इराण प्रतिनिधी मंडळाचा खुलासा सत्य वास्तवतेवर आधारित …..
⁃ काँग्रेस’चे वरीष्ठ प्रवक्ते गोपाळदादा तिवारी
पुणे –
देशाचे (भाषणजीवी) पंतप्रधान मोदी हे देशहिताचे निर्णय तत्परतेने घेत नाही, तेंव्हा ‘जनता आणि विपक्ष विदेशनीती हातात घेऊन राष्ट्रहित जपते’ याचा प्रत्यय ईराण’च्या निर्णय प्रक्रियेतून आल्याचे प्रतिपादन महाराष्ट्र प्रदेश काँग्रेस’चे वरीष्ठ प्रवक्ते गोपाळदादा तिवारी यांनी केले.
इराणने भारताचे दोन जहाज होर्मुज मधून सोडताना भारत सरकार’चा स्पष्ट अनुल्लेख करून, संपूर्ण श्रेय स्पष्टरित्या ‘भारतीय जनतेला’ दिले असल्याचे त्यांनी सांगितले. ते पुढे म्हणाले की, भारताचा जुना मित्र इराणला जेंव्हा दुष्ट प्रवृत्तीचा इज्राइल धमक्या देत होता, तेंव्हा असंख्य देशांनी अटक वारंट काढलेल्या इज्राइलच्या नेतान्याहूने पंतप्रधान मोदींना तातडीने बोलावून घेतले व एक मेडल (पुरस्कार) *बहाल केला (गळ्यात बांधला) आणि आपल्या कुकर्मांना भारताची अप्रत्यक्ष स्वीकृती मिळवून घेत, दुसऱ्या दिवशी इराणवर इज्राइल आणि अमेरिकेने हल्ला केला, इराणचे सर्वोच्च नेते अली खोमेनींना मृत्यूस सामोरे जावे लागले, मात्र पारंपरिक मित्र असलेल्या भारत सरकारने, साधा शोक संदेश ही तत्परतेने दिला नसल्याचा तर *अत्यंत विलंबाने दिल्याचा आरोप ही त्यांनी केला.

भारतीय जनता’ मात्र इराणवर झालेल्या या अत्याचारामुळे दुखावली, इराणचे समर्थन आणि शहिद अली खोमेनी यांच्या समर्थनार्थ शोक संदेशांचा देशात पाऊस पडला.
भारत सरकारच्या अश्या वागण्यामुळे दुखावलेला इराण, ‘भारतीय जनतेच्या प्रेमाने’ मात्र निश्चितच सुखावला.
तसेच, इराण’चे पूर्णतः निशस्त्र युद्धक जहाज भारताच्या आमंत्रणावर विशाखापट्टण येथे आले होते, त्याच्या सैनिकांनी विशाखापट्टणमच्या रस्त्यावर भारतीय राष्ट्रपतींना सलामी दिली मात्र परतीच्या प्रवासात (भारताच्या जवळच) अमेरिकेने युद्ध नियम धाब्यावर ठेऊन, या निःशस्त्र जहाजाला बुडवले. जहाजातून आपत्तीचा एसओएस कॉल प्रथम भारताला देण्यात आला होता पण भारत सरकारला बुडणाऱ्या इराणी प्रवाशांना वाचवण्याची कदाचित अमेरिकडून अनुमती मिळाली नसावी म्हणूनच भारत सरकारने वा सैन्याने पावले उचलली नसावीत अशी उपहासात्मक टिका ही काँग्रेस वरीष्ठ प्रवक्ते गोपाळदादा तिवारी यांनी केली.
त्याचवेळी लहानशा श्रीलंकेने मात्र कसल्याही अनुमतीची पर्वा न करता आपल्या छोट्याश्या कुवतीने जमेल तितक्या इराणी लोकांना वाचवले याकडे ही त्यांनी लक्ष वेधले.

भारत सरकारने पुन्हा साधा ‘शोक संदेश’ ही दिला नाही का अमेरिकेच्या दबावाखाली भारत सरकार हे करू शकले नाही.. (?) असा संतप्त सवाल की काँग्रेस’चे वरीष्ठ प्रवक्ते गोपाळदादा तिवारी यांनी केला.
भारतीय जनता पुन्हा हळहळली, शोक संदेशांचा आणि आपल्याच सरकारच्या निर्भर्त्सनेचा देशात विविध माध्यमांवर पाऊस पडला. देशाच्या विदेशनीतीची व भारताच्या सार्वभौमत्वाची अशी दुर्गती पाहून, विपक्षाने सूत्रे आपल्या हातात घेतली.
ज्येष्ठ काँग्रेस नेत्या श्रीमती सोनिया गांधी यांनी यावर देशातील प्रमुख माध्यमातून विस्तृत लेख लिहून, ‘सद्य स्थितीतील भारत सरकारची नीती ही भारताची नीती नाही, भारतीय जनतेची ही नीती नाही, हा भारतीय जनमानसाचा दृष्टिकोन नाही, हे साऱ्या जगासमोर विशेषतः इराणसमोर स्पष्ट केले.
त्याचीच् परिणीती म्हणजे इराणने भारताचे दोन जहाज होर्मुजतून सोडले आणि हा ‘मित्रत्वाचा, संवेदनशीलता व आत्मियतेचा* भाव’ भारत सरकार मुळे नसून ‘भारतीय जनतेचा’ आहे हे अगदी इराण’ने स्पष्ट शब्दात सांगितले.
अश्या रितीने भारतातील जनता आणि विरोधी पक्ष’ यांनी विदेश नीतीत कृतीशील पुढाकार घेऊन युद्धजन्य परिस्थितीत ‘भारतास संभाव्य ऊर्जा संकटपासून काही काळ वाचवण्याचा प्रयत्न केला’ याचे श्रेय काँग्रेस संसदीय पक्षाच्या नेत्या व लोकसभेच्या माजी विरोधीपक्ष नेत्या श्रीमती सोनियाची गांधी यांना व देशातील संवेदनशील व मानवतावादी ईराणप्रेमी सामाजिक घटकांना जात असल्याचे काँग्रेस वरीष्ठ प्रवक्ते गोपाळदादा तिवारी यांनी दिलेल्या प्रसिद्धी निवेदनात म्हटले आहे.

अध्यक्षपदी विरधवल कृष्णराव जगदाळे;उपाध्यक्षपदी विवेक प्रतापराव वळसे पाटील

पुणे- जिल्हा परिषदेच्या अध्यक्षपदी विरधवल कृष्णराव जगदाळे आणि उपाध्यक्षपदी विवेक प्रतापराव वळसे पाटील यांची बिनविरोध निवड करण्यात आल्याचे जितेंद्र डुडी, जिल्हाधिकारी तथा पीठासीन अधिकारी, अध्यक्ष व उपाध्यक्ष निवडणूक जिल्हा परिषद यांनी जाहीर केले.

जिल्हा परिषदेच्या पाचव्या मजल्यावरील यशवंतराव चव्हाण सभागृहात आयोजित जिल्हा परिषदेची विशेष सभा आणि अध्यक्ष आणि उपाध्यक्ष निवडणूकीच्यावेळी उपस्थित होते. यावेळी जिल्हा परिषदेचे मुख्य कार्यकारी अधिकारी गजानन पाटील, जिल्हा परिषद व पंचायत समिती सार्वत्रिक निवडणूक-२०२५ च्या समन्वयक अधिकारी तथा उपजिल्हाधिकारी चारुशिला देशमुख-मोहिते, अतिरिक्त मुख्य कार्यकारी अधिकारी चंद्रकात वाघमारे, उपमुख्य कार्यकारी अधिकारी श्रीकांत खरात, भुषण जोशी, जिल्हा परिषदेचे नवनिर्वाचित सदस्य, पंचायत समितीचे सभापती आदी उपस्थित उपस्थित होते.

श्री. डुडी म्हणाले, महाराष्ट्र जिल्हा परिषद व पंचायत समिती अधिनियम १९६९ चे कलम ४५ (२) आणि महाराष्ट्र जिल्हा परिषदा (अध्यक्ष आणि उपाध्यक्ष व निवडणूक) नियम १९६२ प्रमाणे अध्यक्ष व उपाध्यक्ष यांची निवड करण्यात आली आहे, असे श्री. डुडी म्हणाले.

अध्यक्ष पदाकरिता विरधवल कृष्णराव जगदाळे आणि विजयसिंह बाबासाहेब शिंदे यांनी नामनिर्देशन पत्र दाखल केले, त्यापैकी विजयसिंह बाबासाहेब शिंदे यांनी माघार घेतली. तसेच उपाध्यक्ष पदाकरिता विवेक प्रतापराव वळसे पाटील आणि मंगेश गुलाबराव काकडे यांनी नामनिर्देशन पत्र दाखल केले. त्यापैकी मंगेश गुलाबराव काकडे यांनी माघार घेतली. त्यामुळे अध्यक्षपदी विरधवल कृष्णराव जगदाळे तर उपाध्यक्षपदी विवेक प्रतापराव वळसे पाटील यांची बिनविरोध निवड करण्यात आली आहे.

सुरुवातीला श्री. डुडी यांनी अध्यक्ष व उपाध्यक्ष पदाकरिता प्राप्त नामनिर्देशन पत्राचे वाचन केले. अध्यक्ष व उपाध्यक्ष पदाकरिता प्राप्त सर्व नामनिर्देशन पत्र वैध असल्याचे जाहीर करुन ते मागे घेण्याकरिता १५ मिनीटांचा कालावधी देण्यात आला.

सुरुवातीला दिवंगत उपमुख्यमंत्री अजित पवार यांना श्रद्धांजली अर्पण करण्यात आली.

श्री रामजी संस्थान तुळशीबाग तर्फे श्रीरामनवमी उत्सवाला प्रारंभ ; उत्सवाचे २६५ वे वर्ष

पुणे : पेशवेकालीन ऐतिहासिक तुळशीबाग श्रीराम मंदिरात गुढीपाडव्यानिमित्त श्रीराम जय राम जयजय राम… च्या निनादात श्रीराम-लक्ष्मण-सीता मूर्तीस पवमान अभिषेक करण्यात आला. अभिषेकानंतर मूर्तींना पोशाख व दागिने घालण्यात आले. दरवर्षी गुढीपाडव्याच्या दिवशी श्रीरामनवमी उत्सवास प्रारंभ होतो. पुणे प्रांताचे सरसुभेदार श्रीमंत नारो अप्पाजी तुळशीबागवाले यांनी सन १७६१ साली स्थापन केलेल्या देखण्या मंदिरामध्ये यंदाचे श्रीरामनवमी उत्सवाचे अखंडीत २६५ वे वर्ष साजरे होत आहे.

श्री रामजी संस्थान तुळशीबाग च्यावतीने श्रीराम मंदिरात दि. १९ मार्च ते २ एप्रिल विविध कार्यक्रमांचे आयोजन करण्यात आले आहे. गुढीपाडव्याच्या दिवशी संस्थानचे कार्यकारी विश्वस्त डॉ.रामचंद्र तुळशीबागवाले, विश्वस्त भरत तुळशीबागवाले, रामदास तुळशीबागवाले, श्रीपाद तुळशीबागवाले, कोटेश्वर तुळशीबागवाले, यांसह तुळशीबागवाले परिवार उपस्थित होता. 

उत्सवाच्या पहिल्या दिवशी श्रीरामरक्षा, अथर्वशीर्ष, श्रीविष्णूसहस्त्रनाम, श्रीसूक्त व पुरूषसूक्त पठण देखील मंदिरात झाले. प्रभू श्रीरामाचे दर्शन घेण्याकरीता पुणेकरांनी सकाळपासून मंदिरात गर्दी केली होती. त्यानिमित्ताने मंदिरात फुलांची आकर्षक आरास व विद्युतरोषणाई देखील करण्यात आली आहे.

डॉ.रामचंद्र तुळशीबागवाले म्हणाले, उत्सवांतर्गत श्रीरामरक्षा, अथर्वशीर्ष पठण, श्रीविष्णूसहस्त्रनाम, श्रीसूक्त व पुरुषसूक्त पठण, महापूजा, पालखी, श्री कौसल्या माता डोहाळजेवण, श्रीरामजन्म सोहळा, श्रीरामराज्याभिषेक सोहळा अशा धार्मिक कार्यक्रमांबरोबरच रामायण वाचन, रामायण प्रवचन, सांगितीक कार्यक्रम अशा सांस्कृतिक कार्यक्रमांचे देखील आयोजन करण्यात आले आहे. तसेच रविवार, दि. २२ मार्च रोजी आनंद भाटे यांचे सुश्राव्य गायन, मंगळवार, दि. २४ मार्च रोजी अविष्कार क्रिएशन भाग्यश्री कुलकर्णी प्रस्तुत रामगान हे कार्यक्रम सायंकाळी ५.३० वाजता होणार असून सर्व कार्यक्रम विनामूल्य आहेत. तरी पुणेकरांनी मोठ्या संख्येने उत्सवात सहभागी व्हावे

पुणे, : मुख्यमंत्री देवेंद्र फडणवीस यांच्या दबावाखाली आयुक्त नवल किशोर राम हे आमदार योगेश टिळेकर यांना मदत करत आहेत, असा आरोप काँग्रेसचे शहराध्यक्ष अरविंद शिंदे आणि महापालिकेतील गटनेते चंद्रकांत कदम यांनी बुधवारी केला.

स्थायीच्या मंगळवारी झालेल्या बैठकीत कचऱ्यावर प्रक्रिया करणाऱ्या एका कंपनीचा प्रस्ताव प्रशासनाने सादर केला. त्यास समितीच्या सदस्यांनी विरोध केला. त्यावरून कॉंग्रेसने आज पत्रकार परिषदत घेत हे आरोप केले. मुख्यमंत्री हे टिळेकर यांच्या भावाच्या भूमी ग्रीन एनर्जी कंपनीला काम मिळावे, यासाठी प्रयत्न करत आहेत. आयुक्त देखील चुकीच्या पद्धतीने प्रस्ताव आणत आहेत. कचरा आणि प्रक्रिया प्रकल्पांची क्षमता यांची. तपासणी करावी, शहरातील सर्व प्रकल्पांचे ऑडिट करावे, अशी मागणी शिंदे आणि कदम यांनी केली.

पुणे :जम्मू-काश्मीरमधील पहलगाम येथे झालेल्या दहशतवादी हल्ल्यात मृत्यूमुखी पडलेल्या संतोष जगदाळे यांच्या कुटुंबासाठी दिलासादायक घडामोड घडली आहे. त्यांच्या कन्या आसावरी जगदाळे यांना पुणे महानगरपालिकेत प्रशासकीय अधिकारी म्हणून नोकरी देण्यात आली आहे. त्यांना वर्ग-२ पदाचे नियुक्तीपत्र मिळाले आहे. या निर्णयामुळे संतोष जगदाळे यांच्या कुटुंबाला आर्थिक स्थैर्य मिळणार असल्याचे म्हणले जात आहे. वडिलांच्या निधनानंतर आसावरी यांच्यासाठी शासकीय नोकरीची मागणी होत होती. त्या उच्चशिक्षित असून प्रशासनात काम करण्याची तयारी त्यांनी यापूर्वीच दर्शवली होती.

मध्यंतरी अद्याप नोकरी मिळाली नाही म्हणून जगदाळे कुटुंबाने सरकारवर नाराजी व्यक्त केली होती. त्यानंतर या प्रकरणात राज्याचे उपमुख्यमंत्री एकनाथ शिंदे यांनीही हस्तक्षेप करत संबंधित अधिकाऱ्यांना लवकर निर्णय घेण्याचे निर्देश दिले होते. त्यांच्या सूचनेनंतरच या प्रस्तावाला गती मिळाल्याचे सांगितले जात आहे.

आसावरी जगदाळे यांनी सुरुवातीला उच्च पदाची अपेक्षा व्यक्त केली होती. पण प्रशासकीय नियम आणि पात्रतेच्या चौकटीत राहूनच त्यांना वर्ग-२ पद देण्यात आले आहे. त्यामुळे “विशेष प्रकरण” असले तरी नियमांमध्ये बदल झाला नाही, असे प्रशासनाकडून स्पष्ट करण्यात आले आहे.

दरम्यान, आता आसावरी जगदाळे लवकरच आपल्या नव्या जबाबदारीची सूत्रे हाती घेणार आहेत. त्यांच्या कामगिरीकडे लक्ष लागले आहे. ही नियुक्ती एकीकडे मदतीचा हात म्हणून पाहिली जात असली, तरी दुसरीकडे प्रशासनातील नियम आणि संवेदनशीलतेचा समतोल कसा राखला जातो, याचाही हा एक महत्त्वाचा नमुना ठरत आहे.

मुख्यमंत्र्यांच्या फोनवरुन आसावरी यांना शुभेच्छा

दरम्यान, आसावरी जगदाळे यांना नियुक्तीपत्र देत असताना अधिकाऱ्यांनी मुख्यमंत्री देवेंद्र फडणवीस यांना फोन करुन दिला. यावेळी मुख्यमंत्र्यांनी आसावरी जगदाळे यांचे अभिनंदन केले. काही तांत्रिक कारणास्तव नियुक्ती रखडली होती. पण आपण एकाच दिवसात सर्व नियोजन केल्यानंतर विषय मार्गी लागला, असं मुख्यमंत्र्यांनी आसावरीच्या आईंना सांगितलं. यावेळी आसावरी जगदाळे यांच्या आईंनी मुख्यमंत्र्यांचे मनापासून आभार मानले.

“नमस्कार दादा, आज तुम्ही जास्त फॉलोअप घेतल्यामुळे माझ्या मुलीचं काम झालं आहे. खूप खूप धन्यवाद. माझी आता कुठलीही तक्रार नाही. मी आता खूप आनंदी आहे. तुमच्यामुळे हे सर्व झालं”, अशा शब्दांत आसावरी जगदाळे यांच्या आईंनी मुख्यमंत्र्यांचे आभार मानले. यानंतर आसावरी जगदाळे यांनी देखील मुख्यमंत्री देवेंद्र फडणवीस यांचे फोनवर आभार मानले.

पुणे
अर्जासोबत धर्मादाय आयुक्तांकडील प्रमाणपत्र सादर करू शकले नाहीत म्हणून भाजपच्या स्वीकृत सदस्यपदासाठीचे दोन उमेदवारांचे अर्ज बाद झाले. त्यामुळे महापालिकेच्या मुख्यसभेत बुधवारी
१८) दहाऐवजी आठ सदस्यांची स्वीकृत नगरसेवकपदी निवड करण्यात आली. जयप्रकाश पुरोहित आणि प्रियांका शेंडगे असे अर्ज बाद झालेल्या भाजपच्या सदस्यांची नावे आहेत.

महापालिकेत दहा स्वीकृत नगरसेवक पदांसाठी राजकीय पक्षांकडून अर्ज मागविण्यात आले होते. नगरसेवकांच्या संख्याबळानुसार यामध्ये भाजपचे ७, राष्ट्रवादी काँग्रेस पक्षाचे दोन आणि काँग्रेसच्या एक सदस्याची वर्णी लागणार होती.

भाजपने नीलेश कोंढाळकर, रवींद्र साळेगावकर, राजेंद्र काकडे, विश्‍वास ननावरे, उदय लेले, प्रियांका शेडगे आणि जयप्रकाश राजपुरोहीत या जुन्या कार्यकर्त्यांना संधी दिली होती. त्यानुसार, महापालिका आयुक्तांकडे अर्ज दाखल केले होते. अर्ज छाननीत शेंडगे आणि राजपुरोहीत यांनी अर्जासोबत धर्मदाय आयुक्तांकडील प्रमाणपत्र सादर न केल्याने त्यांचे अर्ज बाद झाले.

दरम्यान, बुधवारी सर्वसाधारण सभेत शेंडगे आणि राजपुरोहीत वगळता उर्वरित पाचही सदस्यांची नावे जाहीर केली. राष्ट्रवादी काँग्रेसतर्फे दत्तात्रेय धनकवडे आणि राकेश कामठे, तर काँग्रेसतर्फे सुनील शिंदे यांच्या निवडीची घोषणा करण्यात आली.

स्मार्ट सिटीवर दोन संचालक, तर सर्वसाधारण सभेत स्मार्ट सिटी कंपनीवर संचालक नेमण्याचा विषय होता. काँग्रेसतर्फे विशाल मलके, तर राष्ट्रवादी काँग्रेस शरदचंद्र पवार पक्षातर्फे नगरसेविका अनिता इंगळे यांना संधी देण्यात आली.

दोन्ही राष्ट्रवादी काँग्रेस युतीत निवडणुका लढल्या असून, एकत्रितच गटनोंदणी केली. या मुळे राष्ट्रवादी काँग्रेसचे दोन स्वीकृत नगरसेवक होऊ शकले. या पार्श्‍वभूमीवर राष्ट्रवादी काँग्रेसने स्मार्ट सिटी कंपनीवर ‘शरदचंद्र पवार पक्षा’ला संधी दिली.

दहापैकी आठजणांची नियुक्ती झाल्याने उर्वरित दोन जागांसाठी अर्ज प्रक्रिया पुन्हा राबविली जाणार आहे. एप्रिल महिन्याच्या पहिल्या मुख्यसभेत ही नियुक्ती होणार आहे.

यासाठी नव्याने अर्ज सादर करावे लागणार असल्याचे नगरसचिव योगिता भोसले यांनी सांगितले.

पीएमपीच्या संचालकपदी अजय खेेडेकर

पीएमपीएमएलच्या संचालक मंडळात नगरसेवकांपैकी एकाची नियुक्ती करण्यात येते. संख्याबळाच्या आधारे हे पद सर्वाधिक सदस्यसंख्या असलेल्या भाजपकडे जाते. भाजपतर्फे नगरसेवक अजय खेडेकर यांची संचालकपदावर नियुक्ती केली. खेडेकर हे शुक्रवार पेठ घोरपडी पेठ प्रभागातून सलग दुसऱ्यांदा विजयी झाले आहेत.

अर्ज बाद , पण उमेदवार बदलणार नाही

भाजप सदस्यांची अर्जासोबतची कागदपत्रे वेळेत सादर झाली नसल्याने अर्ज बाद झाले. पुन्हा निवडीवेळी या उमेदवारांचे अर्ज भरले जातील. तसेच, याच दोन्ही उमेदवारांना संधी दिली जाणार असून, पुढील मुख्यसभेत त्यांची नियुक्ती होईल. तांत्रिक बाबीमुळे त्यांची निवड झाली नाही.

• धीरज घाटे, भाजप शहराध्यक्ष

पुणे, दि.१८: स्वराज्य रक्षक धर्मवीर श्री संभाजी महाराज यांच्या पुण्यतिथी-३३७ व्या बलिदान स्मरणदिनानिमित्त राज्याच्या उपमुख्यमंत्री तथा जिल्ह्याच्या पालकमंत्री सुनेत्रा अजित पवार यांनी श्री क्षेत्र तुळापूर येथील समाधीस्थळी जावून अभिवादन केले आणि समाधीचे दर्शन घेतले.

यावेळी आमदार ज्ञानेश्वर कटके, बापुसाहेब पठारे, जिल्हा परिषद सदस्य किरण साकोरे, मोनिका हरगुडे, पंचायत समिती सदस्य, जिल्हाधिकारी जितेंद्र डुडी, जिल्हा परिषदेचे मुख्य कार्यकारी अधिकारी गजानन पाटील, अतिरिक्त मुख्य कार्यकारी अधिकारी चंद्रकांत वाघमारे, उप विभागीय अधिकारी यशवंत माने, अपर तहसीलदार तृप्ती कोलते, शिरुरचे तहसील बाळासाहेब म्हस्के, वढू.बु. चे सरपंच कृष्णा आरगडे, तुळापुरच्या प्रशासक संरपच ॲड. गुंफा इंगळे आदी उपस्थित होते.

यावेळी उपमुख्यमंत्री श्रीमती पवार यांनी छत्रपती संभाजी महाराज यांच्या पुण्यतिथीनिमित्त तुळापूर येथे आयोजित मुकज्योत पदयात्रेत गावकऱ्यांसोबत सहभागी झाल्या.तुळापूर येथील संगमस्थळी जावून संगमेश्वराचे दर्शन घेतले. तुळापूर स्मारकाच्या अनुषंगाने सुरु असलेल्या विविध विकासकामांबाबत माहिती घेवून ही कामे दर्जेदार, गुणवत्तापूर्ण आणि वेळेत पूर्ण करण्याच्या श्रीमती पवार यांनी सूचना दिल्या. .