लातूर मतदारसंघाचे उमेदवार डॉ. शिवाजी काळगेंच्या प्रचारार्थ इंडिया आघाडीची जाहीर सभा.

लातूर/मुंबई, दि. १ मे २०२४
काँग्रेसने देशाला स्वातंत्र्य मिळवून दिले व स्वातंत्र्यानंतर ६०-६५ वर्षात देशात विविध क्षेत्रात विकासाची कामे केली. विज्ञान, तंत्रज्ञान, कृषी, आरोग्य, शिक्षण, जलसंपदा सह सर्वच क्षेत्रात प्रगती केली. काँग्रेसने ६० वर्षात जे उभे केले ते सर्व पंतप्रधान नरेंद्र मोदींनी विकून टाकले. देश विकून देश चालवला आणि २०५ लाख कोटी रुपयांचा कर्जाचा डोंगर उभा करुन ठेवला. भाजपाने जाती धर्माच्या नावावर भांडणे लावून सामाजिक शांतता बिघडवण्याचे पाप केले. लोकसभेची ही निवडणुक देशाच्या स्वातंत्र्याची दुसरी लढाई असून लोकशाही व संविधान वाचवण्यासाठी इंडिया आघाडीची केंद्रात सत्ता आणा, असे आवाहन महाराष्ट्र प्रदेश काँग्रेस कमिटीचे अध्यक्ष नाना पटोले यांनी केले.

लातूर लोकसभा मतदारसंघाचे काँग्रेस इंडिया आघाडीचे अधिकृत उमेदवार डॉ. शिवाजी काळगे यांच्या प्रचारार्थ अहमदपूर तालुक्यातील रोकडा सावरगाव येथे महाराष्ट्र प्रदेश काँग्रेसचे अध्यक्ष नाना पटोले यांच्या प्रमुख उपस्थितीत सभा झाली. या सभेला माजी मंत्री आमदार अमित विलासराव देशमुख, आमदार वजाहत मिर्झा, राष्ट्रवादी काँग्रेस (शरदचंद्र पवार) पक्षाचे ज्येष्ठ नेते माजी मंत्री विनायकराव पाटील, शिवसेना उद्धव बाळासाहेब ठाकरे पक्षाचे लातूर जिल्हा प्रमुख बालाजी रेड्डी, अहमदपूर विधानसभा मतदारसंघाचे काँग्रेसचे निरीक्षक माजी महापौर विक्रांत गोजमगुंडे, अहमदपूर तालुका काँग्रेस कमिटीचे अध्यक्ष डॉ. गणेश कदम, एन आर पाटील, चंद्रकांत मद्दे, रामभाऊ बेल्लाळे, सिराज जहागीरदार, विलास पाटील, निळकंठ मिरकले, ज्योतीताई पवार, निलेश देशमुख, भाग्यश्री क्षिरसागर, सांब महाजन, कलीम अहमद, अनिल शेळके, शंकर गुट्टे, सोमेश्वर कदम, आर. डी शेळके, संजय पवार, विकास महाजन, श्रीकांत बनसोडे, हेमंत माकणे यांच्यासह काँग्रेस, शिवसेना, राष्ट्रवादी काँग्रेस पक्षाचे पदाधिकारी, कार्यकर्ते व नागरिक मोठ्या संख्येने उपस्थित होते.

भाजपा सरकारवर टीका करत नाना पटोले म्हणाले की, भाजपने मराठा, ओबीसी, धनगर, आदिवासी समाजाला आरक्षण देण्याचे आश्वासन दिले पण त्यांनी आरक्षण दिले नाहीच उलट राज्यात मराठा विरुद्ध ओबीसी वाद लावला. भारतीय जनता पक्ष व आरएसएस हे आरक्षण विरोधी आहेत. नरेंद्र मोदी यांची पुन्हा सत्ता आली तर ते संविधान बदलणार व संविधानाने दिलेले आरक्षणही संपवणार. भाजपने २०१४ साली खोटी आश्वासने देऊन सत्ता मिळवली, २०१९ मध्ये पुलवामा येथे हल्ल्यात ४० जवान शहिद झाले, हा हल्ला कोणी त्याचा तपास आजही लागलेला नाही. मोदी सरकारने जीएसटीच्या माध्यमातून जनतेकडून वसुली केली व अदानी, अंबानीचे घर भरले. कांदा निर्यात बंदी उठवताना गुजरातची उठवली पण महाराष्ट्रातील कांदा निर्यातला परवानगी दिली नाही. भाजपा सरकारने महाराष्ट्राचे उद्योग गुजरातला पळवले. राम मंदिर उद्घाटन व संसदेच्या नवीन इमारतीच्या उद्घाटनाला राष्ट्रपती द्रौपदी मुर्मू यांना आदिवासी असल्याने भाजप सरकार व नरेंद्र मोदी यांनी आमंत्रण न देऊन त्यांचा अपमान केला, असेही नाना पटोले म्हणाले.
काँग्रेसने जनतेला गॅरंटीकार्ड दिले आहे, गरिब महिलांना वर्षाला एक लाख रुपये देणार, ३० लाख सरकारी रिक्त पदे भरणार, शेतकऱ्यांना कर्जमाफी करणार, एमएसपीचा कायदा आणणार, शेती जीएसटी मुक्त करणार, जातनिहाय जनगणना करणार आहे असे नाना पटोले यांनी सांगितले.
माजी मंत्री आमदार अमित विलासराव देशमुख म्हणाले की, लातूरात झालेल्या पंतप्रधान मोदींच्या सभेत सामान्य माणसाच्या प्रश्नाबद्दल भाष्य करण्यात आले नाही. २०१४ च्या निवडणुकीत मराठवाडा रेल्वे कोच फॅक्टरीतून मेट्रोचे कोच तयार करू असे भाजपवाले म्हणाले होते, 2019 ला त्याच फॅक्टरीतून बुलेट ट्रेन कोच तयार करू असे म्हणाले आणि आता 2024 ला ते त्या फॅक्टरीतून वंदे भारत कोच तयार करू असे म्हणतात पण महाविकास आघाडीचे उमेदवार डॉक्टर शिवाजी काळगे हे खासदार म्हणून या फॅक्टरीतून कोच बाहेर काढतील. नांदेड अहमदपूर रेल्वे विकसित झाली पाहिजे, रोकडा सावरगाव पर्यंत प्रधानमंत्री ग्रामसडक योजने अंतर्गत रस्ता करू, या परिसरातील ऊस मांजरा परिवार घेऊन जाईल. महाविकास आघाडीच्या कार्यकर्त्यांनी एकजुटीने काम करा आणि ७ मे रोजी डॉ. शिवाजी काळगे यांच्या नावासमोरील हाताच्या चिन्हाचे बटन दाबून विक्रमी मताधिक्याने विजयी करा असे आवाहन देशमुख यांनी केले.

आमदार वजाहत मिर्झा म्हणाले की, देशातील सध्याचे वातावरण पाहता भाजपचा सुपडा साफ होणार आहे. देशाला स्वातंत्र्य काँग्रेस पक्षाने मिळवून दिले, ही निवडणूक लोकशाही व संविधान वाचवण्याची असून डॉक्टर शिवाजी काळगे हे उच्चशिक्षित सुसंस्कृत, डॉक्टर आहेत त्यांना विजयी करा असे आवाहन केले
माजी मंत्री विनायकराव पाटील म्हणाले की, देशातील व राज्यातील भाजपच्या कारभाराचा जनतेला वीट आलेला आहे. लोकशाही, संविधान भाजपमुळे धोक्यात आलेले आहे. डॉक्टर बाबासाहेब आंबेडकरांच्या राज्यघटनेनुसार ते काम करत नाहीत. मोदी शहा यांच्या काळात देशात दडपशाही वाढली आहे त्यांनी शेतकऱ्यांची आंदोलने चिरडली.
या कार्यक्रमाचे सूत्रसंचलन संग्राम पवार यांनी केले तर आभार शिवकुमार कदम यांनी मानले.

बारणे यांच्या विजयाचा निर्धार

पिंपरी, दि. 1 मे – मावळ लोकसभा मतदारसंघातील शिवसेना-भाजप-राष्ट्रवादी- मनसे- आरपीआय- रासप- मित्रपक्ष महायुतीचे उमेदवार खासदार श्रीरंग बारणे यांच्या प्रचारासाठी महायुतीतील सर्व घटक पक्षांचे नेते एकवटले असून ठिकठिकाणी संयुक्त बैठका घेऊन प्रचाराचे नियोजन करण्यात येत आहे.

खासदार बारणे यांच्या प्रचारार्थ भाजपचे मावळ लोकसभा निवडणूक समन्वयक सदाशिव खाडे व राष्ट्रवादीचे नेते माजी महापौर योगेश बहल यांच्या पुढाकाराने संत तुकारामनगर येथे महायुतीचे पदाधिकारी व कार्यकर्ते यांची मोठी बैठक आयोजित करण्यात आली होती. मतदानाची टक्केवारी वाढवून बारणे यांना विक्रमी मताधिक्याने निवडून आणण्याचा निर्धार या बैठकीत करण्यात आला.

बैठकीस आमदार उमा खापरे, माजी महापौर योगेश बहल, भाजप नेते सदाशिव खाडे, अमित गोरखे, युवा सेनेचे पश्चिम महाराष्ट्र प्रमुख विश्वजीत बारणे, माजी उपमहापौर महंमदभाई पानसरे, माजी नगरसेवक वसंत शेवडे, नारायण बहिरवाडे, बबनराव गाडवे, जितेंद्र ननावरे, निलेश बारणे तसेच नंदू कदम, माणिकराव अहिरराव, फजल शेख, मायला खत्री, विशाल काळभोर, राहुल खाडे, सतीश नागरगोजे, मंगेश धाडगे, वर्षा जगताप, सुनील पालांडे, राजेश वाबळे आदी प्रमुख पदाधिकाऱ्यांसह महायुतीचे कार्यकर्ते मोठ्या संख्येने उपस्थित होते.‌

आतापर्यंत झालेल्या प्रचाराचा आढावा या बैठकीत घेण्यात आला. संत तुकाराम नगर परिसरामध्ये प्रत्येक घरापर्यंत उमेदवाराचे परिचय पत्रक पोहोचवण्यात आले असून दुसऱ्या टप्प्यात महायुतीच्या कार्यकर्त्यांनी एकत्रितपणे घरोघर जाण्याचा निर्णय बैठकीत घेण्यात आला. महायुतीच्या वतीने एक मोठी प्रचार फेरी संत तुकाराम नगर भागामध्ये काढून जोरदार शक्ती प्रदर्शन करण्याचे ठरले.

आमदार खापरे, योगेश बहल, सदाशिव खाडे आदी नेत्यांनी बैठकीत कार्यकर्त्यांना मार्गदर्शन केले. अशाच प्रकारच्या महायुतीच्या संयुक्त बैठका शहराच्या विविध भागांमध्ये घेऊन समन्वयाने अधिक प्रभावी पद्धतीने प्रचार करण्यात येत आहे, अशी माहिती खाडे यांनी दिली.

चिंचवड, दि. 1 मे – अखिल भारतीय मराठा महासंघ, खान्देश तिळवण तली समाज मंडळ, माजी सैनिक संस्था अशा विविध संस्था संघटनांनी मावळ लोकसभा मतदारसंघातील शिवसेना-भाजप-राष्ट्रवादी- मनसे- आरपीआय- रासप- मित्रपक्ष महायुतीचे उमेदवार खासदार श्रीरंग बारणे यांना पाठिंबा जाहीर केला आहे.अखिल भारतीय मराठा सेवा संघाच्या वतीने खासदार बारणे यांना पाठिंब्याचे लेखी पत्र देण्यात आले. पत्रावर संघाचे राष्ट्रीय अध्यक्ष दिलीपदादा जगताप, राष्ट्रीय उपाध्यक्ष संतोष नानवटे, राष्ट्रीय सरचिटणीस संभाजीराजे दहातोंडे, राज्य संपर्कप्रमुख अनिल ताडगे, पिंपरी चिंचवड शहर अध्यक्ष उदयसिंह पाटील, उपाध्यक्ष संतोष भांगरे, सरचिटणीस संजय देसाई यांच्या सह्या आहेत.

मराठा महासंघाने पाठिंबा पत्रात म्हटले आहे की, सरकारच्या विविध खात्यांमध्ये निवड झालेले 2,200 तरुणांना आरक्षण रद्द झाल्यामुळे नियुक्तीपासून वंचित रहावे लागले होते. मुख्यमंत्री एकनाथ शिंदे व उपमुख्यमंत्री देवेंद्र फडणवीस यांनी कायद्यात बसून या मराठा तरुणांना नियुक्तीपत्रे दिली. मंत्रालयात राजमाता जिजाऊ मा साहेबांचे तैलचित्र बसवण्यात आले.

2016 मध्ये मराठा क्रांती मोर्चाच्या पार्श्वभूमीवर तत्कालीन मुख्यमंत्री देवेंद्र फडणवीस मराठा समाजाला शिक्षणात 13 टक्के तर नोकरीत 12 टक्के आरक्षण दिले. मराठा तरुण तरुणींना नवसंजीवनी ठरणारी सारथी संस्था स्थापन केली. त्या माध्यमातून अनेक तरुणांना शासकीय सेवेत संधी मिळाली. आण्णासाहेब पाटील आर्थिक विकास महामंडळाच्या 86,220 तरुण मराठा व्यावसायिकांना कोट्यवधी रुपयांचे आर्थिक सहाय्य उपलब्ध करून दिले, असे पत्रात नमूद करण्यात आले आहे.

नुकत्याच झालेल्या मराठा आंदोलनामुळे महायुती सरकारने न्यायमूर्ती शिंदे समिती स्थापन करून सर्व सरकारी खात्यांना कुणबी नोंदी शोधण्यासाठी आदेश दिले. त्यानुसार 57 लाख कुणबी नोंदी सापडल्या असून शोध मोहीम पुढे चालू ठेवण्यात येणार आहे. नोंदी सापडलेल्या सर्वांना त्वरित कुणबी दाखले देण्याचे आदेश सरकारने दिले आहे, त्याबद्दल पत्रात समाधान व्यक्त करण्यात आले आहे.

अखिल भारतीय मराठा महासंघाने 25 जुलै 2023 रोजी नवी दिल्लीतील जंतर-मंतर येथे लाक्षणिक उपोषण केले होते. आरक्षणाची मर्यादा वाढवून महाराष्ट्रातील मराठा व भारतातील क्षत्रिय समाजांना संवैधानिक आरक्षण द्यावे, ही मागणी महायुतीने मान्य करून नरेंद्र मोदी पुन्हा पंतप्रधान झाल्यानंतर या मागणीचा पाठपुरावा करण्याचे आश्वासन दिले आहे, असे पत्रात म्हटले आहे. मावळ लोकसभा मतदारसंघातील महायुतीचे उमेदवार श्रीरंग बारणे यांना प्रचंड बहुमताने विजयी करण्याचे आवाहन अखिल भारतीय मराठा महासंघाने केले आहे.

खान्देश तिळवण तेली समाजाचा पाठिंबा

पिंपरी-चिंचवड व पुणे परिसर खान्देश तिळवण तेली समाज मंडळाने खासदार बारणे यांना पाठिंबा जाहीर केला आहे. मावळ मतदार संघात या समाजाचे सुमारे पाच हजार मतदार आहेत. मंडळाचे अध्यक्ष अनिल चौधरी व सचिव भरत चौधरी यांनी बारणे यांना पाठिंब्याचे पत्र दिले आहे. खासदार बारणे हे खान्देश तिळवण तेली समाजाच्या अडीअडचणीच्या वेळी सदैव पाठीशी उभे राहतात व समाजाच्या उन्नतीसाठी आवश्यक ती मदत तसेच शासकीय योजनांचा लाभ मिळवून देतात. त्यामुळे समाज बांधवांच्या संमतीने खासदार बारणे यांना पाठिंबा देण्याचा निर्णय मंडळाच्या कार्यकारणीने एकमताने घेतला आहे, असे पत्रात म्हटले आहे.

देहूगाव माजी सैनिक संस्थेचा पाठिंबा

श्रीक्षेत्र देहूगाव येथील माजी सैनिक संस्थेने खासदार बारणे यांना पाठिंबा जाहीर केला आहे. संस्थेचे अध्यक्ष कन्हैयालाल सवालाखे यांनी बारणे यांना पाठिंबा पत्र दिले. सुमारे 160 नोंदणीकृत माजी सैनिकांची कुटुंबे या संस्थेची सभासद आहेत. आम्ही संस्थेसाठी देहूगाव विठ्ठलवाडी येथे सर्वे नंबर 97 मधील सरकारी जमिनीची मागणी केली असता कोणताही विलंब न लावता खासदार बारणे यांनी न हरकत प्रमाणपत्र देऊन ते जिल्हाधिकारी कार्यालयात व मंत्रालयात पोहोचवण्याबाबत मार्गदर्शन केले. खासदार बारणे यांचे संसदेतील कार्यही उल्लेखनीय आहे. सर्वांना जिवाभावाचा वाटणारा, जमिनीवरील लोकनेता भविष्यातही हवा असल्यामुळे माजी सैनिकांच्या परिवारांनी बारणे यांना पाठिंबा दिला आहे, असे पत्रात म्हटले आहे.

पुणे: ज्या राज्यांत चाळीसहून अधिक लोकसभेच्या जागा होत्या, त्या राज्यांत एक किंवा दोन दिवसांत निवडणुका झाल्या. पण महाराष्ट्राची निवडणूक पाच दिवसांत विभागली गेली. यामागचा मोदी आणि भाजपचा डाव राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांनी उघड केला.

महाविकास आघाडीच्या उमेदवारांच्या प्रचारार्थ पुणे वारजे येथे झालेल्या सभेत ते बोलत होते.

या सभेला मोठ्या संख्येने उपस्थित झालेल्या मतदारांचे आभार मानताना शरद पवार म्हणाले की, आज लोकसभा निवडणुकीच्या निमित्ताने इतक्या संख्येने तुम्ही उपस्थित असलेल्या तुमचं स्वागत करायला मला मनापासून आनंद होत आहे. देशाचं सूत्र देशाचा कारभार कुणाच्या हातात द्यायचा आणि गेली पाच दहा वर्षं ज्यांच्या हातात तुम्ही सत्ता दिली, त्यांच्या कामाचा आढावा घ्यायच्या दृष्टीने ही निवडणूकआधीची सभा अत्यंत महत्त्वाची आहे. काल देशाचे पंतप्रधान महाराष्ट्रात होते, आजही होते. चांगली गोष्ट आहे की त्यांना महाराष्ट्रात पुन्हा पुन्हा यावं लागतंय. स्थिती कशामुळे झाली? तुम्ही बघितलं तर तुम्हाला कळेल की निवडणूक आयोगाने निवडणुकीचा कार्यक्रम आखलाय, तो गमतीचा आहे. तामिळनाडूमध्ये 42 जागा आहेत. त्या जागांची निवडणूक एका दिवसात झाली. उत्तरप्रदेशमध्ये त्याहीपेक्षा जास्त जागा आहेत. त्यांची निवडणूक दोन दिवसांमध्ये. महाराष्ट्रात 48 जागा आहेत, त्याची निवडणूक पाच दिवसांमध्ये होणार आहे. कशासाठी? जर कर्नाटकची किंवा तामिळनाडूची निवडणूक एका दिवसात होऊ शकते, तर महाराष्ट्राची का होऊ शकत नाही? ती होऊ शकत नाही, त्याचं महत्त्वाचं कारण मोदींच्या यंत्रणेचा अहवाल आला असावा की त्यांना यश मिळायची शक्यता नाही. पण, पर्याय काय? त्यांनी मग हा पर्याय शोधला की महाराष्ट्राची निवडणूक चार-पाच टप्प्यात घ्यायची. पुन्हा पुन्हा त्या ठिकाणी जायचं. खोट्या गोष्टी लोकांसमोर मांडायच्या आणि लोकांची फसवणूक करून मत मिळवायचं हे सूत्र त्याच्या मागे असलं तर आश्चर्य वाटायचं कारण नाही, असं म्हणत शरद पवार यांनी मोदी आणि भाजपचा डाव उघड केला.

‘मोदी आले, त्याच्याही आधी 2014साली पहिल्यांदा आले. त्यावेळी त्यांनी सांगितलं काय? ते सांगत होते सगळ्या सभांमधून की मनमोहन सिंगांच्या राज्यात महागाई प्रचंड वाढली. ही वस्तु खरी नव्हती. साधी गोष्ट आहे, इंधनाचा दर, पेट्रोलचा दर 2014ला 71 रुपये लीटर होता. मोदींनी सांगितलं 2014ला की माझ्या हातात सत्ता आल्यानंतर 50 दिवसांत पेट्रोलचा दर खाली आणतो. 50 दिवस काय तर आज 3650 दिवस झाले मोदींनी हे आश्वासन देऊन आणि 3650 नंतर त्या पेट्रोलची किंमत काय झाली..106 रुपये लीटर. जे आश्वासन दिलं होतं, 50 टक्क्यांनी खाली आणतो आणि आज 106… तुम्हा आम्हा घरांमध्ये आई-बहीण-पत्नी स्वयंपाक करायला सिलिंडर वापरते. मोदी साहेबांनी सांगितलं की घरगुती गॅस आम्ही 410 होता, आणखीन खाली आणणार. लोकांना खरं वाटलं. तोच सिलिंडर गॅस आज अकराशे साठ रुपये झाला. त्यांनी हे सांगितलं होतं की मत द्यायला जात असाल तर सिलिंडरला नमस्कार करा आणि त्याला नमस्कार करून मत द्यायला जा. तुमची खात्री बसली की भविष्यात असंच होणार आहे. याचा अर्थ एकच आहे, चुकीच्या, खोट्या गोष्टी सांगायच्या. खोटी आश्वासनं द्यायची. या देशातील तरुणांमध्ये अस्वस्थता आहे. नोकरीच्या संधींचा शोध घेतात. मोदींनी सांगितलं की आमची सत्ता आली की एका वर्षांत दोन कोटी तरुणांना नोकरी देऊ. दहा वर्षं होऊन गेली, आज काय चित्र दिसतंय? जगात इंटरनॅशनल लेबर ऑर्गनायझेशन नावाची संघटना आहे. ती जगातल्या नोकरींच्या संधी संदर्भात अभ्यास करते. त्यांचा अहवाल नुकताच आलाय. त्यात म्हटलंय की भारतात 100 तरूण शिकून बाहेर पडले, तर त्यातल्या 87 तरुणांना नोकरी मिळत नाही. याचा अर्थ काय? दरवर्षी दोन कोटी तरुणांना नोकऱ्या देणारे मोदी आज शंभरातल्या 87 तरुणांना नोकरी देऊ शकत नाहीत. या तरुणांची फसगत करण्याची भूमिका त्यांनी घेतली. या सगळ्या गोष्टी पाहिल्यानंतर त्यांच्या हातात सत्ता देणं देशाच्या हिताचं नाही, या निष्कर्षाशी आपण पोहोचतो.’

‘सत्ता ही देशाच्या हितासाठी, भल्यासाठी, भवितव्यासाठी असते. आज मोदी या सत्तेचा वापर कसा करतात. याची उदाहरणं आहेत. एक उदाहरण देतो. झारखंड नावाचं आदिवासी लोकांचं राज्य आहे, आदिवासी मुख्यमंत्री आहे, रांची ही राजधानी आहे. या मागच्या वर्षी आदिवासी आपल्या राज्यात आदिवासींचं जीवन कसं सुधारता येईल यासाठी जिवनाची पराकाष्ठा करतात. केंद्र सरकारच्या मदतीची अपेक्षा करताहेत. केंद्र सरकारने त्यांचे जास्त प्रश्न सोडवले नाहीत. त्यामुळे एका कार्यक्रमात झारखंडच्या मुख्यमंत्र्यांनी केंद्रावर टीका केली. परिणाम काय झाला, राज्याच्या मुख्यमंत्र्याला तुरुगांत टाकलं. देशाची राजधानी दिल्ली. या दिल्लीत दोन तीन निवडुणका अरविंद केजरीवाल निवडून येत आहेत. दिल्लीमध्ये संसदेत सदस्य म्हणून जातो, तेव्हा बघतो की आज दिल्लीचा चेहरा बदलतोय. केजरीवालांनी उत्तम काम केलं. शैक्षणिक संस्थेत आणि प्राथमिक शिक्षणात अनेक सुधारणा केल्या आणि शिक्षणाचा दर्जा वाढवला. केजरीवालांनी दिल्लीत आरोग्यासंबंधी अनेक सुविधा दिल्या. त्यामुळे लोकांचं आजारपण, आरोग्याचे प्रश्न कमी झाले. म्हणून लोकांसाठी काम करणारे केजरीवाल. केंद्र सरकारने एखादं काम नीट केलं नाही म्हणून टीका केली. त्या केजरीवालांना दिल्लीच्या तुरुंगात टाकलं. एक नाही दोन मुख्यमंत्र्याना तुरुंगात टाकायचं. पंजाबच्या मंत्र्यांना अटक करायची. ममता बॅनर्जींच्या मंत्र्यांविरोधात खटले भरायचे. अनिल देशमुख, सामनाचे संपादक, शिवसेनेचे नेते उत्तम लिखाण करतात, लोकांत जागृती करतात. त्यांना तुरुंगात टाकायचं.’

‘स्वातंत्र्यापूर्वी अनेकांनी इंग्रजांच्या तुरुंगात दिवस घालवले. त्यांच्या कष्टांनी देशाला स्वातंत्र्य मिळालं. स्वातंत्र्य मिळाल्यानंतर हा देश योग्य दिशेने जाईल, याची खबरदारी ते घेतात, त्यासगळ्यांबाबत आजचे राज्यकर्ते कशा पद्धतीने बोलतात. काँग्रेस नेते राहुल गांधींनी संपूर्ण देशाचं चित्र समजण्यासाठी काश्मीरपासून कन्याकुमारीपर्यंत रस्त्यावरून चालत जातो. जनतेला भेटतो., तरुणांना, शेतकऱ्यांना, आया-बहिणींना भेटतो. आणि या देशाच्या दुसरं काय ते समजून घेऊन मार्ग काढण्याच दृष्टीने देशात फिरतो, त्या राहुल गांधींना काय म्हटलं जातं. त्यांच्यावर टीका केली जाते. का? पदयात्रा काढणं म्हणजे गुन्हा नाही. ज्या तरुणाचे वडील राजीव गांधी यांनी देशासाठी जीव दिला. त्यांच्या आई इंदिरा गांधी यांनी हौतात्म्य पत्करलं. त्यांचे वडील जवाहरलाल नेहरू स्वातंत्र्यपूर्व काळात 13 वर्षं तुरुंगात होते. आणि स्वातंत्र्यानंतर ज्यांनी संसदीय लोकशाही स्थापन आणि आधुनिक विचारांची स्थापना केली. त्यांच्याबद्दल वेडंवाकडं बोलण्याची, नालस्ती करण्याचं काम पंतप्रधानांनी केलं. पंतप्रधान या पदाला महत्त्व आहे. ते महत्त्व राखणं आपलं कर्तव्य आहे. मी कधी वैयक्तिक टीका करत नाही. पण या पदाची गरिमा त्यांनी ठेवलेली नाही. जाईल त्या राज्यात, तिथल्या नेत्यांवर टीका करायची हा कार्यक्रम त्यांनी हाती घेतलेला आहे. हे बदलायचं असेल तर आपल्याला या देशात बदल करण्याची गरज आहे. आणि ती संधी निवडणुकीच्या मताच्या रुपाने आपल्या सगळ्यांना आलेली आहे.’ असं आवाहन शरद पवार यांनी उपस्थित मतदारांना केलं.