‎
‎पुणे : विद्यार्थ्यांचे हित, अध्यापनातील गुणवत्ता, संशोधनास चालना आणि उच्च शिक्षणाचा सर्वांगीण विकास यासाठी सावित्रीबाई फुले पुणे विद्यापीठाचा सिनेट सदस्य म्हणून कार्यरत राहीन, अशी ग्वाही आमदार सिद्धार्थ शिरोळे यांनी आज (बुधवारी) सत्कार प्रसंगी बोलताना दिली.

सावित्रीबाई फुले पुणे विद्यापीठाचे कुलगुरू प्रा. डॉ. सुरेश गोसावी यांनी पुणे विद्यापीठाचे राज्यपाल नियुक्त सिनेट सदस्य म्हणून नेमणूक झाल्याबद्दल आमदार सिद्धार्थ शिरोळे यांचा विशेष सत्कार केला आणि त्यांना शुभेच्छा दिल्या.
‎
‎या प्रसंगी बोलताना कुलगुरू डॉ.गोसावी म्हणाले, आमदार सिद्धार्थ शिरोळे यांची सिनेट सदस्य म्हणून झालेली नेमणूक ही विद्यापीठासाठी अभिमानाची बाब आहे. त्यांच्या अनुभवातून आणि दूरदृष्टीतून विद्यापीठाच्या शैक्षणिक, संशोधन आणि विकासात्मक कामकाजाला निश्चितच नवी दिशा मिळेल.”
‎
‎या गौरवाबद्दल आमदार शिरोळे यांनी कुलगुरूंचे आभार मानले. सिनेट सदस्य या नात्याने विद्यापीठातील शैक्षणिक, प्रशासकीय व विकासात्मक कामकाजामध्ये माझे सक्रीय योगदान राहील, असे आमदार सिद्धार्थ शिरोळे यांनी या प्रसंगी बोलताना सांगितले.
‎
‎या कार्यक्रमाला विद्यापीठातील सिनेट सदस्य, प्राध्यापक, अधिकारी आणि कर्मचारी उपस्थित होते.

पुणे-रावण दहनाची पूर्व तयारी म्हणून रावणाच्या मुखवट्यांचे काम लोकमान्य नगर येथील जॉगिंग पार्क या ठिकाणी सुरू आहे. यंदा 30 फुटी रावण असणार असून ओला दुष्काळ, अत्याचारी, वाढती गुन्हेगारी, बेरोजगारी अशा रूपात्मक रावणाच्या प्रतिकृतीचे दहन पुणे लोकमान्य फेस्टिवलच्या वतीने दसऱ्याच्या निमित्ताने गुरुवार २ ऑक्टोबर रोजी सायंकाळी ७. ०० वा. लोकमान्य नगर जॉगिंग पार्क जवळ करण्यात येणार आहे.

अशी माहिती पुणे लोकमान्य फेस्टिव्हलचे संस्थापक अध्यक्ष ॲड. गणेश सातपुते यांनी दिली. उत्सव प्रमुख डॉ. नरेश मित्तल, निमंत्रक शुभांगी सातपुते आहेत.

पुणे, दि. १ ऑक्टोबर : ज्येष्ठ नागरिकांचे समाजातील स्थान विचारात घेता त्यांना वृद्धापकाळात सुस्थितीत जीवन व्यतीत करता यावे, तसेच त्यांचे शारीरिक व मानसिक आरोग्य सुस्थितीत राहावे, या उद्देशाने ऑक्टोंबर महिना राज्यात जागतिक ज्येष्ठ नागरिक दिवस म्हणून साजरा करण्यात येतो.

याचे औचित्य साधून दि. 6 ऑक्टोबर रोजी दुपारी ११ ते २ वाजेपर्यंत, प्रादेशिक उपायुक्त, समाजकल्याण पुणे विभाग व सहायक आयुक्त, समाजकल्याण पुणे यांच्या संयुक्त विद्यमाने डॉ. बाबासाहेब आंबेडकर सामाजिक न्याय भवन, येरवडा येथे “ज्येष्ठ नागरिक दिन” कार्यक्रम आयोजित करण्यात येणार आहे. कार्यक्रमामध्ये दोन पिढ्यांमध्ये सुसंवाद साधण्यासाठी ज्येष्ठ नागरिक व युवक यांचा मेळावा आयोजित केला जाणार आहे. तसेच, समाजकल्याण विभागाच्या वतीने विशेष कार्य केलेल्या ज्येष्ठांचा तसेच ज्येष्ठ नागरिकांसाठी काम करणाऱ्या बिगर-सरकारी संस्थांचा सत्कार व गौरव करण्यात येईल.

यावेळी सामाजिक न्याय भवन येथे ज्येष्ठ नागरिकांसाठी आरोग्य शिबिर देखील आयोजित करण्यात आले आहे. पुणे जिल्ह्यातील सर्व ज्येष्ठ नागरिक व संबंधित संघटनांना कार्यक्रमास व आरोग्य शिबिरासाठी उपस्थित राहण्याचे आवाहन विशाल लोंढे, सहायक आयुक्त, समाजकल्याण पुणे यांनी केले आहे.

पुणे, दि. १ ऑक्टोबर : सेना चिकित्सा संगठन प्रशिक्षण केंद्र एवं कॉलेज, लखनऊ येथे युनिट हेडक्वार्टर्स कोटा अंतर्गत सन २०२५-२६ साठी सैनिक तांत्रिक (नर्सिंग असिस्टंट) पदाकरिता भरती मेळावा दिनांक ०४ नोव्हेंबर ते ०९ नोव्हेंबर २०२५ या कालावधीत आयोजित करण्यात आला आहे.

ही भरती सर्व्हिसमन, माजी सैनिक , युद्ध विधवा, विधवा तसेच सेवारत जवानांचे खरे भाऊ, माजी सैनिक आणि संरक्षण सुरक्षा कोर कर्मचाऱ्यांचा मुलगा, बंधू (जे सेना चिकित्सा संगठन मधून निवृत्त झालेले आहेत) यांच्यासाठी राहणार आहे.

भरतीसाठी इच्छुक उमेदवारांनी २० ऑक्टोबर २०२५ पर्यंत uhq2025@joinamc.in या ई-मेल आयडीवर नोंदणी करणे आवश्यक आहे. नोंदणी झाल्यानंतर उमेदवारांना तात्पुरत्या स्वीकृतीबाबत ई-मेलद्वारे माहिती देण्यात येईल. सूचित केलेल्या दिवशी उमेदवारांनी सेना चिकित्सा संगठन स्टेडियम, लखनऊ-रायबरेली रोड येथे उपस्थित राहणे बंधनकारक आहे.
अधिक माहितीसाठी जिल्हा सैनिक कल्याण कार्यालय, पुणे येथे संपर्क साधावा, असे आवाहन लेफ्टनंट कर्नल हंगे स. दै (नि.), जिल्हा सैनिक कल्याण अधिकारी, पुणे यांनी प्रसिध्दीपत्रकान्वये केले आहे.

पुणे : विजयादशमी अर्थात दसऱ्याचे औचित्य साधून साईनाथ मंडळ ट्रस्टच्या वतीने आयोजित कार्यक्रमात शालेय विद्यार्थ्यांनी पारंपरिक वेषभूषेत सहभागी होत पाटीपूजन केले. शनिवार पेठेतील न्या. रानडे बालक मंदिराच्या सभागृहात आज (दि. 1) या कार्यक्रमाचे आयोजन करण्यात आले होते.

साईनाथ मंडळ ट्रस्टचे अध्यक्ष पियूष शहा यांच्या संकल्पनेतून कार्यक्रमाचे आयोजन करण्यात आले होते. दसऱ्याला पाटी-पुस्तकांचे पूजन हे ज्ञान, सरस्वती देवी आणि शिक्षणाची देवता यांचे स्मरण करण्यासाठी केले जाते. कारण हा दिवस शारदीय नवरात्रीचा एक भाग असून महासरस्वतीची उपासना केली जाते. पूजनासाठी आठ फुटी सरस्वती पाटीची रांगोळी रेखाटण्यात आली होती. त्या भोवती बसून विद्यार्थ्यांनी सामूहिक पूजा केली. राष्ट्रीय कला अकॅडमीचे अमर लांडे, रोमा लांडे यांनी रांगोळी रेखाटली होती.

पाटी पूजन अर्थात सरस्वती पूजनाद्वारे आपली संस्कृती, परंपरा जपत उत्तम आचार-विचारांचे सोने विद्यार्थांनी लुटावे, देवी सरस्वतीची कृपा असावी या करिता विद्या आणि कलेची देवता सरस्वती मातेस वंदन करावे या हेतूने कार्यक्रमाचे आयोजन करण्यात आले, असे मंडळाचे अध्यक्ष पियूष शहा यांनी प्रास्ताविकात सांगितले.

गंधाली शाह, वज्रलेपनकार स्वाती ओतारी, अभिषेक मारणे, सतीश नाहर, न्या. रानडे बालक मंदिरच्या मुख्याध्यापिका अमिता दाते तसेच शिक्षिका शिल्पा पराडकर, मेघा रोंघे, रूपाली शुक्ल, सायली फाटक, सुवर्णा ढवळे उपस्थित होत्या.

पुणे : अल्फा इव्हेंटस्‌‍तर्फे ‌‘स्वरार्चना‌’ ही सायंकालीन रागांची मैफल आयोजित करण्यात आली आहे. मैफल शनिवार, दि. 4 ऑक्टोबर 2025 रोजी सायंकाळी 6 वाजता सेवा भवन, सी. डी. एस. एस. चौक, एरंडवणे येथे होणार आहे.

या मैफलीत ग्वाल्हेर घराण्याच्या प्रसिद्ध गायिका अपर्णा पणशीकर, ग्वाल्हेर, किराणा आणि आग्रा घराण्याची तालीम लाभलेल्या प्रसिद्ध गायिका स्मिता देशपांडे यांचे गायन होणार आहे.

संगीत कुटुंबात जन्मलेल्या स्मिता देशपांडे यांना प्रसिद्ध गायिका अलका देव-मारुलकर तसेच पंडित विवेक जोशी यांच्याकडून मार्गदर्शन लाभले आहे. पारंपरिक ग्वाल्हेर, किराणा आणि आग्रा घराण्याच्या गायकीचे सुमधुर मिश्रण हे त्यांच्या गायनाचे वैशिष्ट्य आहे.

भारतीय शास्त्रीय गायन क्षेत्रात तीन दशकांहून अधिक अनुभव असलेल्या अपर्णा पणशीकर यांना सुरुवातीस पंडित भास्करबुवा जोशी यांचे मार्गदर्शन मिळालेले असून सध्या त्या त्यांच्या मातोश्री विदुषी मीरा पणशीकर यांच्याकडे गायनाचे प्रशिक्षण घेत आहेत.

कलाकारांना लीलाधर चक्रदेव (संवादिनी), संजय देशपांडे (तबला) साथसंगत करणार आहेत. कार्यक्रम सर्वांसाठी खुला आहे. 

पुणे : केंद्रात कित्येक वर्षे असलेले भाजपचे नामांकित मंत्री नितीन गडकरी यांनी पुण्यात येऊन हवेत उडणाऱ्या बसेस आणण्याची वल्गना करत त्याबाबतचा डीपी महापालिका आयुक्तांना करण्यास सांगितले होते या हवेत उडणाऱ्या बसेस जशा भुलभुलैय्या ठरल्या तशाच पद्धतीने येरवडा ते कात्रज दरम्यानच्या बोगद्याची २० कि.मी. लांबीच्या बुयारी मार्गाची ७५०० कोटी रुपये खर्चाची संकल्पना देखील भूलभूलैय्या असल्याचे स्पष्ट झाले आहे.

शहराच्या मध्यवर्ती भागातील वाहतूक कोंडीवर उपाययोजना करण्यासाठी येरवडा ते कात्रज दरम्यानच्या बोगद्याची संकल्पना महापालिका स्तरावर गुंडाळण्यात आली आहे. व्यवहार्यदृष्टया या बोगद्याची उपयुक्तता आणि खर्चही परवडणारा नसल्याने आम्ही या बोगद्याच्या कामाला विरोध केला असल्याची माहिती महापालिका आयुक्त नवल किशोर राम यांनी पत्रकारांशी बोलताना दिली. या निर्णयामुळे सारसबाग ते शनिवार वाडा आणि शनिवार वाडा ते स्वारगेट दरम्यान बोगद्याची संकल्पनाही संकल्पनाच राहाणार असल्यावर यानिमित्ताने स्पष्ट होत आहे.

शहरातील वाहतूक कोंडीवर उपाययोजना करण्यासाठी मुख्यमंत्री देवेंद्र फडणवीस यांनी येरवडा ते कात्रज दरम्यान भुयारी मार्गाची संकल्पना मांडली होती. पीएमआरडीएला यासंदर्भातील विस्तृत अहवाल तयार करण्याची जबाबदारी दिली होती. पीएमआरडीएने प्रकल्प अहवाल तयार करण्यासाठी मोनार्क नावाची एजन्सी नेमली आहे. नुकतेच झालेल्या पुम्टाच्या बैठकीमध्ये या अहवालाच्या प्राथमिक बाबींवर चर्चा झाली. त्यामध्ये सुमारे १८ ते २० कि.मी.लांबीच्या सहा लेन रस्त्याच्या दोन बोगद्यांच्या कामासाठी ७५०० कोटी रुपये खर्च अपेक्षित असल्याचे समोर आले आहे.केवळ २० कि.मी. रस्त्यासाठी ७५०० कोटी रुपये खर्च ही महापालिकेच्या दृष्टीने प्रचंड मोठा आहे. या रस्त्याचा वापर आणि उपयोगही खर्चाच्या तुलनेने अगदी कमी वाहनांना होणार असल्याने व्यावहारीकदृष्टया हा प्रकल्प परवडणारा नसल्याची माहिती अधिकारी सूत्रांनी दिली. यासंदर्भात महापालिका आयुक्त नवल किशोर राम यांच्याकडे विचारणा केली असता, त्यांनी येरवडा ते कात्रज बोगदा फिजिबल नसल्याचे स्पष्ट केले. यामुळे हा प्रकल्प जवळपास गुंडाळण्यात आल्यावर शिक्कामोर्तब झाले आहे.

दरम्यान, कसबा विधानसभा मतदार संघाचे आमदार हेमंत रासने यांनी देखिल मध्यवर्ती पेठांतील वाहतूक कोंडी सोडविण्यासाठी बाजीराव रस्त्यावर सारसबाग ते शनिवार वाडा तसेच शिवाजी रस्त्यावर शनिवार वाडा ते स्वारगेट अशा दोन बोगद्यांतील मार्गांची संकल्पना मांडली आहे. सुरवातीला सार्वजनिक बांधकाम विभागाला या कामाचा अहवाल तयार करण्याचे आदेश देण्यात आले होते. सार्वजनिक बांधकाम विभागाने नंतर हे काम महापालिकेकडे सोपविले आहे. रासने यांनी या नियोजीत बोगद्यांच्या मार्गांची पाहाणी करण्यासाठी केंद्रीय वाहतूक मंत्री नितीन गडकरी यांना दोन महिन्यांपुर्वी कसबा मतदार संघामध्ये आणले होते. परंतू शनिवार वाड्याजवळील वाहतूक कोंडीमध्ये गडकरी यांचा ताफा अडकला. त्यामुळे गाडीतून न उतराच गडकरी तेथून परत गेले. शनिवार वाडा ही हेरीटेज वास्तू असून वाड्याच्या १०० मीटर परिसरात खोदाई तर सोडाच परंतू बांधकामाला देखिल बंदी आहे. त्यामुळे अगोदरच अडचणींचा डोंगर असलेला आणि सुमारे दोन ते अडीच हजार कोटींच्या या प्रकल्पालाही महापालिकेकडून रेड सिग्नल मिळणार हे स्पष्ट होत आहे.

पुणे: शैलपुत्री, ब्रह्मचारिणी, चंद्रघंटा, कुष्मांडा, स्कंदमाता, कात्यायनी, कालरात्री, महागौरी, सिद्धिदात्री या देवीस्तुतीतील नऊ देवींच्या रुपांचे साजेसे वर्णन करत नवदुर्गेचा सांगीतिक जागर रसिकांनी अनुभवला. रागदारी, दोन वेगवेगळ्या शैलीतून चितारलेल्या देवींच्या बालरूपातील आणि तरुणरूपातील मनमोहक चित्रांनी उपस्थितांचे लक्ष वेधून घेतले.

निमित्त होते, भाग्यश्री गोडबोले यांच्या देवींवरील स्वरचित बंदिशींच्या ‘नवदुर्गा’ सादरीकरणाचे! नवरात्रीनिमित्त अविष्कार क्रिएशन्सतर्फे शनिवार पेठेतील गांधर्व महाविद्यालय, तसेच अष्टभुजा देवी मंदिरात कलाकारांनी शास्त्रीय संगीतातील विविध रागांमधे बंदिशी सादर करीत नवदुर्गेचा जागर केला. कर्णमधुर व भावपूर्ण रागदारीने नटलेल्या या बंदिशी ऐकून श्रोते मंत्रमुग्ध झाले.

भाग्यश्री गोडबोले, प्रज्ञा देशपांडे, तेजश्री पिटके यांनी बंदिशींचे सादरीकरण केले. ज्येष्ठ संवादिनीवादक प्रमोद मराठे, तसेच त्यांची शिष्या दीप्ती कुलकर्णी यांनी संवादिनीवर, अमित जोशी यांनी तबल्यावर साथसंगत केली. अपर्णा जोशी यांनी निवेदन केले. प्रत्येक देवीचे रुप, स्वभाव लक्षात घेऊन भाग्यश्री यांनी हंसध्वनी, सरस्वती, यमन, कलावती, गौरी, हिंडोल, परमेश्वरी, नारायणी, भीमपलास या रागांत विविध तालांत बांधलेल्या बंदिशींनी रसिकांना मोहिनी घातली. माजी नगरसेविका गायत्री खडके यांनीही या कार्यक्रमाला उपस्थिती लावली.

‘मानवी हक्कांची संस्कृती रुजवावी’ – न्यायमूर्ती ए. एम. बदर

डॉ. डी. वाय. पाटील युनिटेक सोसायटीचे डॉ. डी. वाय. पाटील लॉ कॉलेज, पिंपरी मध्ये राष्ट्रीय स्तरावरील पथनाट्य स्पर्धा आणि कार्यशाळा संपन्न
पुणे – डॉ. डी. वाय. पाटील लॉ कॉलेज, पिंपरी मध्ये दोन दिवसीय राष्ट्रीय स्तरावरील पथनाट्य स्पर्धा आणि कार्यशाळा उत्साहात पार पडली. महाराष्ट्र राज्य मानवाधिकार आयोग,मुंबई व सावित्रीबाई फुले पुणे विद्यापीठाच्या राष्ट्रीय सेवा योजना विभागाच्या सहकार्याने हा उपक्रम आयोजित करण्यात आला होता. मानवाधिकारांविषयी जागरूकता निर्माण करण्याचा उद्देश असलेल्या या उपक्रमाला विविध महाविद्यालयांच्या विद्यार्थ्यांचा उत्स्फूर्त प्रतिसाद मिळाला.या दोन दिवसीय कार्यक्रमाच्या उद्घाटन सत्राला महाराष्ट्र राज्य मानवाधिकार आयोगाचे सदस्य (सेवानिवृत्त आयपीएस) श्री. संजय कुमार, सावित्रीबाई फुले पुणे विद्यापीठाच्या कार्यकारी निबंधक प्रा.(डॉ.) ज्योती भाकरे व डी वाय पाटील कला वाणिज्य विज्ञान, पिंपरी चे प्राचार्य उपस्थित होते. समारोप सत्राला राज्य मानवाधिकार आयोगाचे अध्यक्ष न्यायमूर्ती ए. एम. बदर यांच्यासह  प्र. कुलगुरू सावित्रीबाई फुले पुणे विद्यापीठ डॉ. पराग काळकर आणि राज्याचे लाचलुचपत प्रतिबंधक विभाग अतिरिक्त आयुक्त श्री. संदीप दिवाण आदी मान्यवर उपस्थित होते. स्पर्धा यशस्वी होण्यासाठी महाराष्ट्र मानव हक्क आयोगाचे निबंधक श्री. विजय केदार आणि डॉ. डी. वाय. पाटील लॉ कॉलेज, पिंपरी चे प्राचार्य, डॉ. एस. एस. 

गोपाकुमार यांच्या मार्गदर्शनाखाली आयोजक समितीचे सचिव सहा. प्रा. अर्जुन सोमवंशी, इतर आयोजक समितीचे सदस्य सहा. प्रा. डॉ विजेता चौधरी, सहा. प्रा.समृद्धी शाह, सहा. प्रा. प्रदीप केंद्रे, सहा. प्रा. डॉ. अंजुम अजमेरी,ऍड. विवेक भरगुडे व इतर सर्व शिक्षकांनी  विशेष मेहनत घेतली.पथनाट्याच्या माध्यमातून, विद्यार्थ्यांनी सामाजिक जाणिवा अधोरेखित करणारी आणि समाजात न्याय, समानता व समावेशकतेचे महत्त्व सांगणारी कथानके मोठ्या ताकदीने सादर केली. त्यांनी जटिल कायदेशीर संकल्पना आणि मानवी हक्कांचे महत्त्व आकर्षक आणि थेट संवादातून प्रेक्षकांपर्यंत पोहोचवून उत्स्फूर्त दाद मिळवली. या स्पर्धेने युवकांना रंगभूमीच्या प्रभावी वापराद्वारे सामाजिक बदलाचे वाहक बनण्याचा संदेश दिला.या राष्ट्रीय स्तरावरील स्पर्धेची मध्यवर्ती थीम ‘बदलत्या जगात मानवी हक्क: नवीन आव्हानांना तोंड देणे आणि सामायिक जबाबदाऱ्या स्वीकारणे’ ही होती. सहभागी विद्यार्थ्यांनी अभिव्यक्ती स्वातंत्र्य, लिंग समानता, सामाजिक-आर्थिक हक्क, लोकशाही मूल्ये आणि तंत्रज्ञानामुळे निर्माण होणारी आव्हाने यांसारख्या गंभीर उपविषयांवर आधारित प्रभावी पथनाट्ये सादर केली.

‘मानवी हक्कांची संस्कृती रुजवावी’ – न्यायमूर्ती ए. एम. बदर
कार्यक्रमाच्या समारोप सत्रात महाराष्ट्र राज्य मानवाधिकार आयोगाचे अध्यक्ष न्यायमूर्ती ए. एम. बदर यांनी पथनाट्याचे महत्त्व स्पष्ट केले. ते म्हणाले, “मानवी हक्क हा न्याय्य आणि लोकशाही समाजाचा आधारस्तंभ आहेत. ते प्रत्येक व्यक्तीच्या प्रतिष्ठेचे, समानतेचे आणि स्वातंत्र्याचे प्रतिनिधित्व करतात. कायद्याचे आणि संस्थांचे अस्तित्व या अधिकारांच्या संरक्षणासाठी महत्त्वपूर्ण आहे, परंतु प्रत्येक नागरिक त्यांच्या हक्कांना ओळखण्यास, आदर करण्यास आणि त्यांचे संरक्षण करण्यास सक्षम व्हावा यासाठी तळागाळापर्यंत जागरूकता पसरवणे तितकेच महत्त्वाचे आहे. सामाजिक जाणीव निर्माण करण्यात पथनाट्याने ऐतिहासिकदृष्ट्या महत्त्वपूर्ण भूमिका बजावली आहे. हे माध्यम भाषा, साक्षरता आणि वर्ग-भेद यांसारख्या अडथळ्यांना भेदून जटिल समस्या सामान्य लोकांसाठी सुगम बनवते. ही स्पर्धा केवळ कलात्मक प्रतिभा दर्शवणारी न ठरावी, तर आपल्या समाजात मानवी हक्कांची संस्कृती रुजवणारी ठरावी.”डॉ. डी. वाय. पाटील लॉ कॉलेजचे प्राचार्य, डॉ. एस. एस. गोपाकुमार यांनी या उपक्रमाच्या उद्देशाबद्दल बोलताना सांगितले की, “पथनाट्य विद्यार्थ्यांना कायदेशीर हक्क आणि कर्तव्यांच्या गुंतागुंती सर्जनशीलपणे व्यक्त करण्यासाठी एक गतिमान व्यासपीठ प्रदान करते. या माध्यमातून विद्यार्थी केवळ त्यांच्या कलागुणांचे प्रदर्शन करत नाहीत, तर सकारात्मक बदलांना प्रेरणा देऊन आपल्या समवयस्कांना सक्षम बनविण्यात हातभार लावतात.”या राष्ट्रीय स्तरावरील कार्यक्रमाने तरुण पिढीला न्याय, समानता आणि मानवी सन्मानाचे मूल्ये समाजाच्या तळागाळापर्यंत पोहोचवण्यासाठी प्रेरित केले, ज्यामुळे मानवी हक्कांचे संरक्षण ही सामूहिक जबाबदारी आहे, हा संदेश अधिक ठळकपणे अधोरेखित झाला.