पिंपरी, पुणे (दि.६ जानेवारी २०२४) लाठ्या काठ्या, ढोल- ताशा, झांज पथक, मर्दानी खेळ, पोवाडा, शाहीर, गोंधळी, करपल्लवी आदींच्या सादरीकरणाने आज १०० व्या अखिल भारतीय मराठी नाट्य संमेलनात शिवराज्याभिषेक सोहळा अवतरला. रोमहर्षक या सोहळ्यावेळी ‘हरहर महादेव….जय भवानी जय शिवाजी…’ च्या जयघोषाने मुख्य सभा मंडप दुमदुमून गेला.
शिवराज्याभिषेक सोहळ्याला ३५० वर्ष पूर्ण झाल्याच्या निमित्ताने आज नाट्य संमेलनात ‘प्रभो शिवाजी राजा’ हा कार्यक्रम पृथ्वी इनोव्हेशनच्या वतीने सादर करण्यात आला. यावेळी नाट्य संमेलनाचे आयोजक भाऊसाहेब भोईर,अभिनेते नागेश भोसले, सुशांत शेलार,  नाट्य परिषद पिंपरी शाखेचे कार्याध्यक्ष राजेश सांकला, उपाध्यक्ष कृष्णकुमार गोयल आदी उपस्थित होते. या शिवराज्याभिषेक सोहळ्यात शिवबाचा जन्म, अफजखानाचा वध ते शिवराज्याभिषेक पर्यंतचा प्रवास दाखवण्यात आला. गणेशवंदनेने कार्यक्रमाला सुरूवात झाली. त्यानंतर शाहीर यशवंत जाधव यांनी शिव जन्माचा ‘एके काळी सह्याद्री हसला’ हा रोमहर्षक पोवाडा सादर केला. त्यानंतर ठाकर नृत्य, कोळी गीत सादर करण्यात आले.
त्यानंतर करपल्लवी या आगळ्या वेगळ्या सादरीकरणातून शिवकाळात गोंधळ मधून सांकेतिक भाषा कशी वापरली जायची, याचे सुरेख सादरीकरण केले. या संपूर्ण कार्यक्रमा दरम्यान शिवाजी महाराजांची आज्ञा पत्रांचे वाचन, वासुदेव, भलरी देवा भलरी, विठ्ठल माऊली, बाल शिवबाचा पाळणा अन् शेवटी मर्दानी खेळांच्या सादरीकरणात शिवराज्याभिषेक सोहळा सादर करण्यात आला. अवघी शिवसृष्टी उभी केलेल्या या नेत्रदीप सोहळ्याने उपस्थितांच्या डोळ्यांचे पारणे फिटले.
यावेळी अभिनेते नागेश भोसले यांच्या हस्ते सादरकर्त्यांचा सत्कार करण्यात आला. यावेळी भोसले म्हणाले, शिव राज्याभिषेक कोणताही असो, तो पाहताना अंगावर शहारे येतातच. आता झालेले सादरीकरण हे उत्तूंग अभिनव आहे. खरोखरच डोळ्यांचे पारणे फिटले.
गौरी देशपांडे यांनी सूत्रसंचालन केले.

पुणे- बक्सकॉईन या क्रिप्टोकरन्सी मध्ये गुंतवणुक करण्यास सांगुन त्याद्वारे अधिक नफा मिळवुण देण्याचे अमिष दाखवुन ८४ लाखाची फसवणुक करणा-या आरोपीस पुणे पोलिसांनी अटक केली आहे. Bitsolives Pvt.Ltd या कंपनी कडून फसवणूक झालेल्यांनी तातडीने संपर्क साधावा असेही आवाहन पोलिसांनी केले आहे.
या संदर्भात पोलिसांनी सांगितले कि,’ सायबर पोलीस स्टेशन येथे दाखल गुन्हयातील आरोपीतांनी वेळो वेळी वेग-वेगळ्या ठिकाणी आयोजित केलेल्या सेमिनार मध्ये फिर्यादी यांना तसेच इतर गुंतवणुकदारांना जादा परतावा देण्याच्या बहाण्याने बक्सकॉईन या क्रिप्टोकरन्सीमध्ये तसेच मल्टीलेव्हल गार्केटिंगसारख्या प्लॅनमध्ये गुंतवणुक करावयास सांगुन आरोपीतांनी चालू केलेले प्लॅटफॉर्म, प्लॅन्स्, वेबसाईट, पोर्टल हे जाणीवपुर्वक फसवणूक करण्याच्या उद्देशाने कालांतराने बंद करुन फिर्यादी तसेच त्यांचे इतर ०७ सहकारी गुंतवणुकदार यांना गुंतवणुक केलेल्या रकमेवर कोणताही परतावा न देता त्यांची एकुण रक्कम ८४,३४,६४१.७६/ रुपये ची आर्थिक फसवणूक केली म्हणुन फिर्यादी यांनी दि. २७/११/२०२१ रोजी फिर्याद दिल्याने सायबर पोलीस स्टेशन, पुणे शहर येथे गु.रजि.नं. ५४/२०२१, भा.दं. वि. कलम ४०६, ४२०, ३४ सह माहिती तंत्रज्ञान अधिनियम कायदा २००० कलम ६६ डी सह एम.पी.आय.डी. क. ३ व ४ अन्वये गुन्हा दाखल करण्यात आला होता.
सदर गुन्हयामध्ये यापुर्वी आरोपी नामे गणेश शिवकुमार सागर, वय ४७ वर्षे, रा. फ्लॅट नं. ए-१०४,
पहिला मजला, एस.बी. युथ, सीजीएचएस, प्लॉट नं. ६ बी, सेक्टर २, फेज १, द्वारका, गव्हर्मेंट स्कुल शेजारी, नवी दिल्ली- ११००७५ यास दिल्ली येथुन अटक करण्यात आली असुन त्याचे विरुद्ध न्यायालयात दोषारोप पत्र सादर करण्यात आलेले आहे. नमुद गुन्हयातील बिटसोलाईव्हज प्रा.लि. कंपनी, दुबई यामधील डायरेक्टर यांनी वेगवेगळ्या ठिकाणी आयोजित केलेल्या सेमिनार मध्ये बक्सकॉईन या क्रिप्टोकरन्सीमध्ये तसेच मल्टीलेव्हल मार्केटिंगसारख्या प्लॅनमध्ये गुंतवणुक करावयास सांगुन आरोपीतांनी चालू केलेले प्लॅटफॉर्म, प्लॅन्स्, वेबसाईट, पोर्टल हे जाणीवपुर्वक फसवणूक करण्याच्या उद्देशाने कालांतराने बंद करुन फिर्यादी तसेच त्यांचे इतर ०७ सहकारी गुंतवणुकदारांची मोठ्या रकमेची फसवणुक केली असल्याचे तपासामध्ये निष्पन्न झाले आहे. नमुद गुन्ह्यामध्ये आरोपी नागे प्रशांत कुमार कमलेश भाई ब्रम्हभट, वय ३४ वर्षे, सध्या रा. ४०४, अॅन्डालुस प्लाझा, मंखुल, बुर दुबई, कायमचा पत्ता- हाऊस नं. २२/२११, मारुती धाम, जीआयडीसी, मकरपुरा, वडोदरा, गुजरात यास आर्थिक गुन्हे शाखा, सुरत शहर, गुजरात येथील डीसीबी पोलीस स्टेशन, गु.र.नं. ११२१००१५२२००७५/२०२२ या गुन्हयामध्ये अटक केली असुन नमुद आरोपी हा इकडील दाखल गुन्ह्यात पाहिजे आरोपी असुन त्यास मध्यवर्ती कारागृह, लाजपोर, सुरत, गुजरात येथुन दि. ०५/०१/२०२४ रोजी सदर गुन्ह्यामध्ये ताबा घेऊन दिनांक ०६/०१/२०२४ रोजी १०:२१ वा. अटक करण्यात आली आहे. सदर आरोपीतास आज रोजी न्यायालयासमोर हजर केले असता अटक आरोपीस दि. ०९/०१/२०२४ रोजी पर्यंत पोलीस कोठडी रिमांडमंजूर करण्यात आली आहे. सदर गुन्ह्याचा पुढील तपास पोलीस निरीक्षक, चंद्रशेखर सावंत हे करीत आहेत.

सायबर पोलीस स्टेशन, पुणे शहर यांचेकडून आवाहन करण्यात येत आहे की, वर नमुद Bitsolives Pvt.Ltd या कंपनीच्या नावाचा वापर करून गुंतवणुक करण्याचे सांगुन कोणाची फसवणुक झाली असल्यास त्यांनी सायबर पोलीस स्टेशन, पुणे शहर यांचेशी संपर्क करावा.
सदरची कारवाई पोलीस आयुक्त, श्री. रितेश कुमार, अपर पोलीस आयुक्त, गुन्हे, रामनाथ पोकळे, पोलीस उपआयुक्त, आर्थिक व सायबर गुन्हे, श्री. विक्रांत देशमुख, सहाय्यक पोलीस आयुक्त, आर्थिक व सायबर गुन्हे आर.एन. राजे, यांचे मार्गदर्शनाखाली वरिष्ठ पोलीस निरीक्षक श्रीमती मिनल सुपे- पाटील, पोलीस निरीक्षक चंद्रशेखर सावंत, पोउपनि प्रमोद खरात, सपोउपनि संदेश कर्णे, पोलीस अंमलदार राजेश केदारी, अश्विन कुमकर, प्रविणसिंग राजपुत, वैभव माने, दिनेश मरकड, शिरीष गावडे, निखील पासलकर सर्व नेमणुक सायबर पोलीस स्टेशन यांनी केला असून तपासामध्ये उल्लेखनिय कामगिरी केलेली आहे.

पुणे -ऑफिसमधील अकरा लाखाची रोकड चोरली पण गावी पाळण्याच्या तयारीत असलेला आरोपी ५ दिवसातच पोलिसांच्या तावडीत सापडला, या प्रकरणी पोलिसांनी सांगितले कि,’दि. ३०/१२/२०२३ रोजी सायंकाळी ०६/०० वा. ते दि. ३१/१२/२०२३ रोजी ११/३० वा. चे सुमारास एस के पी कॅम्पस बालेवाडी पुणे येथिल ज्ञानसागर इन्सिट्यूट ऑफ मॅनेजमेंट अॅण्ड रिसर्च या ऑफिसमधील रोख ११,५०,००/- रुपये चोरी गेले बाबत चतुःश्रृंगी पोलीस ठाणे येथे गु.र.नं. ९५३/२०२३ भा.द.वि. कलम ३८० प्रमाणे तक्रार दिल्याने गुन्हा दाखल होता.
दाखल गुन्हयाचा गुन्हे शाखा युनिट ०४, समांतर तपास करत असताना तांत्रीक विश्लेषणाद्वारे दाखल गुन्हयामध्ये आरोपी निष्पन्न करुन दि.०५/०१/२०२४ रोजी आरोपीचा शोध घेत असताना पोलीस अंमलदार सारस साळवर व वैभव रणपिसे यांना त्यांचे बातमीदारामार्फत सदर गुन्हयातील आरोपी वाल्मिक पाटील हा संगमवाडी पार्किंग क्र. ३ येथे आला असून तो गावी जाण्याच्या तयारीत असले बाबत बातमी मिळाली.
सदर बातमीच्या अनुषांगाने लागलीच गुन्हे शाखा, युनिट ४, पुणे शहर कडील पथकाने संगमवाडी पार्किंग क्र. ०३ येथे जावून शिताफिने वाल्मिक संजय पाटील वय ३१ वर्षे, रा. माळीवाडा, अमलेश्वरनगर, ता. अंमळनेर, जि. जळगांव यांस ताब्यात घेतले. त्याचे कब्जात एकुण रु. ८,४८,६५०/- एवढी रोख रक्कम मिळून आली. सदर रकमेबाबत आरोपीकडे तपास केला असता त्याने सदरची रक्कम एस के पी कॅम्पस बालेवाडी पुणे येथिल ज्ञान सागर इन्स्टयुट ऑफ मॅनेजमेंट अॅण्ड रिसर्च या ऑफिस मधुन चोरल्याचे सांगुन गुन्हयाची कबुली दिली. दाखल गुन्हा उघडकीस आणून गुन्हयातील आरोपीस पुढील कारवाई कामी चतुःश्रृंगी
पोलीस ठाणे यांचे ताब्यात देण्यात आले.
सदरची उल्लेखनिय कामगिरी पोलीस आयुक्त रितेश कुमार, अपर पोलीस आयुक्त गुन्हे, रामनाथ पोकळे, पोलीस उप आयुक्त गुन्हे अमोल झेंडे, सहा. पोलीस आयुक्त गुन्हे-२ सतीश गोवेकर, पोलीस निरीक्षक सोमनाथ जाधव यांचे मार्गदर्शनाखाली, सहा. पोलीस फौजदार शितल शिंदे, पोलीस अंमलदार विठ्ठल वाव्हळ, सारस साळवी, प्रविण भालचिम, वैभव रणपिसे, यांनी केली आहे.

• हिट अँड रन विरोधात पंजाब मधील भवाणीगड पटियाला येथे चालकांचा रास्ता रोको
• ऑटो, रिक्षा, टॅक्सी, ट्रक, टेम्पो बस फेडरेशनचे राष्ट्रीय अध्यक्ष बाबा कांबळे देखील सहभागी

पिंपरी-

शेतकरी हिताच्या विरोधात निर्णय घेतल्यानंतर देशभरातील शेतकरी संतप्त होऊन रस्त्यावर उतरले होते. त्यांनी केंद्र सरकारविरोधात चिकाटीने लढा दिला. लाठ्या खाल्ल्या. त्यांच्या लढ्यापुढे सरकारला माघार घ्यावी लागली. शेतकऱ्यांची हीच चिकाटी पाहून त्यांच्याप्रमाणे हिट अँड रन विरोधात लढा द्यायला हवा. केंद्राने रचलेला हिट अँड रनचा जुलमी कायदा माघार घ्यायला भाग पाडू, असे प्रतिपादन ऑटो, रिक्षा, टॅक्सी, ट्रक, टेम्पो बस फेडरेशनचे राष्ट्रीय अध्यक्ष बाबा कांबळे यांनी केले.

केंद्र सरकारने हिट अँड रन प्रकरणी 3 जानेवारी पासून दिल्ली जंतर मंतर येथे बाबा कांबळे यांच्या नेतृत्वाखाली आंदोलन सुरू केले आहे. या आंदोलनासाठी देशभरातील ऑटो, बस, ट्रक, टेम्पो ड्रायव्हर संघटनेचे प्रतिनिधी दिल्ली येथे दाखल झाले. आंदोलनाची ही लाट पंजाब मध्ये देखील पोचली. पंजाब मधील भवाणीगड पटियाला येथील ट्रक, टेम्पो चालकांनी दिवसभर रास्ता रोको आंदोलन केले. या वेळी आंदोलनात सहभागी होत बाबा कांबळे यांनी मार्गदर्शन केले.

केंद्र सरकारच्या विरोधात विविध मागण्यासाठी ऑटो, रिक्षा, टॅक्सी, ट्रक, टेम्पो बस चालक मालक आंदोलन करत आहेत. अपघात झाल्यास चालकाला दहा वर्षांची शिक्षा आणि 7 लाख रुपये दंड असा असलेला काळा कायदा सरकारने तात्काळ मागे घ्यावा. देशातील सर्व चालक आणि मालकांसाठी राष्ट्रीय कल्याण मंडळाची स्थापना करावी. त्याद्वारे सामाजिक सुरक्षा, आरोग्य सुविधा, मुलांना शिक्षणाच्या सुविधा आणि वृद्धापकाळात पेन्शन सुविधा उपलब्ध करून द्याव्यात. राष्ट्रीय चालक आयोग स्थापन करावा. सरकारने देशभरात चालक दिन साजरा करावा. दिल्लीत चालकांसाठी राष्ट्रीय स्मारक बांधावे आदी मागण्यांसाठी बाबा कांबळे यांच्या नेतृत्वाखाली दिल्लीत आंदोलन झाले. महाराष्ट्रातील पिंपरी चिंचवड, पुणे आणि महाराष्ट्रातून ऑटो व ट्रक टेम्पो चालकांनी आंदोलनाला पाठिंबा दिला आहे. संबधित आरटीओ कार्यालयावर आंदोलन करून पाठिंबा देण्यात आला आहे.पंजाब मध्ये देखील रास्ता रोको करण्यात आले. या आंदोलनात बाबा कांबळे सहभागी झाले होते. या वेळी त्यांनी आंदोलनकर्त्यांना मार्गदर्शन केले.

बाबा कांबळे म्हणाले की, हिट अँड रन प्रकरणी देशभरातील २५ कोटी चालक आंदोलन करत आहेत. काही जण आंदोलन बंद झाल्याची चुकीची माहिती देत आहेत. मात्र हे आंदोलन मागे हटलेले नाही. देशभरात आंदोलन सुरूच आहे. केंद्र सरकार देशभरातील 25 कोटी वाहनचालकांवर अन्याय करत असून आंदोलन दडपण्याचा प्रयत्न करत आहे. मात्र देशभरातील चालकांच्या जोरावर होणाऱ्या अन्यायावर मात करून लढा जिंकू असा निर्धार बाबा कांबळे यांनी व्यक्त केला.

पिंपवड,- स्वच्छ पाण्याची गरज लक्षात घेऊन पाणी व सांडपाण्याविषयी आधुनिक तंत्रज्ञान आणि अक्षय ऊर्जा प्रदर्शनाचे आयोजन करण्यात आले आहे. पिंपरी-चिंचवड येथील ऑटो क्लस्टर एक्झिबिशन सेंटर येथे १० ते १२ जानेवारी रोजी “इंडिया वॉटर शो अँड रीन्यूएबल एनर्जी एक्स्पो” हे प्रदर्शन असणार आहे. या प्रदर्शनात प्रामुख्याने पाणी आणि सांडपाणी प्रक्रिया संयंत्र प्रणाली आणि तंत्रज्ञान, ओझोन निर्मिती प्रणाली, चाचणी उपकरणे, आरओ प्लांट्स, अल्कधर्मी पाणी, फिल्टर्स, बाष्पीभवन प्रणाली, रूफ टॉप सोलर, सौर पॅनेल सारखी अक्षय ऊर्जा उपकरणे पाहायला मिळणार आहेत. पिंपरी-चिंचवड महापालिकेचे सहशहर अभियंता (पर्यावरण) संजय कुलकर्णी प्रदर्शनाचे उदघाटन करणार असल्याची माहिती आयोजक सादिक शेख आणि एस शंकर यांनी दिली.

प्रदर्शनाच्या दुसऱ्या दिवशी महावितरणचे मुख्य अभियंता राजेंद्र पवार यांच्या हस्ते कॉन्फरन्सचे उदघाटन होणार आहे. या चर्चासत्रामध्ये शासनाचे नवीन सौर ऊर्जा धोरण आणि नियमांविषयीचे महावितरणचे अभियंता डॉ. संतोष पटनी यांचे मार्गदर्शन तर हायड्रोजन ऊर्जेचा परिचय मास्माचे माजी अध्यक्ष संजय कुलकर्णी हे करून देणार आहेत. यावेळी मास्माचे अध्यक्ष शशिकांत वाकडे व माजी अध्यक्ष रोहन उपासनी उपस्थित असणार आहेत.

पिंपरी-चिंचवड महानगरपालिका, महाराष्ट्र सोलर मॅन्युफॅक्चरिंग असोसिएशन (मास्मा), सस्टेनेबिलिटी आणि एनर्जी प्रॅक्टिशनर्स असोसिएशन यांच्या सहकार्याने व मुंबईतील प्रोपल एंटरप्रायझेस यांच्यावतीने हे प्रदर्शनाचे आयोजन करण्यात आले आहे. महाराष्ट्रासह इतर राज्यातील या क्षेत्रातील दिग्गज तज्ज्ञ, उत्पादक आणि विक्रेते या प्रदर्शनामध्ये सहभागी होणार आहेत. तर उत्पादने आणि सेवांची यावेळी प्रात्यक्षिके सादर होणार असून नवीन उत्पादनांचे आणि तंत्रज्ञानावर विविध तंज्ञाचे मार्गदर्शन यावेळी मिळणार आहे.

लोकसंख्या झपाट्याने वाढत असताना पाण्याचा पुरवठा मर्यादित होत आहे. उद्योग, शेती आणि दैनंदिन वापरासाठी पाण्याचा अधिक वापर होत आहे. अशातच  मोठ्या शहरांमध्ये सांडपाणी हे एक मौल्यवान स्त्रोत असू शकते. मर्यादित गोड्या पाण्याच्या पुरवठ्यावरील ताण कमी करण्याबरोबरच, सांडपाण्याचा पुनर्वापर केल्याने प्रवाह आणि तलावांची गुणवत्ता सुधारू शकते ज्यामुळे ते प्राप्त होणारे सांडपाणी कमी होते. सांडपाण्यावर पुन्हा दावा केला जाऊ शकतो आणि पीक आणि लँडस्केप सिंचन, भूजल पुनर्भरण किंवा मनोरंजक हेतूंसाठी पुन्हा वापरला जाऊ शकतो. त्यामुळे सांडपाणी क्षेत्रातील तसेच अक्षय ऊर्जा क्षेत्रातील नवीन तंत्रज्ञानाचा प्रचार प्रसार करण्यासाठी या प्रदर्शनाचे आयोजन केले असल्याची माहिती आयोजक सादिक शेख आणि एस शंकर यांनी दिली.

पुणे-कुख्यात गुंड शरद मोहोळ याने २०१२मध्ये नामदेव कानगुडे, विठ्ठल गांडले यांना मारहाण केली होती. त्याचा बदला ११ वर्षांनंतर कानगुडे, गांडले यांचा भाचा साहिल पोळेकर घेत ५ जानेवारी २०२४ रोजी दुपारी घेतला. त्यानेच गोळीबार करून मोहोळचा खून केल्याचे पोलिस तपासात उघड झाले आहे. २०१० ते २०१२ कालावधीत पोळेकरच्या दोन्ही मामांनी मोहोळच्या मावस भावाला एका प्रकरणात मारहाण केली. त्यानंतर मोहोळने या दोघांना बदडून काढले. नंतर तो सतत त्यांचा अपमान करत होता. एका व्यवहारातील पैसेही कानगुडेंना परत करण्यास मोहोळने नकार दिला. म्हणून पोळेकरने त्याचा काटा काढला.

पोलिसांनी दिलेल्या माहितीनसार पोळेकर यांनी तीन ते चार महिन्यांपूर्वी महाराष्ट्राबाहेरून पिस्तूल आणले. त्यानंतर तो मोहोळशी गोड बोलून, येता – जाता पाया पडून त्याच्या टोळीत विश्वास मिळवून सामील झाला. आणि त्याने मोहोळच्या हालचालींबाबत त्याच्या साथीदारांना वेळोवेळी माहिती पुरवणे सुरू केले. मोहोळ नेमका कुठे कधी जातो, त्याच्यासोबत कोण कोण असते, याचा पूर्ण अभ्यास झाल्यावर त्याने हल्ल्याचा कट रचला. खून केल्यावर आरोपी एका दुचाकीवरून पसार झाले. त्यानंतर पुढे जाऊन दुचाकी सोडून देत कात्रजला रिक्षाने गेले. तेथे साहिलच्या मामाने चारचाकी पाठवली होती. त्यातून ते कोल्हापूरकडे पसार होण्याच्या मार्गावर होते. सर्वात महत्त्वाचे म्हणजे ॲड. रवींद्र वसंतराव पवार (४०, रा. नांदेगाव, ता. मुळशी), ॲड. संजय रामभाऊ उडान (वय ४३, रा. भुसारी काॅलनी, कोथरुड) हे शिवाजीनगर न्यायालयात कार्यरत वकील कात्रजपासून आरोपींसोबत होते, असे तपासात स्पष्ट झाले आहे.

सीसीटीव्ही, इन्स्टाग्रामुळे तत्काळ सापडले

तपास अधिकारी वरिष्ठ पोलिस निरीक्षक हेमंत पाटील म्हणाले, मोहोळवरील हल्ला सीसीटीव्ही फुटेजमध्ये दिसला. साहिलने इन्स्टाग्रामवर ‘मी येरवड्यात जाणार’ असे रिल तसेच फरार होण्यासाठी वापरलेल्या चारचाकीचा क्रमांक टाकला होता. तो क्रमांक आम्ही चेकनाका पथकांना दिला होता. साहिल, नामदेव, विठ्ठल यांचे गुन्हेगारी रेकॉर्ड आहे.

६ जणांना ५, तर २ वकिलांना ३ दिवस कोठडी

मोहोळ खून प्रकरणात साहिल ऊर्फ मुन्ना संतोष पोळेकर (वय २०, रा. शिवशक्तीनगर, सुतारदरा, कोथरुड), नामदेव महिपती कानगुडे (वय ३५, रा. भूगाव, ता. मुळशी), अमित ऊर्फ अमर मारुती कानगुडे (वय २४, रा. स्वराज्य मित्र मंडळाजवळ, पर्वती), चंद्रकांत शाहू शेळके (वय २२, रा. जनता वसाहत, पर्वती पायथा), विनायक संतोष गव्हाणकर (वय २०, रा. पौड, ता. मुळशी), विठ्ठल किसन गांदले (वय ३४, रा. शिवकल्याणनगर, सुतारदरा, कोथरुड), ॲड. रवींद्र पवार, ॲड. संजय उडान यांना २४ तासात अटक झाली. प्रथमवर्ग न्यायदंडाधिकारी अमृत बिराजदार यांच्यासमोर त्यांना शनिवारी सकाळच्या सत्रात हजर करण्यात आले. तेव्हा सहा आरोपींना दहा जानेवारीपर्यंत तर दोन वकिलांना आठ जानेवारीपर्यंत पोलिस कोठडी सुनावण्यात आली.

एक आरोपी वकील न्यायालयात रडले

खुनासारख्या गंभीर गुन्ह्यात दोन वकिलांना अटक झाल्याने बार असोसिएशन वकिलांनी सुनावणीस गर्दी केली होती. न्यायाधीशांच्या सूचनेवरून बार असोसिएशन अध्यक्षांनी हस्तक्षेप वकिलांना न्याय दालनाबाहेर काढले. त्यानंतर झालेल्या सुनावणीत आरोपी ॲड. रवींद्र पवार ढसाढसा रडले. आरोपींनी संपर्क केल्यानंतर पोलिसांना शरण जाण्यासाठी आम्ही त्यांची भेट घेतली होती, असा दावा त्यांनी केला.

सल्ला देत असताना वकिलांना पकडले

ॲड. निंबाळकर यांनी आरोपी वकिलांतर्फे असा युक्तिवाद केला की, साहिल, नामदेव हे यापूर्वीच्या गुन्ह्यात त्यांचे पक्षकार आहेत. त्यांना या प्रकरणात सल्ला देत असताना, पोलिसांनी त्यांना अटक केली आहे. वकिलांनी आरोपींना पळून जाण्यास मदत केलेली नाही. कोथरुड पोलिस ठाण्यातील कदम नामक एका जुन्या पोलिस उपनिरीक्षकांना आरोपींच्या शरणागतीची माहिती दिली होती. कोणत्याही वकिलाला पक्षकारास सल्ला देण्याचा अधिकार आहे.

पुणे : छत्रपती शिवाजीनगर विधानसभा मतदारसंघातील आशानगर येथे महापालिकेच्या २४ x ७ योजनेअंतर्गत बांधण्यात आलेल्या पाण्याच्या टाकीची पाहणीआमदार सिध्दार्थ शिरोळे यांनी केली. यावेळी टेस्टिंग ट्रायलची कामे त्वरित पूर्ण करून देण्याच्या सूचना पाणी पुरवठा विभागाच्या अधिकाऱ्यांना दिल्या.

मी व आमचे भारतीय जनता पक्षाचे पदाधिकारी, नगरसेवक गेली ४ वर्षे या पाण्याच्या टाकीच्या कामाचा सातत्याने पाठपुरावा करत आहे. मला आनंद आहे की लवकरच या टाकीचे काम पूर्ण होणार असून याचे भव्य उद्घाटन करण्यात येणार आहे,असे आ.शिरोळे यांनी पाहणी नंतर सांगितले.

या पाण्याच्या टाकीमुळे आशानगर, वैदूवाडी, चतुःश्रृंगी परिसर, पीएमसी कॉलनी, जनवाडी, जनता वसाहत, डिफेन्स कॉलनी, निलज्योती सोसायटी, म्हाडा कॉलनी भागातील नागरिकांना येत्या १० ते १५ दिवसांमध्ये पुरेशा दाबाने व दिवसा वेळेवर पाणी मिळेल, अशी माहिती आ.शिरोळे यांनी दिली.

त्याच प्रमाणे संपूर्ण गोखलेनगरला देखील पुरेशा दाबाने व वेळेवर पाणीपुरवठा होणार आहे. तसेच गोखलेनगर भागासाठी मॅफको येथे पाण्याच्या टाकीचे काम सुरु असून त्याचा देखील सातत्याने पाठपुरावा सुरु आहे,असे आ.शिरोळे यांनी सांगितले.

यावेळी गणेश बगाडे, आदित्य माळवे,योगेश बाचल, सतीश बहिरट, किरण ओरसे, हेमंत डाबी, सुरेश शिंदे, विकास डाबी, रमेश भंडारी, आकाश बगाडे, गौतम लोखंडे, संतोष जगताप तसेच पुणे मनपा पाणीपुरवठा विभागाचे सबंधित अधिकारी उपस्थित होते.