पीवायसी एचटीबीए अमनोरा कप जिल्हा मानांकन बॅडमिंटन स्पर्धा

पुणे : सोयरा शेलार आणि शरयू रांजणे यांना पीवायसी एचटीबीए अमनोरा कप जिल्हा मानांकन बॅडमिंटन स्पर्धेत दुहेरी मुकुटाची संधी आहे. त्यांनी स्पर्धेतील १५ वर्षांखालील मुलींच्या एकेरीच्या आणि दुहेरीच्या अंतिम फेरीत प्रवेश केला.

पीवायसी हिंदू जिमखान्याच्या बॅडमिंटन कोर्टवर ही स्पर्धा सुरू आहे. या स्पर्धेतील १५ वर्षांखालील मुलींच्या एकेरीच्या उपांत्य फेरीत सोयराने स्नेहा भिसेवर २१-१४, २१-१२ अशी मात केली. सोयरासमोर अंतिम फेरीत शरयू रांजणेचे आव्हान असेल. शरयूने शर्वरी सुरवसेवर २१-४, २१-४ अशी मात केली. सोयरा आणि शरयू दुहेरीत एकत्र खेळत आहे. त्यांनी उपांत्य फेरीत सई कदम – शिप्रा कदम जोडीवर २१-७, २१-९ असा विजय मिळवून अंतिम फेरीत गाठली.

अभिक-अरहमलाही संधी

अभिक शर्मा आणि अरहम रेदासानी यांनीही दुहेरी आगेकूच कायम राखली आहे. अभिक आणि अरहमने १५ वर्षांखालील एकेरी आणि दुहेरीच्या अंतिम फेरीत प्रवेश केला आहे. दोघेही एकेरीच्या अंतिम फेरीत आमनेसामने आले आहेत. यात एकेरीच्या उपांत्य फेरीत अभिकने कपिल जगदाळेवर २२-२४, २१-१९, २१-१९ असा, तर अरहमने अभिज्ञान सिंघावर २१-१८, २१-९ असा विजय मिळवला. दुहेरीच्या उपांत्य फेरीत अरहमने तनीष्क काळेसह खेळताना चिन्मय फणसे-समीहन देशपांडे जोडीवर २२-२०, २१-९ अशी, तर अभिक वर्मा-स्वरीत सातपुते जोडीने कपिल जगदाळे – राघवेंद्र यादव जोडीवर २१-११, २५-२३ अशी मात केली.

सानिया-श्रेयात अंतिम लढत

स्पर्धेतील १९ वर्षांखालील मुलींच्या एकेरीची अंतिम लढत सानिका पाटणकर आणि श्रेया भोसले यांच्यात रंगणार आहे. उपांत्य फेरीत श्रेयाने संस्कृती जोशीवर २१-१, २१-१० असा, तर सानिकाने जिज्ञासा चौधरीवर २१-१७, २१-१८ असा विजय मिळवला.

हिमांश-आरुष अंतिम लढत

स्पर्धेतील ११ वर्षांखालील मुलांच्या उपांत्य फेरीत हिमांश हरगुनानीने बुरहनुद्दीन अगाशीवालावर २१-१९, २२-२० अशी मात केली. हिमांशची जेतेपदासाठी आरुष सप्रेविरुद्ध लढत होईल. आरुषने दुसऱ्या उपांत्य फेरीत अद्वैत फेरेवर २२-२०, २२-२० असा विजय मिळवला. मुलींच्या गटातील पहिल्या उपांत्य लढतीत दिविशा सिंगने अग्रिमा राणावर २१-१७, २४-२२ अशी, तर वल्लारी वाटाणेने अन्वी बारवकरवर २१-४, २१-११ अशी मात केली.

निकाल – उपांत्य फेरी – १३ वर्षांखालील मुली – ख्याती कत्रे वि. वि. रुद्रानीराजे निंबाळकर २३-२१, २१-६, आराध्या ढेरे वि. वि. कायरा रैना २१-११, १४-२१, २१-१७.

१३ वर्षांखालील मुले – एस. सोमजी वि. वि. मिर शाहझार अली २१-६, २१-५, हृदान पाडवे वि. वि. शारव जाधव २१-११, २१-११.

१५ वर्षांखालील मुले – अभिक वर्मा वि. वि. कपिल जगदाळे २२-२४ २१-१९, २१-१९, अरहम रेदासानी वि, वि. अभिज्ञान सिंघा २१-१८, २१-९.

१७ वर्षांखालील मुली – युतिका चव्हाण वि. वि. भक्ती पाटील २१-१३, २१-१७, सफा शेख वि. वि. जुई जाधव १६-२१, २१-१६, २१-११.

१७ वर्षांखालील मुले – सार्थक पाटणकर वि. वि. अवधूत कदम २१-१८, २१-१७, २१-११, कविन पटेल वि. वि. विहान मूर्ती १३-२१, २१-१४, २१-१९.

१९ वर्षांखालील मुली – श्रेया भोसले वि. वि. संस्कृती जोशी २१-१, २१-१०, सानिका पाटणकर वि. वि. जिज्ञासा चौधरी २१-१७, २१-१८.

पुणे-शहर स्वच्छतेसाठी गेल्या वर्षभरापासून राबविलेल्या विविध उपक्रमांमुळे केंद्र सरकारच्या स्वच्छ सर्वेक्षणात पुणे शहराने फिनिक्स पक्षाप्रमाणे भरारी घेतली आहे. गेल्या वर्षी 20 वा क्रमांक असताना यावर्षी देशात 10 क्रमांक मिळाला आहे. हे सर्वेक्षण 40 निकषांवर घेण्यात आले. त्याचे ‘रँकिंग’ केंद्राने जाहीर केले असून पहिल्या दहा शहरांमध्ये नवी मुंबई महापालिका आणि पुणे शहराचा क्रमांक लागतो. मागील वर्षी पुण्याचा 20 वा क्रमांक होता.

पुणे शहर स्वच्छतेच्या बाबतीत देशात दहावे. एक लाख लोकसंख्येच्या वर 10 वे आणि दहा लाख लोक संख्येच्या वरील शहरात देशात नववा क्रमांक मिळवला आहे. पुणे मनपाला 5 स्टार रँक मिळाले आहे. महापालिका आयुक्त विक्रम कुमार, घन कचरा विभाग प्रमुख संदीप कदमयांनी राष्ट्रपती द्रौपदी मुर्मु यांच्या हस्ते दिल्ली येथे झालेल्या कार्यक्रमात हा पुरस्कार स्वीकारला.

वर्षभरामध्ये शहर स्वछतेच्या बाबतीत विविध उपाययोजना केल्या आहेत. कचऱ्याचे क्रोनीक स्पॉट शोधून ते नष्ट करणे, रोजचा कचरा रोज गोळा करणे, 100 टक्के कचऱ्यावर प्रक्रिया, अतिरिक्त मनुष्यबळ, सार्वजनिक शैचालयाची नियमित स्वछता असे सर्व प्रयत्न करण्यात येत आहेत. नागरिकांची साथ मिळत आहे. नागरिकांच्या सहकाऱ्याने येत्या काळात पहिला क्रमांक मिळवण्याचे उद्दिष्ट ठेवण्यात आले आहेस असे मनपा आयुक्त विक्रम कुमार यांनी सांगितले.

कर्मचाऱ्यांचे प्रयत्न, त्याला नागरिकांची साथ मिळत आहे. शहर स्वचतेसाठी येत्या काळात अनोखे उपक्रम राबवण्यात येणार आहेत. तसेच जनजागृतीसाठी विविध संस्थांचा सहभाग देखील वाढवण्यात येणार आहे. प्रयत्नांमध्ये सातत्य ठेवून देशात पुणे महापालिका अग्रक्रमी राहावी यासाठी प्रशासन झोकून काम करेल, असा विश्वास घनकचरा विभागाचे उपायुक्त संदीप कदम यांनी व्यक्त केला.

 पुणे- राज्य उत्पादन शुल्कच्या पुणे विभागाने बनावट परदेशी स्कॉच तयार करणाऱ्या कारखान्याचा (Fake Foreign Scotch Factory) पर्दाफाश करुन केवळ दहा लाखांचा मुद्देमाल जप्त केला आहे. कात्रज परिसरातील देहुरोड बायपास रोड आंबेगाव बु. येथे बनावट परदेशी स्कॉचचा कारखाना सुरु होता. राज्य उत्पादन शुल्क विभागाच्या या कारवाईमुळे खळबळ उडाली आहे. या कारवाईत महेशभाई हरिभाई कोळी (रा. बालाजी हाईट्स, मंगळवार पेठ, पुणे) याला अटक केली आहे.दरम्यान या कारवाईत परदेशी स्कॉच च्या सीलबंद अशा अवघ्या ३४ बाटल्याच कशा सापडल्या यावर छापे टाकणारेच चक्रावल्याचे वृत्त समजते आहे.

देहूरोड बायपास रोड से. नं. 3 आंबेगाव बुद्रुक येथे बनावट परदेशी स्कॉच बनवण्याचा कारखाना सुरु असल्याची माहिती राज्य उत्पादन शुल्क सी विभाग, पुणे पथकाचे उपअधीक्षक संतोष जगदाळे यांना मिळाली. त्यानुसार पथकाने शुक्रवारी आंबेगाव बु. येथील कारखान्यावर दारुबंदी गुन्ह्यांतर्गत छापा टाकला. या ठिकाणावरुन बनावट परदेशी स्कॉचच्या एकूण 34 सिलबंद बाटल्या, दोन दुचाकी वाहने, 551 रिकाम्या बाटल्या, बाटल्यांचे बुचे, मोनोकार्टून, हिट गन (हेअर ड्रायर), इंडक्शन (शेगडी), प्लॉस्टिक पॅकिंग रोल, प्लॉस्टिक चिकटपट्टी आणि मोबाईल फोन असा एकूण 10 लाख 39 हजार 747 रुपयांचा मुद्देमाल जप्त करण्यात आला.

या कारखान्यात परदेशी बनावटीचे मद्य वापरण्यात आलेल्या रिकाम्या बाटल्यातून पुन्हा भरून त्याची विक्री केली जात होती. हे मद्य पार्सलद्वारे मुंबई व इतर शहरामध्ये पाठविले जात होते तसेच दुचाकीचा वापर करून पुणे शहरात त्याची विक्री केली जात होती. अशी माहिती अटक करण्यात आलेल्या आरोपीने पथकाला दिली.

ही कामगिरी आयुक्त, राज्य उत्पादन शुल्क, महाराष्ट्र राज्य, मुंबई विजय सूर्यवंशी, संचालक सुनिल चव्हाण यांच्या आदेशावरुन व विभागीय उपआयुक्त विजय चिंचाळकर तसेच अधीक्षक, राज्य उत्पादन शुल्क, पुणे चरणसिंग राजपूत यांच्या मार्गदर्शनाखाली उप अधीक्षक संतोष जगदाळे, निरीक्षक आर.पी. शेवाळे, दुय्यम निरीक्षक एन.एन. मारकड, सहाय्यक दुय्यम निरीक्षक एस. एस. लोहकरे, एस.एस. इंदलकर, जवान व वाहनचालक जवान शरद भोर, गोपाल कानडे, व महिला जवान उज्वला भाबड यांच्या पथकाने केली. गुन्हयाचा तपास राज्य उत्पादन शुल्क, सी विभागाचे निरीक्षक राजाराम प्रभु शेवाळे करीत आहे.

पुणे : पुणे पोलीस आयुक्त रितेश कुमार यांनी काल शुक्रवारी रात्री उशिरा पुणे शहरातील पंधरा वरिष्ठ पोलीस निरीक्षकांच्या बदल्या केल्या आहेत. बदल्या झालेल्या वरिष्ठ पोलीस निरीक्षकांची नावे आणि त्यापुढील कंसात कुठून कोठे बदली झाले हे पुढील प्रमाणे आहे.

दत्तात्रय विश्वनाथ भापकर (वरिष्ठ पोलीस निरीक्षक, विश्रांतवाडी पोलीस स्टेशन ते पोलीस निरीक्षक वाहतूक शाखा)

कांचन मोहन जाधव (पोलीस निरीक्षक (गुन्हे), येरवडा पोलीस स्टेशन ते वरिष्ठ पोलीस निरीक्षक, विश्रांतवाडी पोलीस स्टेशन)

विजय रघुनाथ पुराणिक (पोलीस निरीक्षक (गुन्हे) भारती विद्यापीठ, पोलीस स्टेशन ते पोलीस निरीक्षक वाहतूक शाखा)

अनिता रामचंद्र हिवरकर (पोलीस निरीक्षक (गुन्हे) फरासखाना पोलीस स्टेशन ते पोलीस निरीक्षक गुन्हे शाखा अमली पदार्थ विरोधी पथक -1)

सुनील गजानन थोपटे (पोलीस निरीक्षक गुन्हे शाखा, अमली पदार्थ विरोधी पथक एक ते नियंत्रण कक्ष)

संदीप देशमाने (पोलीस निरीक्षक, सहकारनगर पोलीस स्टेशन ते वरिष्ठ पोलीस निरीक्षक अलंकार पोलीस स्टेशन)

क्रांतीकुमार पाटील (पोलीस निरीक्षक गुन्हे शाखा, दरोडा व वाहन चोरी प्रतिबंधक पथक ते गुन्हे शाखा खंडणी विरोधी पथक 1)

विनायक दौलतराव गायकवाड (वरिष्ठ पोलीस निरीक्षक, भारती विद्यापीठ पोलीस स्टेशन ते गुन्हे शाखा दरोडा व वाहन चोरी प्रतिबंधक पथक 1)

दशरथ शिवाजी पाटील (वरिष्ठ पोलीस निरीक्षक, लष्कर पोलीस स्टेशन ते भारती विद्यापीठ पोलीस स्टेशन, वरिष्ठ पोलीस निरीक्षक)

संतोष उत्तमराव पाटील (वरिष्ठ पोलीस निरीक्षक, बंडगार्डन पोलीस स्टेशन ते वरिष्ठ पोलीस निरीक्षक, येरवडा पोलीस स्टेशन)

बाळकृष्ण सीताराम कदम (वरिष्ठ पोलीस निरीक्षक, येरवडा पोलीस स्टेशन ते आर्थिक गुन्हे शाखा)

राजेश रामचंद्र तटकरे (वरिष्ठ पोलीस निरीक्षक, अलंकार पोलीस स्टेशन ते पोलीस निरीक्षक कोर्ट कंपनी)

महेश गुंडप्पा बोळकोटगी (पोलीस निरीक्षक, गुन्हे शाखा युनिट 5 ते वरिष्ठ पोलीस निरीक्षक मुंडवा पोलीस स्टेशन)

विष्णू नाथा ताम्हणे ( वरिष्ठ पोलीस निरीक्षक, मुंढवा पोलीस स्टेशन ते पोलीस निरीक्षक गुन्हे शाखा युनिट 5)

विजय गणपतराव कुंभार (पोलीस निरीक्षक, विशेष शाखा ते पोलीस निरीक्षक गुन्हे शाखा, अभयोग कक्ष)

लष्कर आणि बंडगार्डन पोलीस स्टेशन येथील क्राईम पीआय हे पुढील आदेश होईपर्यंत सदर पोलीस स्टेशनचे वरिष्ठ पोलीस निरीक्षक या पदाचा अतिरिक्त कार्यभार पाहतील. सर्वच पोलीस निरीक्षकांनी पदस्थापनेच्या ठिकाणी त्वरित कार्यभाग स्वीकारून अनुपालन अहवाल पोलीस आयुक्त कार्यालयास सादर करण्याचे आदेश पोलीस आयुक्त रितेश कुमार यांनी दिले आहेत.

पुणे-लष्कर परिसरातील कॅम्प भागात 30 ते 35 वर्षात वयोगटातील तरुणाचा खून झाला आहे. लष्कर पोलिस ठाण्याच्या हद्दीत ताबूत स्ट्रीट येथे दिल्ली दरबार हॉटेलच्या पुढे 30 ते 35 वयोगटातील एका तरुणावर कोणत्याही धारदार कोयतेने वार करून त्याचा खून करण्यात आल्याचे शनिवारी पहाटे साडेतीन वाजण्याच्या सुमारास उघडकीस आले आहे .याप्रकरणी पोलिसांनी सदर मृतदेह ताब्यात घेऊन शवाविच्छेदनासाठी ससून रुग्णालयात पाठवला. अद्याप मयातची ओळख पटली नसल्याची माहिती पोलिसांनी दिली आहे. सदर खुनातील आरोपींचा शोध पोलिस घेत आहे .घटनास्थळ परिसरातील सीसीटीव्ही फुटेजची पाहणी करून आरोपींचा माग काढण्यात येत आहे .याप्रकरणी लष्कर पोलिस ठाण्यात अज्ञात आरोपींवर गुन्हा दाखल करण्यात आला आहे.पोलीस निरीक्षक प्रियांका शेळके.9527977977 याप्रकरणी अधिक तपास करत आहेत.

पुणे- अनधिकृत बांधकामे , बेकायदा धंदे, दादागिरी, गुंडगिरी चे आगर बनत चाललेल्या दक्षिण पुण्यातील कात्रजच्या दिवस रात्र वर्दळ असलेल्या चौकात खून झाला आहे.. सीसी टीव्ही चे जाळे , नेहमीच्या व्यावसायिकांची वर्दळ , पोलीसांचे राउंड एवढे सारे असताना .. संध्याकाळी ५ वाजेपर्यंत काहीही समजू शकलेले नव्हते .आज सकाळी ८ वाजता कात्रजच्या चौकातील भाजी मंडई पासून संतोषनगर कडे जाणाऱ्या चौकात मनोहर भीमराव बगल (वय ५५ ) यांचा मृतदेह पोलिसांना आढळला आहे.दगडाने किंवा कशाच्या तरी साह्याने त्यांना ठार मारण्यात आले आहे .याप्रकरणी त्यांचा मुलगा महादेव बगल (वय २९ रा. कात्रज ) यांनी फिर्याद नोंदविली आहे. एवढेच पोलिसांनी सांगितले .सहायक पोलीस निरीक्षक भाबड 8668449687 याप्रकरणी अधिक तपास करत आहेत .

 तर्पण फाउंडेशन तर्फे  तर्पण युवा पुरस्कार प्रदान सोहळा

पुणे :  अनाथांना महाराष्ट्रात १ टक्का आरक्षण सुरु आहे. यामुळे अनेक अनाथ मुलांना नोक-या मिळायला लागल्या. स्पर्धा परीक्षांची फी देखील कमी केली आहे.  आता अनाथांना महाराष्ट्रात कोणत्याही कोर्सला शैक्षणिक शुल्क भरावे लागणार नाही. याचा निर्णय एक महिन्यापूर्वी झाला आहे. महिला बाल कल्याण विभागाकडे हे काम असून हा मोठा निर्णय झाला असल्याचे राज्याचे  उच्च व तंत्र शिक्षण मंत्री चंद्रकांत पाटील यांनी सांगितले. 
तर्पण फाउंडेशन तर्फे स्वामी विवेकानंदांच्या जयंतीचे औचित्य साधून तर्पण युवा पुरस्कार प्रदान सोहळा कात्रज कोंढवा रस्त्यावरील इस्कॉन मंदिराच्या कमलनयन बजाज अतिथी गृहात पार पडला. कार्यक्रमाला  सावित्रीबाई फुले पुणे विद्यापीठाचे कुलगुरू डॉ. सुरेश गोसावी, तर्पण फाऊंडेशनचे संस्थापक आमदार श्रीकांत भारतीय, प्रकल्प संचालक ऊर्जा भारतीय, इस्कॉन पुणे चे उपाध्यक्ष रेवतीपती प्रभू, पुण्यातील संचालक संजय भोसले, अशोक गुंदेचा, जनार्दन चितोडे, राजेश मेहता, किशोर तळेकर, पुरुषोत्तम पाटील, शशिकांत जगदाळे, प्रविण पाटील, अनुप शहा आदी उपस्थित होते.
अनाथ मुलांसाठी कार्य करणाऱ्या व्यक्ती आणि संस्थांच्या कार्याचा गौरव तर्पण युवा पुरस्कार प्रदान सोहळ्याच्या माध्यमातून दरवर्षी केला जातो. यावर्षी पुण्यातील विजय फळणीकर यांना ‘आपलं घरं’  संस्था, नाशिकमधील स्वामी नारायण मंदिराचे प.पू. माधव स्वामी महाराज आणि अमरावतीमधील गुंजन गोळे यांच्या ‘गोकुळाश्रम’ संस्थेला यंदाचा पुरस्कार प्रदान करण्यात आला. मानपत्र, रोख रक्कम आणि स्मृतीचिन्ह असे या पुरस्काराचे स्वरुप होते. कार्यक्रमासाठी संपूर्ण महाराष्ट्रातून तर्पण फाउंडेशनचे संचालक उपस्थित होते. 
चंद्रकांत पाटील म्हणाले, परमेश्वराने भेदभाव निर्माण केला नाही. मात्र, आपण जाती, पंथ, भाषा, उपासना पद्धती यावर  भेदभाव निर्माण केला. हा समाज माझा आहे, दुस-याचे दु:ख आपले मानून तर्पण फ़ौउंडेशन सारख्या संस्था कार्यरत आहेत. हिंदू तत्वज्ञानात माणसाला कसे जगावे हे शिकविण्यात आले. माझ्या समाजाची काळजी मी करणे, हा धर्म आहे, हे स्वामी विवेकानंद यांनी शिकविले. हिंदवी स्वराज्य निर्माण करणा-या छत्रपती शिवाजी महाराजांचे मोठे योगदान आहे. त्यांना जिजामातांनी घडविले. त्यामुळे त्यांचे कार्य आपल्याला आदर्शवत आहे. 
डॉ.सुरेश गोसावी म्हणाले, बालसुधारगृहातून बाहेर पडल्यानंतर पुढे काय? असा प्रश्न मुलांसमोर असतो. त्यांना योग्य दिशा मिळाली तर त्यांचे आयुष्य चांगले घडू शकते. त्यांच्यासाठी काम करणारी ही संस्था आहे. ही संस्था आणखी मोठी व्हावी अशी सदिच्छा त्यांनी व्यक्त केली.

श्रीकांत भारतीय म्हणाले, तर्पण फाउंडेशन हे १८ वर्षांपेक्षा जास्त वय असलेल्या अनाथ मुलांसाठी संपूर्ण महाराष्ट्रभर काम करते. महाराष्ट्रात प्रत्येक जिल्ह्यात तर्पण फाउंडेशनचे संचालक आहेत. फाउंडेशन मार्फत अनाथ मुलांच्या शिक्षणाबरोबरच नोकरी मिळविण्यासाठी सुद्धा मदत केली जाते. शिक्षण आणि नोकरी झाल्यानंतर मुलांचे विवाह जुळविणे आणि थाटात लग्न लावून देण्याचे कार्यसुद्धा फाउंडेशन करते. त्यामुळे अश्याप्रकारे अनाथ मुलांसाठी काम करणाऱ्या व्यक्ती व संस्थांना प्रोत्साहित करण्याकरीता पुरस्कार वितरण सोहळा आयोजित केला जातो, असेही त्यांनी सांगितले. 

नोटीसा देण्यापूर्वीच अन दिल्यावरही लाखोची वसुली करणाऱ्या पालिकेच्या कनिष्ठ अभियंते आणि निरीक्षकांच्या विरोधात वाढत्या तक्रारी

बेकायदेशीर,पक्षपाती  कारवाईविरुद्ध सोमवारी धरणे आंदोलन

‘पुणे शहर छोटे व्यावसायिक,गाळेधारक,भाडेकरू महासंघ’स्थापन 

मंत्री इस्टेट सोसायटीत टेरेसवरील  फ्लॅटसदृश  ८ बेकायदेशीर बांधकामांकडे  पालिकेचा काणा डोळा,तळमजल्यांवरील गाळ्यांच्या शेडवर मात्र कारवाई 
पुणे :
अतिक्रमण काढण्याच्या नावाखाली पुणे शहरात चालू असलेल्या पालिकेच्या मनमानी ,पक्षपाती आणि बेकायदेशीर कारवाईच्या विरोधात दाद मागण्यासाठी ‘पुणे शहर छोटे व्यावसायिक,गाळेधारक,भाडेकरू महासंघ’स्थापन करण्यात आला असून मनमानी कारवाईच्या विरोधात सर्व पातळ्यांवर दाद मागणार असल्याची माहिती पत्रकार परिषदेत देण्यात आली . महासंघाचे निमंत्रक हसीब कमलानी यांच्यासह ,डॉ.पायल शाह,हेमराम चौधरी,अशोक शिरवे हे प्रतिनिधी या पत्रकार परिषदेला उपस्थित होते. 
पुणे पालिकेच्या या संशयास्पद कारवाईची चौकशी व्हावी. मंत्री इस्टेस्ट सोसायटीसह सर्व अन्यायग्रस्त गाळे धारकांना न्याय मिळावा. बड्या धेंडांच्या बेकायदेशीर बांधकामांवर प्राधान्याने कारवाई करावी,या मागणीसाठी १५ तारखेपासून सॅलिसबरी पार्क येथे मांडव टाकून उपोषण केले जाणार आहे,अशी माहिती या पत्रकार परिषदेत देण्यात आली. 

महासंघाच्या भूमिकेची पुष्टी करण्यासाठी सॅलिस्बरी पार्क येथील सोसायटीमधील हेतूपूरस्सर झालेल्या , दूजाभाव करणाऱ्या अतिक्रमण तोडणाऱ्या कारवाईची माहिती देखील या पत्रकार परिषदेत दिली गेली .सॅलिसबरी पार्क मधील मंत्री इस्टेट को-ऑपरेटिव्ह हौसिंग सोसायटी मध्ये निवासी फ्लॅट आणि ४० व्यावसायिक गाळे आहेत.त्यात दुकाने,कॅफे,किराणा,सलून,दवाखाना असे व्यवसाय चालवले जातात. त्यांच्याकड़े सर्व आवश्यक परवाने आहेत. याच इमारतीच्या टेरेस वर काही रहिवाशांनी बेकायदेशीर बांधकाम करून शेड टाकून ८ फ्लॅट तयार करून वापर चालविला आहे.बाल्कनी बंद करून खोल्या करण्यात आल्या आहेत.त्याविरोधात गाळेधारकांनी पालिकेच्या क्षेत्रीय कार्यालयाकडे,बांधकाम विभागाकडे  लेखी तक्रारी केल्या.टेरेसवरील बेकायदेशीर फ्लॅट सदृश अवैध बांधकामाचेवर कारवाई होण्याऐवजी तक्रार करणाऱ्या गाळेधारकावर अतिक्रमण विभागाने नोटीस न देता,वेळ न देता  कारवाई केली.
टेरेस वरील फ्लॅट बांधकामाचे साहित्य खालच्या गाळ्यात येणाऱ्या ग्राहकांवर पडून जीवितहानी होऊ नये ,कचरा पडू नये म्हणून गाळे धारकांनी तात्पुरत्या शेड बांधल्या होत्या. त्या फुटपाथवर किंवा रस्त्यावर नसून गाळ्यासमोर इमारतीच्या जागेतच आहेत. मात्र,त्या पाडताना तेथील फ्रिज,मशिनरी,सामान देखील तोडण्यात आले. आणि शिवीगाळ करून लाखोंचे नुकसान करण्यात आले.त्यामागे या इमारतीत राहणारा  पुणे जिल्हा परिषदेतील एक   अधिकारी असून त्याने गाळे धारकांकडे अतिक्रमण विरोधी कारवाई नको असल्यास दरमहा १ लाख रुपये मला द्या,अशी मागणी करून धमक्याही देत असल्याची माहिती या पत्रकार परिषदेत देण्यात आली.  
टेरेसवरील बेकायदा फ्लॅट बांधकाम वाचविण्यासाठी पालिकेतील अधिकाऱ्यांच्या साहाय्याने गाळेधारकांच्या शेडचे बळी देऊन कागद रंगविण्यात आल्याचा आरोप महासंघाने केला.   
अतिक्रमण विरोधी कारवाईच्या चौकशीची मागणी* 
पुणे शहरात सुरु असलेली अतिक्रमण विरोधी कारवाई शंकास्पद असून या मोहिमेचीच चौकशी करावी,अशी मागणी या पत्रकार परिषदेत करण्यात आली. जिथे ही कारवाई केली गेली आहे ,तिथे छोट्या व्यवसायिकांचा बळी देण्यात आला असून बड्यांची अतिक्रमणे त्यामागे हुशारीने लपवली आहेत,असा आरोप या पत्रकार परिषदेत करण्यात आला. अतिक्रमण विरोधी कारवाई ही दुबळ्यांवर होत नाही. जे लोक प्रभावीपणे दाद मागू शकणार नाहीत,अशाच ठिकाणी कारवाई होत आहे. शहरात असलेली रुफटॉप हॉटेले पालिकेच्या आणि उच्च पदस्थांशी संबंधित आहेत.तिथे मात्र कोणीही कारवाईला जात नाही,असा दाखला या पत्रकार परिषदेत देण्यात आला. 
मनमानी कारवाईच्या विरोधात धरणे आंदोलन*
पुणे पालिकेच्या या शंकास्पद कारवाईची चौकशी व्हावी. मंत्री इस्टेस्ट सोसायटीसह सर्व अन्यायग्रस्त गाळे धारकांना न्याय मिळावा. बड्या धेंडांच्या बेकायदेशीर बांधकामांवर प्राधान्याने कारवाई करावी,या मागणीसाठी १५ तारखेपासून सॅलिसबरी पार्क येथे मांडव टाकून उपोषण केले जाणार आहे,अशी माहिती  हसीब कमलानी यांनी दिली.  

पुणे: प्रधानमंत्री जनमन योजनेअंतर्गत कातकरी समाजातील पात्र व्यक्तींना शासनाच्या विविध योजनांचा लाभ देण्यासाठी आवश्यक नियोजन करावे, असे निर्देश जिल्हाधिकारी डॉ.राजेश देशमुख यांनी दिले.

जनमन योजनेचा आढावा घेण्यासाठी दूरदृष्यप्रणालीद्वारे आयोजित बैठकीत ते बोलत होते. बैठकीस जिल्हा परिषदेचे मुख्य कार्यकारी अधिकारी रमेश चव्हाण, निवासी उपजिल्हाधिकारी ज्योती कदम, जिल्हा ग्रामीण विकास यंत्रणेच्या प्रकल्प संचालक शालिनी कडू, उपजिल्हाधिकारी रोहिणी आखाडे, जिल्हा आरोग्य अधिकारी डॉ.सचिन देसाई, घोडेगाव येथील एकात्मिक आदिवासी विकास प्रकल्पाचे प्रकल्प अधिकारी बळवंत गायकवाड, जिल्हा अग्रणी बँक व्यवस्थापक श्रीकांत कारेगावकर आदी उपस्थित होते.

डॉ.देशमुख म्हणाले, केंद्र शासन स्तरावरून जनमन योजनेचे संनियंत्रण होत आहे. यामुळे योजनेच्या यशस्वी अंमलबजावणीसाठी सूक्ष्म नियेाजन करावे. कातकरी समाजाला वैयक्तिक आणि सामुहिक लाभाच्या योजनांचा लाभ देण्यासाठी नियोजन करावे. प्रत्येक पात्र लाभार्थ्याला सर्व योजनांचा लाभ मिळेल असे सुनिश्चित करावे. पात्र व्यक्ती लाभाशिवाय राहणार नाही याची दक्षता घ्यावी, त्यासाठी आवश्यक बाबींची पुर्तता करावी, असे त्यांनी सांगितले.

मुख्य कार्यकारी अधिकारी श्री.चव्हाण यांनी लाभार्थ्यांची आधार कार्ड नोंदणी आणि उज्वला गॅस जोडणीबाबत सूचना दिल्या.

यावेळी श्रीमती आखाडे आणि श्रीमती कडू यांनीदेखील योजनेच्या अंमलबजावणीबाबत मार्गदर्शन केले.

आंबेगाव तालुक्यात २६, भोर ३०, मावळ ९१, मुळशी २७, जुन्नर ८, खेड ३४ आणि वेल्हे तालुक्यात ११ गावे अशा एकूण २२६ गावात ही योजना राबविण्यात येणार आहे, अशी माहिती यावेळी देण्यात आली.

बैठकीला खेड, जुन्नर, आंबेगाव आणि भोरचे उपविभागीय अधिकारी, संबंधित तालुक्याचे तहसिलदार, गटविकास अधिकारी दूरदृष्य प्रणालीद्वारे उपस्थित होते.