पुणे : संगीत क्षेत्रातील तेजस्वी तारा असणाऱ्या स्वरयोगिनी डॉ. प्रभा अत्रे यांच्या नावाने मिळालेला पुरस्कार म्हणजे समृद्ध भारतीय संगीत परंपरा आणि माझ्या कार्याची सांगड घालणारा अमूल्य सन्मान आहे. संगीत ही माझ्यासाठी फक्त कला नसून तो माझा श्वास, साधना आहे. स्वरयोगिनी डॉ. प्रभा अत्रे शास्त्रीय संगीत पुरस्काराने माझी जबाबदारी वाढली असून यापुढेही मी संगीताची साधना अतिशय मनोभावे करून या उच्च परंपरेला न्याय देत हा अनमोल वारसा पुढील पिढ्यांपर्यंत पोहोचविण्याचा अथक प्रयत्न करत राहीन, असे प्रतिपादन आंतरराष्ट्रीय कीर्तीचे तालवादक पंडित रामदास पळसुले यांनी केले.
गानवर्धन आणि तात्यासाहेब नातू फाऊंडेशन यांच्या संयुक्त विद्यमाने दिल्या जाणाऱ्या स्वरयोगिनी डॉ. प्रभा अत्रे शास्त्रीय संगीत पुरस्काराने आंतरराष्ट्रीय कीर्तीचे तालवादक पंडित रामदास पळसुले यांचा शनिवारी (दि. 20) गौरव करण्यात आला. त्या वेळी सत्काराला उत्तर देताना पंडित पळसुले बोलत होते. पुरस्काराचे वितरण ज्येष्ठ शास्त्रीय गायक डॉ. अजय पोहनकर आणि सुप्रसिद्ध लेखक, विचारवंत अच्युत गोडबोले यांच्या हस्ते झाले. तात्यासाहेब नातू फाऊंडेशनचे अध्यक्ष शारंग नातू, गानवर्धनचे अध्यक्ष डॉ. दयानंद घोटकर, सचिव डॉ. वासंती ब्रह्मे मंचावर होते. 50 हजार रुपये, शाल आणि सन्मानपत्र असे पुरस्काराचे स्वरूप होते. टिळक स्मारक मंदिर येथे कार्यक्रमाचे आयोजन करण्यात आले होते.
डॉ. प्रभा अत्रे या शास्त्रशुद्धता, साधना आणि नवनिर्मितीचा संगम असलेल्या महान कलाकार होत्या, असे गौरवाने नमूद करून पंडित रामदास पळसुले म्हणाले, डॉ. प्रभा अत्रे या फक्त गायिकाच नव्हे तर संगीत क्षेत्रातील विद्यापीठ होत्या. त्या संशोधक, लेखिका आणि प्रभावी गुरू देखील होत्या. भारतीय शास्त्रीय संगीताचा वारसा पुढील पिढीपर्यंत पोहाचविण्यासाठी त्यांनी अखंडितपणे कार्य केले. त्यांच्या गायनातील ऊर्जा आजही रसिकांना आनंद आणि प्रेरणा देत आहे. माझ्या गुरूंकडून मिळालेल्या संस्कारांशिवाय माझे संगीत अपूर्ण राहिले असते. हा पुरस्कार मी माझे कुटुंबिय, मित्रवर्य, सहकलाकार, श्रोतृवर्ग आणि सुहृदांना समर्पित करीत आहे.
अध्यक्षपदावरून बोलताना पंडित अजय पोहनकर म्हणाले, डॉ. प्रभा अत्रे आणि माझा 50 वर्षांहून अधिक काळाचा अनुबंध होता. पंडित रामदास पळसुले उत्तम वादन करत असून पुढील पिढी घडवत आहेत. त्यांचे गुरू तालयोगी पंडित सुरेश तळवलकर यांनी आपल्या प्रत्येक शिष्यावर पुत्रवत प्रेम करून त्यांना संस्कारित केले आहे. डॉ. प्रभा अत्रे यांच्या आवडत्या मारवा रागातील धून पंडित पोहनकर यांनी रसिकांना ऐकविली.
अच्युत गोडबोले म्हणाले, मला डॉ. प्रभा अत्रे यांचा सहवास लाभला होता. किरणा घराण्याव्यतिरिक्त त्यांचे शास्त्रीय संगीत क्षेत्रात मोठे योगदान आहे. त्यांच्या नावे तबलावादक व अभ्यासक पंडित रामदास पळसुले यांचा सन्मान होत आहे, ही आनंददायक गोष्ट आहे.
प्रास्ताविकात डॉ. दयानंद घोटकर यांनी गानवर्धन आणि तात्यासाहेब नातू फाऊंडेशनतर्फे दिल्या जात असलेल्या स्वरयोगिनी डॉ. प्रभा अत्रे पुरस्काराविषयी माहिती सांगितली. सूर-ताल या एकाच नाण्याच्या दोन बाजू असल्याने पंडित रामदास पळसुले यांना हा पुरस्कार देण्यात आला असून याचे संगीत क्षेत्रातून विशेष कौतुक होत आहे.
तात्यासाहेब नातू फाऊंडेशनचे विश्वस्त शारंग नातू म्हणाले, अभिजात कला, भारतीय संस्कृतीचे जतन आणि सामाजिक कार्य या हेतूने हा सन्मान दरवर्षी दिला जातो. सन्मानाचे यंदाचे 14वे वर्ष असून नादब्रह्माचे उपासक पंडित रामदास पळसुले यांचा सन्मान करून तालवाद्याचाच सन्मान केला जात आहे.
मान्यवरांचे स्वागत डॉ. दयानंद घोटकर, शारंग नातू यांनी केले. मानपत्राचे वाचन डॉ. वासंती ब्रह्मे यांनी केले तर सूत्रसंचालन सविता हर्षे यांनी केले.
पुरस्कार वितरण सोहळ्यानिमित्त विशेष सांगितीक मैफलीचे आयोजन करण्यात आले होते. सुरुवातीस युवा संतूरवादक निनाद दैठणकर यांनी पूरिया कल्याण राग ऐकवून रसिकांची मने जिंकली. त्यानंतर स्वरयोगिनी पद्मविभूषण डॉ. प्रभा अत्रे यांच्या ज्येष्ठ शिष्या आरती ठाकूर-कुंडलकर यांची गायन मैफल रंगली. त्यांनी चंपाकली रागाने मैफलीची सुरुवात केली. विलंबित एकतालातील ‌‘मोरा मन लागा‌’ ही बंदिश ऐकवून द्रुत आडाचौतालातील तराणा सादर केला. त्यानंतर द्रुत तीनतालात ‌‘अब ना करो गुमान‌’ ही बंदिश प्रभावीपणे सादर केली. ‌‘जाओ जाओ मोसे करो ना बरजोरी‌’ या भैरवीने गायन मैफलीची सांगता केली. कार्यक्रमाची सांगता पंडित रामदास पळसुले यांच्या एकल तबलावादनाने झाली. त्यांनी राग तीनताल सादर केला. रसिकांनी त्यांच्या वादनास भरभरून दाद देत मैफलीचा आनंद घेतला. सुयोग कुंडलकर यांनी संवादिनी साथ केली.

“आमची स्वप्ने आम्हाला बघू द्या, आम्हाला गृहीत धरू नका, आमदार तुम्ही मध्यस्ती करू नका ! नागरिकांचा संतप्त सवाल !

मुख्यमंत्र्यांच्या सहीने आणलेलेली स्थगिती हटवा : लोकमान्यनगर बचाव कृती समितीची ठाम मागणी

पुणे दि. २० : पुणे शहरातील मध्यवर्ती भागात वसलेले लोकमान्यनगर येथील म्हाडाच्या इमारतींचे अनेक प्रश्न उद्भवलेले आहेत. त्या अनुषंगाने येथील रहिवाशांनी स्वतः च्या घरांचा विकास स्वतः विकासक नेमून करण्याचे ठरवेल तसे विकासक नेमले, परंतु आमदार हेमंत रासने यांनी मुख्यमंत्री देवेंद्र फडणवीस यांना पत्र लिहून एकल विकासाच्या नावाखाली स्थगिती आणली. त्यामुळे लोकांच्या घरांच्या पुनर्विकासाचे स्वप्न भंगले आहे. पुणे लोकमान्यनगर बचाव कृतीच्यावतीने आज लोकमान्यनगर येथील शेकडो नागरिकांनी थेट आमदार हेमंत रासने यांच्या कार्यालयावर धडक दिली. यावेळी सह कुटुंबासहीत नागरिक मोठ्या संख्येने उपस्थित होते.

याठिकाणी जमलेल्या नागरिकांनी हात निषेधाचे फलक घेतले होते. रासने यांनी मुख्यमंत्री देवेंद्र फडणवीस यांना दिलेल्या पत्रामुळे लोकमान्यनगर पूर्वविकासाला खीळ बसल्याने संतप्त नागरिकांनी रासने यांच्या विरोधात जोरदार घोषणाबाजी केली. “आमची स्वप्ने आम्हाला बघू द्या, आम्हाला गृहीत धरू नका, पुनर्विकासाला त्वरित मंजुरी द्या. अशा घोषणांनी नातूबाग परिसर नागरिकांनी दणाणून सोडला. कार्यालयावर रासने उपस्थित नसल्याने नागरिक अजून संतप्त झाले. तब्बल अर्ध्या तासानंतर रासने आले. झालेल्या संवादात आमदार हेमंत रासने आणि रहिवाशांमध्ये जवळ जवळ पाऊण तास शाब्दिक खडाजंगी झाली.

नागरिकांनी आमदारांना खडे बोल सुनावले. “आम्हाला आमची स्वप्नं साकार करू द्या,  आमच्या घरांवर विकासकांवर आणलेले स्थगिती अगोदर उठवा, मगच चर्चा अशी नागरिकांनी ठाम भूमिका घेतली. परिणामी गोंधळातच वादळी चर्चा झाली. आम्हाल आमची स्वप्न पाहू द्या आणि पूर्ण करू द्या, तुम्ही मध्यस्ती करण्याची गरज नाही, आणलेले स्थगिती त्वरित हटवा, एकल विकासला आमचा विरोध आहे, आमचा आम्हाला विकास करू द्या, रहिवाशांना विचारात घेऊनच स्वतः रहिवाशांना घरांचे पुनर्विकासाला करू द्या. नागरिकांनी यावेळी रासने यांना निवेदन दिले.

केवळ लोकमान्य नगरचा नव्हे तर संपूर्ण कसबा मतदार संघांतील जीर्ण झालेल्या सोसायट्या यांचा विकास करायचा आहे असे मत आमदारांनी मांडण्याचा प्रयत्न केला, परंतु इतर भागाचे आम्हाला काही सांगू नका केवळ लोकमान्य नगर रहिवाशांचे प्रश्न वेगळे आहेत त्यामुळे आम्हाला आमचा विकास करू द्या आणि स्थगिती हटवा अशी स्थानिक रहिवाशांनी ठाम भूमिका घेतली.

याप्रसंगी ॲड. गणेश सातपुते यांनी लोकमान्य नगर येथील रहिवाशांची बाजू मांडली. त्याचबरोबर रासने यांचे म्हणणे ऐकून त्यावर सातपुते यांनी समन्वयक म्हणून लोकमान्यनगरवासी आणि रासने यांच्यामध्ये यांच्यामध्ये सुसंवाद घडवून आणला.

लोकमान्यनगरचा विकासासाठी मी प्रयत्नशील – रासने

लोकमान्यनगरचा विकासासाठी मी प्रयत्नशील असून यावर लवकरच तोडगा काढेन. केवळ लोकमान्यनगरचा नव्हे तर संपूर्ण कसबा मतदार संघांतील जीर्ण झालेल्या सोसायट्या यांचा विकास करायचा आहे. अजून एकदा लोकमान्य नगरच्या नागरिकांशी चर्चा करणार आहे.

दिव्यांग व्यक्तींनी बनवलेल्या वस्तूंच्या प्रोत्साहन प्रदर्शनात आयोजन : २१ सप्टेंबरपर्यंत प्रदर्शन सुरू

पुणे : दोन्ही डोळे नसतानाही वायर बॅग तयार करणे, भाज्या निवडणे-चिरणे, शोभेच्या वस्तू तयार करणे अशी कामे सहजतेने करत अंधभगिनींनी आपले कलागुण पुणेकरांसमोर सादर केले. पुणेकरांनी देखील अंधभगिनींनी तयार केलेल्या वस्तू विकत घेत त्यांच्या कलेला आणि प्रयत्नांना प्रोत्साहन दिले.

दिव्यांग व्यक्तींना समाजाच्या मुख्य प्रवाहात आणणे, त्यांना स्वावलंबी बनवणे आणि त्यांच्या कौशल्यांची ओळख समाजासमोर करून देणे या उद्देशाने पुण्यातील समविचारी मैत्रिणींनी ‘प्रोत्साहन २०२५’ या प्रदर्शनाचे आयोजन केले आहे. कर्वे रस्त्याजवळील अश्वमेध हॉल येथे हे प्रदर्शन सुरू आहे. 

या प्रदर्शनाचे संयोजन रंजना आठल्ये, रेखा कानिटकर, आरती पटवर्धन, माधुरी पाटणकर, शुभदा करंदीकर, गीता पटवर्धन, आबेदा खान, नीलम भाटवडेकर, अमृता पटवर्धन व रोहिणी अभ्यंकर यांनी केले. महाराष्ट्रातील विविध भागांतून आलेल्या ३१ दिव्यांग व्यक्ती आणि ९ संस्थांचा सहभाग या प्रदर्शनात झाला.

प्रोत्साहन प्रदर्शनाचे उद्घाटन 

इंटिग्रेटेड एज्युकेशन सेंटरच्या अमृता भागवत व गती मंद असलेल्या पूजा मुनोत यांच्या हस्ते झाले. फक्त दिव्यांग व्यक्तींनी बनवलेल्या उपयुक्त कलात्मक वस्तू व खाद्यपदार्थांचे प्रदर्शन तसेच विक्री या ठिकाणी करण्यात आले.

विद्या ज्योती स्पेशल स्कूल, प्रिझम फाउंडेशन, शिर्डी साईबाबा अंध महिला वृद्धाश्रम, संवाद, नंदनवन, स्मित फाऊंडेशन, उन्मेष फाऊंडेशन, मैत्र फाऊंडेशन व मोहोर एंटरप्रायझेस या संस्थांनी सहभाग नोंदवला. धायरी येथील दृष्टीहीन वृद्ध महिलांनी वायर बास्केट व मण्यांच्या शोपीस तयार करण्याचे प्रात्यक्षिक सादर केले. याशिवाय दिव्यांग कलाकारांनी करमणुकीचे कार्यक्रम सादर केले.

प्रदर्शन रविवार, २१ सप्टेंबरपर्यंत सर्वांसाठी खुले असून प्रवेश विनामूल्य आहे.

महाराष्ट्र लोकसेवा हक्क अधिनियम अंतर्गत संबंधित सेवांचा घेता येणार लाभ

पिंपरी (दि.२०) : पुणे महानगर प्रदेश विकास प्राधिकरण हद्दीतील नागरिकांना सुलभ व कालमर्यादेत सेवा मिळाव्यात, यासाठी महाराष्ट्र लोकसेवा हक्क अधिनियमानुसार १९ सेवा सुविधा ऑनलाइन पद्धतीने सुरू करण्यात आल्या आहे. नागरिकांना शासकीय सेवा / कामे घरबसल्या ऑनलाईन करता यावी, यासाठी पीएमआरडीएच्या माध्यमातून संबंधित सेवा सुविधा ऑनलाईन करण्यात आल्याने नागरिकांना मोठ्या प्रमाणावर दिलासा मिळणार आहे. आठवड्याभरात यात १० नवीन सेवांची भर पडणार असून नागरिकांना पीएमआरडीएमधील एकूण २९ सेवांचा लाभ ऑनलाईन घेता येणार आहे.

शासनाच्या अधिसूचित सेवा पारदर्शक, गतिमान आणि विहित कालमर्यादेत देण्यासाठी महाराष्ट्र लोकसेवा हक्क अधिनियम अंमलात आला आहे. शासनाने १५० दिवसाच्या महत्वकांक्षी उपक्रमांतर्गत नागरिकांना घरबसल्या ऑनलाईन शासकीय सेवा सुविधा देण्याचे निर्देश दिले आहे. त्या अनुषंगाने पीएमआरडीएच्या माध्यमातून १९ सेवा नागरिकांसाठी ऑनलाइन उपलब्ध करून देण्यात आल्या आहे. या सेवा सुविधांचा लाभ नागर‍िकांना घ्यावा, असे आवाहन पीएमआरडीएचे महानगर आयुक्त डॉ. योगेश म्हसे यांनी केले आहे.

पीएमआरडीएच्या माध्यमातून सुरू करण्यात आलेल्या या ऑनलाईन प्रणालीत अर्जदार नागर‍िकांनी अर्जात नमूद केलेल्या मोबाईल क्रमांकावर अर्ज प्राप्त झाल्याचा संदेश मिळणार आहे. यामुळे नागर‍िकांना कार्यालयात येण्याची आवश्यकता राहणार नाही. संबंध‍ितांना आपला अर्ज/ फाईल कुठल्या अधिकाऱ्यांच्या टेबलवर कार्यवाहीसाठी आहे, याची माह‍िती अर्जामध्ये नमूद केलेल्या क्रमांकावर या सुरू केलेल्या ऑनलाईन प्रणालीच्या माध्यमातून कळणार आहे.

पीएमआरडीएतील या सेवा ऑनलाईन उपलब्ध
पुणे महानगर प्रदेश विकास प्राधिकरणाच्या हद्दीमधील नागरिकांना दिलासा देण्याच्या दृष्टिकोनातून १९ सेवा सुविधा ऑनलाईन उपलब्ध करून देण्यात आल्या आहेत. त्या खालीलप्रमाणे आहेत.

विकास परवानगी विभाग
१. अभिन्यास/इमारत बांधकाम परवानगी
२. जोता मोजणी प्रमाणपत्र
३. भोगवटा प्रमाणपत्र
४. झोन दाखला
५. भाग नकाशा/नकाशा देणे
६. सुधारित बांधकाम परवानगी
७. तात्पुरते रेखांकन परवानगी
८. सुधारित तात्पुरते रेखांकन
९. अंतिम रेखांकन परवानगी
१०. नूतनीकरण परवानगी
११. भागश: भोगवटा प्रमाणपत्र
१२. साईट एलेवेशन प्रमाणपत्र

जमीन व मालमत्ता विभाग
१. वाटप भूखंडाचे / गृहयोजनेतील सदनिकांचे हस्तातंरण
२. वाटप भूखंडावर / गृहयोजनेतील सदनिकांवर वारसानोंद
३. वाटप भूखंडावर / गृहयोजनेतील सदनिकांवर कर्जासाठी ना- हरकत प्रमाणपत्र

अग्निशमन विभाग
१. प्राथमिक अग्निशमन ना-हरकत दाखला
२. अंतिम अग्निशमन ना-हरकत दाखला
३. पर्यावरण मंजुरी प्रमाणपत्र
४. अग्निशमन बंदोबस्त

या सेवा नागर‍िकांसाठी आपले सरकार या https://aaplesarkar.mahaonline.gov.in तसेच पुणे महानगर प्रदेश विकास प्राधिकरणाच्या https://www.pmrda.gov.in या संकेत स्थळावर उपलब्ध करून देण्यात आल्या आहे. संबंधित १९ सेवांसाठी नागर‍िकांनी ऑनलाईन अर्ज करणे अपेक्षित आहे. ऑनलाईन अर्ज करताना काही अडचणी येत असल्यास संबंधितांनी त्या-त्या विभागास भेट दिल्यानंतर त्यांना याबाबत मार्गदर्शन करण्यात येणार आहे.

ग.दि. माडगूळकर नाट्यगृहात ‘रंगानुभूती : पूर्वरंग ते उत्तररंग’ महोत्सवाचे उदघाटन, महाराष्ट्रासह विविध राज्यांतील कलाकारांचा सहभाग

पुणे , २० सप्टेंबर २०२५ : पिंपरी चिंचवड शहराची सांस्कृतिक, समृद्धीची पंढरी म्हणून ओळख ‘रंगानुभूती : पूर्वरंग ते उत्तररंग’ अशा महोत्सवाच्या माध्यमातून निर्माण होण्यास मदत होत आहे. अशा महोत्सवाच्या माध्यमातून पिंपरी चिंचवड महापालिका शहराच्या सांस्कृतिक प्रगतीसाठी उल्लेखनीय काम करीत आहे, असे गौरवोद्गार महाराष्ट्र राज्याचे उपमुख्यमंत्री तथा पुणे जिल्ह्याचे पालकमंत्री अजित पवार यांनी काढले.

पिंपरी चिंचवड महानगरपालिका, थिएटर वर्कशॉप कंपनी आणि पैस कल्चरल फाउंडेशन यांच्या संयुक्त विद्यमाने ‘रंगानुभूती : पूर्वरंग ते उत्तररंग’ प्रयोगकला महोत्सव २०२५ निगडी येथील ग.दि. माडगूळकर नाट्यगृहात होत आहे. या महोत्सवाचे उद्घाटन उपमुख्यमंत्री अजित पवार यांच्या शुभहस्ते झाले. त्यावेळी ते बोलत होते.

याप्रसंगी विधानसभा उपाध्यक्ष अण्णा बनसोडे, महाराष्ट्र राज्य अनुसूचित जाती-जमाती आयोगाचे सदस्य ॲड. गोरक्ष लोखंडे, पिंपरी चिंचवड महापालिका आयुक्त तथा प्रशासक शेखर सिंह, माजी उपमहापौर राजू मिसाळ, महापालिका अतिरिक्त आयुक्त प्रदीप जांभळे पाटील, तृप्ती सांडभोर, माजी नगरसेवक राजेंद्र साळुंके, हरिभाऊ तिकोने, फजल शेख, सामाजिक कार्यकर्ते माऊली सूर्यवंशी, सहआयुक्त मनोज लोणकर, शहर अभियंता मकरंद निकम, सहशहर अभियंता बापू गायकवाड, उपायुक्त पंकज पाटील, मुख्य सुरक्षा अधिकारी उदय जरांडे, विशेष अधिकारी किरण गायकवाड, जनसंपर्क अधिकारी प्रफुल्ल पुराणिक यांच्यासह प्रवीण भोळे, पैस कल्चरल फाउंडेशनचे संस्थापक प्रभाकर पवार, अमृता मुळे, महापालिकेच्या विविध विभागांचे अधिकारी, कर्मचारी, कलाकार व रसिक श्रोते उपस्थित होते.

उपमुख्यमंत्री अजित पवार यांच्या शुभहस्ते सांस्कृतिक क्षेत्रामध्ये विशेष योगदान दिलेल्या संस्थांचा सन्मान यावेळी करण्यात आला. यामध्ये टेल्को कलासागर – टाटा मोटर्स पुणे, कलापिनी तळेगाव दाभाडे, अखिल भारतीय मराठी नाट्य परिषद पिंपरी चिंचवड, नादब्रह्म संस्था, अथर्व थिएटर्स, दिशा फाउंडेशन, संस्कार भारती, नाटक घर, द बॉक्स, नाटक कंपनी आसक्त पुणे, महाराष्ट्र कल्चर सेंटर (एमसीसी) आदी संस्थांचा सन्मान करण्यात आला.

यावेळी उपमुख्यमंत्री अजित पवार म्हणाले, पिंपरी चिंचवड शहरातील सांस्कृतिक चळवळीला बळ देणारा ‘रंगानुभूती’ हा महोत्सव आहे. या महोत्सवात महाराष्ट्रासह राजस्थान, केरळ, उत्तर प्रदेश अशा देशाच्या विविध राज्यांतील कलाकार सहभागी झाले आहेत. यानिमित्ताने पिंपरी चिंचवड महापालिकेने शहरवासियांना चांगल्या प्रकारची सांस्कृतिक मेजवानी उपलब्ध करून दिली आहे. हा महोत्सव ग.दि. माडगूळकर या नाट्यगृहात रंगतोय, ही अत्यंत महत्त्वाची व अभिमानाची बाब आहे. कारण ग.दि.मा हे केवळ गीतकार किंवा लेखक नव्हते तर ते महाराष्ट्राच्या सांस्कृतिक आणि साहित्यिक परंपरेचे तेजस्वी प्रतिनिधी होते. त्यांच्या नावाने उभ्या केलेल्या या नाट्यगृहात हा महोत्सव होत असल्याने या कार्यक्रमाला एक वेगळ्या प्रकारचे सांस्कृतिक आणि ऐतिहासिक महत्त्व प्राप्त झाले आहे, असेही ते म्हणाले.

पिंपरी चिंचवड महापालिकेने शहराच्या सांस्कृतिक प्रगतीसाठी सातत्याने उल्लेखनीय काम केले आहे, असे सांगतानाच उपमुख्यमंत्री अजित पवार पुढे म्हणाले, महाराष्ट्र सरकारच्या सांस्कृतिक धोरणानुसार शहरामध्ये विविध सांस्कृतिक उपक्रम राबवण्यास येथील महापालिकेचे नेहमीच प्राधान्य राहिले आहे. या माध्यमातून नवकलाकारांना एक व्यासपीठ मिळत असून त्यांच्या कलेला प्रोत्साहन दिले जात आहे.पिंपरी चिंचवड शहर हे केवळ आता औद्योगिक शहर म्हणून नव्हे तर सांस्कृतिक क्षेत्रामध्ये झपाट्याने वेगळी ओळख निर्माण करीत आहे. या शहरामध्ये अनेक कलाकार, दिग्दर्शक, लेखक, साहित्यिक, कवी घडत आहेत. मराठी रंगभूमीला समृद्ध करण्याचे काम या शहराने केले आहे, असेही उपमुख्यमंत्री पवार म्हणाले.

मराठी भाषा व मराठी नाटकाचे महत्त्व अधोरेखित करताना उपमुख्यमंत्री पवार म्हणाले, मराठी भाषेसाठी राज्य सरकारने नवीन विभाग सुरू केला आहे. मराठी माणसाचे पहिले प्रेम हे नाटक आहे. मराठी माणूस हा नाटकवेडा असून खऱ्या अर्थाने त्याने नाट्यचळवळ जिवंत ठेवली आहे. मराठी नाटक हे खऱ्या अर्थाने समाजाचे प्रतिबिंब आहे. आगामी काळात सांस्कृतिक क्षेत्राला अधिक आर्थिक पाठबळ देण्याचा प्रयत्न सरकारचा आहे. ग्रामीण भागातील नाट्यगृह ही दर्जेदार असावीत, तेथे उत्तम सोयीसुविधा असाव्यात, यासाठी शासन प्रयत्नशील आहे. या माध्यमातून ग्रामीण भागातून चांगले कलाकार घडण्यास मदत होईल, असा विश्वासही त्यांनी व्यक्त केला.

महापालिका आयुक्त शेखर सिंह स्वागतपर प्रास्ताविक करताना शहरातील नागरिकांना दर्जेदार कलानुभव, नवोदित व नामांकित कलाकारांना व्यासपीठ आणि सांस्कृतिक क्षेत्राला प्रोत्साहन देण्यासाठी ‘रंगानुभूती : पूर्वरंग ते उत्तररंग’ महोत्सवाचे आयोजन करण्यात आले असल्याचे सांगितले. तसेच या महोत्सवाबाबत सविस्तर माहिती त्यांनी दिली. कार्यक्रमाचे सूत्रसंचालन तेजस्विनी गांधी, मिलिंद बावा यांनी केले. थिएटर वर्कशॉप कंपनी व पैस कल्चरल फाउंडेशनच्या अमृता मुळे यांनी आभार मानले.
……
चित्रप्रदर्शनाचे उपमुख्यमंत्री अजित पवारांकडून कौतुक
‘रंगानुभूती’ या महोत्सवाच्या निमित्ताने ग.दि. माडगूळकर नाट्यगृहातील कलादालनात पिंपरी चिंचवड शहराचा सांस्कृतिक प्रवास दर्शवणारी चित्रकृती तसेच अप्रतिम चित्रांचे प्रदर्शन देखील भरवण्यात आले आहे. शहरातील उत्तम चित्रकारांची अभिनव कलाकृती येथे प्रदर्शित करण्यात आली आहे. या प्रदर्शनाला देखील उपमुख्यमंत्री अजित पवार यांनी भेट देत कलाकारांचे कौतुक केले. या माध्यमातून नवकलाकारांच्या कलेला वाव देण्याचे काम करण्यात आले आहे, असे उपमुख्यमंत्री पवार म्हणाले.

राष्ट्रीय सुगी पश्चात तंत्रज्ञान संस्था, तळेगाव दाभाडे येथे आढावा बैठक संपन्न

पुणे, दि.२० .: फुल उत्पादक शेतकरी कंपनी यांच्यासाठी संस्था परिसरात किंवा थेट शेतकऱ्यांच्या प्रक्षेत्रावर स्वतंत्र प्रशिक्षण कार्यक्रम घ्यावेत, यामुळे फुल निर्यातीस चालना मिळेल, असे निर्देश पणन मंत्री तथा राष्ट्रीय सुगी पश्चात तंत्रज्ञान संस्थेचे अध्यक्ष जयकुमार रावल यांनी आढावा बैठकीत दिले.

यावेळी राष्ट्रीय सुगी पश्चात तंत्रज्ञान संस्थेचे सचिव तथा महाराष्ट्र राज्य कृषी पणन मंडळाचे कार्यकारी संचालक संजय कदम, सर व्यवस्थापक विनायक कोकरे, राष्ट्रीय सुगी पश्चात तंत्रज्ञान संस्थेचे संचालक मिलिंद आकरे, व्यवस्थापक, सहाय्यक व्यवस्थापक आदी उपस्थित होते.

श्री. रावल म्हणाले, राष्ट्रीय सुगी पश्चात तंत्रज्ञान संस्था, तळेगाव दाभाडे येथे त्रिभुवन सहकार विद्यापीठाचे उपकेंद्र लवकरच सुरू करण्यात येईल, यामुळे संस्थेच्या उत्पन्नवाढीस मोठी चालना मिळेल. नेदरलँड, इजराईल, जपान व तांजानिया येथील विद्यापीठांचे सहकार्य घेत फुल उत्पादक शेतकऱ्यांकरिता आंतरराष्ट्रीय पातळीववरील प्रशिक्षण वर्ग सुरू करावेत.

आफ्रिका खंडाअंतर्गत येणाऱ्या देशामधील कृषी विभागाशी संपर्क साधून तेथील शेतकऱ्यांना या संस्थेमध्ये किंवा त्या देशामध्ये जाऊन प्रशिक्षण द्यावे. इतर राज्यांच्या कृषी, फलोत्पादन विभागांशी संपर्क साधून त्या राज्यातील अधिकाधिक शेतकऱ्यांना संस्थेत प्रशिक्षण द्यावे.

राज्यातील साखर कारखान्यांना संस्थेचे सभासद करुन त्यांच्या कार्यक्षेत्रामधील शेतक-यांसाठी विविध प्रशिक्षण कार्यक्रम घेणे. शेतकऱ्यांसाठी प्रशिक्षण राबवावे. संस्थेच्यावतीने कृषी पर्यटन व नॅचरोपॅथीसारखे प्रशिक्षण कार्यक्रम सुरू करावेत. बांबू मूल्यवर्धन केंद्राच्या बांबू सायकलचा प्रायोगिक तत्वावर वापर करण्याबाबत श्री. रावल यांनी मार्गदर्शन केले.

संस्थेचे उपक्रम आणि सुविधांची घेतली माहिती

मंत्री श्री. रावल यांनी संगणकीकृत वर्गखोल्या (डिजिटल क्लासरूम), उपहारगृह इमारत, शीतगृह विस्तारित इमारतीची पाहणी केली. निवासी सुविधा, एम.बी.ए. महाविद्यालय, पी.टी.सी. प्रयोगशाळा, माती व पाणी तपासणी प्रयोगशाळा यांची माहिती देण्यात आली.

श्री. आकरे यांनी प्रशिक्षण कार्यक्रमांची माहिती दिली तसेच मार्च २०२६ पर्यंतचा प्रशिक्षण आराखडा सादर केला.

▪️ शिक्षणमंत्र्यांची दिवसभर सर्व तज्ञांच्या सत्रांना उपस्थिती

पुणे, दि. 20
शालेय शिक्षण व क्रीडा विभाग आयोजित राज्यस्तरीय शालेय शिक्षण परिषदेच्या दुपारच्या सत्रात विविध तज्ज्ञांनी नवीन शिक्षण धोरण २०२०, परख सर्वेक्षण अहवाल, प्रशासकीय सुधारणा, समग्र शिक्षण व विविध शैक्षणिक उपक्रमांबाबत मार्गदर्शन केले. जिल्हा परिषदेच्या मुख्य कार्यकारी अधिकाऱ्यांनी त्यांच्या जिल्ह्यात राबविलेल्या नाविन्यपूर्ण शैक्षणिक प्रयोगांची माहिती दिली.

दुपारच्या पहिल्या सत्रात मा. आनंद पाटील, अतिरिक्त सचिव, शालेय शिक्षण व साक्षरता विभाग, केंद्रीय शिक्षण मंत्रालय, नवी दिल्ली यांनी ऑनलाईन व्याख्यान दिले. त्यांनी नवीन शिक्षण धोरण २०२० ची अंमलबजावणी, देशभरातील नाविन्यपूर्ण उपक्रम व महाराष्ट्राकडून असणाऱ्या अपेक्षा तसेच प्रधानमंत्री पोषण योजनेविषयी मार्गदर्शन केले. त्यानंतर श्रीमती इंद्राणी भादुरी, सीईओ अँड हेड ऑफ परख सेल, NCERT, दिल्ली यांनी परख सर्वेक्षण अहवाल, त्यातील महाराष्ट्राची स्थिती व शिक्षण अधिक गुणवत्तापूर्ण करण्यासाठी आवश्यक प्रयत्न याबाबत सखोल मार्गदर्शन केले.

यानंतर विविध जिल्ह्यांतील मुख्य कार्यकारी अधिकाऱ्यांनी सादरीकरणे केली. त्यात कोल्हापूरचे श्री. कार्तिकेयन एस., साताऱ्याच्या श्रीमती याशनी नागराजन, छत्रपती संभाजीनगरचे श्री. अंकित, अहिल्यानगरचे श्री. आनंद भंडारी आणि पुण्याचे श्री. गजानन पाटील यांचा समावेश होता. या सादरीकरणांमध्ये नाविन्यपूर्ण शैक्षणिक उपक्रमांची अंमलबजावणी व परिणामकारकता याविषयी माहिती दिली. मंत्री महोदयांनी सर्व सादरीकरण करणाऱ्या अधिकाऱ्यांचा स्मृतिचिन्ह व पुस्तके देऊन सन्मान केला.

शिक्षण आयुक्त सचिन्द्र प्रताप सिंह यांनी इ. ११ वी प्रवेश, समूह शाळा योजना, यू-डायस प्लस, पवित्र शिक्षक भरती मान्यता यांसारख्या प्रशासकीय विषयांवर मार्गदर्शन केले. राज्य प्रकल्प संचालक संजय यादव यांनी महाराष्ट्र प्राथमिक शिक्षण परिषदेतर्फे राबविण्यात येणाऱ्या योजना व समग्र शिक्षेविषयी माहिती दिली.

यानंतर राज्य शैक्षणिक संशोधन व प्रशिक्षण परिषदेचे संचालक मा. राहुल रेखावार यांनी NEP २०२० ची अंमलबजावणी, निपुण महाराष्ट्र कृती कार्यक्रम, SQAAF, क्षमता आधारीत प्रश्नपेढी, VSK, कृती पुस्तिकांचे विकसन,शैक्षणिक दिनदर्शिका, पीएम श्री शाळा योजना, ई-विद्या वाहिन्या, योग अभ्यासक्रम मार्गदर्शिका आदी उपक्रमांबाबत सविस्तर मार्गदर्शन केले.

तसेच मंत्री नामदार दादासाहेब भुसे यांनी शाळांमध्ये वार्षिक स्नेहसंमेलने व विद्यार्थी क्रीडा स्पर्धांचे आयोजन करण्याच्या सूचना दिल्या. सर्व शाळांमध्ये २६ जानेवारी २०२६ रोजी देशभक्तीपर गीतांवर आधारित कवायती आयोजित करण्याचे आवाहन केले. याशिवाय विज्ञान प्रदर्शनाच्या बक्षीस रक्कमेत वाढ करण्याची घोषणा त्यांनी यावेळी केली. विशेष बाब म्हणजे मा. मंत्री महोदयांनी शिक्षण परिषदेत दिवसभर पूर्णवेळ उपस्थित राहून चर्चेत सहभाग घेतला व अधिकारी वर्गास मार्गदर्शन केले.

१६ गावांच्या जीआयएस आधारित नकाशाचे अनावरण

सेवा पंधरवडा उपक्रमात सहभागी होण्याचे आवाहन

पुणे, दि.२० : दौंड तालुक्यात सेवा पंधरवडा उपक्रमाअंतर्गत तालुक्याचे आमदार राहुल कूल यांच्या हस्ते लाभार्थ्यांना ५०० हून अधिक लाभपत्राचे श्रीकृष्ण मंगल कार्यालय, बोरीपार्धी, चौफुला येथे वितरण करण्यात आले. नागरिकांना सेवा पंधरवडा उपक्रमात सहभागी होऊन सेवांचा लाभ घेण्याचे प्रशासनाच्यावतीने आवाहन करण्यात आले.

राष्ट्रनेता पंतप्रधान नरेंद्र मोदी यांचा जन्मदिवस (१७ सप्टेंबर)ते राष्ट्रपिता महात्मा गांधी यांची जयंती
(२ ऑक्टोबर) या कालावधीत राबविण्यात येणाऱ्या सेवा पंधरवडा उपक्रमाचा दौंड येथे शुक्रवारी (दि.१९) शुभारंभ करण्यात आला. यावेळी विविध शासकीय विभागांचे प्रमुख अधिकारी, कर्मचारी, तालुक्यातील लोकप्रतिनिधी, नागरिक उपस्थित होते.

यावेळी सेवा पंधरवड्यात देण्यात येणाऱ्या सेवा व विविध शासकीय योजनांची माहिती देण्यात आली. तसेच तालुक्यात महसूल विभागामार्फत सर्व गावातील गाव रस्ते, शेत रस्ते, पाणंद रस्त्यांना सांकेतांक क्रमांक देऊन यादी तयार करण्यात येणार असल्याची माहिती दिली. त्यानुसार प्राथमिक टप्प्यात एकूण १६ गावांच्या भौगोलिक माहिती प्रणालीवर (जीआयएस) आधारित नकाशाचे अनावरण करण्यात आले.

यावेळी भटक्या व विमुक्त जाती यांचे जातीचे दाखले ५०, संजय गांधी व श्रावणबाळ निराधार योजना लाभार्थी प्रमाणपत्रे १२५, भामा आसखेड व पुनर्वसन शेरे कमी दाखले १३४ गट , पुनर्वसन भूखंड वाटप २६, शिधापत्रिका वाटप ३२, गोपीनाथ मुंडे शेतकरी अपघात मदत वितरण दाखले ४ या प्रमाणे लाभपत्राचे वितरण करण्यात आले, असे तहसीलदार अरूण शेलार यांनी प्रसिद्धी पत्रकांनव्ये कळविले आहे.

पुणे:

पुणे नवरात्रौ महोत्सवात दरवर्षी संपन्न होणारा आणि हजारो महिलांचा सहभाग असणारा ‘पुणे नवरात्रौ महिला महोत्सव’ यंदा वैभवशाली २७वे वर्ष साजरे करीत आहे. याचे उद्घाटन मंगळवार, दि. २३ सप्टेंबर रोजी सकाळी ११.३० वाजता ज्येष्ठ कथक नृत्यगुरू शमा भाटे यांच्या हस्ते श्री लक्ष्मीमाता मंदिर प्रांगण, मुक्तांगण शाळेजवळ, शिवदर्शन, पुणे येथे संपन्न होईल. समाजात उत्तुंग काम करणाऱ्या दोन महिलांना या महिला महोत्सवात दिला जाणारा ‘तेजस्विनी पुरस्कार’ यंदा ज्येष्ठ संगीत नाट्य कलावंत व गायिका दीप्ती भोगले आणि आत्महत्याग्रस्त शेतकऱ्यांच्या अनाथ मुला-मुलींचे शिक्षण व संगोपन करणाऱ्या आळंदी येथील ‘स्नेहवन’ संस्थेच्या अर्चना देशमाने यांना मंगळवार, दि. २३ सप्टेंबर रोजी महिला महोत्सवाच्या उद्घाटन सोहळ्यात ‘तेजस्विनी पुरस्कार’ देऊन गौरविले जाणार आहे. ५ हजार रुपये, गौरवचिन्ह, शाल व श्रीफळ असे पुरस्काराचे स्वरूप आहे. तसेच याप्रसंगी पुणे महानगरपालिकेच्या २५०हून अधिक महिला सफाई कामगारांचा गौरवचिन्ह व भेटवस्तू देऊन विशेष गौरव करून कृतज्ञता व्यक्त केली जाणार आहे, अशी माहिती पुणे नवरात्रौ महिला महोत्सवाच्या अध्यक्षा जयश्री बागुल यांनी दिली.

दीप्ती भोगले : जयराम आणि जयमाला शिलेदार या संगीत रंगभूमीवरील साधक दाम्पत्याची कन्या. संगीत रंगभूमीवर स्त्री भूमिकेपासून पुरुष भूमिकांपर्यंत स्वतःचे वैशिष्ट्यपूर्ण स्थान, पुणे विद्यापिठाची मराठी विषयाची एम.ए. पदवीधारक, वयाच्या सहाव्या वर्षापासून ६५ वर्षांपर्यंत रंगभूमीवर सुमारे ४००० प्रयोगांतून भूमिका, आकाशवाणीवरील ‘ए ग्रेड’ आर्टिस्ट, २७ नाटकांतून ४४ भूमिका, संगीत मैफलींचे निवेदन, संगीत नाट्यविषयक कार्यशाळा, ‘पुरुषोत्तम करंडक’ स्पर्धांमध्ये परीक्षक, जयराम शिलेदार यांच्या ‘सूरसंगत’ या आत्मचरित्राचे शब्दांकन, अनेक पुरस्कारांनी सन्मानित दीप्ती भोगले यांना ‘तेजस्विनी पुरस्कार’ देऊन गौरविले जाणार आहे.

अर्चना देशमाने : आळंदी येथील ‘स्नेहवन’ संस्थेच्या अर्चना देशमाने यांनी पती
अशोक देशमाने यांच्यासमवेत आत्महत्याग्रस्त शेतकऱ्यांच्या १८०हून अधिक मुला-मुलींचे संगोपन, आरोग्य व शिक्षण यांची जबाबदरी स्वीकारून अखंडपणे त्यांनी या कामात स्वतःला झोकून दिले आहे. आयटी इंजिनीअर असणाऱ्या अशोक देशमाने यांनी उत्तम नोकरी सोडून ‘स्नेहवन’ संस्था २०१५मध्ये सुरू केली. अर्चना देशमाने यांनी पतीला पूर्ण साथ देत या निराधार मुला-मुलींची ‘आई’ बनून या मुलांचे संगोपन, आरोग्य व शिक्षण त्या स्वतः करतात. या निराधार मुलांचे कल्याण हेच जीवनध्येय मानून काम करणाऱ्या अर्चना देशमाने या शेकडो तरुणांच्या प्रेरणास्थान बनल्या आहेत. त्यांच्या अतुलनीय कार्याबद्दल ‘तेजस्विनी पुरस्कार’ देऊन त्यांना गौरविले जाणार आहे.

‘तेजस्विनी पुरस्कारा’च्या यापूर्वीच्या मानकरी : शीतल महाजन, शीतल सावंत, कीर्ती शिलेदार, सरस्वतीबाई राणे, सावनी रवींद्र, जयश्री फिरोदिया, केतकी माटेगावकर, ऋतुजा भोसले, शांताबाई किर्लोस्कर, प्राची बडवे, मीना फातर्पेकर, मृणालिनी चितळे, रोहिणीताई भाटे, ऋता बावडेकर, सरू वाघमारे, कल्याणी किर्लोस्कर, सुषमा खटावकर, मनीषा सोनवणे , मुग्धा धामणकर, जुई सुहास आदी.

• माताप्रसाद पांडे यांचे आवाहन

पुणे :
सांप्रदायिकता आणि भांडवलशाही व्यवस्था उद्धवस्त करण्यासाठी समाजवाद्यांनी पुन्हा एकदा रस्त्यावरचा लढा लढण्यासाठी सज्ज व्हावे, असे आवाहन उत्तरप्रदेशचे विरोधी पक्षनेता माताप्रसाद पांडे यांनी केले.

पुण्यातील सानेगुरुजी स्मारक येथे भारतीय समाजवादी आंदोलनाच्या 90 वर्षे पूर्तीनिमित्त आयोजित समाजवादी एकाजूटता संमेलनाच्या उद्घाटनप्रसंगी ते बोलत होते. तीन दिवसीय संमेलनासाठी देशभरातून शेकडो समाजवादी नेते, कार्यकर्ते सहभागी झाले आहेत. यावेळी उदघाटन सत्राचे अध्यक्ष मध्यप्रदेशचे माजी मंत्री रमाशंकर सिंह, १०० वर्षीय ज्येष्ठ समाजवादी नेते, माजी खासदार पंडित रामकिशन, सलीमभाई (कश्मीर), विजया चौहान, अन्वर राजन, प्रफुल्ल सामंत्रा (ओडिशा), मेधा पाटकर गजानन खातू, बी.आर. पाटील (कर्नाटक), माजी आमदार डॉ.  प्रा. डॉ. आनंद कुमार आदी उपस्थित होते. या संमेलनाचे आयोजन राष्ट्रसेवा दल, एस एम जोशी सोशालिस्ट फाऊंडेशन, युसूफ मेहर अली सेंटर, समाजवादी समागम आणि महाराष्ट्र गांधी स्मारक निधी यांच्यावतीने करण्यात आले होते.  

माताप्रसाद पांडे म्हणाले, समाजवादी आंदोलनाने वेळोवेळच्या सरकारला कंट्रोल करण्याचे काम केले. आवाज उठवला. आंदोलने केली. आता ती चळवळ कुठे आहे ? समाजवादी चळवळीने आपल्या विचाराने गरीब, किसान, मागासांना वर आणण्याचे काम केले. आज आपण सांप्रदायिक, उन्मादवादी लोकांच्या जाळ्यात अडकलो आहे. त्यातून बाहेर पडणे, हाच या संमेलनाचा उद्देश आहे. भांडवलशाही व्यवस्था उद्धवस्त  करण्यासाठी पुढे येण्याची गरज आहे. समाजवादी विचार सर्वत्र पोहचवण्यासाठी पुढे या. ज्या संकल्पासाठी आपल्या लोकांनी कुर्बाणी दिली. तो संकल्प पुढे नेण्यासाठी पुढे या. समाजवादी विचारसरणी पुढे नेण्यासाठी एकत्र या ! असेही आवाहन पांडे यांनी केले.

प्रा. आनंद कुमार म्हणाले, समाजवादाने 19 व्या शतकापासून स्वातंत्र्य समता ही मूल्ये लोकांच्या मनात रुजवली. बेरोजगारी, गरीबी यापासून मुक्ती देणारी व्यवस्था म्हणजे समाजवाद. पण आज देशात अदाणी, अंबानी यांची ताकद वाढत असताना शेतकरी, शेतमजूर, कामागार यांची ताकद कमी होत आहे. अशा परीस्थितीत शेतकरी, शेतमजूर, कामागार यांची ताकद वाढविण्यासाठी समाजवादाची आवश्यकता आहे.या उदघाटन सोहळ्याचे प्रास्ताविक ऍड. सविता शिंदे यांनी केले, तर डॉ. सुनीलम यांनी सूत्रसंचालन केले, संदेश दिवेकर यांनी आभार मानले. दत्ता पाकिरे, प्रशांत दांडेकर, प्रकाश डोबांळे, साधना शिंदे, फैयाज इनामदार, राहुल भोसले, भीमराव अडसूळ, विनायक लांबे आदींनी संमेलनाचे संयोजन केले.

चळवळीतील ज्येष्ठांचा सत्कार
समाजवादी चळवळीतील वयाची 80 वर्षे पूर्ण केलेल्या कार्यकर्ते, नेते यांचा यावेळी सत्कार करण्यात आला. रावसाहेब पवार, उमाकांत भावसार, राधा शिरसेकर, भीमराव पाटोळे, राजकुमार जैन, चंद्रा अय्यर आदी या सत्काराला उपस्थित होते. यावेळी समाजवादी आंदोलनाची 90 वर्षे या स्मरणिकेचे प्रकाशन झाले. समाजवादी आंदोलनाचा प्रवास दर्शविणाऱ्या छायाचित्र प्रदर्शनाचे उदघाटन करण्यात आले.