१९१ देशांच्या २ अब्ज लाेकांनी केली याेगासने
नवी दिल्ली : पंतप्रधान नरेंद्र मोदी यांच्या नेतृत्वाखाली आज राजपथावर झालेल्या पहिल्यावाहिल्या आंतरराष्ट्रीय योग दिनाच्या सोहळ्यात राजनैतिक अधिकारी, जवान, सरकारी कर्मचारी आणि विद्यार्थ्यांसह सुमारे 35 हजार नागरिक सहभागी झाले. मोदींनी यावेळी स्वतः विविध आसने केली .
रफी मार्ग ते विजय चौक ओलांडून इंडिया गेटपर्यंतचा दोन किलोमीटरचा संपूर्ण मार्ग हिरव्या कारपेटवरील निळ्या आणि लाल चटयांनी भरून गेला होता. सर्व वयोगटांतील लोकांनी एकत्रितपणे 35 मिनिटे योगासनांचे 21 प्रकार केले. यात ध्यानधारणा तसेच काही सुलभ आसनांचा समावेश होता.
राजपथवर झालेला हा योग सोहळा आजवरचा सर्वांत विक्रमी असून, या सोहळ्याची नोंद गिनेस बुक ऑफ वर्ल्ड रेकॉर्डमध्ये होण्याची शक्यता आहे. एकाच वेळी इतक्या मोठ्या संख्येने योगसाधना करण्याचा हा जगातील पहिलाच सोहळा असल्याचा आयोजकांचा दावा असून, या सोहळ्याची गिनेसमध्ये नोंद व्हावी, यासाठी अर्ज करण्यात आला आहे, अशी माहिती “आयुष‘ अर्थात योग मंत्रालयाने दिली. भव्य योगसाधना सोहळ्याचा यापूर्वीचा गिनेस विक्रम विवेकानंद केंद्राच्या नावावर आहे. विवेकानंद केंद्राच्या वतीने 19 नोव्हेंबर 2005 रोजी ग्वाल्हेर येथे योगशिबिर भरविण्यात आले होते. त्यात 29,973 लोकांनी सहभाग घेतला होता
नरेंद्र मोदी यांनी संयुक्त राष्ट्रसंघासमोर ठेवलेल्या प्रस्तावाला 177 देशांनी पाठिंबा दर्शविला आणि 21 जून हा आंतरराष्ट्रीय योग दिन साजरा करण्याचे ठरले. यामध्ये 47 मुस्लिम देशांचा समावेश होता. शांती आणि एकजुटीच्या नव्या उंचीचे मोजमाप करण्यासाठी मानवी मनाला प्रशिक्षित करण्याचे नवे पर्व सुरू झाले असल्याचे सांगून मोदी यांनी आजच्या कार्यक्रमादरम्यान योगाच्या व्यापारीकरणाविरुद्धही सावधनतेचा इशारा दिला.
एकत्रित योगाभ्यास कार्यक्रमात सहभागी होऊन प्रत्येकाला आश्चर्यचकित करण्यापूर्वी 64 वर्षे वयाचे मोदी म्हणाले, की कोणी विचार केला होता की राजपथ योगपथ बनेल? अमेरिकेचे भारतातील राजदूत रिचर्ड वर्मा यांच्यासह विविध देशांचे राजदूत या सोहळ्यात सहभागी झाले होते. त्याचप्रमाणे केंद्रीय मंत्रालयांच्या सचिवालयातील उच्चपदस्थ अधिकारी तसेच पंतप्रधान कार्यालयातील अधिकारीही या वेळी उपस्थित होते.
योगसाधना केवळ शरीराचा व्यायाम नसून, मनुष्याच्या आंतरिक विकासासाठी योगसाधना आवश्यक आहे. ते तणावमुक्ती आणि शांततेचेही साधन आहे, असे प्रतिपादन नरेंद्र मोदी यांनी योगासनाच्या कार्यक्रमापूर्वी आपले विचार मांडताना केले. ते म्हणाले, की विकासाचे नवनवे टप्पे पादाक्रांत केले जात आहेत. तंत्रज्ञानामुळे अनेक बदल घडताहेत. पण या सर्वांमध्ये माणूस तिथेच राहिला आहे, असे व्हायला नको. तसे झाले तर ते संपूर्ण मानवजातीसाठी धोकादायक असेल. योगसाधनेमुळे मनुष्याचा आंतरिक विकास होतो. ते केवळ शरीराचे व्यायामप्रकार नाहीत. मन, बुद्धी, शरीर आणि आत्मा हे सगळे संतुलित करण्यासाठी योगसाधनेची भूमिका महत्त्वाची आहे.
21 जून हा आंतरराष्ट्रीय योग दिन जाहीर केल्याबद्दल त्यांनी संयुक्त राष्ट्रसंघाचे, त्याचबरोबर या ठरावाला पाठिंबा देणाऱ्या देशांचे आभार मानले. आज सूर्याची पहिली किरणे जिथे उगवतात तेथपासून ते सूर्याच्या शेवटच्या किरणांपर्यंत जगातील सर्व देशांमध्ये योगसाधना केली जाईल, याबद्दल त्यांनी आनंद व्यक्त केला. योगसाधना पुढे घेऊन जाणाऱ्या ऋषी-मुनींचे, योगशिक्षकांचे, योगगुरूंचे त्यांनी आभार मानले. या वेळी उपस्थित योगगुरू रामदेव बाबा यांनीही योगा हा वैज्ञानिक, सार्वत्रिक आणि धर्मनिरपेक्ष असल्याचे नमूद केले.
