश कुलकर्णी लिखित या पुस्तकामध्ये प्रादेशिक भाषांची जादू, अविस्मरणीय चित्रपटांची गाथा उलगडण्यात आली आहे. रुद्र पब्लिशिंग हाऊस आणि पुस्तकविश्व या संस्थेच्या वतीने या कार्यक्रमाचे आयोजन केले आहे, असे संयोजक नवनाथ जगताप यांनी कळवले आहे.

या पुस्तकाला प्रसिद्ध अभिनेते मकरंद अनासपुरे, ज्येष्ठ अभिनेत्री वंदना गुप्ते, सोनाली कुलकर्णी यांनी या पुस्तकाविषयी भरभरून अभिप्राय दिला आहे. मराठीसह बंगाली, कन्नड, तेलगू, गुजराती, मैथिली अशा प्रादेशिक भाषांमधील सिनेमांचा रसास्वाद अतिशय रंजकपणे मांडला आहे. चित्रपटांची आवड असलेल्या रसिक-प्रेक्षकांना उत्तम, रंजक प्रादेशिक चित्रपटांची कथानके आणि दिग्दर्शनातील कंगोरे, अभिनयाची वैशिष्ट्ये याची ‘क्लासिक मुशाफिरी’ घडवणारे हे पुस्तक आहे. हा कार्यक्रम सर्वांसाठी विनामूल्य खुला असणार आहे.

पुणे, दि. १७ सप्टेंबर, २०२५- नुकत्याच झालेल्या राष्ट्रीय लोकअदालतीमध्ये महावितरणची १०५७ प्रकरणे निकाली काढण्यात आली. या प्रकरणांतून महावितरणची २ कोटी १८ लाखांची वसुली सुद्धा झाली. यामध्ये दाखल पूर्व व प्रलंबित अशा दोन्ही प्रकरणांचा समावेश आहे.

नियममित वसुलीबरोबरच कायमस्वरुपी बंद असलेल्या व थकबाकीमुळे बंद केलेल्या जवळपास ग्राहकांच्या वीजबिल वसुलीसाठी महावितरण कायम आग्रही असते. त्यासाठी वेळोवेळी वसुली मोहिमा राबविल्या जातात. त्यातूनही ज्या प्रकरणांत वसुली होत नाही अशी प्रकरणे महावितरणतर्फे लोकअदालतीमध्ये ठेवली जातात. महावितरणचे मुख्य अभियंता सुनिल काकडे यांच्या मार्गदर्शनाखाली पुणे परिमंडलातील गणेशखिंड, रास्तापेठ व पुणे ग्रामीण या तीन मंडलांमध्ये थकबाकीमुळे बंद असलेल्या ५१३१७ वीज ग्राहकांना १३ सप्टेंबर रोजी पुणे येथे होणाऱ्या राष्ट्रीय लोकअदालतीपुढे ठेवण्यात आले होते. सर्व प्रकरणातील वादींना तशा नोटीसाही बजावण्यात आल्या होत्या. तसेच वीजचोरीची ८३ प्रकरणे देखील लोकअदालतीपुढे ठेवण्यात आली.

५१३१७ प्रकरणांपैकी १०५३ प्रकरणांमध्ये २ कोटी १४ लाख ८९ हजार ३०८ रुपयांचा भरणा झाला. यात सर्वाधिक पुणे ग्रामीण मंडलातील १० ग्राहकांकडून १ कोटी ३ लाख ४१ हजारांचा तर त्यापाठोपाठ रास्तापेठ मंडल ९६ लाख ९७ हजार ८१८ व गणेशखिंड मंडलातून १७ लाख ८४ हजार ९३० रुपये वसूल झाले. तर वीजचोरीच्या ८३ पैकी ४ गुन्ह्यांमध्ये तडजोड झाली. त्यातून ४ लाख ८ हजार ४४० रुपयांची रक्कम वसूल झाली. या लोकअदालतीच्या यशस्वीतेसाठी प्रभारी विधी सल्लाकार दिनकर तिडके, कनिष्ठ विधी अधिकारी नितल हासे, अंजली चौगुले व इम्रान शेख यांनी परिश्रम घेतले.

आधार कार्ड व रेशन कार्ड घेऊन या, (आभा कार्ड) तसेच प्रधानमंत्री जन आरोग्य योजना या योजनांचे कार्ड काढून न्या .

पुणे- केंद्रीय आरोग्य आणि कुटुंब कल्याण मंत्रालय यांचे मार्गदर्शनाखाली “स्वस्थ नारी सशक्त परिवार” अभियान अंतर्गत पुणे महापालिकेतर्फे किशोरवयीन मुली, गरोदर माता, स्तनदा माता व महिलांच्या आरोग्य विषयक तज्ञ आरोग्य तपासण्यांसाठी शिबिराचे आयोजन येथे करण्यात आले होते. या शिबिराचे उद्घाटन पुणे महापालिकेच्या कमला नेहरू हॉस्पिटल येथे केंद्रीय सहकार आणि नागरी विमान वाहतूक राज्यमंत्री मुरलीधर मोहोळ यांच्या हस्ते करण्यात आले.
उद्घाटन प्रसंगीमहापालिका आयुक्त नवल किशोर राम,माजी सभागृहनेते गणेश बिडकर ,अतिरिक्त महापालिका आयुक्त एस.जे. प्रदीप चंद्रन,ओमप्रकाश दिवटे,आरोग्य प्रमुख नीना बोराडे ,उपसंचालक, आरोग्य भगवान पवार, सहाय्यक आरोग्य प्रमुख डॉ. मनिषा नाईक,डॉ. वैशाली जाधव ,उपआरोग्य अधिकारी डॉ. कल्पना बळीवंत,कमला नेहरू रुग्णालयाचे डॉ. प्रशांत बोठे, माजी नगरसेवक विशाल धनवडे पल्लवी जावळे तसेच राज्य शासन व पुणे महानगरपालिकेचे इतर अधिकारी, कर्मचारी व लाभार्थी उपस्थित होते.

केंद्रीय आरोग्य आणि कुटुंब कल्याण मंत्रालय यांचे मार्गदर्शनाखाली “स्वस्थ नारी सशक्त परिवार” अभियान दि. १७/०९/२०२५ ते दि. ०२/१०/२०२५ या कालावधीत सकाळी १० ते दुपारी ४ वाजेपर्यंत राबविण्यात येणार आहे.
या अभियानाअंतर्गत पुणे महानगरपालिकेच्या सर्व रुग्णालये, युपीएचसी, आयुष्यमान आरोग्य मंदिर, हिंदूहृदयसम्राट बाळसाहेब ठाकरे आपला दवाखाना अशा स्तरावर जनजागृती व तपासणी शिबिरे आयोजित करण्यात येणार आहेत. सदर अभियानात प्रामुख्याने किशोरवयीन मुली, गरोदर माता, स्तनदा माता व महिलांच्या आरोग्य विषयक सर्व तपासण्या करून रुग्णांवर आवश्यक पुढील उपचार करण्यात येणार आहेत.या अभियानात सर्व प्रसूतिगृहे पुणे मनपा या ठिकाणी महाआरोग्य शिबीराचे नियोजन करण्यात येणार आहे. या शिबिरामध्ये स्त्रीरोग तज्ञ, बालरोग तज्ञ, नेत्ररोग तज्ञ, कान-नाक-घसा तज्ञ, दंत चिकित्सक, त्वचारोग तज्ञ,मानसोपचार तज्ञ, अस्थिरोग तज्ञ, फिजीशीयन, फिजीओथेरीपिस्ट इत्यादी तज्ञांचा समावेश करून महिलांना आरोग्य विषयक तज्ञ सेवा उपलब्ध करून देण्यात येणार आहेत.

तज्ञ डॉक्टर शिबिरामध्ये खालीलप्रमाणे सेवा देण्यात येणार आहेत

त्यामध्ये,महिलांची एनसीडी तपासणीः उच्च रक्तदाब, मधुमेह, तोंडाचा कर्करोग, स्तनाचा कर्करोग, आणि गर्भाशयाच्या मुखाची कर्करोग तपासणी.असुरक्षित महिलांसाठी क्षयरोग तपासणी.
किशोरवयीन मुली आणि महिलांसाठी अशक्तपणाची तपासणी व समुपदेशन सेवा तसेच मासिक पाळी व स्वच्छता आणि पोषण यावर जागरूकता सत्र,
गर्भवती महिलांसाठी प्रसुतीपूर्व काळजी (एएनसी) तपासणी ज्यामध्ये हिमोग्लोबिन पातळीची चाचणी, गर्भधारणेदरम्यान पोषण आणि काळजी यावर समुपदेशन आणि माता आणि बाल संरक्षण (एमसीपी) कार्डचे वितरण.
बालकांना लसीकरण सेवा प्रदान करण्यात येणार आहे.
पोषण समुपदेशन आणि कल्याणसत्र, रक्तदान मोहीम, पीएमजेएवाय अंतर्गत नोदणी/ आयुष्मान वय वंदना कार्ड चे वितरण, निक्षयमित्र स्वयंसेवकांची नोंदणी.
तसेच सर्व युपीएचसी, आयुष्मान आरोग्य मंदिर व हिंदूहृदयसम्राट बाळसाहेब ठाकरे आपला दवाखाना यांच्यामार्फत प्रत्येक आठवड्याला २ शिबिरे घेण्यात येणार असून सदर आरोग्य संस्थेमध्ये येणाऱ्या नागरिक व रुग्णांची प्राथमिक आरोग्य तपासणी करून आवश्यकता असल्यास त्यांना पुढील उपचारासाठी नजीकच्या प्रसुतीगृहाकडे संदर्भित करण्यात येणार आहे.
सोबत येताना नागरिकांनी आधार कार्ड व रेशन कार्ड घेऊन यावे जेणेकरून नागरिकांना (आभा कार्ड) तसेच प्रधानमंत्री जन आरोग्य योजना या योजनांचे कार्ड काढून देण्यात येतील.
चतुश्रृंगी देवी मंदिर, तांबडी जोगेश्वरी मंदिर व भवानी माता मंदिर इत्यादी ठिकाणी नवरात्र काळात महिलांची प्राथमिक आरोग्य तपासणी करण्यासाठी सकाळी १० ते दुपारी २ वाजेपर्यंत विशेष शिबीर आयोजित करण्यात येणार आहे.
या शिबिरा करिता आरोग्य विभाग पुणे महानगरपालिका याच्या कडून मनुष्यबळ, औषधे साधन सामग्री याची पूर्व तयारी करण्यात आली आहे,
शिबिराचे काटेकोर नियोजन करण्याबाबत परिमंडळ व क्षेत्रिय वैद्यकीय अधिकारी यांना निर्देश देण्यात आले आहे.

पिंपरी (दि.१७) : प्रस्तावित रिंग रोडच्या भूसंपादन प्रक्रियेसंबंधी सुरू असलेल्या कार्यवाहीचा पीएमआरडीएचे महानगर आयुक्त डॉ. योगेश म्हसे यांनी प्रशासकीय यंत्रणांकडून आढावा घेतला. टप्पा एक, दोन, तीन आणि चारसंदर्भात सुरू असलेल्या कार्यवाहीबाबत आढावा घेऊन तातडीने भूसंपादन प्रक्रिया आणि मोजणीसाठी जिल्हाधिकारी कार्यालयाकडे प्रस्ताव पाठवण्याचे निर्देश त्यांनी यावेळी दिले.

पुणे शहर आणि परिसरातील वाहतूक कोंडी कमी करण्यासाठी प्रशासकीय यंत्रणांमार्फत विविध उपाययोजना करण्यात येत आहे. यात प्रामुख्याने प्रस्तावित रिंग रोडसह इतर महत्त्वाचे काही रस्ते रुंदीकरणाच्या अनुषंगाने कार्यवाही सुरू आहे. रिंग रोड टप्पा एक, दोन, तीन आणि चार असे असून सद्यस्थितीत टप्पा क्रमांक एक सोलू ते निरगुडीमधील ३ गावांची भूसंपादन प्रक्रिया अंतिम टप्प्यात आहे. संबंधित शेतकऱ्यांना एफएसआय / टीडीआर देण्याच्या अनुषंगाने तातडीने संबंधित शेतकऱ्यांसोबत बैठका आयोजित करण्याचे निर्देश महानगर आयुक्त डॉ. योगेश म्हसे यांनी दिले.

हिंजवडी व चाकण भागातील वाहतूक कोंडी सोडवण्यासाठी प्रस्तावित रस्त्याच्या भूसंपादन प्रक्रियेबाबत माहिती जाणून घेतली. नवले ब्रीज परिसरातील वाहतूक व्यवस्थापनासाठी भूसंपादन, जलवाहिनीचे स्थलांतर व सिग्नल यंत्रणा बसविण्याबाबतची सद्यस्थिती जाणून घेण्यात आली. संबंध‍ित व‍िभागांनी समन्वयातून ऑक्टोबरपर्यंत कामे पूर्ण करण्याचे न‍िर्देश द‍िले.

या बैठकीला पीएमआरडीएचे महानगर आयुक्त डॉ. योगेश म्हसे, अतिरिक्त महानगर आयुक्त दीपक सिंगला, अपर पोलीस आयुक्त मनोज पाटील, विकास परवानगी व नियोजन विभागाचे संचालक अविनाश पाटील, जमीन व मालमत्ता विभागाचे सह आयुक्त हिम्मत खराडे, भूमिअभिलेख विभागाच्या अधीक्षक आशा जाधव, अधीक्षक अभियंता शिवप्रसाद बागडी, भूसंपादन समन्वय अधिकारी, पुणे महानगरपालिका, एनएचएआय, सार्वजनिक बांधकाम विभाग, राष्ट्रीय महामार्ग विभाग यांच्यासह इतर विभागाचे वरिष्ठ अधिकारी उपस्थित होते.