पुणे – विविध रागांनी नटलेले शास्त्रीय गायन, मन तल्लीन करणारी पखवाज वादनाची जुगलबंदी आणि रसिकांच्या टाळ्या-वाहव्यांच्या गजरात पंडित जितेंद्र अभिषेकी संगीत महोत्सवातील ‘युवोन्मेश’ ही खास युवा कलाकारांची मैफिल रंगली.

तरंगिनी सांस्कृतिक प्रतिष्ठान आणि ‘आपला परिसर’ यांच्या संयुक्त विद्यमाने आयोजित २० व्या पंडित जितेंद्र अभिषेकी संगीत महोत्सवाच्या दुसऱ्या दिवशी सकाळच्या सत्राची सुरुवात गायिका डॉ. शर्वरी डिग्रजकर-पोफळे यांच्या सुरेल गायनाने झाली. त्यांनी राग गुजरी तोडीमध्ये विलंबित ख्याल आणि द्रुत बंदिश सादर करत रसिकांना मंत्रमुग्ध केले. त्यांच्या सादरीकरणाला गीत इनामदार, उमेश पुरोहित (तबला) आणि सुकन्या जोशी (तानपुरा) यांनी समर्पक साथ दिली.

यावेळी बोलताना डॉ. शर्वरी डिग्रजकर-पोफळे म्हणाल्या, “या प्रतिष्ठित महोत्सवात सादरीकरणाची संधी मिळणे हे माझे भाग्य असून, हे पंडित जितेंद्र अभिषेकी यांचे आशीर्वादच आहेत.”

कार्यक्रमाचे सूत्रसंचालन ऋषिकेश रामदासी यांनी केले, तर रश्मी अभिषेकी यांनी प्रास्ताविक केले. त्या म्हणाल्या, “अभिजात संगीताचा प्रचार-प्रसार करण्यासाठी पंडित जितेंद्र अभिषेकी यांनी मोठे योगदान दिले आहे. या महोत्सवाच्या माध्यमातून भारतीय शास्त्रीय संगीत तरुणांपर्यंत पोहोचावे, यासाठी ‘युवोन्मेश’ हा विशेष विभाग सुरू करण्यात आला आहे.”

या प्रसंगी देवश्री कचरे आणि मंगल गवळी यांच्या हस्ते डॉ. शर्वरी डिग्रजकर-पोफळे यांचा सत्कार करण्यात आला.

दुसऱ्या सत्रात पखवाज वादक पार्थ भूमकर आणि प्रथमेश तारळकर यांनी दमदार पखवाज वादन सादर केले. त्यांच्या प्रत्येक थापेसह मैफिल रंगत गेली आणि सभागृहात भक्तीमय वातावरणाची अनुभूती निर्माण झाली. अथर्व कुलकर्णी (संवादिनी) यांनी त्यांना साथ दिली.

महोत्सवाच्या शेवटच्या सत्रात आसामच्या गायिका श्रुती बुजरबारूआ यांनी अप्रतिम गायन सादर केले. त्यांनी राग शुद्ध सारंगमध्ये ‘धरणी धरोहर’ ही रूपक मध्य तालातील बंदिश सादर करत रसिकांची मने जिंकली. त्यांच्या सादरीकरणाला पार्थ ताराबादकर (तबला) आणि सौमित्र क्षीरसागर (संवादिनी) यांनी समर्थ साथ दिली.

यावेळी भावना व्यक्त करत श्रुती बुजरबारूआ म्हणाल्या, “या महोत्सवात सादरीकरणाची संधी मिळणे हे माझे भाग्य आहे. आसामहून महाराष्ट्रात आल्यानंतर मी पंडित विजय कोपरकर यांच्याकडे गायनाचे शिक्षण घेतले. त्यामुळे पुण्यात सादरीकरण करणे म्हणजे माझ्यासाठी माहेरच्या ठिकाणी संगीत सेवा करण्यासारखे आहे.”

युवा कलाकारांच्या उत्स्फूर्त आणि दर्जेदार सादरीकरणामुळे ‘युवोन्मेश’ मैफिलीने महोत्सवात विशेष रंग भरला.

पुणे, : देवाची उरुळी येथे ५०० टन ओल्या कचऱ्यावर प्रक्रिया करण्यासाठी विनानिविदा काढण्यात आलेला प्रस्ताव मागे घेण्यात येत आहे. या प्रकल्पासाठी निविदा प्रक्रिया राबविण्यात येईल, अशी माहिती महापालिका आयुक्त नवलकिशोर राम यांनी येथे दिली.कॉंग्रेसचे शहराध्यक्ष अरविंद शिंदे आणि गटनेते चंद्रकांत कदम यांनी याप्रकरणी आयुक्त नवल किशोर राम यांच्यावर ते दबावाखाली काम करत असल्याचे आरोप केले होते .
स्थायी समितीच्या बैठकीमध्ये ऐनवेळी उरुळी येथील कचरा डेपोच्या आवारात ओल्या कचऱ्यावर ५०० टन क्षमतेचा प्रकल्प करण्याचे काम भूमी ग्रीन एनर्जी या कंपनीला देण्याचा प्रस्ताव ऐनवेळी आणला होता. २० वर्षे ६९० रुपये प्रति टन टिपिंग फी व दरवर्षी १० टक्के वाढ असे या प्रस्तावात नमूद केले होते. परंतु ऐनवेळी बैठकीत काँग्रेस सदस्य प्रशांत जगताप यांनी एवढ्या दीर्घकाळासाठी विनानिविदा प्रस्ताव आणण्यास विरोध करत, तो कार्यपत्रिकेवर घेण्याची मागणी केल्याने हा विषय बारगळला. मात्र, विनानिविदा आणलेल्या या प्रस्तावावरून प्रशासनाच्या कारभारावर प्रश्नचिन्ह निर्माण झाले.
यासंदर्भात आयुक्त नवल किशोर राम म्हणाले, “हडपसर येथील उघड्यावरील कचऱ्याचा प्रश्न गंभीर झाला असून, याबाबत न्यायालयात खटला सुरू आहे. ओल्या कचऱ्याची विल्हेवाट लावायची असल्याने तातडीने प्रक्रिया करणे गरजेचे आहे. प्रकल्प उभारण्यासाठी येणारा ४० ते ५० कोटी रुपये खर्च संबंधित ठेकेदारानेच करायचा आहे. परंतु यासाठी १० वर्षे अधिकचे काम देण्याबाबत अधिकाऱ्यांशी चर्चा केल्यानंतर कालावधी जास्त होत असल्याचे निदर्शनास आले, त्यामुळे प्रस्ताव मागे घेण्याचा निर्णय झाला होता. परंतु तत्पूर्वीच प्रस्तावावर माझी स्वाक्षरी झाल्याने तो स्थायी समितीमध्ये गेला होता.”

गायिका सानिका कुलकर्णी यांचे गायन ; श्री रामजी संस्थान तुळशीबाग तर्फे श्रीरामनवमी उत्सव ; उत्सवाचे २६५ वे वर्ष

पुणे : ठुमक चलत रामचंद्र… राम रतन धन पायो…ध्यान लागले रामाचे… यांसह प्रभू श्रीरामांचे वर्णन करणाऱ्या विविध गीतांचा आनंद घेताना रसिकांनी जणू श्रीरामांचे ध्यान लागले. पेशवेकालीन ऐतिहासिक तुळशीबाग श्रीराम मंदिरात आयोजित स्वरमैफलीत गायिका सानिका कुलकर्णी यांच्या गायनाने पुणेकरांना मंत्रमुग्ध केले. 

श्री रामजी संस्थान तुळशीबाग च्यावतीने श्रीराम मंदिरात श्रीरामनवमी उत्सवानिमित्त विविध कार्यक्रमांचे आयोजन करण्यात आले आहे. उत्सवाचे अखंडीत २६५ वे वर्ष साजरे होत आहे. संस्थानचे कार्यकारी विश्वस्त डॉ.रामचंद्र तुळशीबागवाले, विश्वस्त भरत तुळशीबागवाले, रामदास तुळशीबागवाले, श्रीपाद तुळशीबागवाले, कोटेश्वर तुळशीबागवाले यांसह तुळशीबागवाले परिवाराने उत्सवाचे आयोजन केले आहे. 

‘वंदे गणपतीम’ या गणेश वंदनेने मैफलीला प्रारंभ झाला. त्यानंतर ‘रूप पाहता लोचनी’ या संत ज्ञानेश्वरांच्या अभंगाचे सानिका कुलकर्णी यांनी केलेले सादरीकरण रसिकांच्या विशेष पसंतीस पडले. ‘जानकी नाथ सहाय करे जब’ या भजनाला उपस्थितांनी टाळ्यांनी साथ दिली. संत तुकाराम महाराजांच्या ‘लक्ष्मी वल्लभा’ या रचनेच्या सादरीकरणाने पुणेकर मंत्रमुग्ध झाले. 

डॉ.रामचंद्र तुळशीबागवाले म्हणाले, पुणे प्रांताचे सरसुभेदार श्रीमंत नारो अप्पाजी तुळशीबागवाले यांनी सन १७६१ साली स्थापन केलेले हे देखणे मंदिर आहे. यंदा दि. २ एप्रिल पर्यंत विविध कार्यक्रमांचे आयोजन करण्यात आले आहे. उत्सवांतर्गत श्रीरामरक्षा, अथर्वशीर्ष पठण, श्री विष्णू सहस्त्रनाम, श्रीसूक्त व पुरुषसूक्त पठण, महापूजा, पालखी, श्री कौसल्या माता डोहाळजेवण, श्रीरामजन्म सोहळा, श्रीरामराज्याभिषेक सोहळा अशा धार्मिक कार्यक्रमांबरोबरच रामायण वाचन, रामायण प्रवचन, सांगितीक कार्यक्रम अशा सांस्कृतिक कार्यक्रमांचे देखील आयोजन करण्यात आले आहे. सर्व कार्यक्रम विनामूल्य आहेत. तरी पुणेकरांनी मोठ्या संख्येने उत्सवात सहभागी व्हावे

शिवसेना कार्यकर्त्यांच्या उपस्थितीत आसावरी जगदाळे यांचा डॉ. गोऱ्हे यांच्या हस्ते सत्कार

पुणे. दि.२१: पहलगाम दहशतवादी हल्ल्यात शहीद झालेल्या संतोष जगदाळे यांच्या कन्या आसावरी जगदाळे यांनी पुणे महानगरपालिकेत नोकरी मिळाल्याबद्दल उपमुख्यमंत्री एकनाथ शिंदे आणि मुख्यमंत्री देवेंद्र फडणवीस यांच्या विशेष प्रयत्नांचे कौतुक करत विधान परिषदेच्या उपसभापती डॉ. नीलम गोऱ्हे यांची भेट घेतली. या भेटीत डॉ. गोऱ्हे यांनी आसावरी यांचा सत्कार केला.

उपमुख्यमंत्री एकनाथ शिंदे यांनी एप्रिल २०२५ मध्ये कुटुंबाला भेट देऊन शासकीय सेवेत नोकरी देण्याचे आश्वासन दिले होते. त्यानंतर मुख्यमंत्री देवेंद्र फडणवीस यांच्या आदेशानुसार महापालिका आयुक्त नवलकिशोर राम यांनी विशेष प्रक्रिया राबवून आसावरी जगदाळे यांना प्रशासकीय अधिकारी (वर्ग-२) पदावर नियुक्ती दिली. या पार्श्वभूमीवर २० मार्च रोजी आसावरी यांनी उपसभापती व शिवसेना नेत्या डॉ. नीलम गोऱ्हे यांची भेट घेऊन आभार व्यक्त केले. यावेळी संतोष जगदाळे यांच्या पत्नी प्रगती जगदाळे उपस्थित होत्या.

डॉ. गोऱ्हे यांनी आसावरी यांना शाल, पुष्पगुच्छ देऊन सत्कार केला. त्यांनी पुढील वाटचालीसाठी मनापासून शुभेच्छा दिल्या आणि भविष्यातही कुटुंबाला पूर्ण सहकार्य असल्याचे सांगितले. आसावरीने नोकरी मिळाल्याबद्दल कुटुंबीयांच्या भावना व्यक्त करत डॉ. गोऱ्हे यांचे विशेष आभार मानले.याप्रसंगी बाळासाहेब भांडे, आनंद गोयल, एकनाथ ढोले, विठ्ठल तांबे, ज्योती गाडे, सोनाली लांडगे, रिंकू मोरे आदी शिवसेना कार्यकर्ते उपस्थित होते.

२६ मार्च हा संतोष जगदाळे यांचा स्मृतिदिन असून, सरकारने दिलेली ही नोकरी त्यांना आदरांजली असल्याचे जगदाळे कुटुंबीयांनी सांगितले.

पहलगाम हल्ल्यात २२ एप्रिल २०२५ रोजी संतोष जगदाळे यांच्यासह २६ पर्यटकांचा मृत्यू झाला होता. उपस्थित शिवसेना कार्यकर्त्यांनी सांगितले की, पहलगाम हल्ला असो वा इराण युद्धासारखे संकट असो, उपमुख्यमंत्री एकनाथ शिंदे नेहमीच पीडित नागरिकांच्या मदतीला धावून जातात आणि त्यांना सुखरूप बाहेर काढतात.

रस्ता प्रकल्प व अतिक्रमणाच्या विरोधात आंदोलन; प्रशासनाकडून ठोस प्रतिसाद नसल्याचा आरोप

पुणे :  प्रशासनाकडून ठोस प्रतिसाद मिळाला नसल्याने माजी आमदार दीपक पायगुडे यांचे फुलगाव, पुणे येथील लोकसेवा प्रतिष्ठान संचलित नेताजी सुभाषचंद्र बोस सैनिकी शाळेच्या मैदानातून जाणाऱ्या रस्त्याबाबत तसेच अतिक्रमणाबाबत धरणे आंदोलन सलग नवव्या दिवशीही सुरूच आहे.

दीपक पायगुडे यांनी फुलगाव येथील शाळेच्या जागेच्या प्रश्नावर धरणे आंदोलन सुरू केले आहे. सरकारने शाळेची शैक्षणिक जागा रस्ता बांधकामासाठी ताब्यात घेतल्याच्या तसेच विविध भागात अतिक्रमण केल्याच्या निषेधार्थ त्यांनी आंदोलन सुरू केले होते. दीपक पायगुडे गेल्या नऊ दिवसांपासून फुलगावमधील शाळेच्या परिसरात धरणे आंदोलन करत आहेत. स्थानिक नागरिक आणि पालकांच्या मते, ही जागा विद्यार्थ्यांच्या शैक्षणिक उपयोगासाठी राखीव होती. मात्र, रस्ता प्रकल्पासाठी ती घेण्यात आल्याने व अतिक्रमण केल्याने भविष्यात विद्यार्थ्यांच्या सुविधांवर परिणाम होणार असल्याची भीती व्यक्त केली जात आहे.

या निर्णयाचा निषेध करत पायगुडे यांनी सरकारचे लक्ष वेधण्यासाठी धरणे आंदोलन सुरू केले आहे. मात्र नऊ दिवस उलटूनही प्रशासन किंवा सरकारकडून कोणतीही ठोस दखल घेण्यात आलेली नसल्याचा आरोप आंदोलकांकडून करण्यात येत आहे. दरम्यान, धरणे आंदोलनामुळे दीपक पायगुडे यांची प्रकृती दिवसेंदिवस खालावत असल्याची माहिती स्थानिकांनी दिली आहे. तरीदेखील सरकारकडून अद्याप कोणतीही सकारात्मक प्रतिक्रिया मिळाली नसल्याने नागरिकांमध्ये नाराजी व्यक्त होत आहे.

भविष्यात आंतरराष्ट्रीय क्रिकेट मैदान तेथे होऊ शकते पण याच अतिक्रमण आणि बेकायदेशीर रस्त्यामुळे ते होऊ शकणार नाही, अशी भितीदेखील दीपक पायगुडे यांनी व्यक्त केली आहे.
या आंदोलनाकडे प्रशासनाने तातडीने लक्ष देऊन तोडगा काढावा, अशी मागणी स्थानिक नागरिक आणि आंदोलनकर्त्यांकडून करण्यात येत आहे.

पुणे- उच्च न्यायालयाने दिलेल्या निर्देशांनुसार रस्त्यांवरील खड्डे आणि चेम्बर, वा वाळू तदनुषंगिक बाबी यामुळे अपघात होता कामा नये, त्या दृष्टीने शहर आणि परिसरातील सर्व रस्त्यांची कामे वेगाने आणि उत्कृष्ट रित्या पूर्ण करा असे स्पष्ट आदेश आज महापालिका आयुक्त नवल किशोर राम यांनि महापालिका अधिकाऱ्यांना दिले आहेत. शहर परिसरातील रस्त्यां वरील चेंबर्स समपातळीत करणे, पदपथ दुरुस्ती करणे इत्यादी कामाबाबत आज दि.२०.०३.२०२६ रोजी मा. नवल किशोर राम, महापालिका आयुक्त यांचेमार्फत बैठक आयोजित करण्यात आली.या बैठकीस अतिरिक्त महापालिका आयुक्त (विशेष)ओमप्रकाश दिवटे, शहर अभियंता अनिरुद्ध पावसकर, मुख्य अभियंता (विद्युत)मनीषा शेकटकर, मुख्य अभियंता (पथ)राजेश बनकर अधीक्षक अभियंता अशित जाधव (पथ), बांबळे इत्यादी तसेच पथ व विद्युत विभागाकडील अभियंते व संबंधित अधिकारी उपस्थित होते.
पुणे शहरात मध्यंतरी पार पडलेल्या आंतरराष्ट्रीय सायकल स्पर्धेच्या मार्गावर २ हजार सर्व प्रकारचे चेंबर्स झाकणे रस्त्याच्या समपातळीत आणून मार्ग व्यवस्थित करण्यात आला आहे. मात्र, स्पर्धेच्या मार्गापुरतेच काम मर्यादित राहिले आहे. शहरातील इतर भागातील रस्त्यावरील पावसाळी व ड्रेनेजची झाकणे समपातळीत न आल्याने त्यांच्या खड्ड्यात वाहने आदळून अपघात होत आहेत.पुणे महानगरपालिके मार्फत सुरु असलेल्या कार्यवाही बाबतची वस्तुस्थिती महापालिका आयुक्त नवल किशोर राम यांनी खालीलप्रमाणे सांगितले :
• पुणे महानगरपालिकेच्या पथ विभागामार्फत रस्त्यावरील खड्ड्यांच्या अनुषंगाने उच्च न्यायालयाने स्थानिक स्वराज संस्थाना दिलेल्या निर्देशांनुसार रस्ते खड्डे मुक्त अभियान पुणे महानगरपालिकेने सुरु केले.
• या बरोबरच रस्त्यावरील पावसाळी लाइन चे चेंबर्स रस्त्याच्या सम पातळीत आणणे याबाबतचे या अभियानाचे रितसर उद्घाटन दिनांक १५ डिसेंबर २०२५ रोजी करण्यात आले असून त्या दिवसापासून संपूर्ण शहरभर पुणे महानगरपालिकेच्या पथ विभागामार्फत या बाबतचे कामकाज सुरु आहे.
• पुण्यात पार पडलेल्या आंतरराष्ट्रीय सायकल स्पर्धेच्या वेळी चेंबर समापतळीत आणण्याबाबतची जी एस.ओ.पी. तयार करण्यात आली होती, त्यानुसारच चेंबर समापतळीत आणण्याची कार्यवाही सुरू आहे.
• संपूर्ण शहरात पथ विभागाकडील कडील झोन वाईज वेगवेगळ्या ठेकेदार यांना महाराष्ट्र महानगर पालिका अधिनियम 5 2.2 अन्वये नेमणुकी करून चेंबर समापतळीत आणण्याचे कामकाज सुरू आहे. याबाबत दैनंदिन केलेल्या कामाचा आढावा घेऊन केलेल्या कामाची आकडेवारी दरोरोज महापालिका आयुक्त यांच्याकडे सादर करण्यात येत आहे.
• दिवसा असलेली वाहतूक विचारत घेऊन रात्री एस.ओ.पी नुसार चेंबर समपातळीमध्ये आणण्याचे काम करीत असताना, रस्ता कटरच्या साह्याने व ब्रेकरच्या साह्याने कट करीत असताना होणा-या आवाजाचा नागरिकांना, विद्यार्थ्यांना परीक्षा कालवधी असल्याने त्रास होत असल्याच्या तक्रारी प्राप्त होत असल्याने रात्री काम करताना अडचणी निर्माण होत आहेत.आवश्यक त्या दक्षता घेऊन ज्या ठिकाणी शक्य आहे त्या ठिकाणी कामे करण्यात येत आहेत.
• सद्यस्थिती संपूर्ण शहरात पावसाळी ,लाईन वरील आज मितीस सुमारे १२८३ एवढे चेम्बर्स समपातळी घेण्याची कार्यवाही करण्यात आलेली आहे. पावसाळी वाहिन्यांवरील चेम्बर्स पथविभागामार्फत तर ड्रेनेजची गोल चेम्बर्स ड्रेनेज विभागाकडून समपातळीवर करण्यात येत आहेत.
• रस्त्याचे डांबरीकरण काम पूर्ण झाल्यानंतर अस्तित्वातील चेम्बर्सची पातळी खाली गेल्याने त्याठिकाणी निर्माण होणा-या खड्यांमुळे होणारे अपघात हे यामुळे टाळता येणार आहेत.
• महापालिका आयुक्त यांनी आज दिनांक २० मार्च २०२५ रोजी स्वतः या विषयाची बैठक घेऊन दररोज जास्तीत जास्त चेंबर्स सम पातळीवर आणण्याची कार्यवाही अधिक गतीने करण्याच्या सूचना प्रशासनाला दिल्या आहेत.

डॉ. दिलीप देवधर यांच्या पंचत्तरीनिमित्त आयोजित सत्कार सोहळ्यात मदत

पुणे : डॉ. दिलीप देवधर यांच्या पंचत्तरीनिमित्त आयोजित सत्कार सोहळ्यात त्यांच्या वर्गमित्रांकडून ‘सहजीवन’ या वृद्धाश्रमासाठी ७५ हजार रुपयांची देणगी देण्यात आली. सामाजिक बांधिलकी जपत वृद्धांच्या सेवेसाठी कार्यरत असलेल्या या उपक्रमाला या मदतीमुळे एक आगळावेगळा पंचाहत्तरीचा सोहळा साजरा झाला.

शहरातील प्रसिद्ध फॅमिली डॉक्टर आणि ‘सहजीवन’ या वृद्धाश्रमाचे संस्थापक डॉ. दिलीप देवधर यांच्या पंचत्तरीनिमित्त त्यांच्या रुग्णांकडून व चाहत्यांकडून कर्वे रस्त्याजवळील अश्वमेध कार्यालय येथे भव्य सत्कार करण्यात आला. कार्यक्रमाच्या अध्यक्षस्थानी ज्येष्ठ साहित्यिक सतीश आळेकर उपस्थित होते. कार्यक्रमासाठी माजी खासदार व केंद्रीय मंत्री प्रकाश जावडेकर, डॉ. अविनाश भोंडवे, तसेच ज्येष्ठ गायक रविंद्र साठे आदी मान्यवर देखील उपस्थित होते.

सतीश आळेकर म्हणाले, वैद्यकीय सेवेबद्दल विविध प्रवाद होत असताना डॉ. देवधर यांच्यासारखे अचूक निदान करून अनावश्यक चाचण्या टाळणारे डॉक्टर दुर्मिळ होत आहेत. कोविड काळात कोणतीही बुवाबाजी न करता त्यांनी रुग्णांना दिलेला आधार अत्यंत मोलाचा ठरला, असेही त्यांनी सांगितले.

ग्राहक पेठेचे संचालक आणि डॉ. देवधर यांचे वर्गमित्र सूर्यकांत पाठक म्हणाले, चार-पाच पिढ्यांचे कौटुंबिक डॉक्टर म्हणून देवधर यांनी असंख्य कुटुंबांशी स्नेहाचे नाते निर्माण केले आहे. अनेक रुग्णांना आर्थिक अडचणीतही त्यांनी विनामूल्य उपचार देऊन मोठा आधार दिला, याचीही त्यांनी उदाहरणे सांगितली.

डॉ. दिलीप देवधर म्हणाले, पंचाहत्तरीनंतर काय करणार, असा प्रश्न अनेक जण विचारतात. पण माझे उत्तर एकच अजून कामच करणार. स्वामी विवेकानंद यांनी सांगितल्याप्रमाणे इतरांसाठी जगणे हेच खरे जीवन आहे. त्यामुळे माझ्या कुटुंबासाठी, रुग्णांसाठी आणि वृद्धाश्रमातील बांधवांसाठी कार्यरत राहण्याची शक्ती मिळो, हीच प्रार्थना. कार्यक्रमाचे सूत्रसंचालन आलोक देवधर आणि सुप्रसिद्ध गायिका मंजुषा पाटील यांनी केले.