लेफ्टनंट जनरल संदीप जैन(AVSM),(SM) यांनी 1 एप्रिल 2026 रोजी दक्षिण कमांडचे ‘जनरल ऑफिसर कमांडिंग-इन-चीफ म्हणून सूत्रे हाती घेतली. त्यांनी लेफ्टनंट जनरल धीरज सेठ यांची जागा घेतली असून, लेफ्टनंट जनरल धीरज सेठ यांनी आजच ‘उप-लष्कर प्रमुख’ म्हणून पदभार स्वीकारला आहे.राष्ट्रीय संरक्षण प्रबोधिनीचे माजी विद्यार्थी असलेले लेफ्टनंट जनरल संदीप जैन, जून 1988 मध्ये ‘महार रेजिमेंट’मध्ये नियुक्त झाले. जवळपास चार दशकांच्या प्रदीर्घ आणि गौरवशाली कारकिर्दीत, त्यांनी विविध ठिकाणी आणि वेगवेगळ्या अधिकारपदांवर महत्वाची कामगिरी बजावली आहे.

जैन यांनी निम-विकसित भूप्रदेशासह, दक्षिण सुदानमधील संयुक्त राष्ट्र मिशनमध्ये एका सैनिकांच्या तुकडीचे, स्ट्राइक कोअरमधील एका पायदळ ब्रिगेडचे, दहशतवादविरोधी दलाचे आणि उत्तर कमांडमधील एका महत्त्वाच्या  कोअरचे नेतृत्व केले आहे.

ऑपरेशन पवन मधील सहभाग, इथिओपियामधील संयुक्त राष्ट्र मिशनमध्ये लष्करी निरीक्षक म्हणून केलेली सेवा आणि नियंत्रण रेषेसह ईशान्य भारतामध्ये उंचीवरील क्षेत्रात आणि दहशतवादविरोधी कारवायांमध्ये बजावलेल्या अनेक मोहिमांचा त्यांना अनुभव आहे. ते महार रेजिमेंटचे कर्नल म्हणूनही कार्यरत आहेत.

दक्षिण कमांडचे नेतृत्व स्वीकारण्यापूर्वी त्यांनी मुख्यालय दक्षिण कमांड येथे चीफ ऑफ स्टाफ म्हणून काम पाहिले होते. या पदावर असताना त्यांनी लष्करी क्षमतावृद्धी, दलाची पुनर्रचना आणि एकूणच कार्यसज्जता वाढविण्यात महत्त्वपूर्ण योगदान दिले.

त्यांनी आर्मी वॉर कॉलेज येथून उच्च कमांड अभ्यासक्रम, तसेच केनियाच्या नॅशनल डिफेन्स कॉलेजमधून नॅशनल डिफेन्स कोर्स पूर्ण केला आहे. त्यांच्या उल्लेखनीय आणि उत्कृष्ट सेवेसाठी त्यांना अतिविशिष्ट सेवा पदक(AVSM) आणि सेना पदक(SM) प्रदान करण्यात आले आहे.

कमांडची सूत्रे स्वीकारल्यानंतर लेफ्टनंट जनरल संदीप जैन यांनी युद्धात हौतात्म्य पत्करणाऱ्या सैनिकांना दक्षिण कमांडच्या युद्ध स्मारकावर आदरांजली अर्पण केली आणि मुख्यालय दक्षिण कमांड येथे गार्ड ऑफ ऑनर स्वीकारला.वाळवंट क्षेत्र, रण व खाडी प्रदेश, किनारपट्टी, बेटे तसेच अंतर्गत भाग अशा विविध कार्यक्षेत्रांमध्ये परिचालनात्मक सज्जतेवर कमांडचा सातत्याने भर राहील, असे ते म्हणाले.

तसेच त्यांनी ‘JAI’ या चौकटीअंतर्गत संयुक्त कार्यपद्धती (jointness) अधिक मजबूत करणे, स्वदेशी क्षमताविकास आणि तंत्रज्ञानाचा प्रभावी वापर यावर विशेष भर देण्याचे सांगितले. बदलत्या कार्यात्मक आव्हानांच्या पार्श्वभूमीवर सर्व स्तरांवरील अधिकाऱ्यांनी व जवानांनी उच्च दर्जाची सज्जता, व्यावसायिकता आणि लढाऊ तत्परता कायम राखावी, असेही त्यांनी निर्देश दिले.

नागपूर-मुंबई महामार्गावर जालना जिल्ह्यातील कडवंची शिवारात भीषण अपघात झाल्याची माहिती समोर आली आहे. सफाईचे काम उरकून मजूर पिकअप वाहनात बसत असताना या वाहनाला ट्रकने जोरदार धडक दिली आहे. ही धडक इतकी भीषण होती की यात मजुरांचा जागीच मृत्यू झाला आहे.

मिळालेल्या माहितीनुसार, समृद्धी महामार्गावर कडवंची गावाच्या हद्दीत साफसफाईचे काम सुरू होते सायंकाळी पाच वाजेच्या सुमारास मजूर काम संपून पिकपमध्ये बसून आपल्या घराकडे जात असताना ट्रकने त्यांना धडक दिली. अपघात झाला तेव्हा मजूर पिकपमध्ये बसतच होते. ठार झालेले सर्वजण बदलापूर तालुक्यातील खादगाव आणि केळीगव्हाण या गावातील आहेत.

जालन्यातील कडवंचीजवळ समृद्धी महामार्गावर भीषण अपघातात झाला आहे. समृद्धी महामार्गावर काम करणाऱ्या कामगारांच्या महिंद्रा पिकपला ट्रकची जोरदार धडक दिल्याने हा भीषण अपघात झाल्याची महिती समोर आली आहे. या अपघातात सात कामगारांचा जागीच मृत्यू झाला असून चालकासह ८ ते ९ जण गंभीर जखमी असल्याने त्यांना उपचारासाठी जालन्यातील जिल्हा रुग्णालयात दाखल करण्यात आलं आहे. बदनापूर तालुक्यातील केळीगव्हाण आणि खादगाव परिसरातील 15 कामगार एबी इंटरप्राईजेस या कंपनीकडून समृद्धी महामार्गावरील स्वच्छता करण्यासाठी रोज जातात. महिला कामगारांना घेऊन जात असताना हा अपघात झाला. या परिसरातील 15 महिला कामगार महिंद्रा पिकअपमध्ये बसून जात असताना भरधाव येणाऱ्या ट्रकने महिंद्रा पिकअपला धडक दिली. यात 7 महिला कामगारांचा जागेवर मृत्यू झाला आहे. 8 ते 10 महिला कामगार आणि चालक गंभीर जखमी असल्याने त्यांना उपचारासाठी जालन्यातील जिल्हा रुग्णालयात दाखल करण्यात आलं आहे. अपघातात मृत्यूची संख्या वाढण्याची शक्यता असून अपघातातील मृत्यू झालेले कामगार बदनापूर तालुक्यातील केळीगव्हाण आणि खादगाव परिसरातील असल्याची माहिती समोर आली आहे. घटनेची माहिती मिळताच नागरिकांसह जालना पोलीस आणि समृद्धी महामार्गावरील पोलिसांनी घटनास्थळी धाव घेत जखमींना उपचारासाठी जालन्यातील शासकीय रुग्णालयात हलविण्यात आले आहे.

मुंबई, दि. १ मार्च २०२६ : महाराष्ट्र शासनाच्या सांस्कृतिक कार्य विभाग आणि सांस्कृतिक कार्य संचालनालय, महाराष्ट्र राज्य, मुंबई यांच्या वतीने आयोजित हा कार्यक्रम रसिकांसाठी एक संस्मरणीय सांस्कृतिक पर्व ठरणार आहे. सातारा जिल्ह्यातील पाटण येथे दि. २ ते ६ एप्रिल २०२६ या कालावधीत ‘कोयना दौलत डोंगरी महोत्सव २०२६’ चे आयोजन करण्यात येणार आहे. सह्याद्रीच्या कुशीत वसलेल्या सातारा जिल्ह्यातील निसर्गसंपन्न पर्यटन स्थळांना राष्ट्रीय व आंतरराष्ट्रीय पर्यटन नकाशावर अधिक ठळक स्थान मिळावे, हा या महोत्सवामागील प्रमुख उद्देश आहे. या महोत्सवामुळे स्थानिक पर्यटनाला चालना मिळून ग्रामीण अर्थव्यवस्थेला बळकटी मिळणार आहे. नागरिक, शेतकरी, पर्यटक आणि उद्योजकांनी मोठ्या संख्येने सहभागी व्हावे, असे आवाहन करण्यात आले आहे.

महोत्सवामध्ये विविध सांस्कृतिक कार्यक्रम आणि उपक्रमांचा समावेश करण्यात आला आहे. दि. २ एप्रिल रोजी शाहिरी पोवाडा, ३ एप्रिलला भजनी मंडळ, ४ एप्रिलला ब्रास बँड पथकाचा थरार आणि ५ एप्रिलला लावणी महोत्सव आयोजित करण्यात आला आहे. स्थानिक लोककला, पारंपरिक सांस्कृतिक कार्यक्रम आणि नामांकित कलाकारांचे विशेष सादरीकरण यामुळे महोत्सव अधिक रंगतदार होणार आहे.

या कार्यक्रमांबरोबरच आनंदमेळा, बोटींग, घोडेस्वारी, पॅराग्लायडिंग, उंट सफारी, इलेक्ट्रिक बग्गी, कार्निवल परेड, कृषी प्रदर्शन, खाद्यजत्रा, पशु-पक्षी प्रदर्शन आणि शस्त्र प्रदर्शन यांसारखे विविध आकर्षक उपक्रम पर्यटकांना अनुभवता येणार आहेत. महिला बचत गटांना विशेष दालने उपलब्ध करून देण्यात येणार असून त्यांच्या हस्तकला आणि कलाकृतींचे प्रदर्शन व विक्री हे महोत्सवाचे खास आकर्षण ठरणार आहे.

मनोरंजन विश्वातील अनेक नामवंत कलाकार या महोत्सवात सहभागी होणार आहेत. यामध्ये संस्कृती बालगुडे, जान्हवी किल्लेकर, स्पृहा जोशी, भाऊ कदम, भारत गणेशपुरे, प्रियदर्शन जाधव, कुशल बद्रिके, हेमांगी कवी, गायक रोहित राऊत, गायिका जुईली जोगळेकर तसेच अभिजीत जाधव – आमु जाधव यांचा समावेश आहे.

डोंगरी पर्यटन महोत्सवादरम्यान पर्यटकांना स्थानिक संस्कृती, परंपरा आणि पर्यटनाची विविध रूपे अनुभवता येणार आहेत. ग्रामीण जीवनशैलीचा जवळून परिचय करून देण्यासाठी कृषी पर्यटनाशी संबंधित उपक्रम, सातारा जिल्ह्यातील पारंपरिक खाद्यसंस्कृतीचे दर्शन घडविणारे पाककृती प्रदर्शन, तसेच बोटींग शर्यती, छायाचित्र आणि चित्रकला स्पर्धा व विविध कार्यशाळा आयोजित करण्यात येणार आहेत.

राज्याच्या पर्यटन धोरणाच्या अनुषंगाने महिला सशक्तीकरण, युवा पर्यटन आणि साहसी पर्यटन यांना चालना देण्यासाठी मार्गदर्शनपर चर्चासत्रे आयोजित केली जातील. सह्याद्रीतील ऐतिहासिक गड-किल्ल्यांचा वारसा, परिसरातील प्रेक्षणीय स्थळे आणि प्राचीन मंदिरांच्या भेटींच्या विशेष पर्यटन सहली हेही महोत्सवाचे वैशिष्ट्य ठरणार आहे.

सदर कार्यक्रम मा. श्री. ॲड. आशिष शेलार, मंत्री (सांस्कृतिक कार्य व माहिती तंत्रज्ञान), महाराष्ट्र राज्य आणि मा. श्री. शंभूराज देसाई, मंत्री (पर्यटन, खनिकर्म व माजी सैनिक कल्याण विभाग), महाराष्ट्र राज्य यांच्या संकल्पनेतून, तसेच मा. श्री. डॉ. किरण कुलकर्णी, सचिव, सांस्कृतिक कार्य विभाग यांच्या मार्गदर्शनाखाली आयोजित करण्यात येत आहे.

हा कार्यक्रम सर्वांसाठी विनामूल्य खुला असून सातारा, पुणे, मुंबई तसेच राज्यभरातील पर्यटक, साहित्यप्रेमी, सांस्कृतिक रसिक आणि निसर्गप्रेमींनी मोठ्या संख्येने उपस्थित राहून या अनोख्या सांस्कृतिक व पर्यटन पर्वाचा अनुभव घ्यावा, असे आवाहन श्री. बिभीषण चवरे, संचालक, सांस्कृतिक कार्य संचालनालय, महाराष्ट्र राज्य, मुंबई यांच्या वतीने करण्यात आले आहे.

जनहितासाठी निर्णय:

मुंबई- पुणे महापालिकेतील नगरसेवक राग्वेंद्र उर्फ बाप्पू मानकर यांनी आपले पहिल्या महिन्यापासुन चे मानधन लोकोपयोगी अर्थसहाय्यसाठी महापौर निधीला अर्पण केल्यानंतर आता अशाच प्रकारचा निर्णय बृहन्मुंबई महापालिकेतील नगरसेवक तेजिंदर सिंग तिवाना यांनीही घेतला आहे.
जनसेवा आणि जनकल्याणाप्रती आपली अटळ बांधिलकी दर्शवत नगरसेवक, स्थायी व विधी समिती सदस्य तेजिंदर सिंग तिवाना यांनी प्रेरणादायी पाऊल उचलत आपले संपूर्ण वेतन जनसेवेसाठी देण्याचा निर्णय घेतला आहे.
तिवाना हे नुकत्याच पार पडलेल्या महानगरपालिका निवडणुकीत वॉर्ड ४७ मधून विजयी झाले असून त्यांनी आपल्या पुढील ५ वर्षांच्या कार्यकाळातील संपूर्ण मानधन तसेच विविध समिती बैठकींसाठी मिळणारे सर्व भत्ते महापौर निधीसाठी समर्पित करण्याचा निर्णय घेतला आहे. यासंदर्भात त्यांनी महापौर यांना निवेदनही सादर केले आहे.
यावेळी तिवाना म्हणाले, “नगरसेवक म्हणजे जो नगराची सेवा करतो, आणि ही सेवा निस्वार्थ भावनेने व्हायला हवी. जनसेवा ही माझ्यासाठी एक संकल्प आहे. जनप्रतिनिधीचे पहिले कर्तव्य म्हणजे समाजातील शेवटच्या घटकापर्यंत मदत पोहोचवणे. याच भावनेतून मी माझ्या संपूर्ण कार्यकाळातील मानधन आणि सर्व भत्ते महापौर निधीसाठी देण्याचा निर्णय घेतला आहे.”
त्यांनी विश्वास व्यक्त केला की ही रक्कम गरजू मुंबईकरांच्या मदतीसाठी आणि विविध जनकल्याणकारी योजनांच्या प्रभावी अंमलबजावणीसाठी उपयोगी ठरेल.
भारतीय जनता पक्षाने यंदाच्या महापालिका निवडणुकांमध्ये युवा उमेदवारांना प्राधान्य देत नव्या ऊर्जेसह आणि नव्या विचारसरणीसह महानगरपालिकेत सकारात्मक बदल घडवून आणण्याचा प्रयत्न केला आहे. मुंबईच्या विकासाला नवी दिशा देण्याच्या उद्देशाने घेतलेले हे पाऊल महत्त्वाचे ठरत आहे.
तेजिंदर सिंग तिवाना यांची ही पुढाकार केवळ त्यांच्या जनसेवेतील निष्ठेचे प्रतीक नाही, तर इतर जनप्रतिनिधींसाठीही एक प्रेरणादायी उदाहरण ठरते आहे .

मुंबई, दि. 1 : नवी मुंबईत जागतिक दर्जाचे आधुनिक स्टेडियम उभारण्यासाठी आवश्यक नियोजन तातडीने पूर्ण करून स्टेडियमसाठी योग्य जागेची निवड करताना कनेक्टिव्हिटी, वाहतूक व्यवस्था, पार्किंग सुविधा आणि आवश्यक पायाभूत सुविधांचा सर्वंकष विचार करावा, असे निर्देश निर्देश सांस्कृतिक कार्य व माहिती तंत्रज्ञान मंत्री तथा मुंबई उपनगर पालकमंत्री ॲड.आशिष शेलार यांनी दिले.

नवी मुंबई येथे जागतिक दर्जाचे स्टेडियम उभारण्यासंदर्भात मंत्रालयात आढावा बैठक घेण्यात आली. या बैठकीस उरण विधानसभा मतदार संघाचे आमदार महेश बाल्दी तसेच सिडकोचे अधिकारी उपस्थित होते.

नवी मुंबईत स्पोर्ट्स सिटीच्या प्रस्तावित क्षेत्रामध्ये स्टेडियम उभारणीचा पर्यायही विचाराधीन असून, त्या ठिकाणी सुमारे 50 टक्के जमीन आधीच संपादित झालेली आहे. उर्वरित जमीन टप्प्याटप्प्याने संपादित करून प्रकल्पाला गती देण्याचे निर्देश मंत्री अँड.शेलार यांनी दिले. स्टेडियमसाठी सुमारे 40 एकर जागा आणि इतर पूरक सुविधांसाठी अतिरिक्त 30 एकर जागेची आवश्यकता भासू शकते, असा अंदाजही यावेळी व्यक्त करण्यात आला.
या प्रकल्पासाठी आवश्यक आराखडा तयार करण्याबरोबरच प्रकल्प व्यवस्थापन सल्लागार नियुक्त करण्याची प्रक्रिया सुरू करण्याचेही निर्देश देण्यात आले. मात्र, त्यापूर्वी जागेचे निश्चितीकरण आणि मूलभूत नियोजन पूर्ण करण्यावर भर देण्याचे निर्देश मंत्री शेलार यांनी दिले.

दरम्यान, या प्रकल्पाचा सविस्तर आढावा घेण्यासाठी एप्रिल महिन्याच्या मध्यापर्यंत प्राथमिक अहवाल सादर करून त्यानंतर पुनरावलोकन बैठक घेण्यात येणार आहे. स्टेडियम प्रकल्प वेळेत पूर्ण व्हावा यासाठी सर्व संबंधित विभागांनी समन्वयाने काम करण्याचेही निर्देश मंत्री ॲड.शेलार यांनी दिले.

नाशिक-भोंदूबाबा अशोक खरातला न्यायालयाने 14 दिवसांची न्यायालयीन कोठडी सुनावली आहे. यापूर्वी त्याची पोलिस कोठडी संपत असल्याने विशेष तपास पथकाकडून (एसआयटी) पुन्हा कोठडी वाढवण्याची मागणी केली गेली. मात्र न्यायालयाने न्यायालयीन कोठडी देत तपासाच्या पुढील टप्प्याला वेगळे वळण दिले आहे. त्याच्याविरोधात लैंगिक अत्याचार, आर्थिक फसवणूक आणि इतर गुन्ह्यांच्या तक्रारी सातत्याने वाढत आहेत.

दरम्यान, काल रात्री उशिरापर्यंत खरातच्या घराबाहेर नाट्यमय घडामोडी घडल्या. शिर्डी येथील जमीन फसवणूक प्रकरणात अशोक खरातसह त्याची पत्नी कल्पना खरात हिच्यावर गुन्हा दाखल करण्यात आला आहे. मात्र एसआयटीचे पथक पोहोचण्यापूर्वीच कल्पना खरात फरार झाली. दुसरीकडे, खरातचा मुलगा हर्षवर्धन याला पोलिसांनी घरातून ताब्यात घेतल्याने या प्रकरणाला आणखी गंभीर वळण मिळाले आहे.

तपासादरम्यान अशोक खरात अपेक्षित सहकार्य करत नसल्याचा आरोप एसआयटीकडून करण्यात आला आहे. त्यामुळे तपास पुढे नेण्यासाठी त्याच्या मुलासमोरच चौकशी करण्याची तयारी होती. खरातकडून अधिक माहिती मिळवून फरार पत्नीचा शोध घेण्याचा पोलिसांचा प्रयत्न सुरू आहे. सुरुवातीला लैंगिक अत्याचाराच्या प्रकरणांवर लक्ष केंद्रित करण्यात आले असून त्यानंतर आर्थिक व्यवहार आणि फसवणुकीच्या बाबींची सखोल चौकशी टप्प्याटप्प्याने केली जाणार आहे.

याचवेळी एसआयटीने तपासाचा फास अधिक घट्ट करत विविध संबंधितांची चौकशी सुरू ठेवली आहे. खरातचा चार्टर्ड अकाउंटंट, ईशान्येश्वर मंदिराचा पुजारी आणि एका सराफ व्यावसायिकाची कसून चौकशी करण्यात आली. आर्थिक व्यवहार, मंदिरातील हालचाली आणि संभाव्य गैरव्यवहार याबाबत महत्त्वाचे धागेदोरे शोधण्याचा प्रयत्न केला जात आहे.

दरम्यान, न्यायालयात सादर केलेल्या पुराव्यांच्या आधारे पुढील तपासाची दिशा ठरणार आहे. पोलिसांनी जमा केलेले पुरावे आणि साक्षीदारांच्या माहितीच्या आधारे प्रकरण अधिक मजबूत करण्याचा प्रयत्न सुरू आहे. कुटुंबातील सदस्यांवर कारवाई, वाढत्या तक्रारी आणि आता मिळालेली न्यायालयीन कोठडी यामुळे अशोक खरातच्या अडचणी दिवसेंदिवस अधिकच वाढताना दिसत आहेत.

नाशिक-भोंदू अशोक खरातचे महिलांसोबतचे 3500 हून अधिक व्हिडिओ सोशल मीडियावर व्हायरल झाले आहेत. या प्रकरणाचा तपास करणाऱ्या विशेष तपास पथकाने या सर्व व्हिडिओच्या लिंक्स सोशल मीडियावरून हटवल्या आहेत. पोलिसांनी या प्रकरणी राज्यभरात 100 हून अधिक गुन्हे दाखल केले आहे. दरम्यान, या व्हायरल व्हिडिओमुळे पीडित महिला व त्यांच्या कुटुंबीयांना घराबाहेर पडणेही अवघड झाले आहे. हे सर्वजण सध्या वर्क फ्रॉम होमवर भर देत असल्याची माहिती एका पीडितेच्या नातेवाईकाने दिली आहे.

भोंदू अशोक खरातवर आतापर्यंत 10 गुन्हे दाखल झालेत. यापैकी 8 गुन्हे हे महिलांचे लैंगिक शोषण, फसवणूक व जादूटोण्याशी संबंधित आहेत. तर इतर 2 गुन्हे आर्थिक फसवणुकीशी संबंधित आहेत. या प्रकरणी विशेष तपास पथक त्याची कसून चौकशी करत आहे. पण अशोक खरातचे दररोज व्हायरल होणारे व्हिडिओ पोलिसांसाठी डोकेदुखी ठरत आहेत. यासंबंधीच्या माहितीनुसार, अशोक खरात व पीडित महिलांच्या व्हिडिओच्या तब्बल 3500 लिंक्स सोशल मीडियावर व्हायरल झाल्या आहेत. पोलिसांनी या सर्व लिंक्स सोशल मीडियावरून हटवल्या आहेत. पण त्यात आणखी काही लिंक्सची भर पडत आहे.

पोलिसांनी लिंक्स व्हायरल केल्याप्रकरणी नाशिकसह कोपरगाव, बीड, अहिल्यानगर व राज्यातील इतर जिल्ह्यांत गुन्हे दाखल केलेत. हे गुन्हे दाखल झालेल्या व्यक्तींमध्ये सामान्य नागरिकांसह सोशल मीडियावर सक्रिय असणाऱ्या काही विशिष्ट युजर्सचा समावेश आहे. ज्यांच्या मोबाईलमध्ये असे व्हिडिओ असतील त्यांच्यावरही या प्रकरणी कारवाई होण्याची शक्यता आहे. त्यामुळे संबंधितांनी ते व्हिडिओ किंवा लिंक्स तत्काळ डिलिट कराव्यात असे आवाहन पोलिसांनी केले आहे. सोशल मीडियावर अश्लील किंवा गोपनीय व्हिडिओ शेअर करणे कायद्याने गुन्हा आहे. यामुळे पीडित महिलांना त्रास होत आहे, असे पोलिसांचे म्हणणे आहे.

अधिकाऱ्यांच्या मते, अशोक खरातच्या व्हिडिओचा वेगाने होणारा प्रसार केवळ पीडितांच्या कुटुंबीयांना मानसिक आघातच पोहोचवत नाही, तर संभाव्य साक्षीदारांना पुढे येण्यापासून परावृत्तही करत आहे. त्यामुळे तपास प्रक्रियेत अडथळा निर्माण होत आहे. हे व्हिडिओ सोशल मीडियाच नव्हे तर अश्लील संकेतस्थळांवरही पोहोचले आहेत. मुख्यमंत्री देवेंद्र फडणवीस यांच्या 23 मार्चच्या निर्देशांनंतर, प्रशासनाने अशा प्रकारच्या सामग्रीविरोधात कडक कारवाई केली आहे. या संदर्भात अनेक वृत्तवाहिन्यांना नोटिसा बजावण्यात आल्या आहेत. एसआयटीच्या माहितीनुसार, हे व्हिडिओ 170 संकेतस्थळांवरून यापूर्वीच काढून टाकण्यात आले आहेत.

सोशल मीडियावर लीक झालेल्या व्हिडिओमुळे अनेक महिलाचे आयुष्य उद्ध्वस्त होण्याच्या मार्गावर आहे. पीडित महिलांसह त्यांच्या कुटुंबीयांना घराबाहेर पाऊल टाकणेही कठीण झाले आहे; परिणामी, संबंधित महिला आणि त्यांचे कुटुंबीय सध्या ‘वर्क फ्रॉम होम’ (घरून काम) करत आहेत. एका पीडितेच्या नातेवाईकाने ही गोष्ट सांगितली आहे. पीडितेच्या चुलत भावाने या प्रकरणी इंडिया टुडेशी बोलताना सांगितले की, असे काही घडेल, याची आम्ही कधी कल्पनाही केली नव्हती. आम्ही अत्यंत व्यथित झालो आहोत. मी गेल्या 7 दिवसांपासून कार्यालयात जाणे टाळले होते. आता जोपर्यंत हे प्रकरण निवळत नाही तोपर्यंत मी ‘वर्क फ्रॉम होम’ करण्याची परवानगी मागितली आहे.

( टीप :असे व्हिडीओ माय मराठी ने कधीही प्रसारित केलेले नाही.करत नाही )

नाशिक- भोंदूबाबा अशोक खरात प्रकरणात तपास जसजसा पुढे सरकत आहे, तसतसे नवे धक्कादायक तपशील समोर येत आहेत. आता पुण्यातील मॉडेल कॉलनी परिसरात त्याच्या मुलीच्या नावावर आलिशान फ्लॅट असल्याची माहिती उघड झाली आहे. ‘24 रत्नम’ या उच्चभ्रू सोसायटीतील सातव्या मजल्यावर सुमारे 1055 चौरस फुटांचा 3 बीएचके फ्लॅट 13 सप्टेंबर 2023 रोजी खरेदी करण्यात आल्याचे समोर आले आहे. या मालमत्तेमुळे खरातच्या आर्थिक व्यवहारांबाबत संशय अधिक गडद झाला आहे.

या फ्लॅटच्या खरेदीत सर्वात मोठा मुद्दा म्हणजे व्यवहाराची पद्धत. तपासात समोर आलेल्या माहितीनुसार, या व्यवहारासाठी संबंधित बिल्डरला 1 कोटी 20 लाख रुपये पूर्णपणे रोख स्वरूपात देण्यात आले. सेल डीडमध्ये कोणत्याही प्रकारच्या चेक किंवा बँक व्यवहाराचा उल्लेख नसल्याने संशय आणखी वाढला आहे. लोकांना घाबरवून किंवा फसवून पैसे उकळून विविध शहरांमध्ये मालमत्ता खरेदी केल्याचा आरोपही तपासात पुढे येत आहे.

दरम्यान, अशोक खरातच्या उत्पन्न आणि संपत्तीमध्ये मोठा तफावत असल्याचंही उघड झालं आहे. तो आयकर विभागाकडे केवळ सुमारे 12 लाखांचे वार्षिक उत्पन्न दाखवत होता, मात्र प्रत्यक्षात त्याची संपत्ती शेकडो कोटींच्या घरात असल्याची शक्यता व्यक्त केली जात आहे. कंपन्या, बांधकाम प्रकल्प आणि हार्डवेअर व्यवसायातून जीएसटी बुडवल्याचा संशयही आयकर विभागाने व्यक्त केला असून मोठी कारवाई होण्याची चिन्हे आहेत.

या सगळ्या पार्श्वभूमीवर खरातविरोधातील गुन्ह्यांची मालिका वाढतच आहे. आज त्याला पुन्हा नाशिक जिल्हा न्यायालयात हजर करण्यात येणार असून त्याची पोलिस कोठडी संपत आहे. अत्याचार आणि फसवणुकीच्या प्रकरणांमध्ये आधीच तीन वेळा कोठडी मिळालेल्या खरातसाठी एसआयटी पुन्हा कोठडी वाढवण्याची मागणी करणार आहे. दरम्यान, त्याच्या पत्नीवरही गुन्हा दाखल असून ती फरार झाली आहे, तर मुलगा हर्षवर्धन याला पोलिसांनी ताब्यात घेतले आहे.

मुलासमोरच चौकशी करण्याची तयारी

तपासात सहकार्य न केल्यामुळे आता अशोक खरातची चौकशी त्याच्या मुलासमोरच करण्याची तयारी सुरू आहे. त्याच्याकडून अधिक माहिती मिळवून फरार आरोपींचा शोध घेण्याचा प्रयत्न केला जात आहे. सुरुवातीला लैंगिक अत्याचाराच्या गुन्ह्यांवर लक्ष केंद्रित करून पुढे आर्थिक व्यवहारांची चौकशी केली जाणार आहे. आज न्यायालयात सादर होणाऱ्या पुराव्यांमुळे या प्रकरणात आणखी मोठे खुलासे होण्याची शक्यता वर्तवली जात आहे.