पुणे: मराठे शाहीचे ज्येष्ठ इतिहासकार व ज्यांनी तथ्यांवर आधारित इतिहास लेखन करून महाराष्ट्रातील मराठ्यांच्या इतिहासाला एक वेगळी दिशा दिली असे थोर इतिहासकार डॉ. जयसिंगराव पवार यांचे नुकतेच कोल्हापूर येथे निधन झाले. त्यांच्या निधनापूर्वी पुण्यात गुजर-निंबाळकरवाडी कात्रज येथील रस्त्याला महाराणी ताराराणी पथ असे नामकरण त्यांच्या हस्ते करण्याच्या समारंभात तसेच नंतर झालेल्या भेटीत त्यांनी माझ्या हयातीत किल्ले पन्हाळा येथे महाराणी ताराराणी यांचा त्यांच्या 351व्या जयंती वर्षात अश्वारूढ पुतळा आणि यथोचित स्मारक व्हावे ही इच्छा व्यक्त केली होती. त्यांनी त्यासाठी महाराष्ट्र शासनाकडे सातत्याने पाठपूरावाही केला होता. सांस्कृतिक मंत्री आशिष शेलार यांनी याबाबत त्यांना आश्वासनही दिले होते.
औरंगजेबाने जेव्हा मराठा स्वराज्य नष्ट करण्यासाठी प्रयत्न चालू केले, तेव्हा ताराराणींनी किल्ले पन्हाळ्याला आपली राजधानी बनवून लढा दिला होता. सन १७०० ते १७०१ या काळात औरंगजेबाने पन्हाळ्याला वेढा दिला होता. महाराणी ताराराणींच्या नेतृत्वाखाली मराठ्यांनी तो किल्ला ९ वर्षे (१६९२-१७०१) झुंजवला. ताराराणींनी अतिशय कौशल्याने आणि धैर्याने मोगलांना टक्कर दिली, ज्यामुळे किल्ले पन्हाळा हा त्या काळातील मराठा सत्तेचा बळकट आधारस्तंभ बनला. किल्ले पन्हाळ्यावर आजही महाराणी ताराराणींचा वाडा, सुसज्ज तटबंदी आणि ऐतिहासिक स्थळे त्यांच्या पराक्रमाची साक्ष देतात म्हणूनच पन्हाळा किल्ल्यावर छत्रपती महाराणी ताराराणी बाईसाहेब यांचे जागतिक दर्जाचे स्मारक व्हावे असे डॉ. जयसिंगराव पवार यांचे स्वप्न होते. दुर्दैवाने त्यांच्या हयातीत हे स्वप्न पूर्ण होऊ शकले नाही.
आता त्यांच्या निधनानंतर त्यांचे हे अपूर्ण स्वप्न पूर्ण करण्याचा निर्धार पुण्यातील शिव शंभू प्रतिष्ठानचे अध्यक्ष महेश कदम आणि सरहद परिवाराचे मयुर मसूरकर यांनी आज एका प्रसिद्धी पत्रकाद्वारे व्यक्त केला. या स्मारकात छत्रपती महाराणी ताराराणी यांचा अश्वारूढ पुतळा आणि स्मारक उभारण्यात येणार असून यासाठी छत्रपती शाहू महाराज आणि याविषयातील तज्ञांचे मार्गदर्शन घेण्यात येईल. या स्मारक उभारणीस शासनाने विलंब न लावता परवानगी द्यावी असे आवाहन महेश कदम आणि मयुर मसूरकर यांनी केले आहे

पुणे-पुणे शहरात झालेल्या अतिवृष्टीनंतर निर्माण झालेल्या परिस्थितीवर पुणे महानगरपालिकेने तातडीने उपाययोजना सुरू केल्या आहेत. त्यानुसार, नदी आणि नाल्यांच्या बाजूला असलेल्या बेकायदा बांधकामांचे नव्याने सर्वेक्षण करून ती अतिक्रमणे काढण्यात येणार आहेत.महापौर मंजुषा नागपुरे यांनी याविषयी पत्रकार परिषदेत माहिती दिली की, सध्याचा पाऊस अनिश्चित स्वरूपाचा असून कमी वेळेत अधिक पाऊस होत आहे. यामुळे शहरातील विविध भागांत पाणी साचले, ज्यामुळे गंभीर परिस्थिती निर्माण झाली. एका ज्येष्ठ महिलेचा दुर्दैवी मृत्यू झाला, तर अनेक नागरिकांच्या घरात पाणी शिरले. या पार्श्वभूमीवर शुक्रवारी महापालिकेत आपत्कालीन बैठक घेण्यात आली.

महापालिकेने स्ट्रॉम वॉटरलाइन ड्रेनेज सफाईच्या कामाला सुरुवात केली आहे. पावसाचे पाणी वाहून नेण्याची क्षमता वाढवण्यासाठी पाइपलाइनचा आकार वाढवण्यात येणार आहे. झाडे छाटणीचे काम केवळ पावसाळ्यापूर्वीचे नसून वर्षभराचे आहे, असे सांगत नियमानुसार परवानगी देऊन कामाला सुरुवात झाल्याचे त्यांनी स्पष्ट केले. धोकादायक झाडे पावसाळ्यापूर्वी काढली जातील.

ज्यांच्या घरात पाणी शिरले आहे, त्याबाबत पंचनामा करण्यात येईल. झाड पडून मयत झालेल्या महिलेच्या कुटुंबाला पाच लाखांची आर्थिक मदत आणि अतिरिक्त दोन लाख रुपये निधी देण्यात येणार असल्याची घोषणा महापौर नागपुरे यांनी केली.
यावेळी उपस्थित असलेले पुणे मनपा आयुक्त नवलकिशोर राम यांनी माहिती दिली की, नुकताच एका तासात १०४ मिमी पाऊस झाला, ज्यामुळे दोन ठिकाणी ढगफुटीसदृश घटना घडल्या. मनपा प्रशासन सातत्याने काम करत असून, शहराचा विस्तार वाढल्याने आव्हाने वाढली आहेत.

शहरात २२७ ठिकाणी कामे करण्याची गरज असून, ती तीन विभागांत विभागून केली जातील. यापैकी १२० ठिकाणी जूनपूर्वी सर्व आवश्यक कामे पूर्ण करण्यात येतील. वर्षानुवर्षे काही ठिकाणी पाणी साचण्याच्या घटना घडत आहेत, त्या ठिकाणांचा यात समावेश आहे.

झाड छाटणीसाठी २४ तासांत परवानगी देण्यात येईल. प्रत्येक वॉर्डला कामांसाठी दहा लाख निधी दिला जातो, परंतु खर्चात कमी-अधिकता असल्याने तशा सूचना दिल्या आहेत. शहरातील ३२ धोकादायक वाड्यांमधील रहिवाशांचे एप्रिलपूर्वी स्थलांतर करण्यात येणार आहे. क्षेत्रीय अधिकारी दररोज कामावर येण्यापूर्वी दोन तास फिरून त्यांच्या भागातील अडचणींचा आढावा घेतील, असे आयुक्त राम यांनी सांगितले.

पुणे शहर देशातील एक महत्वपूर्ण शहर आहे. दुबई, सिंगापूर मध्ये देखील १०० मिमी पाऊस एक तासात झाला तर पाणी जमा होते. त्यामुळे त्रास सर्वच ठिकाणी होत असतो. पाऊस न साचता ते तात्काळ निघून गेले पाहिजे याचे प्रयत्न करण्यात येत आहे. पुणे शहरात जुनी स्ट्रॉम वॉटर पाइपलाइन केवळ १६ टक्के असून ती ११३ मिमी अपेक्षित असल्याने त्याबाबत काम सुरू आहे. बेकायदा होर्डिंग्ज बाबत ऑडिट करून नवीन गाईड लाइननुसार काम करण्यात येईल.

आवश्यकता असल्यास लोकसहभागातून १०० कर्मचारी उपलब्ध करुन देऊ!

ना. चंद्रकांतदादा पाटील यांचे निर्देश

युद्धामुळे उद्भवलेल्या परिस्थितीमुळे पाईप नॅचरल गॅस (PNG) ची मागणी मोठ्या प्रमाणात वाढली आहे. ही वाढती गरज ओळखून नागरिकांना तात्काळ नवीन कनेक्शन उपलब्ध करून देण्याचे आदेश ना. पाटील यांनी दिले. तसेच, मनुष्यबळाची कमतरता भासत असल्यास लोकसहभागातून १०० कर्मचारी उपलब्ध करुन देऊ, अशी ग्वाही राज्याचे उच्च व तंत्र शिक्षण मंत्री चंद्रकांतदादा पाटील यांनी दिली.

आखाती देशातील युद्धजन्य परिस्थितीमुळे नैसर्गिक गॅसच्या मागणीत वाढ झाल्याच्या पार्श्वभूमीवर आज ना. पाटील यांची एमएनजीएलच्या अधिकाऱ्यांसोबत बैठक घेऊन सविस्तर चर्चा केली. कोथरुड विधानसभा मतदारसंघासह संपूर्ण पुणे शहरात पीएनजी पुरवठा विनाव्यत्यय सुरू राहण्याबाबत त्यांनी आढावा घेतला.

यावेळी एमएनजीएलचे डायरेक्टर कुमार शंकर, कमर्शियल डायरेक्टर शंकर करजगी, स्वतंत्र डायरेक्टर बागेश्री मंठाळकर, व्हाईस प्रेसिडेंट शत्रुघ्न सिंह, रितेश इंगोले, ओंकार डुबल, लोकेश सरोदे आदी उपस्थित होते.

बैठकीच्या सुरुवातीला ना. पाटील यांनी एमएनजीएलच्या शहरातील पुरवठा, तांत्रिक अडचणी याबबतचा सविस्तर आढावा घेतला. तसेच, मागणी आणि पुरवठ्याबाबत ही सविस्तर माहिती जाणून घेतली. युद्धजन्य परिस्थितीमुळे अचानक मागणी वाढल्याने नागरिकांशी समन्वय साधून भागांत पाईप लाईन पोहोचवण्याचे काम जलदगतीने पुरवावे. तसेच, कामाला गती देण्यासाठी जर मनुष्यबळाची कमतरता भासत असेल, तर लोकसहभागातून १०० कर्मचारी उपलब्ध करून देण्याचे आश्वासन त्यांनी दिले.

• ‘डिजिटल जनसंवाद ही काळाची गरज’ – महानगर आयुक्त डॉ. अभिजित चौधरी

पुणे: पुणे महानगर प्रदेश विकास प्राधिकरणाचे (पीएमआरडीए) कामकाज अधिक पारदर्शक करण्यासाठी आणि नागरिकांशी थेट संवाद साधण्यासाठी ‘व्हॉईस ऑफ पीएमआरडीए’ या डिजिटल ई-न्यूजलेटरचा गुरुवारी (दि. २ एप्रिल) शानदार शुभारंभ करण्यात आला. “बदलत्या तांत्रिक युगात डिजिटल माध्यमांचा प्रभावी वापर करून जनतेशी जोडले जाणे, ही काळाची गरज आहे,” असे प्रतिपादन महानगर आयुक्त डॉ. अभिजित चौधरी यांनी यावेळी केले.

आकुर्डी येथील पीएमआरडीए मुख्यालयातील छत्रपती शिवाजी महाराज सभागृहात हा प्रकाशन सोहळा पार पडला. यावेळी सहआयुक्त (प्रशासन) रूपाली आवले-डंबे, मुख्य अभियंता रिनाज पठाण, सहआयुक्त (जमीन व मालमत्ता) पूनम मेहता, उपायुक्त हिंमत खराडे, विकास परवानगी विभागाचे संचालक अविनाश पाटील, वित्तीय नियंत्रक जितेंद्र कोळंबे, मुख्य अभियंता शिवप्रसाद बागडी, अग्निशमन विभागाचे प्रमुख देवेंद्र पोटफाडे, उपायुक्त (प्रशासन) राजेश माशेरे, तहसीलदार अभिजित जगताप यांच्यासह विविध विभागांचे प्रमुख उपस्थित होते.

पीएमआरडीएचे धोरणात्मक निर्णय, राबविण्यात येणारे विविध प्रकल्प आणि विकासकामांची अधिकृत माहिती नागरिकांपर्यंत त्वरित पोहोचावी यासाठी हे ई-न्यूजलेटर महत्त्वाचे माध्यम ठरेल. या उपक्रमामुळे पीएमआरडीएच्या कामात अधिक सुसूत्रता आणि पारदर्शकता येईल, असा विश्वास महानगर आयुक्त डॉ. अभिजित चौधरी यांनी व्यक्त केला.

कार्यक्रमाचे प्रास्ताविक करताना पीएमआरडीएच्या सहआयुक्त (प्रशासन) रूपाली आवले-डंबे यांनी या उपक्रमाची भूमिका विशद केली. पीएमआरडीएच्या योजना आणि जनहितार्थ निर्णय थेट सर्वसामान्यांपर्यंत पोहोचवण्यासाठी हे डिजिटल व्यासपीठ कार्यान्वित करण्यात आल्याचे त्यांनी नमूद केले. माहिती व जनसंपर्क अधिकारी पुरुषोत्तम सांगळे यांनी उपस्थितांचे आभार मानले.

वॉशिंग्टन:
ट्रम्प यांनी म्हटले आहे की, जर त्यांनी इराणविरुद्ध सुरू असलेले युद्ध संपवण्याचा निर्णय घेतला, तर इस्रायलही त्यांच्या सांगण्यावरून लगेच हल्ला थांबवेल. त्यांनी टाइम मॅगझिनशी बोलताना सांगितले.
टाइम्स ऑफ इस्रायलच्या अहवालानुसार, नेतन्याहू यांच्याकडे ट्रम्प यांच्या पाठिंब्याशिवाय जास्त पर्याय नाहीत. दुसरीकडे, इराणच्या सैन्याने स्पष्टपणे सांगितले आहे की, हे युद्ध तोपर्यंत सुरू राहील, जोपर्यंत त्याचे शत्रू शरणागती पत्करत नाहीत.

दरम्यान, संयुक्त राष्ट्र सुरक्षा परिषदेत (UNSC) आज म्हणजेच शुक्रवारी बहरीनच्या प्रस्तावावर मतदान होणार आहे. या प्रस्तावात देशांना होर्मुझमधून जहाजांच्या सुरक्षिततेसाठी आवश्यक सर्व पावले उचलण्याची परवानगी देण्याबाबत म्हटले आहे.
ब्रिटनच्या पुढाकाराने होर्मुज सामुद्रधुनी पुन्हा उघडण्यासाठी गुरुवारी एक ऑनलाइन बैठक झाली, ज्यात 60 हून अधिक देशांनी भाग घेतला. या बैठकीत भारताकडून परराष्ट्र सचिव विक्रम मिसरी सहभागी झाले होते.

बैठकीत विक्रम मिसरी म्हणाले की, होर्मुज संकटात आतापर्यंत केवळ भारताचेच नागरिक मारले गेले आहेत. मीडिया रिपोर्ट्सनुसार, होर्मुज संकटात आतापर्यंत 3 भारतीय खलाशी मारले गेले आहेत, हे सर्व परदेशी जहाजांवर काम करत होते.

भारताने सांगितले की, या संपूर्ण संकटावर केवळ चर्चा आणि शांततेनेच तोडगा निघू शकतो. भारताने सर्व देशांना आवाहन केले की, तणाव कमी करा आणि आपापसात चर्चा करून मार्ग काढा.
इराणी सैन्याने म्हटले आहे की जोपर्यंत शत्रू शरण येत नाही तोपर्यंत युद्ध सुरूच राहील
इराणी सैन्याने स्पष्टपणे सांगितले आहे की जोपर्यंत त्यांचे शत्रू शरणागती पत्करत नाहीत तोपर्यंत हे युद्ध सुरूच राहील.

अल जझीराच्या वृत्तानुसार, इराणी लष्करी अधिकाऱ्यांनी म्हटले आहे की, ते पूर्ण ताकदीनिशी लढा सुरू ठेवतील आणि कोणत्याही दबावापुढे झुकणार नाहीत.

इराणने अमेरिकेला जमिनीवरून हल्ला करण्याचा प्रयत्न केल्यास तीव्र प्रत्युत्तर देण्याचा इशाराही दिला आहे. वरिष्ठ लष्करी अधिकाऱ्यांनी म्हटले आहे की, कोणत्याही हल्ल्यामुळे शत्रू सैन्याचे मोठे नुकसान होईल.

पुणे :पेट्रोल आणि एलपीजी गॅसच्या दरवाढीनंतर आता सीएनजीचे दर वाढले आहेत. पुण्यामध्ये सीएनजीचे नवे भाव स्पष्ट झाले आहेत.पुण्यामध्ये सीएनजीचे दर दोन रुपयांनी वाढले असून 94.50 रुपये प्रति किलो, असे नवीन दर असतील. शुक्रवारी रात्री बारा वाजल्यापासून नवीन दर लागू होणार आहेत. 92.50 रुपये प्रति किलो मिळणारा सीएनजी आता २ रुपयांनी महाग खरेदी करावा लागणार आहे.

दरम्यान, बुधवार, दि. १ एप्रिलरोजी ‘इंडियन ऑइल कॉर्पोरेशन’ने आपल्या ‘प्रीमियम’ इंधनांच्या किमती वाढवल्या आहेत. कंपनीने ‘१००-ऑक्टेन’ पेट्रोलचे दर वाढवले ​​आहेत; हे पेट्रोल ‘XP100′ या नावाने बाजारात उपलब्ध आहे. दिल्लीमध्ये, या पेट्रोलचा दर प्रति लिटर ₹१४९ वरून वाढवून १६० रुपये करण्यात आला आहे. तसेच’एक्स्ट्रा ग्रीन’ ही प्रीमियम श्रेणीतील डिझेल देखील महाग झाले आहे. याचा दर प्रति लिटर ₹९१.४९ वरून वाढून ९२.९९ रुपये इतका झाला झाला आहे. हे नवीन दर IOCL च्या सर्व विक्री केंद्रांवर लागू करण्यात आले आहेत.

मागील आठवड्यात केंद्र सरकारने पेट्रोल आणि डिझेलच्या दरांबाबत एक महत्त्वपूर्ण निर्णय घेतला आहे. सरकारने पेट्रोलवरील विशेष अतिरिक्त उत्पादन शुल्क कमी करून ते प्रति लिटर ३ रुपये इतके केले आहे, तर डिझेलवरील हे शुल्क पूर्णपणे रद्द करण्यात आले आहे. यापूर्वी, पेट्रोलवर प्रति लिटर १३ आणि डिझेलवर प्रति लिटर १० रुपये इतके विशेष अतिरिक्त उत्पादन शुल्क आकारले जात होते.

पश्चिम आशियातील सध्याचा तणाव आणि कच्च्या तेलाच्या किमतींमध्ये झालेली प्रचंड वाढ यामुळे भारतासारख्या आयातीवर अवलंबून असलेल्या देशांवरील दबाव अधिकच वाढला आहे. या पार्श्वभूमीवर, करांमध्ये कपात करून सामान्य जनतेला दिलासा देण्याचा आणि महागाई नियंत्रणात ठेवण्याचा प्रयत्न सरकारने केला आहे. पण तज्ञांचे असे म्हणणे आहे की, जर जागतिक कच्च्या तेलाच्या किमती उच्च पातळीवरच राहिल्या, तर भविष्यात पेट्रोल आणि डिझेलच्या किमती पुन्हा एकदा वाढू शकतात.

बैल गेला अन् झोपा केला….प्रशासनाचा कारभार

पुणे: रस्त्यांच्या काँक्रीटीकरणास सातत्याने विरोध होत असतानाही त्याकडे दुर्लक्ष करून शहर परिसरात गल्लीबोळातील रस्ते सिमेंट काँक्रिटचे करून त्यातून मजबूत टक्केवारी कमविण्याची ट्रिक वर्षानुवर्षे सुरू आहे. पण या सिमेंट काँक्रिटच्या रस्त्यामुळे पाणी तुंबण्याचे प्रमाण वाढत असून, थेट वस्त्यांमध्ये पाणी घुसत असल्याचे आता कुठे महापालिकेला खरे वाटू लागले आहे.
त्यामुळे ९ मीटरपेक्षा कमी रस्त्यांचे सिमेंट कांँक्रिटीकरण केले जाणार नाही, तेथे केवळ डांबरी रस्ते केले जाईल असे आयुक्त नवल किशोर राम यांनी स्पष्ट केले आहे.

शहरात सुमारे ९०० किलोमीटर लांबीचे सहा ते १२ मीटर रुंदीचे अरुंद अंतर्गत रस्ते आहेत. या रस्त्यांवर पावसाळी गटारे आणि पाणी वाहून नेणारी यंत्रणा अपुरी असल्याने मुसळधार पावसात या रस्त्यांचे नाल्यात रूपांतर होते. सखल भागांमध्ये पाणी साचून ते थेट घरांमध्ये व इमारतींच्या पार्किंगमध्ये शिरत असल्याच्या तक्रारी सातत्याने वाढत आहेत.

यंदाच्या अवकाळी पावसाने या समस्येची तीव्रता पुन्हा समोर आणली असून सिमेंट कॉंक्रीटमुळे पाण्याचा नैसर्गिक निचरा थांबत असल्याचे स्पष्ट झाले आहे. डांबरी रस्त्यापेक्षा सिमेंटच्या रस्त्यांचा खर्च जास्त आहे. बहुतांश नगरसेवक हे ‘स’ यादीत विविध ठिकाणी सिमेंट काँक्रिटचे रस्ते करण्यासाठी म्हणून निधीची तरतूद करतात. त्यातून मिळणारी टक्केवारी जास्त असल्याने नगरसेवकांच्या दृष्टीने सिमेंटचे रस्ते महत्वाचे आहेत.

जलवाहिनी, सांडपाणी वाहिनी, पावसाळी गटार, केबल आणि इतर सेवा वाहिन्यांसाठी वारंवार खोदकाम करावे लागत आहे. सिमेंट काँक्रिटच्या रस्त्याची डांबरी रस्त्यासाठी मोठी खर्च होतो. पण हे कॉंक्रीट रस्ते तयार केल्यानंतर त्यांची पुन्हा खोदाई केल्याने रस्ते पुन्हा दुरुस्त होत नाहीत. त्यामुळे निधी वाया जात आहे. सिमेंट रस्त्यांमुळे उष्णतेत भर पडत आहे. शहरात कमी वेळात जास्त पाऊस पडल्यानंतर लहान रस्त्यावर सिमेंटच्या रस्त्यामुळे रस्त्याने मोठ्या प्रमाणात पाणी वाहते.

त्याचा परिणाम दाट लोकवस्ती असलेल्या भागात होत असून, घरांमध्ये पार्किंगमध्ये पाणी घुसत आहे. याचा विचार करून आयुक्त नवल किशोर राम यांनी गल्लीबोळातील रस्ते सिमेंटचे न करण्याचा निर्णय घेतला आहे. यासंदर्भात परिपत्रक काढण्याचे आदेश शहर अभियंता अनिरुद्ध पावसकर यांना दिले आहेत. दरम्यान, साडेसात मीटरपर्यंतच्या रस्त्यांवर आता डांबरीकरणावर भर दिला जाणार असून, त्याबाबतचे आदेश लवकरच काढले जाणार आहेत.

डांबरी रस्ते – ९०० किलोमीटर

सिमेंट काँक्रिटचे रस्ते – ४०० किलोमीटर

विकसित न झालेले रस्ते – १०० किलोमीटर

समाविष्ट गावातील रस्ते – ७०० किलोमीटर

सिमेंट रस्ता तयार करण्याचा प्रति चौरस मिटर खर्च – ६००० रुपये

डांबरी रस्ता तयार करण्याचा प्रति चौरस मिटर खर्च – ४५०० रुपये

जुन्या हद्दीतील शहरातील रस्त्यांची रुंदी आणि लांबी (किलोमीटरमध्ये)

१२ मीटरपेक्षा लहान रस्ते -९७०.८६

१२ ते २४ मीटरचे रस्ते – ३१४

२४ ते ३० मीटरचे रस्ते – ६०.५४

३० ते ३६ मीटरचे रस्ते – २९.९६

३६ ते ६१ मीटरचे रस्ते – २३.२९

पुणे- महानगरपालिका कार्यक्षेत्रात दि.०२/०४/२०२६ रोजी सायंकाळी ३.३० ते ०५.०० वाजेपर्यंत किमान ३६ ते १०४ मिमी पाउस पडल्याची माहिती महापालिकेच्या आपत्ती व्यवस्थापन विभागाने दिली आहे. महापौर यांनी शहरातील वस्तीभागामध्ये पाणी शिरलेले ठिकाणी व पावसामुळे आलेल्या नुकसानीचे तात्काळ पंचनामे करून मदत देण्याविषयीचे आदेश दिले आहेत.असेही या विभागाने स्पष्ट केले आहे

पहा दीड तासात महापालिकेच्या म्हणण्यानुसार कुठे किती झाला पाउस

१खडकवासला
104.2
२सिंहगड रोड क्षेत्रिय कार्यालय
100.2
३कोंढवा – येवलेवाडी क्षेत्रिय कार्यालय
92.2
४बिबवेवाडी क्षेत्रिय कार्यालय
81.4
५कोथरूड-बावधन क्षेत्रिय कार्यालय
66.6
६वारजे- कर्वेनगर क्षेत्रिय कार्यालय
59.2
७वानवडी – रामटेकडी क्षेत्रिय कार्यालय
54.6
८येरवडा- कळस धानोरी क्षेत्रिय कार्यालय
54

९भवानी पेठ क्षेत्रिय कार्यालय
54
१०कसबा – विश्रामबाग क्षेत्रिय कार्यालय
53
११ढोले पाटील रोड क्षेत्रिय कार्यालय
50.2


१२शिवाजीनगर घोले रोड क्षेत्रिय कार्यालय
48
१३औंध-वाणेर क्षेत्रिय कार्यालय
43
१४हडपसर-मुंढवा क्षेत्रिय कार्यालय
37
१५नगर रोड वडगाव शेरी क्षेत्रिय कार्यालय
36.4
महापालिकेच्या आपत्ती व्यवस्थापन विभागाने असेही म्हटले आहे कि,’ दि.०२/०४/२०२६ रोजी पुणे महानगरपालिका क्षेत्रात अवकाळी पावसामुळे आपत्कालीन कक्षाकडे पाणी साठण्याच्या, चेंबर तुंबलेबाबत, घरामध्ये पाणी घुसलेबाबत साधारण १४५ व झाडे पडण्याच्या साधारण २१ तक्रारी प्राप्त झाल्या आहेत. प्राप्त आलेल्या तक्रारी संबंधित क्षेत्रिय कार्यालयामार्फत मनुष्यबळ पाठवून तात्काळ मदत पुरविण्यात आली आहे. आपत्ती व्यवस्थापन विभागाकडून सर्व विभागांसमवेत समन्वय ठेऊन तात्काळ मदतीविषयी माहिती दिली त्याचप्रमाणे आपत्ती व्यवस्थापन कक्ष, जिल्हाधिकारी कार्यालय यांना पाणी शिरलेल्या ठिकाणी तात्काळ पंचनामा करणेविषयी व महापालिका सहाय्यक आयुक्त स्तरावर कळविण्यात आले आहे.

नागरिकांना आपत्कालीन परिस्थितीमध्ये संपर्काकरिता पुणे महानगरपालिका आपत्कालीन कक्ष संपर्क क्रमांक (२४x७) कार्यरत आहे.
१) ०२०-२५५०१२६९
२) ०२०-२५५०६८००

उप आयुक्त (परिमंडळ), महापालिका सहाय्यक आयुक्त, उप अभियंता, क्षेत्रिय स्तरावरील कनिष्ठ अभियंता, वरिष्ठ आरोग्य निरीक्षक, आरोग्य निरीक्षक पाणी साठणाऱ्या ठिकाणी तात्काळ आवश्यक असणारी मदतीकरिता पोहचले. या ठिकाणी नागरिकांना आवश्यक असणारी व पाणी साठणाऱ्या ठिकाणी मदतीकरिता अग्रिशमन दलाकडील कर्मचारी व आरोग्य विभागाचे कर्मचारी हे प्रत्यक्ष कामाच्या ठिकाणी उपस्थित होते. क्षेत्रिय स्तरावरील JCB, युटीलिटी व्हॅन, झाडपडी गाडी, डंपर, इलेक्ट्रीकल वाहन व त्याचप्रमाणे कटर्स, रीसायक्लर मशीन इत्यादीचा वापर करून पाण्याचा निचरा करण्यात आला. सदर ठिकाणी प्रत्येक क्षेत्रिय कार्यालयाकडील सर्व सेवक या ठिकाणी उपस्थित होते.
पुणे शहरामध्ये प्रामुख्याने खडकवासला परिसर, सिंहगड रोड, बिबवेवाडी पुणे शहराच्या पेठेचा भाग कोंढवा, विश्रामबाग वाडा, फर्गुसन कॉलेज रोड, स्वारगेट, समतानगर, कोरेगाव पार्क, गुंजन चौक, पुणे विद्यापीठ, उंड्री, हडपसर गाडीतळ, वारजे या भागातून पाणीसाठले बाबतच्या तक्रारी प्राप्त झाल्या आहेत. त्याचप्रमाणे सिंहगड रस्ता येथे आड पडून महिलेचा मृत्यू आल्याची माहिती प्राप्त आली आहे.
सर्व उप आयुक्त, महापालिका सहाय्यक आयुक्त बांधकाम विभाग, पथ विभाग, मोटर वाहन विभाग, मलनिस्सारण विभाग, पाणीपुरवठा, विद्युत विभाग, अग्निशमन विभाग, आपत्ती व्यवस्थापन विभाग यांनी समन्वय साधून तात्काळ पाणी साठणाऱ्या ठिकाणी तसेच शहरातील अवकाळी पावसामुळे निर्माण झालेल्या परिस्थितीस प्रतिसाद दिला व तात्काळ मदत करण्यात आली.
महापालिका आयुक्त, अतिरिक्त महापालिका आयुक्त (ज) व (वि), शहर अभियंता, मुख्य अभियंता (मलनिस्सारण), मुख्य अभियंता (विद्युत), मुख्य अभियंता (पथ), अधिक्षक अभियंता (भवन रचना विभाग), उप आयुक्त (कर आकरणी व करसंकलन) यांनी आपत्ती व्यवस्थापन कक्ष, पुणे महानगरपालिका या ठिकाणी भेट देऊन पुणे शहरातील पावसामुळे उदभवलेल्या परिस्थितीचा आढावा घेतला. महापालिका आयुक्त यांनी शहरातील पाणी साठलेल्या ठिकाणी व शहरातील विविध घडलेल्या घटनांबाबत तात्काळ आवश्यक असणारी सर्व कार्यवाही करणेबाबतचे आदेश सर्व खातेप्रमुख व विभागप्रमुखांना दिले.
महापौर, पदाधिकारी व सभासद यांनी क्षेत्रिय स्तरावर शहरातील परिस्थितीची माहिती घेतली व तात्काळ मदत करणेविषयी सूचना केल्या. तसेच महापौर यांनी शहरातील वस्तीभागामध्ये पाणी शिरलेले ठिकाणी व पावसामुळे आलेल्या नुकसानीचे तात्काळ पंचनामे करून मदत देण्याविषयीचे आदेश दिले आहेत.