लेखिका डॉ. प्रचिती पुंडे लिखित ‘वेलनेस रीडिफाइंड’ पुस्तकाचे प्रकाशन

पुणे, दि.२२ फेब्रुवारी: “मन करारे प्रसन्न, सर्व सिद्धीचे कारण, या उक्ती नुसार प्रत्येक मनुष्य हा सुखी राहू शकतो. त्यासाठी कर्म, ज्ञान आणि भक्ती योग हा अत्यंत महत्वाचा आहे. कर्मयोगात सेवा महत्वाची असून अहंकाराला तिलांजली दयावी. तरच मानव हा शारीरिक, मानसिक व अध्यात्मिक स्तरावर सुखी राहतो.” असे विचार ज्येष्ठ साहित्यीक डॉ. निशिकांत श्रोत्री यांनी व्यक्त केले.
तितिक्षा इंटरनॅशनल आणि प्रोलक्स प्रोडक्शन यांच्या संयुक्त विद्यमाने गुरूवारी पुण्यातील जवाहरलाल नेहरू सांस्कृतिक भवन येथे आयोजित पहिली आंतरराष्ट्रीय आरोग्य आणि सांस्कृतिक परिषद २०२४ संपन्न झाली. यावेळी लेखिका डॉ. प्रचिती पुंडे लिखित ‘वेलनेस रीडिफाइंड’ या पुस्तकाचे प्रकाशन करण्यात आले. त्यावेळी ते प्रमुख पाहुणे म्हणून बोलत होते.
या प्रसंगी डॉ. आशितोष मिसाळ हे मुख्य अतिथि म्हणून उपस्थित होते. तसेच जापान येथील डॉ.कोटा नागुची, लेखिका डॉ. प्रचिती पुंडे आणि तितिक्षा इंटरनॅशनल फाउंडेशनच्या प्रिया दामले यांची प्रमुख उपस्थिती होती.
साहित्य क्षेत्रात आयुष्यभर अमुल्य योगदान दिल्याबद्दल मधुसुदन घाणेकर, सामाजिक, साहित्यीक, काव्य, नाट्य, सेवा व एनजीओ क्षेत्रातील कार्यकरणार्‍या व्यक्तींचा आणि आर.के मिडियाचे संचालक रामहरी कराड यांना शाल व सन्मानपत्र देऊन विशेष सत्कार करण्यात आला.
डॉ. निशिकांत श्रोत्री म्हणाले,”डब्ल्यूएचओ ने शारीरिक, मानसिक, सामाजिक व आध्यात्मिक आरोग्यवर विस्तृत विवेचन केले आहे. आध्यात्मिक आरोग्य महत्वाचे असून अधि आत्मा म्हणजे, ब्रह्मतत्व त्यांनंतर कॉस्मिक एनर्जी कशी असते याचा उलगडा केला. त्याचप्रमाणे धन्वतरी, शुश्रृत, चरक आणि शारंधर हे वैद्यकीय शास्त्रताील सर्व प्रथम आहेत. हे पुस्तक आरोग्याच्या क्षेत्रातील सर्वोत्तम असून सर्वांसाठी लाभदायक राहिल.”
डॉ. प्रचिति पुंडे म्हणाल्या,” ‘ग्लॅमर’ आणि ‘निरोगीपणाच्या’ अभूतपूर्व मिश्रणातून संपूर्ण जगाला ग्लॅमवेलची नवी ओळख या पुस्तकातून होईल. ग्लॅमोवेल तत्वज्ञान “२:२ ह्यूमन कोकोरो संकल्पनेवर आधारित आहे. वेलनेस, वेलबिइंग आणि ऑप्टिमल या तत्वांवर मानवाच्या आरोग्यात मोठे बदल घडू शकतात. वर्तमान काळात सेल्फ आयसोलेटेट ह्यमून बिइंग आहे. अशावेळेस ग्लॅमवेल महत्वाचे ठरेल. ”
डॉ. सतिश मिसाळ म्हणाले,” भगवद्गीता आणि वेलनेस यांचा खूप जवळचा संबंध आहे. ५५०० केसस हाताळतांना आलेल्या अनुभवातून डॉ. पुंडे यांनी वेलनेसची संकल्पना अस्तित्वात आणली. आज कार्पोरेट क्षेत्रात सर्वात जास्त शारीरिक, मानसिक व आध्यात्मिक आरोग्यावर भर दिला जातो. तंत्रज्ञानाच्या युगात प्रत्येक व्यक्ती दुखी असतांना हे पुस्तक सुखाचे दरवाजे उघडेल.”
कोटा नागुची म्हणाले,” द्वितिय महायुध्दानंतर जपान मध्ये हॅपी सायन्स उदयास आले. यानंतर असे लक्षात आले की ७० ते ८० टक्केलोक हे फक्त मानसिक व बौद्धिक तनावामुळेच अधिक आजारी पडतात. त्यासाठी सर्वांवर प्रेम करा, आदर करा आणि सकारात्मक विचारधारेवर चला.”
प्रिया दामले म्हणाल्या,”हसत खेळत आरोग्य सांभाळणे म्हणजे सहज आरोग्य होय. सुखी जीवन जगण्यासाठी कोणत्या गोष्टींचा स्विकार करावा किंवा करू नये हे डॉ.पुंडे यांनी आपल्या पुस्तकात मांडले आहे.”
यावेळी रमेश पाचंगे यांनी चौघड्याचे सुंदर वादन केले. अजित जाधव यांनी गाणे गायले. साक्षी यांनी प्रोलक्स अ‍ॅण्ड ग्लोमोवेल संदर्भातील माहिती देऊन आधुनिक काळात याची गरज किती महत्वाची आहे हे सांगितले.

पुणे दि.२३: संरक्षण उत्पादन क्षेत्रात महत्त्वपूर्ण योगदान देण्यासाठी राज्यातील सूक्ष्म, लघु आणि मध्यम उद्योगांना सक्षम करणाऱ्या देशातील सर्वात मोठ्या आणि महाराष्ट्रातील अशा प्रकारच्या पहिल्या ‘महाराष्ट्र एमएसएमई डिफेन्स एक्स्पो’तून देशाची संरक्षण दले, संरक्षण उपकरणे निर्मितीतील सार्वजनिक उपक्रम तसेच यातील खासगी उद्योग, नवीन स्टार्टअप यांची उत्पादने, नवसंकल्पना पाहता येणार असल्याने महाविद्यालयीन विद्यार्थी, उद्योजक आणि नागरिकांनी भेट द्यावी, असे आवाहन राज्याचे उद्योगमंत्री उदय सामंत यांनी केले.

इंटरनॅशनल एक्झिबिशन ॲण्ड कन्व्हेनशन सेंटर, मोशी येथे होत असलेल्या या प्रदर्शनात मांडण्यात येत असलेली शस्त्रास्त्रांची पाहणी करून माहिती घेतली. तसेच प्रदर्शन दालनांना भेट देऊन उर्वरित कामे गतीने पूर्ण करण्याचे निर्देश दिले. उद्योग विभागाचे प्रधान सचिव हर्षदीप कांबळे, पिंपरी चिंचवड महानगरपालिका आयुक्त शेखर सिंह, पीएमआरडीएचे आयुक्त राहुल महिवाल, उपमुख्यमंत्री महोदयांचे विशेष कार्य अधिकारी कौस्तुभ धवसे, प्रदर्शनाचे नॉलेज पार्टनर गणेश निबे, महाराष्ट्र राज्य औद्योगिक विकास महामंडळाचे सह मुख्य कार्यकारी अधिकारी विजय राठोड, मुख्य अभियंता प्रकाश चव्हाण आदी उपस्थित होते.

तीन दिवस प्रदर्शन पाहता येणार
श्री. सामंत म्हणाले, २४ फेब्रुवारी पासून सुरू होणाऱ्या या प्रदर्शनात भारतीय नौसेना, लष्कर आणि वायुसेना या तिन्ही सुरक्षा दलांचा महत्वाचा सहभाग आहे. प्रदर्शन २६ फेब्रुवारीपर्यंत ३ दिवस सुरू राहणार असून त्यासाठी २० दालने तयार करण्यात आली आहेत. तसेच खुल्या जागेत हेलिकॉप्टर, रणगाडे, जड संरक्षण वाहने, तोफा आदी पाहता येतील.

या प्रदर्शनातील विविध सत्रात भारताची संरक्षण सिद्धता, विविध शस्त्रास्त्रांची निर्मिती, संरक्षण क्षेत्रातील संधी याविषयी अभियांत्रिकी तसेच अन्य शाखेच्या विद्यार्थ्यांना उपयुक्त माहिती मिळणार असून सैन्यदलात दाखल होण्याची प्रेरणा मिळेल. याशिवाय या क्षेत्रातील तंत्रज्ञान सर्वसामान्यांना अनुभवता येणार आहे, शस्त्रास्त्रांना प्रत्यक्ष स्पर्श करून रोमांचक अनुभव घेता येणार आहे, असेही ते म्हणाले.

प्रदर्शनातील चार भव्य दालनांना शिवनेरी, सिंधुदुर्ग, रायगड आणि पन्हाळा असे नाव देण्यात येणार आहे. संपूर्ण परिसरात छत्रपती शिवाजी महाराजांच्या गडकिल्ल्यांच्या संरक्षण सिद्धतेची संकल्पना प्रदर्शित करण्यात येणार आहे, असे श्री.सामंत यांनी सांगितले.

बैठकीस विविध विभागांचे अधिकारी उपस्थित होते.

श्री महालक्ष्मी मंदिर सारसबाग तर्फे ४० व्या वर्धापनदिनानिमित्त आयोजन
पुणे : श्री महालक्ष्मी मंदिरातील उत्सव मूर्तींची धान्यतुला करुन ते धान्य अनाथ मुलांच्या संस्थेस देण्याचा उपक्रम सारसबागेसमोरील महालक्ष्मी मंदिरात पार पडला.  राजस्थान डिडवाना येथील अनंत श्री विभुषित जगतगुरु रामानुचार्य झालरिया पीठाधीपती पूज्य श्री श्री १००८ स्वामीजी घनश्यामाचार्यजी महाराज यांच्या हस्ते धान्य तुला पूजन आणि सोने-चांदी पुष्पअर्पण करुन देवीचरणी सुख-शांती समृद्धी करिता प्रार्थना देखील करण्यात आली. 
श्री बन्सीलाल रामनाथ अग्रवाल धार्मिक व सांस्कृतिक ट्रस्ट, श्री महालक्ष्मी मंदिर सारसबागच्या ४० व्या वर्धापनदिनानिमित्त आयोजित ब्रह्मोत्सवात मंदिरात विविध कार्यक्रम सुरु आहेत. यावेळी ट्रस्टचे प्रमुख संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त अ‍ॅड.प्रताप परदेशी, प्रविण चोरबेले, हेमंत अर्नाळकर, नारायण काबरा यांसह विश्वस्त उपस्थित होते.
राजकुमार अग्रवाल म्हणाले, सामाजिक कार्यक्रमांमध्ये मंदिरातील श्री महालक्ष्मी, श्री महासरस्वती, श्री महाकाली व श्री विष्णू यांच्या उत्सवमूर्तीची धान्यतुला करुन ते धान्य अनाथ मुलांच्या संस्थेस वाटप करण्याचा उपक्रम दरवर्षी राबविला जातो. धान्यतुलेमध्ये विविध प्रकारचे धान्य, तेल, बिस्कीटे व खाऊ ठेवण्यात आला होता. याशिवाय सोने व चांदीची फुले देखील मान्यवरांच्या हस्ते उत्सवमूर्तीला अर्पण करण्यात आली. 

पुणे: उच्च माध्यमिक प्रमाणपत्र परीक्षा (इ. १२ वी.) आणि माध्यमिक शालांत प्रमाणपत्र परीक्षेतील (इ. १० वी) गैरप्रकार टाळण्यासाठी दक्षता समितीच्या अंतर्गत भरारी पथकांची नियुक्ती, कलम १४४ नुसार प्रतिबंधात्मक आदेश काढण्यासह परीक्षा कॉपीमुक्त करण्यासाठी कृती कार्यक्रम प्रभावीपणे राबविण्याचे निर्देश जिल्हाधिकारी डॉ. सुहास दिवसे यांनी दिले आहेत.

महाराष्ट्र राज्य माध्यमिक व उच्च माध्यमिक शिक्षण मंडळ, पुणे यांच्याकडून जिल्ह्यात २१ फेब्रुवारी ते १९ मार्च या कालावधीत उच्च माध्यमिक प्रमाणपत्र परीक्षा (इ. १२ वी.) आणि १ मार्च ते २६ मार्च या कालावधीत माध्यमिक शालांत प्रमाणपत्र परीक्षा (इ. १० वी) आयोजित केलेल्या आहेत. या परीक्षा सुरळीतपणे पार पाडण्यासाठी व कॉपीमुक्त अभियानाची प्रभावीपणे अंमलबजावणी करण्याचे अनुषंगाने उपाय योजना करण्यात आलेल्या आहेत.

परीक्षेदरम्यान कोणताही अनुचित प्रकार घेडू नये, कायदा व सुव्यवस्था अबाधित राहण्यासाठी जिल्हाधिकारी कार्यालयाकडून जिल्ह्यातील ग्रामीण भागातील सर्व परीक्षा केंद्राच्या परिसरात सीआरपीसी- कलम १४४ नुसार प्रतिबंधात्मक आदेश पारित करून परीक्षार्थीच्या व्यतिरिक्त इतर व्यक्तींना प्रवेश करण्यास मनाई करण्यात आली आहे.

महाराष्ट्र राज्य माध्यमिक व उच्च माध्यमिक शिक्षण मंडळ पुणे यांच्या पत्राच्या अनुषंगाने जिल्हाधिकारी कार्यालयाने सर्व परीक्षा केंद्रावर गैरप्रकार टाळण्यासाठी तहसिलदार व गट विकास अधिकारी यांना तहसिल कार्यक्षेत्रामध्ये सर्व परीक्षाकेंद्रावर भरारी पथके तयार करण्याबाबत आदेश दिले असून कॉपीमुक्त अभियान राबविण्यासाठी भरारी पथके नेमण्यात आली आहेत.

प्रत्येक परीक्षा केंद्रानजिकच्या प्राथमिक आरोग्य केंद्राचे आवश्यक ते सहकार्य करण्याबाबत जिल्हा शल्य चिकित्सक आणि जिल्हा आरोग्य अधिकारी यांना आदेश देण्यात आले आहेत. तसेच पुणे महानगरपालिका आणि पिंपरी चिंचवड महानगरपालिका यांना त्यांच्या हद्दीमधील शाळांसाठी भरारी पथके नियुक्ती करण्याबाबतही कळविण्यात आले आहे, असे जिल्हा प्रशासनाकडून कळविण्यात आले आहे.

शिक्षण विभाग प्राथमिक, माध्यमिक, योजना जिल्हा शिक्षण व प्रशिक्षण संस्था यांचीही भरारी पथके तैनात करण्यात आलेली असून सर्व परीक्षा केंद्रांवर बैठे पथकही पूर्णवेळ उपस्थित राहणार आहे. परीक्षा कॉपीमुक्त वातावरणात होण्याच्यादृष्टीने जिल्हा प्रशासन कार्यरत आहे. कॉपी व तत्सम गैरप्रकार आढळून आल्यास संबंधित केंद्र संचालक व संबंधित व्यक्तींवर तात्काळ शिस्तभंग कारवाई करण्याचे निर्देश जिल्हाधिकारी व मुख्य कार्यकारी अधिकारी यांनी दिलेले आहेत, अशी माहिती कमलाकांत म्हेत्रे शिक्षणाधिकारी माध्यमिक यांनी दिली आहे.

पुणे: शासन आपल्या दारी या संकल्पनेच्या माध्यमातून जिल्ह्यातील अनाथ बालकांना आधारकार्ड, रेशन कार्ड, जातीचा दाखला, राज्याचे अधिवास प्रमाणपत्र, राष्ट्रीयत्वाचा दाखला, मतदान कार्ड आदी २३ फेब्रुवारी ते ५ मार्च या कालावधीत पंधरवडा राबवून वाटपाचे नियोजन करण्यात आल्याचे जिल्हा महिला व बाल विकास कार्यालयाने कळविले आहे.

पंधरवडा कालावधीत गरजू अनाथ बालकांनी पंचायत समिती येथील तालुकास्तरीय संरक्षण अधिकारी व जिल्हास्तरावर जिल्हा महिला व बाल विकास कार्यालय, ३ रा मजला, गुलमर्ग सोसायटी, जाधव बेकर्स जवळ, पुणे यांच्या कार्यालयाशी संपर्क साधावा, असे आवाहन जिल्हा महिला व बाल विकास अधिकारी मोनिका रंधवे यांनी केले आहे.

पुणे,: लोकसभा सार्वत्रिक निवडणुकीसाठी निवडणूक खर्च दरनिश्चिती समितीची बैठक जिल्हाधिकारी डॉ.सुहास दिवसे यांच्या उपस्थितीत घेण्यात आली. निवडणूकीसाठी राजकीय पक्षांना आवश्यक साहित्य व प्रचारासाठीच्या विविध बाबींचे दर निश्चित करताना जिल्ह्याच्या विविध भागातील आणि जिल्ह्याबाहेरील दरांची माहिती घेण्यात यावी, असे निर्देश जिलहधिकारी डॉ.सुहास दिवसे यांनी दिली.

बैठकीला निवडणूक खर्च समन्वय अधिकारी तथा अपर जिल्हाधिकारी सोनप्पा यमगर, उप जिल्हा निवडणूक अधिकारी मीनल कळसकर यांच्यासह विविध शासकीय विभागांचे अधिकारी उपस्थित होते. बैठकीत विविध प्रकारच्या निवडणूक खर्चाबाबत बाबनिहाय आढावा घेण्यात आला. दरनिश्विती करताना राजकीय पक्षांनादेखील प्रक्रियेची माहिती देण्याच्या सूचना जिल्हाधिकाऱ्यांनी दिल्या.

पुणे दि.२२: महिलांचे मतदानामध्ये अधिक सहभाग वाढावा आणि शिवसेना महिला आघाडीच्या पदाधिकाऱ्यांना विविध योजना राबवत असताना ज्या अडचणी येत असतात त्यातून सरकार त्यांच्या पाठीशी आहे याचा संदेश जावा म्हणून शिवसेना महिला आघाडीच्यावतीने ‘शिवदुर्गा मोहीम’ आयोजित करण्यात आलेली आहे. या मोहिमेचा भाग म्हणून येत्या २४ फेब्रुवारी रोजी संभाजीनगर लोकसभा मतदार संघाचा मेळावा होणार आहे. या मेळाव्याला उपसभापती तथा शिवसेना नेत्या डॉ. नीलम गोऱ्हे, शिवसेना उपनेत्या कला शिंदे, आशा मामेडी मार्गदर्शन करणार आहेत. या मेळाव्याचे संयोजन आमदार संजय शिरसाट व संभाजीनगर शिवसेना महिला आघाडीच्या सविताताई किवंडे, शिल्पाराणी वाडकर, हर्षदा शिरसाट, तेजस्विनी केंद्रे, जयश्रीताई घाडगे, उषाताई हांडे, सुरेखाताई चव्हाण, गायत्री ताई पटेल यांसह इतर महिला शिवसैनिकांनी केले आहे.

तसेच येत्या ४ मार्च रोजी पुणे जिल्ह्यातील शिरूर मावळ पुणे शहर आणि बारामती लोकसभा मतदारसंघातील महिला आघाडीच्या पदाधिकारींचा मेळावा होणार आहे. तसेच मार्चच्या पहिल्या आठवड्यात शिवसैनिकांना विविध ठिकाणी येणाऱ्या अडचणींचे निराकरण करण्यासाठी विभागीय आयुक्त आणि जिल्हाधिकारी यांच्यासोबत बैठक घेणार आहे. यामधून समोर येणारे मुद्दे मुख्यमंत्री एकनाथ शिंदे यांच्यासमोर सादर करण्यात येणार आहेत. पुणे शहरातील वाहतूक कोंडीच्या समस्येबाबत मुख्यमंत्री एकनाथ शिंदे यांच्या अध्यक्षतेखाली लवकरच बैठक घेण्यात येणार आहे. असे विधानपरिषद उपसभापती तथा शिवसेना नेत्या डॉ. नीलम गोऱ्हे यांनी सांगितले.

नुकतेच राज्य विधीमंडळाचे अधिवेशन पार पडलेला आहे आणि ते अधिवेशनाच्या नंतर झालेल्या जाहीर सभेला प्रचंड अशी गर्दी तिथे उपस्थित झालेली होती हिंदुहृदयसम्राट शिवसेनाप्रमुख बाळासाहेब ठाकरे यांच्या सभांना जशी गर्दी असायची तसाच आशीर्वाद जनतेने कोल्हापूरला मुख्यमंत्री एकनाथ शिंदे यांना दिला असल्याचे उपसभापती डॉ. गोऱ्हे यांनी सांगितले.

पुणे दि.२२: पुणे गृहनिर्माण व क्षेत्र विकास प्राधिकरण अर्थात म्हाडाच्या अध्यक्षपदी श्री शिवाजीराव आढळराव पाटील यांची नियुक्ती करण्यात आली आहे. त्या पदाचा कार्यभार महाराष्ट्र विधान परिषद उपसभापती डॉ. नीलम गोऱ्हे यांच्या उपस्थितीत श्री आढळराव पाटील यांनी आज पदभार स्वीकारला. याप्रसंगी विभागीय संपर्क नेते संजय माशीलकर, इरफान सैय्यद, जिल्हा प्रमुख रमेश कोंडे, बाळासाहेब वाल्हेकर, सुरेंद्र जेवरे, उपजिल्हाप्रमुख संभाजी शिरसाठ, महिला शहर प्रमुख पूजा रावेतकर, कांताताई पांढरे, मा. नगरसेवक लक्ष्मण आरडे, युवासेना शहर प्रमुख निलेश गिरमे, युवासेना जिल्हाप्रमुख निलेश घारे, पुणे लोकसभा निरीक्षक किशोर भोसले अभिजित बोऱ्हाडे म्हाडाचे कार्यकारी अधिकारी श्री अशोक पाटील आदी मान्यवरांसह शिवसैनिक मोठ्या संख्येने उपस्थित होते.

म्हाडाच्या माध्यमातून गोरगरिबांना स्वस्तात घरे मिळवून देणे, म्हाडा वसाहतींमधील नागरिकांच्या समस्या सोडविण्यासाठी कार्य करून त्यांना न्याय देण्याचे कार्य नवनिर्वाचित अध्यक्षांद्वारे केलं जाईल याचा विश्वास आहे असे उपसभापती डॉ. गोऱ्हे यांनी सांगितले.