पुणे २४ सप्टें. : गुरु व शिष्य यांनी एकाच वेळी पदकांच्या व्यासपीठावर उभे राहण्याचा दुर्मिळ योग येथे नुकताच पहावयास मिळाला.‌ निमित्त होते महाराष्ट्र राज्य फिन स्विमिंग अजिंक्यपद स्पर्धा. या स्पर्धेमध्ये नांदे येथील ध्रुव ग्लोबल स्कूलच्या खेळाडूंनी सुवर्ण चौकारांसह आठ पदकांची कमाई केली. त्याचबरोबर त्यांच्या प्रशिक्षकांनीही तीन सुवर्णपदके जिंकून चमकदार कामगिरी केली

श्री शिव छत्रपती क्रीडा संकुल, महाळुंगे, पुणे येथे आयोजित करण्यात आलेल्या या स्पर्धेमध्ये निया पतंगे‌ हिने २०० बाय फिन, २०० मोनो फिन व १०० मोनो फिन प्रकारात सुवर्णपदक पटकावले तर १०० बाय फिन प्रकारात तिला कांस्यपदक मिळाले. रेवा चौगुले हिने ५० अपनिया व २०० मोनोफिन प्रकारात रौप्यपदक मिळविले तर १०० मोनोफिन प्रकारात कांस्यपदक जिंकले. अनया वानखेडे हिने ५० बाय फिन प्रकारात सुवर्णपदक पटकावले.‌ या खेळाडूंना प्रशिक्षक स्मिता काटवे, उमा जोशी, रुपाली अनाप आणि केशव हजारे यांचे मार्गदर्शन लाभले.
प्रशिक्षक श्रीमती स्मिता काटवे यांनी या स्पर्धेत ५० मीटर बाय फिन, १०० मीटर बाय फिन, ५० मीटर सरफेस मोनो फिन या तीनही क्रीडा प्रकारात सोनेरी कामगिरी केली.
खेळाडू व प्रशिक्षकांनी मिळवलेल्या या यशाबद्दल ध्रुव ग्लोबल स्कूलचे संचालक यशवर्धन मालपाणी व प्राचार्य संगीता राऊतजी यांनी सर्व खेळाडू तसेच प्रशिक्षकांचे अभिनंदन केले आणि शुभेच्छा दिल्या.

पुणे-मराठी चित्रपटसृष्टी मध्ये तब्बल ६० वर्ष सुरेल संगीत गायन करणारे पद्मभूषण ज्येष्ठ संगीतकार श्रीनिवास खळे यांच्या जन्मशताब्दी वर्षानिमित्त रंगभूमीवरील त्यांच्या कार्याची दखल घेणाऱ्या आठवणींना उजाळा देण्यात आला. ३१व्या पुणे नवरात्रौ महोत्सव मध्ये श्रीनिवास खळे यांच्या प्रतिमेचे पूजन करून गायन कार्यक्रमास सुरवात झाली. पुणे नवरात्रौ महोत्सवात २००० साली श्री लक्ष्मीमाता कलासंस्कृती पुरस्कार देऊन श्रीनिवास खळे यांना सन्मानित करण्यात आले होते तसेच त्यांनी त्यावेळी कार्यक्रम देखील सादर केला होता या आठवणींना याप्रसंगी उजाळा देण्यात आला. तसेच त्यांच्याशी संबंधित गाणी देखील गाण्यात आली.

३१वा पुणे नवरात्रौ महोत्सव मध्ये स्वारगेट येथील श्री गणेश कला क्रीडा रंगमंच याठिकाणी १९९०च्या काळातील सुरेल गाण्यांचा ‘नाईनटीज मेलडी’या कार्यक्रमाचे देखील आयोजन यावेळी करण्यात आले होते. पुणे नवरात्रौ मोहत्सवचे आयोजक अध्यक्ष आणि माजी उपमहापौर आबा बागुल आणि जयश्री बागुल यांनी या सुरेख सांगीतिक कार्यक्रमाचे आयोजन केले. कार्यक्रमाचे सूत्रसंचालन प्रसिद्ध अँकर आर. जे. बंड्या याने आपल्या ओघवत्या शैलीने करत प्रेक्षकांना संपूर्ण कार्यक्रमात खिळवून ठेवले.

१९९०च्या काळातील सुरेल गाण्यांचा ‘नाईनटीज मेलडी’या कार्यक्रमात सुप्रसिद्ध गायक अभिषेक सराफ, अक्षय घाणेकर कल्याणी घाणेकर, तन्वी दाते यांनी वेगवगेळया सुरेल गाण्यांचे गायन करत प्रेक्षकांची मने जिंकली. नामांकित गायक ए. आर. रहमान , कुमार सानू, उदित नारायण, सोनू निगम, अल्का याज्ञिक, श्रेया घोषाल यांच्या विविध गाण्यांचा समावेश यामध्ये होता. प्रेक्षकांनी १९९० च्या दशकातील सुरेल गाणी पुन्हा एकदा ऐकण्यास मिळाल्याने आनंद व्यक्त करत टाळ्या वाजवून तसेच आवडती गाणी गुणगुणत जल्लोषपूर्ण प्रतिसाद दिला. ए. आर. रहमान यांचे “दिल से रे…” हे गाणे गायक अभिषेक घाणेकर यांनी उत्साहपूर्ण वातावरणात गातच प्रेक्षकांनी त्याला मोठा प्रतिसाद देत “वन्स मोअर” म्हणत गाणे पुन्हा गाण्यास लावले. श्रेया घोषल यांनी गायलेल्या ” जादू है नशा है” गाणे गायिका कल्याणी देशपांडे यांनी सुमधुर आवाजात गात उपस्थितांची मने जिंकली. गायक अक्षय घाणेकर आणि गायिका कल्याणी देशपांडे यांनी एकत्रित गायलेल्या सुप्रसिद्ध आशिकी चित्रपटातील गाण्याला तर प्रेक्षकांनी शिट्या वाजवून जोरदार प्रतिसाद दिला. बॉम्बे चित्रपटातील ए.आर.रहमान यांचे अजरामर गाणे “तू ही रे..तेरे बिना में कैसे जिऊ” गाण्यात तर प्रेक्षक ताल्लिन झाल्याचे पाहावयास मिळाले, गायका सोबत एकत्रित गाणे गात त्यांनी कार्यक्रमाचा आनंद घेतला. प्रथमच नवरात्रौ उत्सव मध्ये गायन करत असलेल्या तन्वी दाते हिच्या सुरेल गाण्यांनी देखील सर्वांना मंत्रमुग्ध केले.

यावेळी नामांकित गायकांना संगीत वाद्य कलाकारांनी देखील उत्कृष्ट साथ दिली. ड्रम वादनअभिजित भदे, रिदम मशीनओंकार इंगवले, सॅक्सोफोनपीयुष तिवारी, पियानोशंतनु जहागिरदार आणि भारत ढोरे, गिटार वादन अजय थोरात तर तबला वादन मंगेश जोशी यांनी केले. यावेळी आबा बागुल, नंदकुमार कोंढालकर, नंदकुमार बानगुडे, घनश्याम सावंत, रमेश भंडारी, सुनील महाजन, निकिता मोघे, विलास रत्नपारखी, ॲड. चंद्रशेखर पिंगळे, द.स.पोळेकर उपस्थित होते.

पुणे : पुण्यनगरीच्या वैभवशाली सांस्कृतिक परंपरेत या वर्षी आदिशक्ती माता सच्चीयाय देवीच्या नवरात्री पावन पर्वानिमित्त श्रीमद् भागवत कथा तथा नवरात्री कीर्तन महोत्सव भव्यदिव्य स्वरूपात आयोजित करण्यात आला आहे. नाम-ज्ञान-प्रेम-दानाचा संगम घडविणाऱ्या या धार्मिक उत्सवात भक्तीसंगीत, पारायण, हरिपाठ, कीर्तन आणि महाप्रसादाचे आयोजन श्री दगड जीवदया संस्था जवळ,आगम जैन मंदिर समोर, कात्रज,पुणे येथे करण्यात आले आहे. आज पुण्याचे पोलिस आयुक्त अमितेश कुमार यांनी मातेचे दर्शन घेऊन पुणेकरांना नवरात्रीच्या शुभेच्छा दिल्या.

यावेळी श्री सुसवाणीमाता सच्चीयायमाता चॅरिटेबल ट्रस्टचे आयोजक प्रमोद दुगड, मोनल दुगड आदि मान्यवर उपस्थित होते.

यावेळी बोलताना पोलिस आयुक्त अमितेश कुमार म्हणाले, पुणेकरांना नवरात्रीच्या हार्दिक शुभेच्छा ,आज दुगड परिवाराच्या निमंत्रणांवरून माता सच्चीयाय देवीची आरती करण्याचा योग आला, मंदिरात येऊन अतिशय प्रसन्न वाटले. दुगड परिवार राबवत असलेल्या विविध सामाजिक उपक्रमांचेही पोलिस आयुक्तांनी यावेळी कौतुक केले.

मोनल दुगड म्हणाल्या, माणिकशेठ दुगड यांनी 35 वर्षांपूर्वी आदिशक्ती माता सच्चीयाय देवीच्या मंदिराची उभारणी केली. येथे नवरात्री मध्ये विविध धार्मिक कार्य करत आहोत, यामध्ये ज्ञानेश्वरी पारायण, स्त्री सूक्त पठण , याशिवाय येथे गोशाला आहे, चारशे हून अधिक गायांचा सांभाळ आम्ही करत असून इतरांच्या आजारी गायींना इथे आणले तरी आम्ही त्यांच्यावर योग्य ते उपचार करतो त्यांची काळजी घेतो, अन्नछत्र 24 तास सुरू असते, आज दुगड यांची चौथी पिढी देवीच्या सेवेत आहे.

प्रमोद दुगड म्हणाले, आदिशक्ती माता सच्चीयाय देवीच्या नवरात्री पावन पर्वानिमित्त दरवर्षी विविध धार्मिक उपक्रम आम्ही घेत असतो. यंदाही धार्मिक कार्यक्रमांची रेलचेल आहे. आदिशक्ती माता सच्चीयाय देवीच्या नवरात्री पावन पर्वानिमित्त श्रीमद् भागवत कथा तथा नवरात्री कीर्तन महोत्सव मोठ्या प्रमाणावर साजरा करत आहोत. अष्टमीच्या दिवशी महाकुंभ महोत्सव होत आहे, यामध्ये 108 जोडपी हवन करणार आहेत. सर्व उपक्रम गौरव दुगड यांच्या मार्गदर्शनाखाली सुरू असल्याचे प्रमोद दुगड यांनी नमूद केले.

पुणे, दि. २४ सप्टेंबर: सेवा पंधरवडा उपक्रमांतर्गत इंदापूर तालुक्यातील शेतकऱ्यांना शेतात जाण्याकरिता त्यांची कायमस्वरुपी सोय व्हावी याकरिता १५ गावांमध्ये शेत,पाणंद, शिव रस्त्यांना सिमांकन करावयाचे कामकाज युद्धपातळीवर सुरु असल्याची माहिती तहसीलदार जीवन बनसोडे यांनी दिली आहे.

इंदापूर तालुक्यात थोरातवाडी (रुई), भोडणी, व्याहळी, कपरवाडी (वा), सरडेवाडी, गलांडवाडी नं. २, गोखळी, म्हसोबाचीवाडी, जंक्शन, डाळज नं.१, जाधववाडी, तावशी, अगोती नं.१, वकीलवस्ती आणि करेवाडी १५ गावांमध्ये शेत,पाणंद, शिव रस्त्याचे सिमांकन कार्यवाही सुरु आहे. या गावांमध्ये पहिल्या पाच दिवसामध्ये शिवारफेरी घेण्यात येणार असून मंडळ अधिकारी, ग्राम महसूल अधिकारी, सरपंच, ग्रामसेवक, मोजणी विभागाचे कर्मचारी व पोलीस पाटील यांच्यामार्फत गाव नकाशावर असलेले आणि नसलेले रस्त्यांचे सर्वेक्षण करण्यात आले आहे. याबाबत १७ सप्टेंबर रोजी आयोजित विशेष ग्रामसभेत रस्त्यांची प्राथमिक यादी तयार करुन मान्यता घेण्यात आली आहे. त्याप्रमाणे ग्रामसभेत ठरावही घेण्यात आले आहेत.

ग्रामसभेत घेण्यात आलेल्या ठरावानुसार १५६ पाणंद रस्त्याबाबत गावपातळीवरुन प्रस्ताव प्राप्त झाले आहेत, या रस्त्यांचे सिमांकन करण्याकरिता उप अधीक्षक भूमी अभिलेख यांच्याकडे पाठविण्यात आहे आहेत. भूमी अभिलेख विभागामार्फत या रस्त्यांची मोजणी व सिमांकनासाठी शुल्क आकारण्यात येणार नाही. येत्या काळात रस्त्यांना विशिष्ट सांकेतांक क्रमांक निश्चित करण्यात येणार आहेत, असे तहसीलदार जीवन बनसोडे यांनी प्रसिद्धी पत्रकान्वये कळविले आहे.

वैभव नावडकर, उपविभागीय अधिकारी: शेतकऱ्यांना शेतात ये-जा करणे, शेतीउपयोगी व यांत्रिकी साहित्य शेतात ने-आण करणे तसेच बाजारपेठेमध्ये शेतमाल वेळेत पोहचविण्याकरिता शेतरस्ते महत्वाचे आहे. राज्यात मुळ जमाबंदीवेळी तयार करण्यात आलेल्या नकाशामध्ये तसेच एकत्रीकरण योजनेच्यावेळी तयार करण्यात आलेल्या गट नकाशामध्ये त्यावेळी अस्तित्वात असलेले ग्राम रस्ते, शिवरस्ते व गाडीमार्ग दर्शविण्यात आलेले आहेत. मात्र त्यानंतर नवीन रस्त्याच्या नोंदी न झाल्यामुळे रस्त्यांच्या वापराबाबत तक्रारी, अतिक्रमण यांसारख्या समस्या उद्भवत आहेत.

छत्रपती शिवाजी महाराज महाराजस्व अभियानांतर्गत राष्ट्रनेता नरेंद्रजी मोदी यांच्या जन्मदिनी १७ सप्टेंबर ते राष्ट्रपिता महात्मा गांधी यांची जयंती २ ऑक्टोबर २०२५ या कालावधीमध्ये विभागात सेवा पंधरवडा उपक्रम राबविण्यात येत आहे, या उपक्रमामुळे रस्त्यांच्या अधिकार अभिलेखामधील नोंदी अद्यावत होतील आणि शेतरस्त्यांच्या समस्यांचे निराकारण होईल. या उपक्रमाचा नागरिकांनी लाभ घ्यावा, असे आवाहन श्री. नावडकर यांनी केले आहे.

पुणे.

श्री रेणुका माता मंदिर केशवनगर, मुंढवा,भंडारी समाजसेवक ट्रस्ट, पुणे 25 वे रौप्य महोत्सवी वर्ष विशेष जल्लोषात साजरा होत आहे.

या पर्वाला विशेष महत्त्व देत, राज्याचे महसूल मंत्री चंद्रशेखर बावनकुळे यांच्या हस्ते श्री रेणुकामातेचा आरती सोहळा पार पडला.या प्रसंगी चंद्रशेखर बावनकुळे यांचा शाल व श्रीफळ देऊन सन्मान केला.

या प्रसंगी आमदार टिळेकर,युवा मोर्चा प्रदेश अध्यक्ष अनुप मोरे,माजीनगरसेविका वंदना भिमाले, माजी नगरसेवक उमेश गायकवाड,भाजप पुणे शहर सरचिटणीस रवींद्र साळेगावकर, भाजपा सरचिटणीस प्रियंकाताई शेंडगे,सरचिटणीस बाप्पू मानकर,पुणे शहर युवामोर्चा सरचिटणीस अभिषेक भिमाले,प्रसाद शेठ भिमाले,विश्वस्त डॉक्टर श्रमकांत अकाले,एकनाथ शेठ भंडारी, सुभाष भंडारी,दत्तात्रय वाल्हेर, नारायण बत्ताले,प्राचार्य महादेव वाल्हेर,भीमराव मिट्टले,देवेंद्र उडताले,शिवाजी भंडारी,लक्ष्मण अकाले,कैलास अकाले तसेच भंडारी समाजसेवा ट्रस्ट चे सर्व सभासद व नागरिक मोठ्या संख्येने उपस्थित होते

श्रीनाथ भिमाले यांच्या कार्याचे चंद्रशेखर बावनकुळे यांनी तोंडभरून केले कौतुक

चंद्रशेखर बावनकुळे यांनी यावेळी भाजपचे पुण्यातील ज्येष्ठ नगरसेवक आणि समाजसेवक श्रीनाथ भिमाले यांच्या कार्याची प्रशंसा करताना म्हटलं की, “मुख्यमंत्री फडणवीस यांच्या व्हिजनला पुढे नेण्याचं काम श्रीनाथ भिमाले निष्ठेने आणि ताकदीनं करीत आहेत.”

बावनकुळे यांनी सांगितले की, “देवेंद्र फडणवीस यांचे ‘विकसित महाराष्ट्र २०२९, २०३५ आणि २०४७’ हे दूरदृष्टीपूर्ण व्हिजन आहे, आणि त्या दिशेने काम करणाऱ्या नेतृत्वामध्ये श्रीनाथ भिमाले यांचे योगदान निश्चितच महत्त्वपूर्ण ठरणार आहे.”

त्यांनी पुढे म्हटलं, “मुख्यमंत्री फडणवीस यांच्या हृदयात विशेष स्थान असलेले भिमाले हे सामाजिक, धार्मिक, सांस्कृतिक आणि समाजातील शेवटच्या घटकासाठी कार्य करणारे एक असामान्य कार्यकर्ते आहेत.”

पुणे- कामावरून काढून टाकल्याचा राग मनात धरून दोन बिहारी तरुणांनी पुण्यातील आपल्या मालकाच्या ३ वर्षाच्या मुलीचे अपहरण करून पळ काढल्याची घटना काल सायंकाळी निदर्शनास आली तत्क्षणी पोलिसांनी हालचाली करून या दोन्ही भुरट्याना कल्याण रेल्वे स्थानकावर पकडले आणि त्यांच्या ताब्यातून या ३ वर्षीय मुलीचीही सुटका केली .

या प्रकरणाची हकीकत पोलिसांनी अशी सांगितली कि,’ दि.२२/०९/२०२५ रोजी विमानतळ पोलीस स्टेशन पुणे शहर येथे ‘फिर्यादी’ यांनी विमानतळ पोलीस स्टेशन येथे येवुन माहिती दिली की, त्यांची लहान मुलगी वय ०३ वर्ष हिस सायंकाळी ०५/०० वाजले पासुन गायब आहे व ती प्रिन्स पॉल (वय २५ वर्ष )व ओमनारायण पासवान यांनी\ पळवुन नेले असण्याची शक्यता आहे.कारण मी त्यांना कामावरून काढून टाकले . अशी तक्रार प्राप्त होताच विमानतळ पोलीस स्टेशनचे वरिष्ठ पोलीस निरीक्षक गोविंद जाधव यांनी पोलीस स्टेशनचे तपास प्रभारी अधिकारी पोलीस उप निरीक्षक नितीन राठोड व तपास पथकातील स्टाफ, सपोनि संतोष शिंदे, सपोनि शिरसाट यांना बोलावुन घेवुन दोन वेगवेगळी पथके तयार करुन तात्काळ मुलीचा शोध सुरु केला. तक्रारदार राहत असलेल्या लेबर कॅम्पच्या आजुबाजुचे सीसीटीव्ही फुटेजची तपासणी सुरु केली. आरोपींचे प्राप्त मोबाईल नंबरचे तात्काळ सीडीआर, लोकेशनची माहिती घेण्यात आली. आरोपींचे लोकेशन प्रथम तळेगाव दाभाडे येथे आले होते. म्हणुन तळेगाव दाभाडे एमआयडीसी पोलीस ठाणेशी संपर्क करुन त्यांना महिती दिली व तपास सुरु केला. परंतु त्यानंतर आरोपीचे लोकशन लोणावळ्याचे आसपास आल्याने सदरचे इसम मुलीला घेवुन रेल्वेने प्रवास करीत असल्याचे समजले. त्या अनुषंगाने पोलीस उप निरीक्षक नितीन राठोड यांचेसह एक तपास पथक मुंबईचे दिशेने रवाना करण्यात आले होते.
आरोपी यांचे मोबाईल नंबरचे लोकेशनवरुन सदर आरोपी हे इंद्रायणी एक्सप्रेसने प्रवास करीत असल्याचे लक्षात येताच रेल्वे पोलीसांना सदर बाबत माहिती देवुन आरोपी व लहान मुलीचे फोटो देण्यात आले होते. कल्याण रेल्वे पोलीस स्टेशनचे पोलीसांचे मदतीने यातील आरोपी १. प्रिन्स संजय पाल वय २१ वर्ष २. ओमनारायण छोटेलाल पासवान वय २० वर्ष दोघे रा. लेबरकॅम्प म्हाडा कॉलनी विमाननगर पुणे मुळ बिहार यांना कल्याण रेल्वे स्टेशन येथे मुलीसह ताब्यात घेण्यात आले .मुलगी वय ०३ वर्ष हिस सुखरुप तिचे आई वडीलांचे ताब्यात देण्यात आले. सदर बाबत विमानतळ पोलीस स्टेशन पुणे शहर येथे गु.र.नं. ४६४/२०२५ भारतीय न्याय संहिता कलम १३७ (२) (२) प्रमाणे गुन्हा दाखल करण्यात आला असुन, पुढील तपास सहा. पोलीस निरीक्षक प्रशांत माने हे करीत आहेत.
सदरची कारवाई ही अपर पोलीस आयुक्त, पुर्व प्रादेशिक विभाग मनोज पाटील, पोलीस उपायुक्त परि ४, सोमय मुंडे, सहा. पोलीस आयुक्त, येरवडा विभाग श्रीमती प्रांजली सोनवणे, यांचे आदेशान्वये वरिष्ठ पोलीस निरीक्षक, विमानतळ पोलीस स्टेशन गोविंद जाधव व पोलीस निरीक्षक (गुन्हे) शरद शेळके यांचे मार्गदर्शनाखाली पोलीस उप-निरीक्षक नितीन राठोड पोलीस अंमलदार अंकुश जोगदंडे, लालु क-हे, रुपेश पिसाळ, राकेश चांदेकर, शैलेश नाईक, सचिन मांजरे, दादासाहेब बर्डे, योगेश थोपटे, श्रीमंत यंपाळे, ज्ञानदेव आवारी, हरीप्रसाद पुंडे, शंकर वाघुले यांचे पथकाने केली.

पुणे, दि. २३ सप्टेंबर, २०२५ : राष्ट्रीय स्वयंसेवक संघाच्या शताब्दी वर्षाचे औचित्य साधत आता संघ प्रार्थना विविध भाषांमध्ये नागरिकांना समजून घेता येणार आहे. निमित्त आहे पुण्यातील शिवाजीनगर विधानसभा मतदार संघाचे आमदार सिद्धार्थ शिरोळे आणि चितळे समूहाचे संचालक इंद्रनील चितळे यांची निर्मिती असलेल्या ‘अर्थासहित संघ प्रार्थना’ या विशेष प्रकल्पाच्या विमोचनाचे.  दि. २७ सप्टेंबर रोजी नागपूर येथे या प्रकल्पाचे औपचारिक प्रकाशन सरसंघचालक मोहनजी भागवत यांच्या उपस्थितीत संपन्न होणार असल्याची माहिती सिद्धार्थ शिरोळे व इंद्रानील चितळे यांनी कळविली आहे. युट्यूब आणि इतर माध्यमांद्वारे सदर संघ प्रार्थना नागरिकांपर्यंत पोहोचेल.

याविषयी अधिक माहिती देताना आमदार सिद्धार्थ शिरोळे म्हणाले, “संघ प्रार्थना ही लहानपणापासून कायमच मला प्रेरणा देत आली आहे. या प्रार्थनेचा अर्थ हा सार्वत्रिक असून त्यातून मिळणारी उर्जा माझ्यासाठी विशेष आहे. ही प्रार्थना विविध भाषिक नागरिकांपर्यंत पोहोचावी हा आमचा या प्रकल्पाच्या संकल्पनेमागील उद्देश आहे. पहिल्या टप्प्यात आम्ही हिंदी, मराठी, इंग्रजी, गुजराथी, तामिळ, तेलुगु, कन्नड आणि मल्याळम या ८ भाषांमध्ये प्रार्थनेच्या अर्थाचे निवेदन केले आहे. येत्या २७ सप्टेंबर रोजी हिंदी निवेदन असलेल्या संघ प्रार्थनेचे प्रकाशन करण्यात येईल व त्यानंतर पुढील काळात संघ प्रार्थनेचे इतर भाषांमधले निवेदन प्रकाशित करण्यात येईल.”  
 
चितळे समूह हा गेल्या काही पिढ्यांपासून व्यवसायात आहे. राष्ट्रीय स्वयंसेवक संघ हा देखील काही पिढ्यांपासून राष्ट्रनिर्माणाच्या कार्यात आपले योगदान देत आहे, त्यामुळे हा समान दुवा लक्षात घेत आम्ही या प्रकल्पात सहभागी झालो.असे सांगत इंद्रनील चितळे म्हणाले, “संघाच्या विचारधारेला १०० वर्षे पूर्ण होत असताना संघ प्रार्थनेचा वैश्विक भाव जास्तीत जास्त नागरिकांपर्यंत पोहोचावा, येणाऱ्या पिढ्यांना आपल्या मागील पिढ्यांचे योगदान माहिती व्हावे हा या संकल्पनेच्या निर्मितीमागील उद्देश आहे.”
सामान्य नागरिकांपर्यंत संघाची प्रार्थना आणि त्याचा योग्य अर्थ पोहोचावा या उद्देशाने संगीत दिग्दर्शक राहुल रानडे यांनी दोन वर्षांच्या अथक प्रयत्नाने ही प्रार्थना तयार केली असून याचे गायन राष्ट्रीय पुरस्कार विजेते गायक शंकर महादेवन यांनी केले आहे. प्रार्थनेचे हिंदी भाषेतील लेखन आणि निवेदन हरीश भिमाणी यांनी केले आहे. मराठी अर्थ विवेक आपटे यांनी लिहिला असून निवेदन सचिन खेडेकर यांनी केले आहे.

‘अर्थासहित संघ प्रार्थना’ या प्रकल्पाची मूळ संकल्पना हरीश भिमाणी यांची असून राहुल रानडे यांनी प्रकल्प प्रमुख व संगीत दिग्दर्शक म्हणून जबाबदारी पार पाडली आहे. या प्रार्थनेचे संगीत संयोजन कमलेश भडकमकर यांनी केले असून लंडन येथील रॉयल फिलहार्मोनिक ऑर्केस्ट्राच्या वादकांनी याला स्वरसाज चढविला आहे. प्रार्थनेचे ध्वनीमुद्रण लंडन येथील ॲबी रोड स्टुडिओज आणि मुंबई येथील यशराज फिल्म्स या ठिकाणी पूर्ण झाले असून ध्वनीमिश्रण व मास्टरिंग विजय दयाळ यांनी केले आहे.

पुणे- कोंढव्यातील दूषित व विस्कळीत पाणीपुरवठ्याबाबत महापालिका आयुक्तांना मनसेने आज निवेदन देत साकडे घातले. मनसे प्रमुख साईनाथ बाबर यांनी हे निवेदन दिले आहे. बाबर यावेळी म्हणाले ,’ कोंढवा परिसरातील अजमेरा पार्क, ग्रीन पार्क, रॉयल पार्क व अश्रफ नगर या भागातील नागरिक गेल्या अनेक वर्षांपासून पाणीपुरवठ्याच्या गंभीर समस्येला सामोरे जात आहेत. या भागात मिळणारे पाणी हे केवळ कमी दाबानेच येते असे नाही तर त्यात ड्रेनेजचे पाणी मिसळून नागरिकांना आरोग्याच्या भयंकर संकटाला तोंड द्यावे लागत आहे. ही बाब इतकी गंभीर आहे की, लहान मुले, ज्येष्ठ नागरिक, महिला यांचे जीवन धोक्यात आले आहे.महानगरपालिकेने या समस्येकडे आजवर केलेले दुर्लक्ष हे नागरिकांच्या सहनशीलतेची परीक्षा घेणारे आहे. नागरिकांनी वेळोवेळी तक्रारी केल्या, निवेदने दिली, तरीसुद्धा प्रशासनाने याकडे काणाडोळाच केला आहे. पुणे महानगरपालिका ज्या जोमाने, ज्या ताकदीने आणि ज्या पद्धतीने मालमत्ता कर, विविध कर आणि दंड वसूल करण्यासाठी उत्साह दाखवते, त्याच जोमाने नागरिकांच्या पाणीपुरवठ्याच्या मूलभूत प्रश्नांवर लक्ष का देत नाही? नागरिकांकडून कर वसूल करताना प्रशासनास कोणतीही अडचण वाटत नाही, मग त्याच नागरिकांना जगण्यासाठी लागणारे शुद्ध पाणी देताना महापालिका मौन का बाळगते?
हे नागरिकांसोबतचे उघड अन्यायकारक वर्तन आहे. नागरिकांना त्यांच्या पैशाचा, कराचा, अधिकाराचा योग्य मोबदला मिळाला पाहिजे. पाणी हा माणसाचा प्राथमिक हक्क आहे. पुणे सारख्या शहरात २०२५ मध्ये सुद्धा नागरिकांना दूषित व अपुरा पाणीपुरवठा सहन करावा लागणे हे अत्यंत लाजिरवाणे व प्रशासनाच्या अपयशाचे स्पष्ट निदर्शक आहे.

म्हणूनच आयुक्तांनी तातडीने पुढील गोष्टी करणे आवश्यक आहे :
१) वरील परिसरातील संपूर्ण पाणीपुरवठा लाईनची तातडीने तपासणी करून दुरुस्ती करावी.
२) ड्रेनेजचे पाणी मिसळण्याची समस्या कायमस्वरूपी थांबवावी.
३) नागरिकांना नियमित व पुरेशा दाबाने शुद्ध पाणीपुरवठा होईल याची खात्री करून द्यावी.
४) या सर्व कामांसाठी निश्चित कालमर्यादा जाहीर करून नागरिकांना माहिती द्यावी.

साईनाथ बाबर यांनी पुढे असेही म्हटले आहे कि,’याकडे तातडीने लक्ष दिले नाही, तर महाराष्ट्र नवनिर्माण सेना पुणे शहराच्या वतीने आम्ही नागरिकांना घेऊन तीव्र आंदोलन उभारू. त्यातून कायदा-सुव्यवस्थेचा प्रश्न निर्माण झाला तर त्याची पूर्ण जबाबदारी पुणे महानगरपालिकेवर राहील.नागरिकांचा संयम आता संपत आला आहे. पुणे महापालिकेने जर नागरिकांकडून कर वसूल करताना दाखवलेली तत्परता, प्रामाणिकपणे या समस्यांवर दाखवली नाही, तर रस्त्यावर उतरून उत्तर मागितले जाईल.

पुणे – .महानगरपालिका प्राथमिक शिक्षण विभाग व जिल्हा क्रीडा परिषद यांच्या संयुक्त विद्यमाने जिल्हास्तरीय शालेय मैदानी
स्पर्धेचे आयोजन दिनांक २३/९ /२०२५ रोजी कै. बाबुराव सणस मैदानावर करण्यात आले . या स्पर्धेच्या उद्घाटनासाठी व खेळाडूंना शुभेच्छा देण्यासाठी उपायुक्त (शिक्षण) वसुंधरा बारवे, उपायुक्त सामान्य प्रशासन विजयकुमार थोरात
प्रशासकीय अधिकारी सुनंदा वाखारे, क्रीडा प्रमुख माणिक देवकर , तसेच सर्व सहाय्यक प्र अधिकारी व क्रीडा अधिकारी उपस्थित होते.
उद्घाटन प्रसंगी उपायुक्त वसुंधरा बारवे यांनी मुलांना स्पर्धेत यश मिळविण्या साठी शुभेच्छा दिल्या. सुनंदा वाखारे मॅडम यांनी मुलांना खेळाचे महत्व सांगितले आणि आनंदाने खेळात सहभागी होऊन स्पर्धेचा आनंद लुटा अशा शुभेच्छा दिल्या. या स्पर्धेमध्ये सुमारे साडेसात ते आठ हजार विद्यार्थ्यांनी सहभाग घेतला असून पुढील पाच दिवस या स्पर्धा पार पडणार आहेत.