पुणे-डेक्कन एज्युकेशन सोसायटीच्या (डीईएस) फर्ग्युसन महाविद्यालयात स्वातंत्र्यवीर सावरकरांना त्यांच्या जयंती निमित्त अभिवादन करण्यात आले. सावरकर विद्यार्थीदशेत 1902 ते 1905 या कालावधीत महविद्यालयाच्या वसतिगृहात राहात होते.
वसतिगृहातील ही खोली आज सर्वांना दर्शनासाठी खुली होती. सावरकरांचा अर्धपुतळा, साहित्य संपदा, पलंग, खुर्ची आदी साहित्याचे जतन करण्यात आले आहे. सावरकरांच्या जीवनातील महत्त्वाचे प्रसंग विषद करणारी भित्तीचित्रे रेखाटण्यात आली आहे.
डीईएसचे अध्यक्ष डॉ. शरद कुंटे यांच्या हस्ते सावरकरांच्या प्रतिमेचे पूजन करण्यात आले. उपाध्यक्ष महेश आठवले, प्राचार्य डॉ. आर. जी. परदेशी, कार्यवाह प्रा. धनंजय कुलकर्णी, प्राजक्ता प्रधान, उपप्राचार्य स्वाती जोगळेकर, प्रा. आनंद पाटेकर यांची प्रमुख उपस्थिती होती.
अजित कुंटे या दिव्यांग विद्यार्थ्याला ‘स्वा. सावरकरांची विज्ञाननिष्ठा’ या जयंत नारळीकर यांनी लिहिलेल्या लेखाचे अभिवाचन केले. दिवसभर सावरकर भक्तांनी दर्शनासाठी मोठी गर्दी केली होती.