• पुण्याच्या शैक्षणिक ओळखीला मिळणार नवा आयाम

पुणे :
पुण्याच्या शैक्षणिक शिरपेचात आणखी एक मानाचा तुरा रोवला जाणार असून शैक्षणिक नगरी पुण्यात नवे शैक्षणिक द्वार खुले होत आहे. देशातील नामांकित व्यवस्थापन शिक्षणसंस्था म्हणून ओळखल्या जाणाऱ्या आयआयएम मुंबईचे केंद्र आता पुण्यात सुरु होत आहे. केंद्रीय नागरी उड्डाण व सहकार राज्यमंत्री मुरलीधर मोहोळ यांनी मांडलेल्या प्रस्तावाला संस्थेच्या डीन कमिटी आणि त्यानंतर Academic Council ने मान्यता दिल्यानंतर हा निर्णय अधिकृत झाला आहे.

आयआयएम मुंबईचे केंद्र पुण्यात व्हावे, यासाठी केंद्रीय मंत्री मुरलीधर मोहोळ यांनी प्रस्ताव दिला होता. त्यावर निर्णय होत पुणे केंद्र सुरु करण्याचा निर्णय घेण्यात आला आहे. पुणे केंद्राची स्थापना ही केवळ पुण्याच्या नव्हे, तर महाराष्ट्राच्या शैक्षणिक आणि औद्योगिक परंपरेतील एक ऐतिहासिक टप्पा मानला जात आहे. पुणे हे देशातील अग्रगण्य तंत्रज्ञान व औद्योगिक केंद्र म्हणून जलद गतीने विकसित होत आहे. बहुराष्ट्रीय कंपन्यांचे जाळे, अत्याधुनिक संशोधन-विकास केंद्रे, वाढती स्टार्टअप संस्कृती आणि Oxford of the East अशी मिळालेली शैक्षणिक ओळख या सर्व पार्श्वभूमीवर आयआयएम मुंबईचा कॅम्पस शहरासाठी केवळ नैसर्गिक पूरकच ठरणार नाही, तर जागतिक दर्जाच्या व्यवस्थापन शिक्षणाला इथल्या विद्यार्थ्यांना थेट दाराशी आणून देणार आहे.

या कॅम्पसच्या माध्यमातून उद्योजकतेला नवा उन्मेष मिळेल, व्यवस्थापन कौशल्यांचा वापर करून नाविन्यपूर्ण कल्पनांचे यशस्वी व्यवसायांत रूपांतर साधता येईल. हा उपक्रम स्वावलंबी भारताच्या संकल्पनेशी सुसंगत असून विकसित भारत २०४७ या राष्ट्रीय दृष्टिकोनाला बळकटी देणारा ठरेल, असा विश्वास व्यक्त केला जात आहे.

याबाबत माहिती देताना आयआयएम मुंबईचे संचालक प्रा. मनोज कुमार तिवारी म्हणाले, ‘आमचा प्रयत्न राहील की शैक्षणिक वर्ष २०२६ पासून प्रस्तावित पुणे केंद्रात क्षमता विकास कार्यक्रम तसेच अल्पावधी कार्यकारी प्रशिक्षण कार्यक्रम सुरू करता यावेत. ही महत्त्वाची संधी उपलब्ध करून दिल्याबद्दल आम्ही केंद्रीय मंत्री मुरलीधर मोहोळ यांचे मनःपूर्वक आभारी आहोत. यामुळे आयआयएम मुंबईला विकसित भारत २०४७ या ध्येयाच्या दिशेने मोलाचे योगदान देता येईल.’
मुंबई-पुण्यामध्ये ‘नॉलेज कॉरिडॉर’ तयार होईल : केंद्रीय मंत्री मुरलीधर मोहोळ
‘पुण्यात आयआयएम मुंबईचे केंद्र स्थापन होणे ही अभिमानाची बाब आहे. मुंबई ही आर्थिक राजधानी आणि पुणे हे तंत्रज्ञान व शिक्षणाचे केंद्र आहे. या दोन्ही शहरांमध्ये निर्माण होणारा ‘Knowledge Corridor’ ही देशाच्या औद्योगिक व शैक्षणिक क्षेत्रासाठी नवी पर्वणी ठरेल. या निर्णयामुळे महाराष्ट्राला जागतिक दर्जाच्या व्यवस्थापन शिक्षणाची नवी ऊर्जा मिळेल आणि नव्या पिढीसमोर संधींचे विस्तीर्ण क्षितिज खुले होईल. पुणे अनेक दशकांपासून देशाचे प्रमुख शैक्षणिक केंद्र राहिले आहे आणि आता ते तंत्रज्ञान, उत्पादन तसेच आयटीचे बळकट हब म्हणूनही उदयास आले आहे. याच वैशिष्ट्यांचा विचार करून आयआयएम मुंबई आपला नवा कॅम्पस पुण्यात स्थापन करीत आहे.

संशोधक समन्वय कृती समितीच्या शिष्ठमंडळने घेतली ना. पाटील यांची भेट

ना. पाटील यांच्या आश्वासनानंतर आंदोलन मागे

पुणे:

संशोधक विद्यार्थी समन्वय कृती समितीच्या मागण्यांबाबत मंत्रालय स्तरावर पाठपुरावा करु, असे आश्वासन राज्याचे उच्च व तंत्र शिक्षणमंत्री चंद्रकांतदादा पाटील यांनी आज दिले. संशोधक विद्यार्थी समन्वय कृती समितीच्या शिष्टमंडळाने आज ना. पाटील यांची भेट घेऊन चर्चा केली. ना. पाटील यांच्या आश्वासनानंतर आंदोलन मागे घेण्याचा निर्णय समन्वय समितीने घेतला.

सारथी, बार्टी, महाज्योती, अमृत, आर्टी आदी संस्थांच्या शिष्यवृत्तीसाठी संशोधक विद्यार्थी समन्वय कृती समितीच्या वतीने डेक्कन चौकात आंदोलन सुरु असून; त्यावर मार्ग काढण्यासाठी समितीच्या शिष्टमंडाळाने आज उच्च व तंत्रशिक्षण मंत्री चंद्रकांतदादा पाटील यांची भेट घेऊन चर्चा केली. या भेटीत सविस्तर चर्चा होऊन अतिशय सकारात्मक चर्चा झाली.

बार्टी, सारथी, महाज्योती, आर्टी या संस्थांमध्ये विद्यार्थी संख्या, प्रवेश प्रक्रिया, शिष्यवृत्ती यांची संख्या ठरविणे, शिष्यवृत्तीसाठी जाहिरात काढणे आणि गुणवत्ता वाढ यासंदर्भात मुख्य सचिव यांच्या अध्यक्षतेखाली समिती नेमण्यात आली होती. या समितीचा अहवाल आता प्राप्त झालेला आहे. त्या संदर्भात मंत्रालय स्तरावर निर्णय घेण्यात येईल, असे यावेळी आश्वस्त केले.

तसेच, उपमुख्यमंत्री एकनाथजी शिंदे यांच्याशी दूरध्वनीवरुन संपर्क साधून मंत्रालयात मुख्य सचिवांसोबत बैठक घेऊन मार्ग काढण्याबाबत चर्चा केली. ना. पाटील यांच्या मध्यस्थीनंतर आंदोलन मागे घेण्याचा निर्णय समन्वय समितीने घेतला.

यावेळी युवासेना नेते किरण साळी,नितीन आंधळे, पूजा झोळे, विद्यार्थी भारत पवार, अंकुश चौगुले, परिमल कुंभार, अभाविपचे राधेय बाहेगव्हाणकर, अलोक पवार, सई थोपटे आदी विद्यार्थी उपस्थित होते.

पुणे: सकाळी कोथरूड च्या डी पी रस्त्यावर भेलकेवाडी, श्री.गणेशकृपा सोसायटी समोर, डि.पी रोड परांजपे शाळेजवळ कोथरूड येथे वाघजाई देवीच्या घटस्थापनेने कोथरूड नवरात्र महोत्सव सुरु होणार असून याही वर्षी उत्तमोत्तम कार्यक्रमांच्या सादरीकरणाने या महोत्सवाची रंगत वाढणार असल्याचे नवरात्र उत्सवाचे संयोजक क्रिएटिव्ह फाउंडेशन चे अध्यक्ष संदीप खर्डेकर, कै. विश्वनाथ भेलके प्रतिष्ठान चे अध्यक्ष विशाल भेलके आणि उमेश भेलके यांनी सांगितले.
यावर्षीच्या सांस्कृतिक महोत्सवात यशवंतराव चव्हाण नाट्यगृहात शुक्रवार 26 सप्टेंबर रात्रौ 9 वाजता जितेंद्र भुरूक यांचे हिट्स ऑफ आर डी बर्मन हा कार्यक्रम सादर होणार असून
शनिवार दि. 27 सप्टेंबर रोजी लोकप्रिय कलावंत प्रशांत दामले यांचे “शिकायलो गेलो एक” हे नाटक सादर होणार आहे तर रविवारी दुपारी 12 वाजता पूनम कुडाळकर आणि त्यांच्या सहकाऱ्यांचे “तुमच्यासाठी काय पण” हा दर्जेदार लावण्यांचा कार्यक्रम सादर होणार असल्याचे सांस्कृतिक महोत्सवाच्या प्रमुख संयोजिका व मा. नगरसेविका सौ.मंजुश्री खर्डेकर आणि सौ. श्वेताली भेलके यांनी दिली.
तसेच हा उत्सव कोजागिरी पर्यंत साजरा केला जाणार असून यात विविध संस्थांना आवश्यक साहित्याची भेट, रास दांडिया, बाल जत्रा असे विविध कार्यक्रम आयोजित केले जाणार असल्याचे ही मंजुश्री खर्डेकर व श्वेताली भेलके यांनी सांगितले.
देवी पुढे ढोल पथकाचे स्थिर वादन होणार असून महिलांची महा आरती वा भोंडला देखील होणार असल्याचे उमेश भेलके व सौ.अक्षदा भेलके यांनी सांगितले.
या महोत्सवात सादर होणारे सर्व कार्यक्रम मोफत असून मोफत प्रवेशिकांसाठी संदीप खर्डेकर यांच्याशी 9850999995,
विशाल भेलके यांना 9011023023 तर उमेश भेलके यांना 9890154050 या क्रमांकावर संपर्क करावा असे आवाहन संयोजकांनी केले आहे.

पुणे,
राष्ट्रीय स्वयंसेवक संघाने १०० वर्षात देशाला नरेंद्र मोदी व देवेंद्र फडणवीसांसारखी भ्रष्ट माणसे दिली. जातीवाद व भांडवलशाहीचा विळखा आणखी घट्ट झाला आहे, ही मनुवादाची देण आहे. आता १०० वर्ष होत असताना पंचागानेही चांगला मुहूर्त दिला असून २ ऑक्टोबर रोजी दसरा, गांधी जयंती व रा. स्व. संघाची शंभरी असा योगायोग असून दसऱ्याच्या दिवशी सीमोल्लंघन करत संघ बरखास्त करा व संविधानाचा मार्ग अवलंबा, असे आवाहन महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी केले आहे.

पुणे श्रमिक पत्रकार संघात आयोजित वार्तालापात ते बोलत होते. यावेळी पत्रकार संघाचे अध्यक्ष ब्रिजमोहन पाटील, सरचिटणीस मंगेश फल्ले, प्रदेश काँग्रेसचे वरिष्ठ उपाध्यक्ष मोहन जोशी, प्रदेश काँग्रेसचे कोषाध्यक्ष ॲड. अभय छाजेड, पुणे काँग्रेसचे अध्यक्ष अरविंद शिंदे, वरिष्ठ प्रवक्ते गोपाल तिवारी यांच्यासह पत्रकार उपस्थित होते.
काँग्रेस प्रदेशाध्यक्ष हर्षवर्धन सपकाळ पुढे म्हणाले की, यापुढे नथुराम चालणार नाही तर संविधानच चालेल असे संकेत नियतीनेच दिले आहेत. सर्वांनाबरोबर घेऊन जाणारा संविधानाचा विचारच चालणार आहे, त्यामुळे संघाने नागपूरच्या रेशीम बाग कार्यालयात संविधान ठेवावे. २८ तारखेपासून संविधान सत्याग्रह यात्रा आयोजित केली असून यावेळी युवक काँग्रेसचे पदाधिकारी रेशीम बागेत जाऊन संघाला संविधान भेट देणार आहेत.
लोकसभेतील विरोधी पक्षनेते राहुल गांधी मतचोरीची एक एक प्रकरणे पुराव्यासह उघड करत आहेत, राहुल गांधी निवडणूक आयोगाला प्रश्न विचारत आहेत, पण उत्तरे मात्र भाजपाचे नेते देत आहेत. राहुल गांधींची पत्रकार परिषद होताच मुख्यमंत्री देवेंद्र फडणवीस त्याला उत्तर देतात, राहुल गांधींचा लेख प्रकाशित होताच फडणवीस त्याला उत्तर देणारा लेख लिहतात, हे काय चालले आहे. फडणवीस निवडणूक आयोगाचे वकील आहेत, का दलाल? असा प्रश्न उपस्थित होतो. महाराष्ट्रात राजुरा मतदार संघात मतचोरी झाली त्यावर अधिकाऱ्यांनी गुन्हा दाखल केला आहे तरीही फडणवीस आयोगाच्या वतीने का बोलतात? रामराज्याची भाषा करता मग अग्निपरिक्षेला का घाबरता? असा प्रश्न सपकाळ यांनी विचारला आहे.

राज्यातील कायदा व सुव्यवस्था रसातळाला गेली आहे. महिलांवरील अत्यचार वाढले आहेत. कोयता गँग, आका, खोक्या गँग, रेती गँगने धुमाकुळ घातला आहे. केंद्रीय मंत्र्याच्या मुलीची छेड काढली जाते त्यावर कारवाई करावी यासाठी केंद्रीय मंत्र्याला पोलीस स्टेशनमध्ये ठिय्या द्यावा लागतो एवढी गंभीर स्थिती राज्यात निर्माण झाली आहे. राज्याला पूर्णवेळ गृहमंत्री नाही, फडणवीस वेळ देऊ शकत नाहीत म्हणून पूर्णवेळ गृहमंत्री द्यावा अशी मागणी सपकाळ यांनी केली आहे.

प्रदेशाध्यक्ष हर्षवर्धन सपकाळ यांनी समाजवादी एकजुटता संमेलनाला उपस्थिती लावली, यावेळी ते म्हणाले की, भारताचे शेजारी देश श्रीलंका, बांगलादेश व नेपाळ मधील परिस्थिती विदारक असून स्थानिक जनतेचा उद्रेक झाला व अत्यंत वाईट पद्धतीने सत्ताधाऱ्यांना जीव मुठीत घेऊन पळावे लागले. भारतात गरिब व श्रीमंत यांच्यातील दरी वाढत चालली आहे. सरकार लाडक्या उद्योगपतीला एक रुपये एकर दराने जमीन दिली. मुंबईतील धारावी, गोरेगाव मधील जमीन कवडीमोल भावाने दिली. नवी मुंबई विमानतळही देऊन टाकला. तर गरज नसताना ८८ हजार कोटी रुपयांचा शक्तीपीठ महामार्ग बनवला जात आहे. सरकारकडे पगार करण्यास पैसे नाहीत, लाडक्या बहिणी साठी पैसे नाहीत, शेतकऱ्यांना देण्यास पैसे नाहीत पण लाडक्या उद्योगपतीसाठी मात्र रेड कार्पेट अंथरले जात आहे, असेही सपकाळ म्हणाले.

पुणे : रोबोटिक्स, आर्टिफिशियल इंटेलिजन्स आणि STEM शिक्षण क्षेत्रात देशातील अग्रगण्य उपक्रम असलेल्या रोबोटेक्स इंडिया नॅशनल चॅम्पियनशिप २०२५ ला पुण्यात उत्साहपूर्ण सुरुवात झाली. एमआयटी-एडीटी विद्यापीठाच्या वर्ल्ड पीस डोम येथे झालेल्या उद्घाटन समारंभात देशभरातील विद्यार्थी, शिक्षक आणि मान्यवर मोठ्या संख्येने सहभागी झाले. देशभरातून ७ हजारांहून अधिक विद्यार्थी आणि ५०० हून अधिक रोबोट्सच्या सहभागाने ही स्पर्धा यंदा ऐतिहासिक ठरली आहे. शासकीय शाळा, खाजगी संस्था तसेच वंचित समाजघटकातील विद्यार्थी या स्पर्धेत सहभागी झाले आहेत. विशेष म्हणजे, यावर्षीच्या स्पर्धेत ग्रामीण आणि आदिवासी भागातील ५० टक्क्यांहून अधिक विद्यार्थी सहभागी झाल्याने STEM आणि रोबोटिक्स शिक्षणाला खऱ्या अर्थाने सर्वसमावेशक व्यासपीठ मिळाले आहे. कार्यक्रमात रोबोटेक्स इंडिया २०२४ चा प्रवास दर्शवणारा विशेष व्हिडिओ सादर करण्यात आला. शेवटी डॉ. शांतिपाल ओहोल यांनी आभार प्रदर्शन करून औपचारिक उद्घोषणा केली आणि प्रा. सुनीता कराड यांच्या शुभ हस्ते स्पर्धेला सुरुवात झाली.

उद्घाटन प्रसंगी MIT-ADT विद्यापीठाच्या कार्यकारी संचालिका प्रा. सुनीता कराड यांचा विशेष सत्कार करण्यात आला. त्यांच्यासोबत प्रमुख पाहुण्यांमध्ये रोबोटेक्स इंटरनॅशनलच्या प्रमुख अ‍ॅनेली पिक्केमेट्स, रोबोटेक्स इंडियाच्या संचालिका पायल राजपाल, पुणे FICCI Flo च्या माजी अध्यक्षा पिंकी राजपाल, ZS असोसिएट्स (गव्हर्नन्स, रिस्क, कंप्लायन्स) ग्लोबल डायरेक्टर अली खान, आयकर विभागाचे मुख्य आयुक्त विवेक वाडेकर, HCL फाऊंडेशन असोसिएट जनरल मॅनेजर रॉबिन थॉमस, स्टर्लाईट टेक्नॉलॉजीज CSR मॅनेजर मनीष तयाडे, BMC सॉफ्टवेअर सीनियर मॅनेजर फायनान्स गिरीश क्याडिगुप्पी, CIET NCERT नवी दिल्ली चीफ इन्फॉर्मेशन अँड सिक्युरिटी ऑफिसर डॉ. राजेश जी, उद्योजक व राजकीय विश्लेषक तेहसीन पूनावाला, फिनोलेक्स इंडस्ट्रीज माजी व्यवस्थापकीय संचालक अनिल व्हाबी, COEP सहयोगी प्राध्यापक डॉ. शांतिपाल ओहोल, ग्रे मॅटर कन्सल्टिंग कार्यकारी संचालक संतानू घोषाल, फिनोलेक्स इंडस्ट्रीज हेड – अॅनालिटिक्स अभिजीत डेका या मान्यवरांनी विद्यार्थ्यांना प्रेरणादायी मार्गदर्शन केले.

रोबोटेक्स इंडिया ही केवळ स्पर्धा नाही तर विद्यार्थ्यांच्या कल्पनाशक्तीचा उत्सव आहे. गाव, शहर, खेड्यातील मुले तंत्रज्ञानाच्या माध्यमातून जेव्हा समस्यांचे निराकरण करतात, तेव्हा ‘विकसित भारत’ घडण्याचे दर्शन घडते. पंतप्रधान नरेंद्र मोदी यांच्या आत्मनिर्भर आणि डिजिटल भारताच्या दृष्टीकोनाशी सुसंगत राहून, ही स्पर्धा भारताच्या तरुण नवोन्मेषकांना जागतिक स्तरावर घेऊन जाण्याचे काम करते,” असे रोबोटेक्स इंडियाच्या संचालिका पायल राजपाल यांनी सांगितले.

“भारताला भविष्य तयार करण्यासाठी सक्षम करणारी ही स्पर्धा विद्यार्थ्यांच्या कल्पकतेला वाव देते. प्रत्येक स्पर्धक विजेता आहे, कारण त्यांनी नवोन्मेष आणि सर्जनशीलतेचा मार्ग स्वीकारला आहे,” अशा शब्दांत उपस्थित मान्यवरांनी विद्यार्थ्यांना शुभेच्छा दिल्या.

रोबोटेक्स इंडियाने आजवर देशभरातील १२ लाखांहून अधिक विद्यार्थ्यांवर परिणाम घडवला असून, ५०० पेक्षा जास्त रोबोटिक्स एआय लॅब्स आणि १० हजारांहून अधिक शासकीय शिक्षकांचे प्रशिक्षण या माध्यमातून नव्या पिढीला भविष्याची तयारी करून दिली आहे. “Girls Who Build Robots” या उपक्रमामुळे मुलींना STEM क्षेत्रात मोठ्या प्रमाणावर प्रोत्साहन मिळाले आहे.

‘सृजनयात्री’ : नवनिर्मितीचा नवोन्मेष
पुणे : किराणा, मेवाती आणि ग्वाल्हेर घराण्याचा सुश्राव्य मिलाफ साधत नवनिर्मित बंदिशींचा आनंद रसिकांना अनुभवता आला. निमित्त होते ‘सृजनयात्री’ कार्यक्रमाचे.
सुप्रसिद्ध संवादिनी वादक सुयोग कुंडलकर, मेवाती घराण्याचे सुप्रसिद्ध गायक आणि बंदिशकार सचिन नेवपुरकर यांनी प्रचलित आणि अप्रचलित रागातील सुमधुर आणि सुरेल बंदिशी रचल्या आहेत. या बंदिशींचे सादरीकरण किराणा घराण्याच्या गायिका आणि प्रभा अत्रे यांच्या ज्येष्ठ शिष्या विदुषी आरती ठाकूर-कुंडलकर आणि सचिन नेवपुरकर यांनी सुश्राव्य आणि प्रभावीपणे केले. बंदिशींचा रसिकांनी भरभरून आनंद घेतला. कार्यक्रमाचे आयोजन टिळक रस्त्यावरील न्यू इंग्लिश स्कूलच्या आवारातील गणेश सभागृहात करण्यात आले होते.
कार्यक्रमाची सुरुवात सुयोग कुंडलकर यांनी रचलेल्या राग सांझमधील रूपक तालातील ‘ए री भयी सांज सखी री’ या बंदिशीने झाली. याला जोडून द्रुत तीन तालातील ‘अब तो मोरी मान ले ओ सावरिया’ ही रचना सादर करून आरती ठाकूर-कुंडलकर यांनी तराणा सादर केला. यानंतर सचिन नेवपुरकर रचित राग रागेश्रीमधील झपतालातील ‘आली रि जियरा’ ही माधुर्यपूर्ण बंदिश सादर केली.
सुयोग कुंडलकर यांनी रचलेल्या गोरख, सोहोनी, रसवंती, यमन या रागांवर आधारित ‘अब तुमी सो लगन ला’, ‘जी न जाओ रे बलवमा’, ‘मानत नाही करत बरजोरी’, ‘झनन झनन बाजे पैंजन सखी’ या बंदिशींचे आरती ठाकूर-कुंडलकर यांनी सुमधुर सादरीकरण केले.
राग रागेश्री, मारुबिहाग, सोहोनी, यमन, दिन की पूरिया या रागांवर आधारित सचिन नेवपुरकर यांनी रचलेल्या बंदिशींचे त्यांनीच प्रभावीपणे सादरीकरण केले.
सोहोनी या एकच रागाकडे वेगळेपणाने बघण्याचा दोन बंदिशकारांचा दृष्टिकोन दर्शविताना सचिन नेवपुरकर यांनी गुरुविषयी कृतज्ञता दर्शविणारी, आग्रा घराण्याची शैली दर्शविणारी ‘पार करन दे हो नैय्या’ ही बंदिश रसिकांना विशेष भावली. सोहोनी रागतच रचलेल्या सुयोग कुंडलकर यांची ‘जी न जाओ रे बलवमा’, ‘काहे समझत नाही मोरा मनवा’ ही बंदिश सादर करताना आरती ठाकूर-कुंडलकर यांनी आपल्या गायनातून विरहिणीची व्यथा प्रभावीपणे दर्शविली.
जन संमोहिनी रागात आडा चौतालमध्ये सुयोग कुंडलकर यांनी रचलेली देवीचे वर्णन करणारी ‘दुर्गे महारानी वरदानी’ ही रचना सादर करून आरती ठाकूर-कुंडलकर यांनी भक्ती-शक्तीचा सुरेल संगम साधला. शब्द आणि स्वरांचे लालित्य सुरेलपणे मांडणाऱ्या सुयोग कुंडलकर रचित ‘शाम को तिलक भाल’ या रागमालेतून सुमारे 21 रागांचे समर्पक दर्शन साधले गेले.
कार्यक्रमाची सांगता सचिन नेवपुरकर यांनी भैरवी रागातील होरीने केली. श्रीकृष्णाचा गोपिकांशी चाललेला खट्याळपणा आणि मग गोपिंनीही काढलेली श्रीकृष्णा छेड, त्यातून लज्जित झालेला श्रीकृष्ण यांचे सुंदर चित्रण उभे करणाऱ्या ‘करत है मनमानी श्याम कन्हाई’ आणि ‘चलो री चलो री सखी पकड कान्ह को’ या रचना नेवपुरकर यांनी सादर करून कृष्ण-गोपिकांच्या अवखळपणाचे दृश्य रसिकांसमोर साकारले.
सुयोग कुंडलकर (संवादिनी), ऋषिकेश जगताप (तबला) यांनी समर्पक साथसंगत करत मैफिलीत रंग भरले. कार्यक्रमाचे अभ्यासपूर्ण निवेदन प्रतिमा कुलकर्णी यांनी केले.

महाराष्ट्रीय कलोपासक आयोजित हीरक महोत्सवी पुरुषोत्तम करंडक एकांकिका स्पर्धेचे पारितोषिक वितरण

पुणे : रंगमंच हा अतिशय छोटा दिसत असला तरी हे अतिशय पावन क्षेत्र आहे. रंगमंचाचा योग्य वापर नक्की करा पण ते विटाळू नका. नट म्हणून विचार केला तर जोपर्यंत नवीन दु:खाच्या शोधात मी फिरत नाही तो पर्यंत नट म्हणून काम करण्याचा मला अधिकार नाही. नाटकात काम करणे हे फक्त करमणुकीपुरते मर्यादित ठेवू नका. सामाजिक, राजकीय परिस्थिती बदलत राहिली तर हेच नाटक शस्त्र म्हणून वापरायला विसरू नका. आपण नट आहोत; जे सांगायचे आहे ते रंगमंचावरून सांगितले तर त्याचे कौतुक होईल, पारितोषिक मिळतील आणि तुम्हाला जे म्हणायचे आहे, ते म्हणू शकाल असा वडिकीचा सल्ला ज्येष्ठ अभिनेते नाना पाटेकर यांनी महाविद्यालयीन विद्यार्थ्यांना दिला.

महाराष्ट्रीय कलोपासक आयोजित हीरक महोत्सवी पुरुषोत्तम करंडक एकांकिका स्पर्धेचा पारितोषिक वितरण समारंभ शुक्रवारी (दि. 19) आयोजित करण्यात आला होता. पुरस्काराचे वितरण ज्येष्ठ अभिनेते नाना पाटेकर आणि सावित्रीबाई फुले पुणे विद्यापीठाचे कुलगुरू प्रा. डॉ. सुरेश गोसावी यांच्या हस्ते झाले. त्या वेळी नाना पाटेकर यांनी विद्यार्थ्यांशी संवाद साधला. भरत नाट्य मंदिरात कार्यक्रमाचे आयोजन करण्यात आले होते. महाराष्ट्रीय कलोपासकचे उपाध्यक्ष सुहास जोशी, अंतिम फेरीतील स्पर्धेचे परीक्षक योगेश सोमण, अश्विनी गिरी, प्रदीप वैद्य मंचावर होते.
पारितोषिक वितरण समारंभापूर्वी स्पर्धेत पुरुषोत्तम करंडक पटकाविणाऱ्या अण्णासाहेब मगर महाविद्यालयाने (हडपसर) ‌‘काही प्रॉब्लेम ये का?‌’ ही एकांकिका सादर केली.

स्पर्धेत पारितोषिक मिळण्याचा आनंद क्षणीक असतो. नाटकाचे वेड अंगात भिनायला पाहिजे असे आवर्जून नमूद करून नाना पाटेकर पुढे म्हणाले, स्पर्धेतील यश-अपयश विसरता आले पाहिजे. दु:ख गोळा करायला शिका. तिचं दु:खे भूमिकांसाठी उपयोगी पडतील. रंगमंचावर कसे दिसता हा मुद्दा क्षणापुरता असतो पण प्रेक्षकांपर्यंत कशा पद्धतीने पाहोतचा हा मुद्दा महत्त्वाचा असतो. ते पुढे म्हणाले, प्रत्येकाचा पिंड वेगळा असतो, भवताल वेगळा असतो. लेखक लिहितो, दिग्दर्शक त्याच्या दृष्टीने नाटकाकडे पाहतो. लेखक, नट, दिग्दर्शक यांच्या एकत्रित प्रयत्नातून नाट्यकृती निर्माण होत असते. नटासाठी शरीर, आवाज किती महत्त्वाचा आहे याचीही उदाहरणे त्यांनी विद्यार्थ्यांना दिली.
सतीश तारे, विक्रम गोखले यांच्या आठवणी सांगताना नाना पाटेकर म्हणाले, हे कलाकार माणूस म्हणून खूप मोठे होते. विक्रम गोखले खऱ्या अर्थाने बॅरिस्टर वाटत. बॅरिस्टर हे नाटक करायचे आहे, अशी इच्छा मी व्यक्ती केली तेंव्हा मी दिग्दर्शन करतो, असे गोखले म्हणाले होते. काही गोष्टी करायच्या राहून जातात. त्यातीलच एक बॅरिस्टर.
अध्यक्षपदावरून बोलताना कुलगुरू म्हणाले, पुण्याची सांस्कृतिक शहर म्हणून असलेली ओळख खूप महत्त्वाची आहे. पुरुषोत्तम करंडक ही स्पर्धा केवळ नाट्यप्रयोगाची शृंखला नाही तर ती तरुणांच्या विचारांची, स्वप्नांची आणि जबाबदारीची अभिव्यक्ती आहे. या मंचावर उभे राहिल्यानंतर असे वाटते की वैश्विक विद्यापीठाच्या हृदयात उभे आहोत जिथे जीवनाचे धडे शिकविले जातात; प्रश्न विचारले जातात आणि भावी समाजाचे आराखडे रेखाटले जातात.
परीक्षक अश्विनी गिरी, प्रदीप वैद्य आणि योगेश सोमण यांनीही मनोगत व्यक्त केले. स्पर्धेसाठी लेखनाच्या उपयुक्ततेविषयी अश्विनी गिरी यांनी महत्वाचे मुद्दे विशद केले. स्पर्धेचे हीरक महोत्सवी वर्ष असल्याने स्पर्धेसंदर्भात प्रदीप वैद्य यांनी काही सूचना केल्या. लेखन, दिग्दर्शन तसेच रंगमंचावरील तांत्रिक बाबींसंदर्भात मार्गदर्शन केले.

मान्यवरांचे स्वागत सुहास जोशी यांनी केले. कार्यक्रमाचे सूत्रसंचालन, निकाल वाचन आणि आभार प्रदर्शन चिटणीस राजेंद्र ठाकूरदेसाई यांनी केले.

पुणे- पंतप्रधान नरेंद्र मोदी यांच्या वाढदिवसानिमित्त आयोजित “सेवा पंधरवडा” अंतर्गत कोथरुड मतदारसंघातील भाजपा मध्य मंडल सरचिटणीस अमित तोरडमल यांच्या संयोजनातून ‘स्वच्छ कोथरुड, स्वस्थ कोथरुड’चा संदेश घेऊन वॅाकेथॅानचे आयोजन केले आहे. या वॅाकेथॅानला मार्गस्थ करुन सर्व सहभागी स्पर्धकांना प्रोत्साहित केले. तसेच, या वॅाकेथॅानमध्ये सहभागी होऊन मॅार्निंग वॅाकचा आनंद लुटला.

मोदी हे स्वच्छता आणि आरोग्याबाबत नेहमीच जागरुक असतात. उत्तम आरोग्यासाठी त्यांचा व्यायामावर विशेष भर असतो. उत्तम आरोग्यासोबतच परिसर स्वच्छतेला सर्वांनी प्राधान्य दिले पाहिजे, असे आवाहन यावेळी उच्च व तंत्र शिक्षण मंत्री चंद्रकांतदादा पाटील यांनी केले.

यावेळी संयोजिका श्वेता तोरडमल, भाजपा मध्य मंडल अध्यक्ष निलेश कोंढाळकर, पुणे जिल्हा नियोजन समिती सदस्य डॉ. संदीप बुटाला, पुणे शहर सरचिटणीस विठ्ठलआण्णा बराटे, शहर चिटणीस प्रा. डॉ. अनुराधा एडके, सरचिटणीस सचिन मोकाटे, महेश शिंदे, वैभव मुरकुटे, मध्य मंडल महिला मोर्चा अध्यक्षा हर्षाली माथवड, गणेश वर्पे, प्रभाग अध्यक्ष प्रदीप जोरी, दीपक पवार, बाळासाहेब टेमकर, अनिता तलाठी, जान्हवी जोशी, सुजीत मगर, राज तांबोळी, रुपेश भोसले, नाना कुंबरे यांच्यासह भाजपाचे सर्व पदाधिकारी आणि नागरिक उपस्थित होते.