उद्गारच्या दशकपूर्तीनिमित्त आयोजन
पुणे : उद्गार संस्थेच्या दशकपूर्तीनिमित्त ‘अनुकृती’ या कथक मैफलीचे आयोजन करण्यात आले आहे. येत्या शनिवारी (दि.२०) बालशिक्षण मंदिर, मयूर कॉलनी, कोथरूड येथे सायंकाळी ५.३० वाजता ही मैफल होणार आहे.कथक कलेला एका वेगळ्या उंचीवर नेणाऱ्या गुरू रोहिणी भाटे यांच्या अजरामर नृत्यरचनांचे सादरीकरण या मैफलीत होईल. गुरू रोहिणी भाटे यांच्या ज्येष्ठ शिष्या निलिमा अध्ये, मनीषा अभय, आभा वांबूरकर यांच्यासह उद्गार संस्थेच्या शिष्या या सुंदर रचनांचे सादरीकरण करतील. तसेच उद्गारच्या दशकपूर्तीचे औचित्य साधून २ फेब्रुवारीला ‘मंथन’ या अनोख्या कार्यक्रमाचेही आयोजन करण्यात आले आहे. त्रिविधा, चैतन्य, राधा, सा-रंगी आणि कर्म या संकल्पनेवर आधारित विविध नृत्य रचनांची अनुभूती मंथन मैफलीतून रसिक प्रेक्षकांना घेता येणार आहे. आसावरी पाटणकर यांच्या संकल्पनेतून व मार्गदर्शनातून हा कार्यक्रम होत असून अनुकृती आणि मंथन या दोन्ही कार्यक्रमाचा आस्वाद पुणेकरांनी घ्यावा, असे आवाहन उद्गारतर्फे करण्यात येत आहे.
