‘नोटबंदी काळातील बँकांची तपासणी-राजकीय डावपेच, असंतुष्टांच्या तक्रारी हे कारण असू शकते
‘ठेवीदार, सभासद, हितचिंतकांनी घाबरू नये ‘
: बँकेचे अध्यक्ष डॉ. पी. ए. इनामदार यांचे निवेदन
पुणे : पुणे येथील दि मुस्लीम को- ऑपरेटिव्ह बँकेत आज( गुरुवारी ) केंद्रीय गुप्तचर खात्याच्या अधिकाऱ्यांनी येऊन बँकेच्या एक- दोन नोंदवह्यांच्या प्रती घेतल्या, या पूर्वीही सीबीआय अधिकारी मुस्लीम बँकेत येऊन गेलेले आहेत, मात्र त्यांनी कोणत्या कारणासाठी बँकेला भेट दिली हे सांगितलेले नाही.
‘बँकेच्याच दोन संचालकांनी बँक व माझ्याविरुद्ध जाणून बुजून तक्रारी केल्याचा किंवा सध्याच्या सत्ताधारी पक्षाच्या एका व्यक्तीच्या कर्ज प्रकरणाला ज्यांनी विरोध केला, त्यांच्याच राजकीय डावपेचाचा हा भाग असण्याची शक्यता आहे, ‘ असे मुस्लीम को -ऑपरेटिव्ह बँकेचे अध्यक्ष डॉ. पी. ए. इनामदार यांनी प्रसिद्धीस दिलेल्या पत्रकात म्हटले आहे.
‘दबाव तंत्राचा वापर करून कर्ज मिळावे किंवा अन्य फायदे मिळतात का हे पाहणे , हे देखील कारण असू शकते. नोटबंदीच्या काळात अनेक सहकारी बँकांच्या नोंदी तपासल्या जात आहेत, त्या तपासणीचाही हा भाग असू शकतो. बँकेचे ठेवीदार, सभासद, हितचिंतक यांनी घाबरून जाऊ नये ‘ , असेही डॉ. पी. ए. इनामदार यांनी म्हटले आहे.