पुणे : जय भवानी जय शिवाजी चा जयघोष… ढोल ताशा ंचा गजर… लाठी काठींचे मर्दानी खेळ… विद्यार्थ्यांच्या हातांमध्ये फडकणारे भगवे झेंडे अशा उत्साहपूर्ण वातावरणात बहुजन हिताय बहुजन सुखाय हे ब्रीद घेऊन कार्यरत असणाऱ्या श्री शिवाजी मराठा सोसायटीमध्ये शिवजयंती उत्सव जल्लोषात साजरा करण्यात आला. 
श्री शिवाजी मराठा सोसायटीच्या वतीने  शिवजयंती उत्सव आणि मिरवणूकीचे आयोजन करण्यात आले होते.  शुक्रवार पेठेतील सोसायटीच्या प्रांगणातील शिवाजी महाराजांच्या पुतळ्याला पोलिस उपायुक्त संदीप सिंह गिल यांच्या हस्ते पुष्पहार अर्पण करुन मिरवणुकीला प्रारंभ झाला.  सोसायटीचे मानद सचिव अण्णा थोरात, उपाध्यक्ष राजेंद्र जगताप, सहसचिव विकास गोगावले, खजिनदार जगदीश जेधे, नियामक मंडळ अध्यक्ष सत्येंद्र कांचन, कारभारी मंडळ अध्यक्ष विलास गव्हाणे, कमलताई व्यवहारे, शाखाप्रमुख,  शिक्षक आणि शिक्षकेत्तर कर्मचारी यावेळी उपस्थित होते. 
 यावेळी तब्बल १५०० पेक्षा अधिक विद्यार्थी पांरपारिक वेशात तसेच शिवाजी महाराज आणि मावळ्यांच्या वेशात सहभागी झाले होते.  विद्यार्थ्यांनी पर्यावरण जागृती, राष्ट्रीय एकात्मता, स्वच्छ पुणे -स्वच्छ  भारत संदेश  मिरवणुकीत दिला. यावेळी मर्दानी खेळांची प्रात्यक्षिके सादर करण्यात आली.
श्री शिवाजी मराठा सोसायटी – बाजीराव रस्त्यामार्गे चितळे बंधू मिठाईवाले – महात्मा फुले मंडई – शिवाजी रोड मार्गे पुन्हा श्री शिवाजी मराठा सोसायटीमध्ये मिरवणूकीचा समारोप झाला. जिजाऊ आणि बाल शिवरायाची मूर्ती असलेला फुलांनी सजलेला  रथ मिरवणुकीच्या अग्रभागी होता. मिरवणुकीत जयंत नगरकर यांचा नगारा, शिवगर्जना पथकाचे ढोल ताशा वादन आणि गंधर्व बँडचे वादन झाले.
अण्णा थोरात म्हणाले, श्री शिवाजी मराठा सोसायटीच्या वतीने छत्रपती शिवाजी महाराजांची ३९४ वी जयंती उत्साहात साजरी करण्यात आली. यामध्ये विद्यार्थ्यांनी साहसी खेळ सादर केले. शिवरायांचे नेतृत्वगुण, त्यांचे शौर्य स्वराज्यासाठी त्यांनी केलेले कार्य विद्यार्थ्यांना कळावे आणि त्यांनी ते अंगिकारावे यासाठी विद्यार्थ्यांच्या प्रत्यक्ष सहभागातून मिरवणुकीचे आयोजन करण्यात आले होते.

पुणे: आरोग्य मंत्री प्रा. डॉ. तानाजी सावंत यांच्या पुढाकाराने आरोग्य विभागातील रिक्त पदे भरण्याची प्रक्रिया युद्धपातळीवर सुरू असून उमेदवारांना संपूर्ण कागदपत्रांची पडताळणी केल्यानंतर त्याच दिवशी आदेशही दिले जात आहेत.

ही भरती प्रक्रिया गतीने व पारदर्शकपणे पूर्ण करण्यासाठी आरोग्य मंत्री डॉ.सावंत यांनी भरती कंपनीच्या प्रतिनिधी समवेत वेळोवेळी बैठका घेऊन प्रक्रिया संपूर्ण पारदर्शी आणि सुरळीत पडण्याविषयी निर्देश दिले होते. आरोग्य विभागातील गट ‘क’ आणि ‘ड’ संवर्गातील १० हजार ९४९ रिक्त पदांसाठी भरती प्रक्रिया आता अंतिम टप्प्यात आहे. संपूर्ण परीक्षा प्रक्रिया राबविण्यासाठी टीसीएस संस्थेची निवड करण्यात आली होती.

परीक्षा प्रक्रियेत पारदर्शकता येण्यासाठी टिसीएसकडून सीसीटिव्ही रेकॉर्डिंग, बायोमेट्रीक्स हजेरी, फिंगर प्रिंट व आयरीस तपासणी सुविधा वापरण्यात आल्या आहेत . तसेच ईलेक्ट्रॉनिक्स कार्पोरेशन ऑफ इंडिया लि. (ईसीआयएल) यांच्याकडून परीक्षा केंद्रामध्ये परीक्षेच्या कालाधीत ५-जी मोबाईल जॅमर्स ची व्यवस्थाही करण्यात आलेली होती. परीक्षेत होणारा गैरप्रकार रोखण्यासाठी आवश्यक त्या सर्व व्यवस्था करण्यात आल्या होत्या.

परीक्षेत पात्र ठरलेल्या उमेदवारांच्या कागदपत्रांची पडताळणी विभागनिहाय राज्यभर सुरू असून पुणे विभागातील आरोग्य भवन, राज्य आरोग्य शिक्षण व संपर्क विभाग, प्रबोधन हॉल पुणे येथे या विभागातील समुपदेशन व नियुक्तीचे आदेश तात्काळ देण्यात येत आहेत. यामध्ये उमेदवारांना विभागाच्यावतीने संपूर्ण सहकार्य करण्यात आले. उमेदवारांना असणाऱ्या विविध समस्यांचे निवारण करण्यात येत आहे. ही भरती प्रक्रिया २ मार्च २०२४ पर्यंत पूर्ण करण्याचे नियोजन करण्यात आले आहे. सर्व पदांची भरती प्रक्रिया अगदी पारदर्शी आणि सुरळीतरित्या पार पडल्याबद्दल निवड झालेल्या उमेदवारांनी प्रा. डॉ. सावंत यांचे आणि आरोग्य विभागाचे आभार मानले. काही उमेदवारांना प्रातिनिधिक स्वरूपात आरोग्यमंत्र्यांच्या हस्ते नियुक्ती आदेश देण्यात आले. यावेळी उमेदवारांनी भरती प्रक्रिये बाबत समाधान व्यक्त केले.

यावेळी आरोग्य विभागाचे सहसंचालक डॉ. राधाकिशन पवार यांनी भरती प्रक्रियेची माहिती दिली.

वर्षानुवर्षे रिक्त असलेल्या जागा भरणे आरोग्यमंत्री प्रा.डॉ. सावंत यांच्या सततच्या पाठपुराव्यामुळे शक्य झाले आहे.

पुणे, दि. १९: छत्रपती शिवाजी महाराज यांचे गडकोट किल्ले हा आपला ठेवा असून तो जपण्याचा प्रयत्न नक्की करु. पहिल्या टप्प्यात शिवाजी महाराज यांच्याशी संबंधित विविध २० पर्यटन स्थळे विकसित होत आहेत, त्यात किल्ले रायगडाप्रमाणेच शिवनेरीचाही विकास करण्यात येईल, असे मुख्यमंत्री एकनाथ शिंदे यांनी सांगितले.

किल्ले शिवनेरीवर आयोजित शिवजन्मोत्सव सोहळ्याप्रसंगी मुख्यमंत्री श्री. शिंदे बोलत होते. कार्यक्रमास उपमुख्यमंत्री देवेंद्र फडणवीस, उपमुख्यमंत्री तथा जिल्ह्याचे पालकमंत्री अजित पवार, सहकारमंत्री दिलीप वळसे-पाटील, खासदार अमोल कोल्हे, आमदार अतुल बेनके आदी उपस्थित होते.

मुख्यमंत्री श्री. शिंदे म्हणाले, छत्रपती शिवाजी महाराजांनी वास्तुकला, अभियांत्रिकी, किल्ल्यावरील प्रत्येक थेंब पाण्याचा उपयोग करून घेण्याची दूरदृष्टी त्या काळी दाखवली. शिवछत्रपती म्हणजे पराक्रम, शौर्य, त्याग, समर्पण आणि दूरदृष्टी असलेले नेतृत्व होते. ते सर्वव्यापी होते आणि त्यांनी सर्वांना बरोबर घेऊन काम केले. ते युगपुरुष, युगप्रवर्तक आणि रयतेचे राजे होते. अठरापगड जातीचे, धर्माचे लोक त्यांनी एकत्र आणले. प्रजेच्या दुःखापुढे, कल्याणापुढे स्वतःचे दुःख, आराम कवडीमोल मानला. त्यांनी तलवार हाती घेतली पण निष्पापांच्या रक्ताने रंगू दिली नाही. त्यामुळे त्यांच्या तलवारीला रक्ताचा वास येत नाही तर मानवतेचा सुगंध येतो. ते केवळ व्यक्ती नाही तर विचार होते.

शिवरायांकडील एक तरी गुण आपण सर्वांनी घेतल्यास शिवजयंती साजरी करताना त्यांना हेच खरे अभिवादन ठरेल. त्यामुळे समाज, राज्य, देश आणि माणूस म्हणून आपण अधिक प्रगती करू, असेही मुख्यमंत्री म्हणाले.

मध्यंतरी देशाचे प्रधानमंत्री नरेंद्र मोदी यांनीदेखील नौदलाच्या कार्यक्रमात त्यांच्या पूर्णाकृती पुतळ्याचे अनावरण केले तसेच नौदलाच्या ध्वजावर शिवप्रतिमेला समाविष्ट केले ही आपल्या सर्वांसाठी अभिमानाची बाब आहे. कुपवाडा येथे भारत पाकिस्तान सीमेवर शिवाजी महाराज यांचा अश्वारुढ पुतळा उभारण्यात आला. आग्र्याला देखील दिवाण-ए- आम येथे शिवाजी महाराज यांची जयंती गतवर्षीपासून साजरी करतो, असेही त्यांनी सांगितले.

छत्रपती शिवाजी महाराजांचे गडकोट किल्ले जागतिक वारसा स्थळामध्ये समाविष्ट करण्यासाठी प्रधानमंत्री यांनी शिफारस केली आहे. ही आपल्यासाठी अभिमानाची बाब आहे. जुन्नर हा पर्यटन तालुका असून बिबट सफारी विकसित करण्याचे घोषित केले आहे. येथील सुकाळवेढे, बोरघर, डूचकेवाडी, खेतेपठार मार्गे शिवजन्म भूमी आणि भीमाशंकर ही तीर्थक्षेत्रे जोडण्याचा प्रयत्न करू, असेही त्यांनी सांगितले.

निसर्ग चक्रीवादळग्रस्तांना नुकसान भरपाईची घोषणा

निसर्ग चक्रीवादळामुळे हिरडा पिकाचे झालेल्या नुकसान भरपाईचे १५ कोटी रुपये विशेष बाब म्हणून देण्याची घोषणा मुख्यमंत्र्यांनी करतानाच उपोषणकर्त्यांना उपोषण सोडण्याचे आवाहन केले.

मराठा समाजाला आरक्षण देण्यासाठी मंगळवारी विशेष अधिवेशन

मराठा समाजाला इतर कुणाचेही नुकसान न करता, कुठल्याही समाजाच्या आरक्षणाला धक्का न लावता टिकणारे, कायद्याच्या चौकटीत बसणारे आरक्षण देण्यासाठी विधानसभेचे विशेष अधिवेशन उद्या घेण्यात येणार आहे, असे मुख्यमंत्री महोदयांनी सांगितले.  ३५० व्या शिवराज्याभिषेक वर्षानिमित्त राज्यभरात शिवाजी महाराजांच्या कार्यावर कार्यक्रम घेतले आहेत. ‘जाणता राजा’ महानाट्याचे कार्यक्रम जिल्हावार घेत आहोत, असेही मुख्यमंत्री म्हणाले.

किल्ल्यांच्या विकासाकरिता एएसआयचे नियम शिथिल करण्यासाठी केंद्र शासन सकारात्मक  – देवेंद्र फडणवीस

राज्यातील किल्ल्याचे संवर्धन करीत असताना भारतीय पुरातत्व सर्वेक्षण विभागाकडून (एएसआय) येणाऱ्या अडचणींबाबत केंद्र शासन स्तरावर पाठपुरावा करून बैठक आयोजित करण्यात आली. त्यामध्ये पुरातत्व खात्याची प्रमाणित कार्यपद्धती सोपी करण्याबाबत आश्वासन देण्यात आले. पद्धत सोपी झाल्यानंतर किल्ले संवर्धन कामाला गती येईल. छत्रपती शिवाजी महाराज यांचे किल्ले म्हणून जागतिक वारसा स्थळामध्ये समावेश करण्यासाठी शिफारस करण्यात आली आहे, असे उपमुख्यमंत्री श्री.फडणवीस म्हणाले.

छत्रपती शिवाजी महाराजांनी शिवराज्याभिषेक करुन स्वराज्य स्थापन केले. महाराजांनी राज्यभिषेक केला; परंतु राजा म्हणून एकही दिवस विश्रांती घेतली नाही. त्यांची प्रेरणा घेऊनच शासन काम करत आहे. जो पर्यंत चंद्र-सूर्य आहे तोपर्यंत शिवाजी महाराज यांचा जयजयकार या भारत भूमीत होतच राहील. शिवराज्यभिषेक सोहळ्यानिमित्त राज्यात विविध कार्यक्रमांच्या माध्यमातून शिवाजी महाराज यांचे विचार, चरित्र बालकांपर्यंत पोहोचविण्याचे कार्य करण्यात येत आहे. प्रत्येक विभागीय मुख्यालयी शिवसृष्टी स्थापन करण्याचा निर्णय घेण्यात आला आहे. परिणामी पुढील पिढीमध्ये त्यांचे तेज बघायला मिळेल, असा विश्वासही श्री. फडणवीस यांनी व्यक्त केला.

प्रधानमंत्री नरेंद्र मोदी यांनी छत्रपती शिवाजी महाराज ही आपली प्रेरणा असल्याचे सांगितले आहे. त्यांच्या कार्याची प्रेरणा घेऊन काम करण्यात येत आहे. त्यामुळे रयतेने विश्वस्त म्हणून आम्हाला संधी दिली असून त्यांच्या कल्याणकरिता प्रयत्न करु, असे आश्वासन श्री. फडणवीस यांनी दिले.

माँ जिजाऊ यांच्या प्रेरणेने शिवाजी महाराजांनी समाजात हिंदवी स्वराज्याची स्थापना करण्याच्या मूलमंत्राचे रोपण केले. समाजातील अतिशय सामान्य व्यक्ती आणि अठरा पगड जातीला एकत्र करून, त्यामधील पुरुषत्व जागृत केले. मुगलासारख्या बलाढ्य शत्रूचा नि:पात केला. शिवरायांनी अन्यायाविरुद्ध संघर्ष करण्याची शिकवण दिली, असेही त्यांनी सांगितले.

किल्ल्याच्या संवर्धनासाठी निधी कमी पडून देणार नाही- उपमुख्यमंत्री अजित पवार

छत्रपती शिवाजी महाराज यांच्या कार्याचा इतिहास, आदर्श सर्वांच्या डोळ्यासमोर राहावा यासाठी राज्यातील विविध किल्ले संवर्धनाचे काम राज्य शासनाने हाती घेतले आहे. किल्ले शिवनेरीच्या संवर्धनासाठी ८३ कोटी रुपये खर्च करण्यात आले आहेत. किल्ल्याच्या संवर्धनासाठी राज्य शासन निधी कमी पडून देणार नाही, अशी ग्वाही उपमुख्यमंत्री श्री. पवार यांनी दिली.

छत्रपती शिवाजी महाराज यांची ३९४ वी जयंती सर्वत्र उत्साहात साजरी करीत आहोत. शिवाजी महाराजांनी ३५० वर्षांपूर्वी रायगड किल्यावर स्वतःचा राज्याभिषेक करून अखंड हिंदुस्थानसोबत युरोपातील राज्यसत्तांना अचंबित केले. हा शिवराज्याभिषेक सोहळा राज्यभरात विविध कार्यक्रमांनी साजरा करत आहोत. त्यांचा सर्वांना सोबत घेऊन चालण्याचा, एकतेचा विचार येत्या पिढीला कळण्याचा निर्धार या जयंतीनिमित्त करुया. सह्याद्रीच्या दऱ्या-खोऱ्यातील सर्व जातीधर्माच्या नागरिकांमध्ये गुलामगिरीच्या विरुद्ध झुंजण्याचा विचार त्याकाळात शिवरायांनी पेरला. परकीय सत्तेसमोर सार्वभौम स्वराज्याची स्थापन करत रयतेला आपले वाटावे असे राज्य, स्वराज्य त्यांनी स्थापन केले, याची प्रेरणा राज्य शासन घेऊन काम करीत आहे.

जून २०२० मध्ये निसर्ग चक्रीवादळाने हिरडा पिकाचे नुकसान झालेल्या जुन्नर आणि आंबेगाव तालुक्यातील शेतकऱ्यांना १५ कोटी रुपयांची नुकसानभरपाई देण्याबाबत उपमुख्यमंत्री श्री. पवार यांनी सूचना केली.

प्रारंभी मुख्यमंत्री, उपमुख्यमंत्री यांच्या उपस्थितीत शिवजन्मस्थानी पारंपरिक वेशातील महिलांनी शिवरायांची महती सांगणारा पाळणा गायला. राष्ट्रगीत तसेच ‘गर्जा महाराष्ट्र माझा’ या राज्यगीताची धून पोलीस बँड पथकाने वाजवून सलामी दिली. त्यानंतर पोलीस पथकाने बंदुकीच्या तीन फैरी झाडून छत्रपती शिवरायांना मानवंदना दिली. यावेळी जिल्हा परिषद शाळा मुथळने येथील विद्यार्थ्यांच्या बाल पथकाने छत्रपती शिवाजी महाराज यांच्या जीवनातील प्रसंग सुंदर पद्धतीने सादर केले.

त्यानंतर मुख्यमंत्री आणि उपमुख्यमंत्र्यांनी बालशिवाजी व जिजाऊंच्या पुतळ्यास पुष्पहार अर्पण केला आणि छत्रपती शिवाजी महाराजांच्या प्रतिमेची पालखी वाहिली.

कार्यक्रमात मान्यवरांच्या हस्ते किल्ले शिवनेरी विकास मंडळाच्या माध्यमातून देण्यात येणारे पुरस्कार प्रदान करण्यात आले. छत्रपती शिवाजी महाराज गौरव पुरस्कार विशेष पोलीस महानिरीक्षक डॉ. दिलीप भुजबळ यांना प्रदान करण्यात आला. शिवनेरी भूषण पुरस्कार कारगिल युद्धात विशेष कामगिरी बजावलेल्या निवृत्त ब्रिगेडियर अनिल काकडे आणि अंटार्क्टिका मोहिमेचे नेतृत्व केलेले डॉ. अरुण रामचंद्र साबळे यांना प्रदान करण्यात आला. विजय घोगरे यांनी प्रास्ताविक केले.

कार्यक्रमास प्रांताधिकारी गोविंद शिंदे, मराठा सेवा संघाचे जिल्हाध्यक्ष बाळासाहेब मुळे यांच्यासह शिवभक्त उपस्थित होते.

‘शिवाई देवराई‘ आणि वन उद्यानाचे लोकार्पण

मुख्यमंत्री एकनाथ शिंदे यांच्या हस्ते आणि उपमुख्यमंत्री देवेंद्र फडणवीस, उपमुख्यमंत्री तथा जिल्ह्याचे पालकमंत्री अजित पवार यांच्या उपस्थितीत किल्ले शिवनेरी येथे ‘शिवाई देवराई’ आणि वन उद्यानाचे लोकार्पण करण्यात आले.

शिवनेरी संवर्धन आणि विकास प्रकल्पांतर्गत वन विभागाच्यावतीने किल्ले शिवनेरीवर अडीच एकर क्षेत्रावर तीन वनोद्यान व स्वतंत्र ‘शिवाई देवराई’ विकसित करण्यात आली आहे. देवराईची संकल्पना सह्याद्री गिरीभ्रमण संस्थेची असून संस्थेच्या माध्यमातून जैन इरिगेशनच्या सामाजिक दायित्व निधीतून सूक्ष्म आणि ठिबक सिंचनाची सुविधा उपलब्ध करून देण्यात आली आहे.

पुणे–पुणे पोलिसांनी ड्रग्स तस्करांविरोधात मोठी कारवाई करत तिघांना अटक केली आणि त्यांच्याकडून तब्बल साडेतीन कोटी रूपयांचे ड्रग्स जप्त केले आहेत. आणखी काही पोत्यांची तपासणी करण्यात येत आहे जी पोती मिठाची असल्याचे सांगण्यात येते मात्र याबाबत तपास सुरु आहे पुणे पोलिसांच्या गुन्हे शाखेने ही कारवाई केली आहे. पोलिसांनी जवळपास साडेतीन कोटी रूपयांचे पावणे दोन किलो एमडी जप्त केले आहे. कार व तदनुषंगिक बाबींसह ४ कोटीचा ऐवज जप्त करण्यात आला आहे. या प्रकरणात आणखी काही लोकांचा समावेश असून एका परदेशी नागरिकाच्या शोधात पोलीस आहेत.

पोलीस आयुक्त यांनी अंमली पदार्थाची तस्करी करणारे गुन्हेगार यांचे समुळ उच्चाटन करण्यासाठी कठोर पाऊल उचलणेबाबत दिलेल्या सुचनांप्रमाणेअपर पोलीस आयुक्त सो गुन्हे पुणे व पोलीस उप आयुक्त गुन्हे पुणे शहर यांनी मार्गदर्शन करुन त्याप्रमाणे आदेश दिले होते.त्याप्रमाणे आज दिनांक १९/०२/२०२४ रोजी गुन्हे शाखा युनिट १ कडील वरिष्ठ पोलीसनिरीक्षक शब्बीर सय्यद, त्यांचेकडील अधिकारी व अंमलदार असे रात्रीचे वेळी हद्दीत गस्त घालीत असताना पोलीस अंमलदार विठ्ठल सांळुखे यांना त्यांच्या बातमीदारामार्फत बातमी मिळाली की, २७६, सोमवार पेठ, पुणे चे समोर एक पांढरे रंगाची इर्टीगा कार नं. एम एच. १२ यु.जे. ४०८१ यामध्ये ड्रायव्हींग सिटवर एक इसम बसलेला दिसला व त्याचे शेजारच्या सिटवर पोलीस अभिलेखावरील आरोपी नामे वैभव उर्फ पिंटया भारत माने रा. पुणे हा बसलेला दिसला. सदरचा आरोपी हा रेकॉर्डवरील असल्याने व त्याच्या हालचाली संशयास्पद असल्याचे बातमी प्राप्त झाली. त्याप्रमाणे युनिट-१ कडील अधिकारी व स्टाफने सदर ठिकाणी जावुन सदरची कार थांबवून अधिक चौकशी केली असता त्यांचे बोलणे अधिक संशयास्पद वाटल्याने त्यांची पंचा समक्ष झडती
घेतली असता त्यांचे कब्जात म्हणजे रेकॉर्डवरील आरोपी वैभव उर्फ पिटया भारत माने याचे कब्जात किं रु १,००,००,०००/- चा ५०० ग्रॅम इतके वजनाचा मेफेड्रॉन (एम.डी.) हा अंमली पदार्थ मिळून आल्याने रेकॉर्ड वरील आरोपी वैभव उर्फ पिंटया भारत माने व कार चालक नामे अजय आमरनाथ करोसिया वय ३५ वर्ष रा. पुणे यांना जागीच ताब्यात घेण्यात आले सदर दोन्ही आरोपींकडे कसुन चौकशी केली असता वैभव उर्फ पिटया भारत माने यास सदरची एम डी देणारा इसमाचे नाव हैदर शेख रा. विश्रांतवाडी, पुणे याने काही वेळा पुर्वी दिल्याचे सांगीतल्याने गुन्हे शाखेकडील पोलीस अधिकारी व अंमलदार त्यांच्या एकुण ५ टिम्स विश्रांतवाडी भागात विविध ठिकाणी रवाना केल्या असता हैदर नुर शेख, वय-४० वर्षे रा. विश्रांतवाडी, पुणे हा विश्रांतवाडी परिसरात मिळून आल्याने त्यास ताब्यात घेण्यात आले त्याची झडती घेतली असता त्याचे कब्जात १,००,००,००० /- किं रू क्रिस्टल पावडर स्वरुपातील ५०० ग्रॅम मेफेड्रॉन (एम.डी.) हा अंमली पदार्थ मिळुन आला. त्याच प्रमाणे त्याचे झडतीमध्ये एक चावी

मिळून आली त्याबाबत त्याचेकडे अधिक तपास करता सदरची चावी ही त्याचे विश्रांतवाडी, परिसरात असलेल्या एक पत्र्याचे गोडाऊनची आहे असे सांगितल्याने सदर ठिकाणी गोडाऊनची पहाणी केली असता त्यामध्ये १,५०,००,०००/- रू किं चे ७५० ग्रॅम वजनाचे एमडी गोडाऊनमध्ये मिळून आले त्याच प्रमाणे सदर ठिकाणी २०० ते ३०० संशयास्पद पोती मिळून आली असून त्यामध्ये मीठ असल्याचे आढळून आले आहे. परंतु सर्व पोत्यांमध्ये एम.डी. आहे किंवा नाही याबाबत गुन्हे शाखेचे अधिकारी व कर्मचारी तपासणी करीत आहेत.
हैदर नुर शेख याचेकडे नमुद मेफेड्रॉन अंमली पदार्थ कोणाकडुन आणला ? याबाबत विचारणा केली असता, त्याने सदरचा एमडी अंमली पदार्थ हा परदेशी नागरीक यांनी मला विक्रीकरिता दिला असल्याचे सांगितले.
परदेशी नागरीक यांचा शोधा करीता गुन्हे शाखेकडील टिम रवाना केल्या आहेत.
यातील ३ अटक आरोपीपैकी १. वैभग ऊर्फ पिटया माने २. हैदर शेख हे पुणे पोलीस अभिलेखावरील रेकॉर्डवरील गुन्हेगार आहेत.
सदरची कामगिरी पोलीस आयुक्त, पुणे शहर श्री अमितेश कुमार, सह पोलीस आयुक्त, पुणे शहर प्रविण पवार, अपर पोलीस आयुक्त, गुन्हे, पुणे श्री शैलेश बलकवडे पोलीस उप- आयुक्त, गुन्हे, पुणे अमोल झेंडे मा. सहा. पोलीस आयुक्त, गुन्हे-१, पुणे सुनिल तांबे, सहा. पोलीस आयुक्त, गुन्हे २, पुणे सतीश गोवेकर यांच्या मार्गदर्शनाखाली वरिष्ठ पोलीस निरीक्षक शब्बीर सय्यद युनिट ०१, अजय वाघमारे, राजेंद्र लांडगे, अनिता हिवरकर, विनायक गायकवाड, सपोनि बाबर, गायकवाड, पोलीस उप निरीक्षक रमेश तापकीर, शेळके, गोरे, कोळेकर, मगदुम, देव, नाईक, जाधव, शिंदे, मोकाशी, पोलीस अंमलदार विठ्ठल सांळुखे, अभिनव लडकत, दता सोनावणे, निलेश साबळे, राहुल मखरे, अनिकेत बाबर, शशीकात दरेकर, शुभम देसाई, शंकर कुंभार, आय्याज दड्डीकर, सुजित वाडेकर, संतोष देशपांडे, निखिल जाधव यांनी केली आहे.

पुणे दि.१८: संरक्षण उत्पादन क्षेत्रात महत्त्वपूर्ण योगदान देण्यासाठी राज्यातील सूक्ष्म, लघु आणि मध्यम उद्योगांना सक्षम करणाऱ्या देशातील सर्वात मोठ्या आणि महाराष्ट्रातील अशा प्रकारच्या पहिल्या ‘महाराष्ट्र एमएसएमई डिफेन्स एक्स्पो’ ला महाविद्यालयीन विद्यार्थी, उद्योजक आणि नागरिकांनी भेट द्यावी, असे आवाहन राज्याचे उद्योगमंत्री उदय सामंत यांनी केले.

इंटरनॅशनल एक्झिबिशन ॲण्‍ड कन्व्हेनशन सेंटर, मोशी येथे ‘महाराष्ट्र एमएसएमई डिफेन्स एक्स्पो’च्या पूर्वतयारीची श्री. सामंत यांनी पहाणी केली. यावेळी आयोजित आढावा बैठकीत ते बोलत होते. बैठकीस विभागीय आयुक्त चंद्रकांत पुलकुंडवार, पुणे महानगरपालिका आयुक्त विक्रम कुमार, पिंपरी चिंचवड महानगरपालिका आयुक्त शेखर सिंह, पीएमआरडीएचे आयुक्त राहुल महिवाल, गणेश निबे, किशोर धारिया, जिल्हा ग्रामीण विकास यंत्रणेच्या प्रकल्प संचालक शालिनी कडू,महाराष्ट्र राज्य औद्योगिक विकास महामंडळाचे मुख्य अभियंता प्रकाश चव्हाण, नितीन वानखेडे आदी उपस्थित होते.

श्री. सामंत म्हणाले, मोशी येथील आंतरराष्ट्रीय प्रदर्शन आणि कन्व्हेन्शन सेंटर येथे २४ फेब्रुवारी पासून सुरू होणाऱ्या या प्रदर्शनात भारतीय नौसेना, लष्कर आणि वायुसेना या तिन्ही सुरक्षा दलांचा महत्वाचा सहभाग आहे. प्रदर्शनातील विविध सत्रात भारताची संरक्षण सिद्धता, विविध शस्त्रास्त्रांची निर्मिती, संरक्षण क्षेत्रातील संधी याविषयी विद्यार्थ्यांना उपयुक्त माहिती मिळणार आहे. शालेय विद्यार्थ्यांना शस्त्रास्त्रांविषयी कुतूहल असते. त्यांना आधुनिक शास्त्रासोबत संरक्षण साहित्य जवळून पाहण्याची ही संधी आहे.

संरक्षण अभियांत्रिकी उद्योगांनाही प्रदर्शनात सहभागी करून घेण्यात येणार आहे. या क्षेत्राशी संबंधित स्टार्ट अप्स आणि इतर उद्योगांना उद्योग विस्तार आणि या क्षेत्रातील संधीविषयी प्रदर्शनातून माहिती मिळणार असल्याने उद्योग क्षेत्राशी निगडित प्रतिनिधींनी प्रदर्शनात सहभागी व्हावे, असे आवाहनही श्री.सामंत यांनी केले.

प्रदर्शनात सहभागी होऊ इच्छिणाऱ्या एमएसएमईना निःशुल्क दालन उपलब्ध करून द्यावे. सर्व उद्योग संघटनांच्या बैठका घेऊन त्यांना आमंत्रित करावे, असे निर्देशही त्यांनी दिले.

प्रदर्शनातील चार दालनांना शिवनेरी, सिंधुदुर्ग, रायगड आणि पन्हाळा असे नाव देण्यात येणार आहे. संपूर्ण परिसरात छत्रपती शिवाजी महाराजांच्या गडकिल्ल्यांच्या संरक्षण सिद्धतेची संकल्पना प्रदर्शित करण्यात येणार आहे. अभियांत्रिकी महाविद्यालयातील १ लाखाहून अधिक विद्यार्थी या प्रदर्शनाला भेट देणार आहे. त्यांना १ हजार प्रकारचे तंत्रज्ञान पाहण्यासोबत भारतीय सुरक्षा दलाच्या वरीष्ठ अधिकाऱ्यांचे मार्गदर्शन मिळणार आहे, अशी माहिती यावेळी देण्यात आली.

बैठकीस विविध विभागांचे अधिकारी उपस्थित होते.
००००

जिल्हा टेबल टेनिस संघटनेतर्फे विविध खेळाडूंचा गौरव
ज्येष्ठ खेळाडूंची मांदियाळी
पुणे – भारताच्या युवा खेळाडूंनी जागतिक टेबल टेनिस स्पर्धेत चीनच्या खेळाडूंवर मात करण्याची ऐतिहासिक कामगिरी केली आहे. चीनच्या खेळाडूंना पराभूत करण्याची क्षमता पुण्याच्याही खेळाडूंमध्ये आहे आणि ते लवकरच हे ध्येय साध्य करतील असा आत्मविश्वास पुणे जिल्हा टेबल टेनिस संघटनेचे अध्यक्ष राजीव बोडस यांनी व्यक्त केला.

जिल्हा टेबल टेनिस संघटनेतर्फे राष्ट्रीय व आंतरराष्ट्रीय स्तरावर चमक दाखवणाऱ्या पुण्याच्या खेळाडूंचा तसेच माजी राष्ट्रीय विजेत्या खेळाडूंचा सत्कार श्री. राजीव बोडस व बालुफ ॲटोमेशन कंपनीचे व्यवस्थापकीय संचालक उदय भालचंद्र यांच्या हस्ते करण्यात आला. यावेळी टेबल टेनिस संघटक श्रीकांत अंतुरकर, श्रीराम कोनकर, प्रकाश तुळपुळे, स्मिता बोडस आदी उपस्थित होते.‌ अनेक ज्येष्ठ खेळाडूंच्या उपस्थितीमुळे हा समारंभ म्हणजे जणू काही ज्येष्ठ खेळाडूंची मांदियाळीच ठरला.

श्री. बोडस यांनी पुढे सांगितले,” पुणे जिल्हा टेबल टेनिस संघटनेच्या वाटचालीमध्ये आणि खेळाच्या प्रगतीमध्ये माजी खेळाडूंच्या प्रयत्नांचा मोठा वाटा आहे. पूर्वी मुंबईच्या खेळाडूंना पराभूत करणे ही अवघड कामगिरी मानली जात असे. आमच्या खेळाडूंनी त्यावेळी प्रयत्न करून हे यश संपादन केले. आता तर पुण्याचे अनेक खेळाडू आंतरराष्ट्रीय स्तरावर चमक दाखवित आहेत ही अतिशय अभिमानास्पद कामगिरी आहे.

उदय भालचंद्र यांनी सांगितले की, खेळामुळे आत्मविश्वास निर्माण होतो आणि कोणत्याही प्रसंगांना धैर्याने सामोरे जाण्याची वृत्ती निर्माण होते. त्याचा फायदा एरवीदेखील जीवनामध्ये अनेक क्षेत्रात होऊ शकतो हा अनुभव मी स्वतः घेतला आहे.‌ आंतरराष्ट्रीय स्तरावर उच्च यश मिळवण्यासाठी खेळाडूंनी शारीरिक व मानसिक तंदुरुस्ती, पोषक आहार याकडे अधिक लक्ष केंद्रित करण्याची गरज आहे.

खेळाडूंच्या सत्कार प्रसंगी जिल्हा संघटनेतर्फे आंतरराष्ट्रीय पदक विजेती तसेच १९ वर्षाखालील गटात राष्ट्रीय विजेतेपद मिळवणारी पृथा वर्टीकर हिला ५० हजार रुपये रोख बक्षीस तर आंतरराष्ट्रीय पदक विजेती पॅरा खेळाडू पृथ्वी बर्वे व राष्ट्रीय कनिष्ठ विजेती नैशा रेवसकर यांचा प्रत्येकी २० हजार रुपये तर राष्ट्रीय कास्य पदक विजेता नील मुळ्ये याचा पंधरा हजार रुपये देऊन सत्कार करण्यात आला. बालुफ कंपनीतर्फेही या खेळाडूंना तसेच खेळाडूंचे पालक व प्रशिक्षकांचा भेट वस्तु देऊन सत्कार करण्यात आला.‌

माजी राष्ट्रीय विजेते खेळाडू सुनील बाब्रस, सुजाता बाब्रस, आश्लेषा बोडस, अनिकेत कोपरकर, पूजा सहस्त्रबुद्धे-कोपरकर, उपेंद्र मुळ्ये यांचाही गौरव करण्यात आला.
या समारंभास ज्येष्ठ संघटक डॉक्टर सतीश ठिगळे, अरविंद नातू, अजेय तुळपुळे, डॉक्टर मनोज उचगांवकर, अजय सिधये, सुरेंद्र देशपांडे, मनीषा बोडस, रोहित चौधरी, शुभंकर रेणावीकर, अविनाश जोशी इत्यादींचा सत्कार करण्यात आला.

पृथा वर्टीकर हिला एक लाख रुपयांचे बक्षीस
आंतरराष्ट्रीय स्तरावर अर्धा डझन पेक्षा जास्त पदके जिंकणारी पुण्याची खेळाडू पृथा वर्टीकर हिला येथील व्यावसायिक मोहिनीदेवी भिवलाल बिश्नोई यांच्यातर्फे एक लाख ११ हजार एकशे अकरा रुपये देऊन सत्कार करण्यात आला. रायझिंग स्टार क्लब तर्फे तिला वीस हजार रुपयांचे बक्षीस देण्यात आले.‌

आशिष बोडस यांनी स्वागत केले तर प्रकाश तुळपुळे यांनी आभार मानले.‌

पुणे, दि.१८: पर्यटन संचालनालय आयोजित ‘हिंदवी स्वराज्य महोत्सव २०२४’ अंतर्गत कृषी विभाग, जुन्नर पर्यटन विकास संस्था, जुन्नर तालुका द्राक्ष उत्पादक संघ आणि कृषी विज्ञान केंद्र नारायणगाव यांच्या संयुक्त विद्यमाने जुन्नर येथे ‘द्राक्ष महोत्सव २०२४’ चे कृषी विज्ञान केंद्राचे अध्यक्ष कृषीरत्न अनिल मेहेर यांच्या उद्घाटन करण्यात आले.

यावेळी पर्यटन संचालनालय पुणे विभागाच्या उपसंचालिका शमा पवार, ग्रामोन्नती मंडळ नारायणगावचे अध्यक्ष प्रकाश पाटे, कृषी विज्ञान केंद्र नारायणगावचे प्रमुख डॉ. प्रशांत शेटे, कृषी तंत्रनिकेतनचे प्राचार्य राधाकृष्ण गायकवाड आदी उपस्थित होते.

द्राक्ष किंग २०२४ स्पर्धेचे आयोजन
पर्यटकांसाठी द्राक्षबागा भेटी, द्राक्ष, बेदाणे आणि द्राक्षज्यूस विक्री तसेच द्राक्ष उत्पादकांना प्रोत्साहन मिळावे यासाठी द्राक्ष पीक स्पर्धेचे आयोजन करण्यात आले आहे. प्रथम क्रमांक द्राक्षकिंग आणि उत्तेजनार्थ चार पारितोषिके देण्यात येणार आहेत. द्राक्षकिंग २१ हजार रुपये रोख, सन्मानचिन्ह व सपत्नीक सन्मान तसेच चार उतेजनार्थ शेतकऱ्यांना प्रत्येकी ११ हजार रुपये, सन्मानचिन्ह व सपत्नीक सन्मान बक्षिसाचे स्वरूप आहे, अशी माहिती महाराष्ट्र राज्य द्राक्ष बागायतदार संघाचे संचालक कृषीभूषण जितेंद्र बिडवई यांनी दिली.

गेल्या सहा वर्षांपासून हा द्राक्ष महोत्सव जुन्नर तालुक्यात होत असून आता हा ‘हिंदवी स्वराज्य महोत्सवाचा’ भाग झाला आहे. तालुक्यात निर्यातक्षम द्राक्ष उत्पादन होत असून यामुळे तालुक्याचे ग्रीन झोन म्हणून वेगळे महत्त्व प्रस्थापित होत आहे. हा महोत्सव १९ फेब्रुवारी पर्यंत सुरु राहणार असून याचा लाभ घेण्याचे आवाहन करण्यात आले आहे.
००००

पुणे : देशाच्या ग्रामीण व आदिवासी भागातील विद्यार्थ्यांनी व नागरिकांनी आजवर राष्ट्रनिर्मानामध्ये महत्वाची भूमिका पार पाडली असून ग्रामीण , आदिवासी भागाच्या विकासासाठी व शिक्षीत, प्रगतशील व सशक्त भारत राष्ट्रनिर्मितीसाठी या विद्यार्थ्यांचे योगदान खूप महत्वाचे असल्याचे मत राष्ट्र सेविका समितीच्या प्रमुख संचालिका श्रीमती व्ही शांताक्का यांनी व्यक्त केले.

निरगुडे (खानगाव), ता जुन्नर येथे सह्यसखा फौंडेशन च्या वतीने आयोजित करण्यात आलेल्या संशोधन आणि इंनोवेशन प्रयोगशाळा, गुरुजनांचा सन्मान आणि मिशन सह्याद्री प्रकल्पाच्या उद्घाटनप्रसंगी श्रीमती व्ही शांताक्का या प्रमुख उद्घाटक म्हणून बोलत होत्या. प्रमुख पाहुण्या म्हणून राष्ट्र सेविका समितीच्या माजी प्रमुख संचालिका श्रीमती प्रमिलाताई मेढे व राष्ट्र सेविका समितीच्या प्रमुख कार्यवाहिका श्रीमती चित्राताई जोशी यांची प्रमुख उपस्थिती होती तर अध्यक्षस्थानी सह्यसखा फौंडेशनच्या विश्वस्त श्रीमती सुषमा इंगळे या होत्या.भारतासारख्या तरुणांच्या देशात राष्ट्रनिर्मानामध्ये हातभार लावणाऱ्या तरुणांची संख्या वाढणे आवशयक असून सह्यसखाचे संस्थापक अध्यक्ष अमित इंगळे यांच्यासारखे तरुण अभियात्रीकीचे शिक्षण घेऊन परदेशातील ऐशोआरामात चाललेले आयुष्य थांबवून राष्ट्रप्रेमापोटी , राष्ट्रसेवेसाठी मायदेशी परतून जुन्नरसारख्या आदिवासी भागामध्ये येऊन या परिसराचा कायापालट करण्यासाठी करीत असलेल्या कार्याची दखल घेत असे अनेक समाजहिताचे उपक्रम राबविण्यासाठी जनतेने सहभागी व्हावे असे आवाहन राष्ट्र सेविका समितीच्या माजी प्रमुख संचालिका श्रीमती प्रमिलाताई मेढे यांनी केले.यंदाचे वर्ष हे युगपुरुष, अखंड हिंदुस्थानचे आराध्य दैवत छत्रपती श्री शिवाजी महाराजांच्या राज्याभिषेकाचे तीनशे पन्नासावे वर्ष असून त्यानिमित्ताने जुन्नर येथे सह्यसखाच्या माध्यमातून शुभारंभ करण्यात आलेल्या सह्याद्री मिशन सह राबविण्यात येत असलेले इतर सर्व समाजोपयोगी उपक्रम हे स्तुत्य असून जुन्नर परिसरातील विद्यार्थी, शाळा व आदिवासी लोकांच्या सर्वांगीण विकासासाठी सह्यसखा अगदी सख्यासारखा जनतेच्या पाठीसाठी उभे राहील अशी अपेक्षा राष्ट्र सेविका समितीच्या प्रमुख कार्यवाहिका श्रीमती चित्राताई जोशी यांनी व्यक्त केली.

यावेळी या तिन्ही मान्यवरांना सह्यसखाच्या वतीने त्यांच्या आयुष्यभराच्या राष्ट्रनिर्मितीमधील त्याग व योगदानासाठी विशेष मानपत्र देऊन सन्मानित करण्यात आले तसेच तिन्ही मान्यवरांच्या हस्ते प्रा अनिल पौल, प्रा चेतन दिवाण, प्रा महेश ठाकूर, प्रा प्रवीण पारगावकर, प्रा राजेश पाटील, प्रा आनंद गोरे, प्रा उज्वला कवडे, तसेच संत तुकाराम विद्यालय निरगुडेचे शिक्षकवृंद यां गुरुजनांचा सह्यसखाच्या योगदानाबद्दल विशेष सन्मान करण्यात आला.

संत तुकाराम विद्यालय निरगुडेमध्ये उद्गाटन करण्यात आलेल्या संशोधन व इनोव्हेशन प्रयोगशाळेची पाहणी श्रीमती प्रमिलाताई मेढे, श्रीमती व्ही शांताक्का व श्रीमती चित्राताई जोशी यांच्याकडून करण्यात आली व त्यांनी या उपक्रमाचे विशेष कौतुक केले.

कार्यक्रमाचे प्रास्ताविक सह्यसखा फौंडेशन चे संस्थापक अध्यक्ष अमित इंगळे यांनी केले. सूत्रसंचालन प्रसाद कात्रे यांनी केले तर आभार सौ प्रीती इंगळे यांनी मानले.

कार्यक्रमास निरगुडे गावचे ग्रामस्थ, संत तुकाराम विद्यालयाचे सर्व शिक्षक, शिक्षकेतर कर्मचारी , विद्यार्थी तसेच सह्यसखा फौंडेशन चे सर्व विश्वस्त, स्वयंसेवक आदी मोठ्या प्रमाणात उपस्थित होते.

मोहोळ – मुळीक भाजपकडून असतील तर..सहज बाजी मारणार कॉंग्रेस..

पुणे-कसब्याच्या विधानसभेचा निष्कर्ष लोकसभेला लावता येणार नाही असे सांगत,मोहोळ -मुळीक भाजपकडून असतील तर..सहज बाजी मारणार कॉंग्रेस अशाही पैंजा लावत कॉंग्रेस मधील लोकसभा इच्छुकांमधील स्पर्धा आता तीव्र होत असून यात अभय छाजेड,मोहन जोशी आणि आबा बागुल यांची नावे आघाडीवर आहेत.दिल्लीतील कॉंग्रेसच्या सूत्रांनी एका बड्या नेत्याच्या पुत्राच्या नावाचा हट्ट त्यांच्याच सूचनेवरून सोडल्यावर आता दिल्ली कॉंग्रेस वर्तुळात पुणे लोकसभेचा कानोसा घेतला असता पुण्यातून बहुजन समाजाचा उमेदवार द्यावा अशी सूचना होती असे सांगण्यात आले. मात्र याबाबत पुण्यातील एका माजी मंत्र्याचे नाव येताच ते स्वतःच इच्छुक नसल्याचे सांगण्यात आले.एकूण २० जणांनी उमेदवारीसाठी अर्ज केलेले असताना आता त्यातील अवघी ४ नावे उरलीत आणि त्यातील देखील एकाने असमर्थता दर्शविली आहे.

काँग्रेसकडून कसब्याचे आमदार रवींद्र धंगेकर यांनी लोकसभेसाठी जोरदार तयारी सुरु केली आहे.मात्र त्यांनी कसबाच व्यवस्थित सांभाळावा असे दिल्लीतील सूत्रांनी सांगितले कि वरिष्ठ नेत्यांची अशी धारणा आहे. माजी आमदार मोहन जोशी, शहराध्यक्ष अरविंद शिंदे, माजी नगरसेवक अभय छाजेड हे उमेदवार म्हणून प्रमुख दावेदार आहेत. लोकसभेच्या निवडणुकीचा अनुभव असलेले माजी आमदार मोहन जोशी यांना आहे यापूर्वी त्यांनी १९९९ मध्ये आणि २०१९ मध्ये लोकसभेची निवडणूक लढविली आहे.

भाजप कडून ब्राह्मणेतर उमेदवार दिली जाण्याची शक्यता आहे. अशावेळी अत्यंत योग्य उमेदवार देण्यासाठी पक्ष नेतृत्वाची कसरत होणार आहे. सर्व गटांना एकत्र घेऊन जाणारा उमेदवार हवा आहे.दलित समाजाचे माजी मंत्री असलेले पुण्यातून लोकसभा विजयी होऊ शकतात असा अहवाल असताना त्यांचाच नकार आल्याने मराठा समजाचा पर्याय देखील ठेवला गेला मात्र तोही बाजूला करून आता अभय छाजेड आणि मोहन जोशी यांच्यात आणि आबा बागुल यांच्यात रस्सीखेच होईल असे दिल्लीतील कॉंग्रेस जणांचे म्हणणे आहे. बागुल यांनी गेली ३५ वर्षे नगरसेवक पदावर काम केल्याने त्यांची प्रशासन आणि जनतेला चांगली ओळख निर्माण झालेली आहे. छाजेड यांच्यामागे केवळ पुणेकरच नव्हे तर भाजपकडे वळणारा वर्ग देखील येईल असा दावा केला जातो आहे. मोहन जोशी निष्ठावंत म्हणून परिचित आहेतच . बारामती बरोबर पुण्यात शरद पवार यांच्या समवेत गांधी घराण्यातील नेते प्रचारासाठी येतील असाही त्यांना विश्वास आहे

मोहोळ -मुळीक भाजपकडून असतील तर..सहज बाजी मारणार कॉंग्रेस

पुणे महापालिकेतील सत्ताकारकीर्द स्थायी समिती अध्यक्ष आणि महापौर पदावरून केलेली शायनिंग हीच मोहोळ यांचा सहज पराभव करेल आणि मुळीक यांच्याबाबतही तसेच घडेल असा कॉंग्रेस जणांचा दावा आहे.भाजपमधून या दोघांमधून एकाला उमेदवारी मिळेल असे माध्यमातून वृत्त येत असते असे झाले तर कॉंग्रेसचा विजय अगदी अलगद होईलअसा कॉंग्रेस जणांचा दावा आहे.

श्री महालक्ष्मी मंदिर सारसबाग तर्फे आयोजन ;  तीन दिवसीय उत्सवाचे आयोजन ; शालेय गरजू विद्यार्थ्यांना शिष्यवृत्ती प्रदान कार्यक्रम      

पुणे : श्री बन्सीलाल रामनाथ अग्रवाल धार्मिक व सांस्कृतिक ट्रस्ट, श्री महालक्ष्मी मंदिर सारसबागच्या ४० व्या वर्धापनदिनानिमित्त ब्रह्मोत्सवाचे आयोजन करण्यात आले आहे. दिनांक २१ ते २३ फेब्रुवारी दरम्यान मंदिरात हा उत्सव होणार असून त्यामध्ये धार्मिक, सांस्कृतिक व सामाजिक उपक्रमांचे आयोजन करण्यात आले आहे. यंदा पुण्यातील विविध शाळांमधील गरजू विद्यार्थ्यांना शिष्यवृत्ती देखील देण्यात येणार आहे, अशी माहिती ट्रस्टच्या प्रमुख विश्वस्त अमिता राजकुमार अग्रवाल यांनी दिली. राजस्थान डिडवाना येथील अनंत श्री विभुषित जगतगुरु रामानुचार्य झालरिया पीठाधीपती पूज्य श्री श्री १००८ स्वामीजी घनश्यामाचार्यजी महाराज यांच्या उपस्थितीत विविध धार्मिक व सांस्कृतिक कार्यक्रम होणार आहेत. धार्मिक कार्यक्रमामध्ये होम-हवन, महाअभिषेक, अर्चना, पालखी सोहळा व फुलांची होळी तसेच सांस्कृतिक आणि सामाजिक कार्यक्रमांमध्ये शालेय विद्यार्थी मदत व उत्सव मूर्तीची धान्यतुला करुन ते धान्य अनाथ मुलांच्या संस्थेस वाटप अशा उपक्रमांचा समावेश आहे. ट्रस्टचे प्रमुख संस्थापक विश्वस्त राजकुमार अग्रवाल म्हणाले, उत्सवाच्या पहिल्या दिवशी बुधवार,दिनांक २१ फेब्रुवारी रोजी सायंकाळी ५ वाजता मंदिरात गरुड स्थापना, कलश स्थापना व यज्ञ स्थापना होणार आहे. गुरुवार, दि. २२ फेब्रुवारी रोजी सकाळी ९.३० वाजता १०८ कलश अभिषेक होईल. त्यानंतर रात्री ८ वाजता श्री महालक्ष्मी, श्री महासरस्वती, श्री महाकाली व श्री विष्णू या उत्सवमूर्तींची धान्य व पुस्तकतुला होणार असून हे साहित्य गरजूंना देण्यात येणार आहे. रात्री ८.३० वाजता सुवर्ण कमल आणि रजत कमल अर्चना म्हणजेच उत्सवमूर्तींना सोन्याची व चांदीची फुले अर्पण करण्यात येतील. उत्सवाच्या शेवटच्या दिवशी शुक्रवार, दिनांक २३ फेब्रुवारी रोजी सकाळी ९.३० वाजता केशर दूध अभिषेक, सकाळी ११.३० वाजता विविध शाळांतील गरजू विद्यार्थ्यांना शिष्यवृत्ती प्रदान कार्यक्रम व सायंकाळी ७ वाजता पालखी सोहळा आयोजित करण्यात आला आहे. देवीच्या उत्सवमूर्तींची पालखी प्रदक्षिणा मंदिर परिसरात होणार आहे. तर, सायंकाळी ७.३० वाजता पुष्पउत्सव म्हणजेच फुलांची होळी होणार आहे. सर्व कार्यक्रमांमध्ये पुणेकरांनी मोठया संख्येने सहभागी व्हावे, असे आवाहन त्यांनी केले आहे.

आरटीई कायद्यातील बदलाने वंचित दुर्बलांच्या शिक्षण हक्काला बाधा: आप

पुणे-राज्य शासनाने शिक्षणात कायद्यात सुधारणा करून ‘खाजगी शाळांच्या परिसरात जर सरकारी अथवा अनुदानित शाळा असल्यास त्यांनी 25 टक्के राखीव मोफत प्रवेश करण्याची गरज नाही’ असा आदेश काढला आहे. या आदेशाला विरोध करण्यासाठी आम आदमी पार्टी तसेच विविध पालक संघटना आणि पालक यांनी रविवारी पुण्यात बालगंधर्व रंगमंदिर चौकामध्ये तीव्र निदर्शने केली.

या नव्या बदलामुळे गरीब मुलांना कुठल्याही खाजगी इंग्रजी शाळांमध्ये प्रवेश मिळण्याची शक्यता आता पूर्णपणे दुरावली आहे. या बदलामुळे वंचित आणि दुर्बल घटतातील मुले यांच्यासाठी सरकारी शाळा आणि श्रीमंतांसाठी खाजगी इंग्रजी शाळा अशी विभागणी होणार असून या पद्धतीमुळे शिक्षणातील सामाजिकीकरणाच्या उद्देशाला हरताळ फासला जाईल असा आरोप करण्यात आला. आर्थिक, सामजिक स्तरामुळे येणाऱ्या अडचणी दूर करत खाजगी शाळांमध्ये वंचित दुर्बल घटकासाठी 25% राखीव जागा ठेवणे हेच न्यायपूर्ण आहे. त्यामुळे सरकारने केलेली दुरुस्ती ही न्यायालयाच्या निर्णयाचा अवमान करणारी आहे असा आरोप आप प्रवक्ते मुकुंद किर्दत यांनी केला.

नवीन शिक्षण धोरणात पूर्व प्राथमिक शाळेपासूनच दहावीपर्यंत शिक्षण हे दर्जेदार आणि सर्वांना परवडणारे असावे व त्याची जबाबदारी सरकारवर असेल असे म्हटले आहे. त्यामुळे सरकारने सर्वप्रथम अनुदानित आणि सरकारी शाळांमध्ये इंग्रजीची सोय तसेच त्याचा दर्जा सुधारणे यावर लक्ष द्यायला हवे. असर , क्राय तसेच इतर संस्थांच्या सर्वे मधून सरकारी शाळांची दयनीय स्थिती उघड झालेली आहे, असे यावेळेस शहर अध्यक्ष सुदर्शन जगदाळे यांनी संगितले.

खाजगी शाळांची प्रतिपूर्ती रक्कम वेळेत द्यायला हवी, त्यात उशीर झाल्यास खाजगी संस्थांना व्याज द्यायला हवे व कागदपत्रांच्या पूर्ततेसाठी योग्य ती काळजी सरकारने घ्यायला हवी, केंद्र सरकारकडून आलेला निधी इतरत्र वापरू नये अशी मागणी यावेळेस करण्यात आली. इतर राज्यांना जे जमते ते महाराष्ट्रात फुले शाहू आंबेडकरांचा वारसा सांगणाऱ्या सरकारला का जमत नाही असा सवाल पालक आघाडी च्या ललिता गायकवाड यांनी केला.

सरकारने हा बदल करणारा आदेश मागे घ्यावा अन्यथा अधिक तीव्र आंदोलन पालक करतील असा इशारा यावेळी देण्यात आला. या आंदोलनात आप राज्य प्रवक्ते मुकुंद किर्दत, शहराध्यक्ष सुदर्शन जगदाळे, पालक आघाडी अध्यक्ष ललिता गायकवाड, सुरेखा भोसले, आरती करंजावणे, अमोल काळे, संतोष काळे, अविनाश केंदळे, श्रीकांत भिसे, चंद्रकांत गायकवाड, शिवाजी डोलारे, आसिफ मोमीन, सुनील सौदी, विकास गोलांडे, गिरीश नाईक, विकास चव्हाण, महेंद्र जाधव, संदीप सूर्यवंशी, प्रीतम कोंढाळकर, गोपी जोशी, विकास लोंढे, बिपिन अहिवळे, साहिल परदेशी, उमेश बोदले, अभिजीत वाघमारे, संदीप खरात, शिवराम ठोंबरे, उमेश बागडे, गुणाजी मोरे, राहुल तिवारी, रिजवान शेख, किरण कद्रे, अर्जुन साकोरे, अभिजीत मोरे, विक्रम गायकवाड, सोमनाथ गोडांबे, प्रदीप माने, शंकर थोरात, ज्ञानेश्वर गायकवाड, सुनील भोसले, उमेश दीक्षित, कुमार धोंगडे, हिना अन्सारी, समीना शेख, मनोज शेट्टी, किरण कांबळे, शमीम बागवान, मुमताज शेख, श्रद्धा शेट्टी, रेधान बागवान, अमित मस्के, मयूर कांबळे, निलेश वांजळे, संजय कटारनवरे, एम अली सईद, संजय रणधीर,अविनाश भाकरे, क्षमा गायकवाड, ॲनी अनिश, शितल कांडेलकर, स्नेहा लावंड, मंजुनाथ मनोरे, अक्षय शिंदे, सतीश यादव, प्रभाकर कोंढाळकर,संदीप धाडगे, ऋषिकेश मारणे, गणेश थरकुडे, मोहसीन अन्सारी इत्यादी पालक व कार्यकर्ते सहभागी झाले होते.