ॲड. निलेश निकम यांच्या भावुक अनुभवाने उपस्थितांचे डोळे पाणावले

पुणे-

बोपोडी येथील डॉ बाबासाहेब आंबेडकर चौक येथे आज स्वर्गीय अजित पवार यांच्या दुःखद निधनानिमित्त सर्वपक्षीय शोकसभेचे आयोजन करण्यात आले होते.या शोकसभेत विविध राजकीय पक्षांचे पदाधिकारी, सामाजिक कार्यकर्ते, धार्मिक प्रतिनिधी तसेच मोठ्या संख्येने नागरिक उपस्थित होते. हिंदू, मुस्लिम, शीख, बौद्ध, ख्रिश्चन समाजातील लोक एकत्र येत अजित पवार यांना श्रद्धांजली अर्पण करताना दिसून आले.

कार्यक्रमास प्रामुख्याने ज्येष्ठ कायदेतज्ज्ञ ॲड. एस. के. जैन सर, राष्ट्रवादी काँग्रेसचे गटनेते ॲड. निलेश निकम, नगरसेवक परशुराम वाडेकर, राष्ट्रवादी काँग्रेस (शरदचंद्र पवार) पक्षाचे अध्यक्ष श्रीकांत पाटील, माजी नगरसेवक आनंद छाजेड, माजी नागसेवक प्रकाश ढोरे, माजी नगरसेवक कैलास गायकवाड, माजी नगरसेवक नंदलाल धीवर, ज्ञानेश्वर मुरकुटे (माजी अध्यक्ष पीएमटी), राजेंद्र भूतडा , ॲड. रमेश पवळे, विनोद रणपिसे, अनिल भिसे, विशाल जाधव,अनवर शेख उपस्थित होते.

तसेच करिम शेख, अमित जावीर, विजय जाधव, शशिकांत पांडुळे, प्रशांत टेके, इंद्रजित भालेराव, रविंद्र गायकवाड, पोपट खंडागळे, दत्तात्रय सूर्यवंशी, दादासाहेब रणपिसे, रोहित भिसे, केतन गायकवाड, गणेश सारवान, विकास कांबळे, निलेश मोरे, अजित थेरे, आदित्य ओव्हाळ, कुशल घागट, विठ्ठल आरुडे यांच्यासह अनेक मान्यवर उपस्थित होते.

याशिवाय अशोक गायकवाड, जीवन घोंगडे, सुरेश ससाणे, काका लगड, भरत शेळके, राजू सिंग, राजू पिल्लं, कुणाल जाधव, रोहित परदेशी, शैलेंद्र पवार, विजय ढोणे, शिवाजी आंग्रे, जय चव्हाण, संदीप भिसे, अमोल जाधव, निलेश रूपंटक्के, मयुरेश गायकवाड, बाबा तांबोळी, अनिकेत भिसे, चेतन भुतडा, अकील मोगल यांनीही उपस्थिती लावली.

महिलांमध्ये मनिषा ओव्हाळ, अंजली दिघे, ज्योती परदेशी, सुंदर ओव्हाळ, रेश्मा कांबळे, अख्तरी शेख, भाग्यश्री गाढवे, ज्योती भिसे, शेंवता नाटेकर, दिलशाद अत्तर, फरिदा शेख, तृप्ती घोडके, रविंद्र कांबळे आणि मुस्कान अत्तर सहभागी झाल्या.

धार्मिक प्रतिनिधींमध्ये मौलाना, बौद्धाचार्य, फादर व इतर धर्मगुरू उपस्थित होते. तसेच सुनील टकावणे, श्रीधर गायकवाड, विनोद मुरार, अफजल शेख आणि बाळासाहेब रानवडे यांनीही शोकसभेत सहभाग घेतला.

यावेळी ॲड. निलेश निकम यांनी आपल्या भाषणात एक हृदयस्पर्शी अनुभव सांगितला. त्यांनी सांगितले की, गटनेतेपदाची जबाबदारी मिळाल्यानंतर ते दररोज रात्री आठ वाजता अजित पवार यांच्याशी फोनवर संवाद साधत असत. मात्र एका दिवशी कामाच्या व्यापामुळे फोन होऊ शकला नाही.

दुसऱ्या दिवशी सकाळी साडेसातच्या सुमारास त्यांनी संपर्क करण्याचा प्रयत्न केला, परंतु अजित पवार यांचा मोबाईल सतत स्विच ऑफ येत होता. सकाळी नऊ वाजेपर्यंत अनेक वेळा फोन करूनही संपर्क होऊ शकला नाही. त्यानंतर त्यांना अजित पवार यांच्या हवाई प्रवासादरम्यान अपघात झाल्याची व त्यात त्यांचे निधन झाल्याची माहिती मिळाली.

ही आठवण सांगताना ॲड. निलेश निकम भावुक झाले आणि सभास्थळी उपस्थित अनेक नागरिकांच्या डोळ्यांत अश्रू तरळले. काही काळ संपूर्ण परिसरात शांतता पसरली होती.

या सर्वपक्षीय शोकसभेमधून अजित पवार हे केवळ एका पक्षाचे नेते नसून सर्व समाजाचे लोकनेते होते, हे पुन्हा एकदा अधोरेखित झाले.

कार्यक्रमाच्या शेवटी सर्व उपस्थितांनी दोन मिनिटांचे मौन पाळून दिवंगत आत्म्यास श्रद्धांजली अर्पण केली व त्यांच्या आत्म्याच्या शांतीसाठी प्रार्थना करण्यात आली.

५ फेब्रुवारीपर्यंत परवानग्या मिळवण्याची अंतिम संधी
हवेली, पुणे : हवेली तालुक्यातील जिल्हा परिषद व पंचायत समिती निवडणुकीच्या पार्श्वभूमीवर उमेदवार व राजकीय पक्षांना आवश्यक विविध परवानग्या सुलभ, जलद व पारदर्शक पद्धतीने मिळाव्यात, यासाठी हवेली तहसील कार्यालयात ‘एक खिडकी कक्ष’ कार्यान्वित करण्यात आला आहे. या सुविधेमुळे निवडणूक प्रक्रियेत गती येत असून उमेदवारांना एकाच ठिकाणी सर्व आवश्यक परवानग्यांची पूर्तता करता येत आहे. 7 फेब्रुवारीला निवडणूक असल्याने हा कक्ष ५ फेब्रुवारी रोजी सायंकाळी ५ वाजेपर्यंत कार्यरत राहणार आहे.
या एक खिडकी कक्षाचे संचालन उपविभागीय अधिकारी व निवडणूक निर्णय अधिकारी डॉ. यशवंत माने तसेच तहसीलदार तृप्ती कोलते, तहसीलदार अर्चना निकम यांच्या मार्गदर्शनाखाली करण्यात येत आहे. कक्षामध्ये नोडल अधिकारी स्वाती नरोटे, डी. एम. मानकर, स्वाती ढोले, जयश्री सरगर, सुविद्य पवार, अक्षय लडकत, रोहन देवरे, सचिन जाधव, सारंग वाडेकर, संतोष हत्ते, सूर्यकांत राऊत व सुवर्णा भोसले हे अधिकारी कार्यरत आहेत.
या कक्षामार्फत प्रचार सभा, प्रचार रॅली, वाहन परवाने, ध्वनिक्षेपक वापर, पदयात्रा तसेच अन्य निवडणूकविषयक परवानग्या एकाच ठिकाणी देण्यात येत आहेत. उमेदवारांच्या अर्जांतील त्रुटी तात्काळ दूर करून आवश्यक मार्गदर्शन केले जात असल्याने परवानगी प्रक्रिया अधिक सुलभ व वेळेची बचत करणारी ठरत आहे.
या उपक्रमासाठी आरटीओ विभाग तसेच सर्व संबंधित पोलीस विभागांचे सहकार्य लाभत आहे. विविध विभागांच्या समन्वयामुळे हा कक्ष प्रभावीपणे कार्यरत असून आतापर्यंत अंदाजे १५० परवाने वितरित करण्यात आले आहेत.
निवडणूक निर्णय अधिकारी डॉ. यशवंत माने यांनी सर्व उमेदवार व राजकीय पक्षांना आवाहन केले आहे की, निवडणूक प्रक्रियेत कोणताही अडथळा येऊ नये यासाठी ५ फेब्रुवारीपर्यंत आवश्यक सर्व परवानग्या एक खिडकी कक्षातून पूर्ण करून घ्याव्यात.

पुणे- ३ तारखेलाच समजणार पुण्याचे महापौर कोण ? अन उपमहापौर कोण? त्यांची नावे जाहीर होऊन ते आपापले उमेदवारी अर्ज या दिवशी दाखल करतील असे वृत्त आहे. याबाबत भाजपच्या ११९ नगरसेवकांचे नेते बनलेले सभागृह नेते गणेश बिडकर यांनी मोठे महत्वपूर्ण वक्तव्य केले आहे . पहा आणि ऐका नेमके बिडकर काय म्हणाले ….

पुणे- सुनेत्रा पवार यांनी उपमुख्यमंत्रीपदाची शपथ घेताच रोहित पवार यांनी ट्विटर अर्थात X वर व्यक्त केलेली प्रतिक्रिया मोठी चर्चेत आहे. रोहित पवार यांनी असे म्हटले आहे कि,’राज्याच्या पहिल्या महिला उपमुख्यमंत्री म्हणून सुनेत्राकाकी यांनी शपथ घेतली, याचा आनंद आहे. खरं म्हणजे अजितदादांची जागा कुणीच घेऊ शकत नाही पण किमान सुनेत्राकाकींच्या रुपात तरी आम्ही तिथं अजितदादांना पाहू..! डोक्यावर डोंगराएवढं दुःख असताना आणि आम्ही सर्वजण शोकाकूल असताना त्यांना शुभेच्छा तरी कशा द्याव्यात, हे कळत नाही..!

तर सुनेत्रा पवार यांनी उपमुख्यमंत्रीपदाची शपथ घेताच युगेंद्र पवार यांनी मात्र त्यांचे अभिनंदन केले आहे. युगेंद्र यांनी ‘एक्स’वर काही फोटोंसह एक पोस्ट केली आहे. त्यात ते म्हणतात, ‘सुनेत्राकाकी अजित पवार यांनी आज राज्याच्या उपमुख्यमंत्रीपदाची शपथ घेतली. याबद्दल त्यांचे मनापासून अभिनंदन व पुढील वाटचालीसाठी हार्दिक शुभेच्छा. आदरणीय अजितदादांनी ज्या निर्धाराने, कर्तव्यनिष्ठेने आणि जनहिताला केंद्रस्थानी ठेवून महाराष्ट्राची सेवा केली, त्याच मूल्यांवर आपणही वाटचाल कराल आणि महाराष्ट्राच्या विकासात मोलाचे योगदान द्याल, हा विश्वास आहे.’

साहित्यदीप काव्य महोत्सवात कलादीप पुरस्काराने गुरू ठाकूर यांचा गौरव

पुणे : मी काही ठरवून प्रवासाला निघालोच नाही. जे अवगत आहे, त्यातच न रमता, तोचतोचपणा टाळून, नव्या वाटा शोधायला आणि त्यावरून चालायला मला आवडते. आता दिग्दर्शनाची वाट चालायला सुरवात केली आहे, असे प्रतिपादन सुप्रसिद्ध कवी आणि गीतकार गुरू ठाकूर यांनी केले. शब्दांवर प्रेम करणारा संगीतकार आणि सुरांवर प्रेम करणारा गीतकार असेल, तर रसिकत्व जागे करणारे गीत नक्की जन्माला येते, असेही ते म्हणाले.

साहित्यदीप प्रतिष्ठान आयोजित दोन दिवसीय काव्य महोत्सवात (दि. ३१) गुरू ठाकूर यांचा कलादीप पुरस्काराने गौरव करण्यात आला. पुरस्काराचे वितरण काव्य महोत्सवाच्या अध्यक्षा डॉ. सिसिलिया कार्व्हालो यांच्या हस्ते झाले. सन्मानपत्र, सन्मानचिन्ह, रोख रक्कम आणि पुष्पगुच्छ असे या पुरस्काराचे स्वरूप होते. यावेळी प्रतिष्ठानच्या अध्यक्ष ज्योत्स्ना चांदगुडे, कार्याध्यक्ष धनंजय तडवळकर, मुलाखतकार डॉ. पंडित संदीप अवचट उपस्थित होते. त्यानंतर गुरू ठाकूर यांच्याशी डॉ. संदीप अवचट यांनी संवाद साधला. भारत इतिहास संशोधन मंडळाच्या वि. का. राजवाडे सभागृहात काव्य महोत्सवाचे आयोजन करण्यात आले आहे.

गुरू ठाकूर म्हणाले, लहानपणापासून घरातल्या वडिलधाऱ्यांचे संस्कार, संतसाहित्याचे वाचन आणि माझी वाचनाची आवड, यातून मी शब्दांकडे ओढला गेलो. माझी पहिली आवड चित्रकलेची. मी राजकीय अर्कचित्रे रेखाटत असे. सोबत त्या चित्रांना साजेसे भाष्यही करत असे. ते भाष्य आवडल्याने दिलीप प्रभावळकर, शं. ना. नवरे अशा मान्यवरांची दाद मिळाली आणि त्यातूनच सदर लेखन आणि मग मालिका लेखनाची सुरवात झाली. हसा चकटफु, गंगाधर टिपरे अशा अनेक मालिकांना उत्तम प्रतिसाद मिळाला. मग चित्रपटलेखन, संवादलेखन आणि शेवटी गीतलेखन असा प्रवास सुरू झाला.

मला आयुष्यात तोचतोचपणा फार कंटाळवाणा वाटतो. जोपर्यंत आनंद वाटतो, तोपर्यंतच मी एखादी गोष्ट करतो. त्यामुळेच नटरंग नंतर तब्बल १२ वर्षे पुन्हा लावणी लिहिली नाही. माझ्यातील या वृत्तीमुळेच मी एखाद्या गोष्टीला नाही म्हणण्याची श्रीमंती टिकवून ठेवली आहे, असे सांगून गुरू ठाकूर म्हणाले, कविता स्वयंस्फूर्त असते, तर गाणे घडीव असते. गाण्यात मला परकायाप्रवेश करायचा असतो. कवितेत मी स्वतःपुरता व्यक्त होऊ शकतो. गाण्यात मला वेगवेगळी रूपे धारण करता येतात, त्यामुळे मला गीतलेखन अधिक आव्हानात्मक वाटते. कविता माझ्यासाठी, माझ्यापुरती असू शकते पण गाणे हे टीमवर्क असते. गीतलेखन करताना ॲक्टरपेक्षा कॅरेक्टर महत्त्वाचे असते. ती व्यक्तिरेखा कोणत्या प्रांतातील आहे, कोणत्या बोलीत संवाद साधणारी आहे, शिक्षण किती आहे असे अनेक मुद्दे लक्षात घेत गीत लिहिण्याचे आव्हान असते. नव्याने लिहिणाऱ्यांचे वाचन आणि अभ्यास कमी पडत असावा. त्या तुलनेत बुजुर्ग मंडळींचा आदर्श जरूर घ्यावा, असे निरीक्षणही गुरू ठाकूर यांनी नोंदवले. गाणे गीतकाराचे, संगीतकाराचे, गायकाचे असते, पण शेवटी ते रसिकांचे होऊन जाते. गीतकाराने पाण्यासारखे असावे, पात्रानुरूप आकार धारण करावा, असेही ते म्हणाले.

सूत्रसंचालन, सन्मानपत्राचे लेखन आणि वाचन धनंजय तडवळकर यांनी केले.

गझलकार भूषण कटककर यांच्या अध्यक्षतेखाली आयोजित गझल मुशायरा या कार्यक्रमात प्रमोद खराडे, शिवदादा डोईजोडे, डॉ. स्नेहल कुलकर्णी, श्याम खामकर, डॉ. माधुरी चव्हाण-जोशी, तेजस भातकुलकर, प्राजक्ता पटवर्धन, मीना शिंदे, राहुल कुलकर्णी, किरण वेताळ, वैशाली माळी, वैजयंती आपटे यांचा सहभाग होता. त्यानंर बालसाहित्यकार एकनाथ आव्हाड यांच्या अध्यक्षतेखाली ‘किलबिल किलबिल’ हा बाल कविता व गीतांचा कार्यक्रम प्रांजली बर्वे व सहकलाकारांनी सादर केला. प्राजक्ता वेदपाठक यांनी सूत्रसंचालन केले.

‘नमामी गंगा’ चळवळीप्रमाणे ‘नमामी मुळा–मुठा’ अशी योजना आणणार

लोणी–काळभोर : पंतप्रधान नरेंद्र मोदी यांच्या मार्गदर्शनाखाली भारत सरकार देशातील सर्वच नद्यांच्या स्वच्छतेवर विशेष लक्ष देत आहे. त्यानुसार पुण्याची जीवनवाहिनी असणाऱ्या मुळा–मुठा नदीतील प्रदूषण ही गंभीर समस्या आहे. नदीत प्रक्रिया न करता सोडण्यात येणारे सांडपाणी, तसेच थेट नदीपात्रात टाकण्यात येणारा कचरा या अत्यंत गंभीर बाबींची नोंद सरकार घेत आहे. भविष्यात स्थानिक महापालिकांच्या समन्वयातून ‘नमामी गंगा’ चळवळीप्रमाणे ‘नमामी मुळा–मुठा’ अशी योजना आखून नदी सुधार प्रकल्पांतर्गत ठोस पावले उचलणार आहोत, अशी माहिती केंद्रीय जलशक्ती राज्यमंत्री राज भूषण चौधरी यांनी दिली.

ते येथील एमआयटी आर्ट, डिझाईन आणि टेक्नॉलॉजी विद्यापीठ, पुणे अंतर्गत कार्यरत असलेल्या महाराष्ट्र नौदल शिक्षण व प्रशिक्षण अकादमी, पुणे (मॅनेट) या संस्थेच्या रौप्य महोत्सवी कार्यक्रमापूर्वी येथे पत्रकारांशी आयोजित वार्तालाप प्रसंगी बोलत होते. याप्रसंगी एमआयटी एडीटी विद्यापीठाचे कार्याध्यक्ष तथा प्र.कुलपती प्रा. डॉ. मंगेश कराड, प्रोव्होस्ट सायली गणकर, कुलसचिव डॉ. महेश चोपडे आदी मान्यवर उपस्थित होते.यावेळी पुढे बोलताना चौधरी म्हणाले की, मुळा–मुठा नदीच्या प्रदूषणामुळे पुणे शहरातील भूजल पातळी, शेती तसेच नागरिकांच्या आरोग्यावर विपरीत परिणाम होत आहे. ही समस्या भविष्यात अधिक गंभीर होऊ नये, यासाठी केंद्र सरकारकडून सर्वंकष नदी सुधार प्रकल्प राबविण्यात येणार आहे. याअंतर्गत सांडपाणी प्रक्रिया प्रकल्पांची क्षमता वाढविणे, अवैध सांडपाणी जोडण्या तोडणे, तसेच औद्योगिक घटकांकडून होणाऱ्या प्रदूषणावर कठोर कारवाई करण्यात येईल, असे त्यांनी स्पष्ट केले.मुळा–मुठा नदी स्वच्छतेसाठी आधुनिक तंत्रज्ञानाचा वापर, जलगुणवत्ता तपासणीसाठी नियमित निरीक्षण यंत्रणा, तसेच नदीकाठावरील गावांकडून पात्रात कचरा टाकला जाऊ नये यासाठी स्थानिक स्वराज्य संस्थांशी समन्वय साधण्यात येणार असल्याचे त्यांनी सांगितले. मुळा–मुठा नदी ही केवळ पाण्याचा स्रोत नसून ती सांस्कृतिक व पर्यावरणीय वारसा आहे. त्यामुळे नदीचे संवर्धन ही केवळ सरकारी जबाबदारी नसून स्थानिक नागरिकांची सामूहिक जबाबदारी आहे, असेही त्यांनी नमूद केले.याशिवाय, एमआयटी एडीटी विद्यापीठासारख्या शैक्षणिक संस्था, स्वयंसेवी संघटना आणि युवकांचा सहभाग घेऊन व्यापक जनजागृती मोहीम राबविण्यात येईल. “स्वच्छ नदी, सुरक्षित भविष्य” या संकल्पनेतून मुळा–मुठा नदीला पुन्हा एकदा निर्मळ व प्रवाही करण्याचा संकल्प केंद्र सरकारने केला असल्याचे राज्यमंत्री चौधरी यांनी सांगितले.

एमआयटी एडीटी विद्यापीठ आणि प्रशासनाने कायमच मुळा–मुठा नदीचे वाढते प्रदूषण, तसेच नदीपात्रात मोठ्या प्रमाणात टाकला जाणारा कचरा या गंभीर विषयांकडे सातत्याने लक्ष वेधले आहे. त्यासाठी विद्यापीठाकडून सातत्याने राज्य, केंद्र सरकार आणि स्थानिक प्रशासनाशी पत्रव्यवहार करण्यात आला आहे. मुळा–मुठा ही पुण्याची जीवनवाहिनी असून तिच्या रक्षणासाठी व स्वच्छतेसाठी सरकार व प्रशासनाला आवश्यक ते सर्व सहकार्य करण्याची विद्यापीठाची भूमिका आहे.
— डॉ. महेश चोपडे,
कुलसचिव, एमआयटी एडीटी विद्यापीठ, लोणी–काळभोर, पुणे

कपिल पाटील, नितीन वैद्य यांचा अर्ज फेटाळला

पुणे धर्मादाय आयुक्तांचा महत्वपूर्ण आदेश

पुणे:

राष्ट्र सेवा दल या संघटनेचे विश्वस्त असल्याचे  भासवत  राष्ट्र सेवा दलाच्या घटनेत बदल करण्याचा प्रस्ताव ज्येष्ठ पत्रकार ,राष्ट्र सेवा दल माजी अध्यक्ष नितीन वैद्य, माजी आमदार कपिल पाटील आणि अबेद खान यांनी धर्मादाय आयुक्तांकडे दाखल केलेला प्रस्ताव सत्य कागदपत्रांची पुर्तता करता न केल्याने धर्मदाय सहाय्यक आयुक्तांनी फेटाळून लावला आहे.  गेली काही वर्ष संघटनेत चाललेल्या बेकायदा हस्तक्षेपामुळे उद्भवलेला वाद आता संपुष्टात येणार आहे.या प्रकरणी घटना बदलाच्या प्रस्तावाविरुद्ध धर्मादाय आयुक्तांकडे आक्षेप घेणारे राष्ट्र सेवा दलाचे सदस्य आणि  माजी पूर्ण वेळ कार्यकर्ते श्याम निलंगेकर(नांदेड) यांनी पुण्यात पत्रकाद्वारे ही माहिती दिली. 

नितीन वैद्य, माजी आमदार कपिल पाटील आणि अबेद खान यांनी  १८ नोव्हेंबर २०२२ रोजी सहाय्यक   धर्मादाय आयुक्त कार्यालय पुणे यांच्याकडे दाखल केला होता. राष्ट्र सेवा दलातील पदाधिकारी नियुक्ती आणि कालावधी या संदर्भात ही घटना दुरुस्ती होती. मात्र सेवा दलाचे ज्येष्ठ कार्यकर्ते श्याम निलंगेकर यांनी या घटना दुरुस्तीबाबत आक्षेप अर्ज दाखल केला होता. कपिल पाटील हे विश्वस्त नाहीत, संघटनेचे सदस्य नसलेल्या व्यक्तींना  पदाधिकारी करण्यात आले होते. बेकायदेशीरपणे पदे  मिळवत ही मंडळी आर्थिक गैरव्यवहार करत असल्याचा आक्षेप श्याम निलंगेकर यांनी घेतला होता.

घटना दुरुस्तीच्या योजना प्रस्तावाला श्याम निलंगेकर यांनी आक्षेप घेतल्यानंतर कपिल पाटील, नितीन वैद्य, अबेद खान यांची अडचण झाली. ते किंवा त्यांचे वकील हे सहाय्यक धर्मादाय आयुक्तांसमोर एकाही तारखेला हजर झाले नाहीत. आपला दावा सिद्ध करणारी कागदपत्रही त्यांना सादर करता आली नाहीत, श्याम निलंगेकर मात्र प्रत्येक तारखेला हजर राहून या प्रकरणाचा पाठपुरावा करत होते.अखेर चार वर्षांनी म्हणजे १३ जानेवारी २०२६ रोजी सहाय्यक धर्मदाय आयुक्त पुणे यांनी कपिल पाटील आणि इतरांनी दाखल केलेला प्रस्ताव फेटाळून लावला. तसा आदेशही जारी केला आहे.

‘कपिल पाटील आणि मंडळी आड मार्गाने राष्ट्र सेवा दलात शिरले. आपली राजकीय ताकद वापरून त्यांनी संघटना ताब्यात घेत अरेरावी चालवली. सेवा दलाचे अनेक ज्येष्ठ पदाधिकारी, सेवाभावी पूर्णवेळ कार्यकर्ते यांना अपमानास्पद वागणूक देत संघटनेतून बाहेर काढलं. पाटील यांनी आपली माणसं घुसवली. बेकायदेशीरपणे आर्थिक व्यवहार केला. यावरून संघटनेत संघर्ष सुरू झाला. आता या मंडळींची हुकूमशाही संपली आहे,’ असे  श्याम निलंगेकर यांनी  प्रसिद्धी पत्राद्वारे कळवले आहे.

पुणे. दि.३१: पुणे ग्रामीण पोलीस दलाच्या हद्दीतील सोरतापवाडी (ता. हवेली) येथील इंजिनिअर दीप्ती मगर-चौधरी यांच्या संशयास्पद मृत्यू प्रकरणात विधान परिषदेच्या उपसभापती डॉ. नीलम गोऱ्हे यांनी सखोल तपासासाठी आणि आरोपींवर कठोर कारवाईसाठी, पुणे ग्रामीणचे पोलीस अधीक्षक यांना निवेदन दिले आहे. हे प्रकरण हुंडा, शारीरिक-मानसिक छळ आणि बेकायदेशीर गर्भलिंग तपासणीशी संबंधित असल्याचे डॉ. गोऱ्हे यांनी नमूद केले असून, हा ‘पीसीपीएनडीटी’ कायद्याचा गंभीर भंग असल्याचे म्हटले आहे. तसेच हे प्रकरण ‘विशेष केस’ म्हणून हाताळण्याची मागणी केली आहे.

डॉ. गोऱ्हे यांच्या निवेदनात या प्रकरणात, ठोस पुरावे गोळा करण्याचे, तांत्रिक पुराव्यांवर भर देण्याचे आणि पीडित कुटुंबीयांना संरक्षण देण्याचे आवाहन करण्यात आले आहे. “या प्रकरणात पुरावे नष्ट होण्याची किंवा साक्षीदारांवर दबाव येण्याची शक्यता आहे. त्यामुळे तपासाची व्याप्ती वाढवावी,” असे त्यांनी म्हटले आहे. तसेच, दोषारोपपत्र लवकर आणि त्रुटीमुक्त सादर करण्याची विनंती केली आहे.

उपसभापती डॉ. नीलम गोऱ्हे यांनी या प्रकरणाच्या अनुषंगाने दिलेल्या निवेदनात खालील मु‌द्यांकडे प्रामुख्याने लक्ष वेधले आहे.

या घटनेत शारीरिक व मानसिक छळ, हुंड्याची मागणी आणि प्रदीर्घ काळापासून सुरू असलेल्या जाचाचे पुरावे समोर येत आहेत. अशा संवेदनशील प्रकरणांत आरोपींना ‘अर्नेशकुमार’ निकालाचा आधार घेऊन पळवाटेची संधी मिळू नये, यासाठी पोलिसानी घटनाक्रमातील विसंगती शोधून ठोस पुरावे गोळा करावेत.

या प्रकरणात बेकायदेशीर गर्भलिंग तपासणी आणि पीडितेवर सक्तीने गर्भपात केल्याचा गंभीर संशय व्यक्त केला जात आहे. हा ‘पीसीपीएनडीटी’ (PCPNDT) कायद्याचा मोठा भंग असून, या गुन्ह्यातील सहभागी डॉक्टर किवा केंद्रांचा शोध घेऊन त्यांना सह-आरोपी करावे.

आरोपीकडून पुरावे नष्ट करणे किंवा साक्षीदारांवर दबाव आणण्याचे प्रकार होण्याची शक्यता नाकारता येत नाही. त्यामुळे अशा प्रकरणांत तपासाची व्याप्ती वाढवून तांत्रिक पुराव्यांवर (उदा, कॉल डिटेल्स, वैद्यकीय अहवाल) भर द्यावा.

पीडितेच्या माहेरच्या व्यक्तींना धमकावण्यात येत असल्यास त्यांना तातडीने पोलीस संरक्षण पुरवण्यात यावे.

दीप्ती मगर-चौधरी मृत्यू प्रकरणाचा तपास हा एक ‘विशेष केस’ म्हणून हाताळला जावा, जेणेकरून गुन्हेगारांमध्ये कायद्याचा धाक निर्माण होईल. या प्रकरणातील दोषारोपपत्र (Charge-sheet) लवकरात लवकर आणि त्रुटीमुक्त सादर होईल याची खबरदारी घ्यावी, ही विनंती.