मराठी सिनेमांमधील सुपरस्स्टार स्वप्नील जोशी आणि अमृता खानविलकर पहिल्यांदाच एकत्र एका सिनेमात दिसणार असून ‘वेलकम जिंदगी’ असं या सिनेमाचं टायटल आहे. आकर्षक इंग्लिश हिंदी टायटल असलेला ‘वेलकम जिंदगी’ हा मराठीतील अनेक दिग्गज कलाकारांनी सजलेला सिनेमा असणार आहे. येत्या २६ जून रोजी हा सिनेमा महाराष्ट्रातील प्रेक्षकांच्या भेटीस येणार आहे.
दिग्दर्शक उमेश घाडगे यांनी ‘वेलकम जिंदगी’ सिनेमाचं दिग्दर्शन केलं आहे. तर मराठीतील सुपरस्टार स्वप्नील जोशी आणि लोकप्रिय अभिनेत्री अमॄता खानविलकर हे दोघे या सिनेमाच्या निमित्ताने पहिल्यांदाच एकत्र बघायला मिळणार आहेत. त्यामुळे या सिनेमाची रंगत ह्या गोडजोडीने वाढणार आहे. दोघांची अभिनयाची जुगलबंदी बघण्यासाठी प्रेक्षकांची उत्सुकताही वाढली आहे. ‘वेलकम जिंदगी’ सिनेमाची निर्मिती अजित साटम, संजय अहलुवालिया आणि बीभास छाया यांनी केली असून या सिनेमामुळे प्रेक्षकांना एक दर्जेदार सिनेमा लवकरच बघायला मिळणार आहे.
‘वेलकम जिंदगी’ सिनेमात स्वप्नील जोशी, अमृता खानविलकर, महेश मांजरेकर, डॉ.मोहन आगाशे, मुरली शर्मा, भारती आचरेकर, राजेश्वरी सचदेव, प्रशांत दामले, उर्मिला कानेटकर, पुष्कर श्रोत्री, विवेक लागू, सतिश आळेकर आणि जयंत वाडकर अशी लोकप्रिय कलाकारांची भलीमोठी लिस्ट आहे. यावरून या सिनेमात काय धमाल बघायला मिळणार याकडे नजरा लागल्या आहेत. सिनेमाचे लेखन गणेश मतकरी यांनी केलं आहे. आता इतकी मोठी स्टारकास्ट आणि गणेश मतकरी यांच्यासारख्या प्रतिभावंत लेखकाने सिनेमाचे लेखन केले आहे, याने आणखीनच सिनेमाची उत्सुकता वाढणार आहे.
सिनेमाला अमित राज, पंकज पडघन, शामीर टंडन, सौमिल आणि सिद्धांत या संगीतकरांनी संगीत दिले आहे तर सिनेमाची गीते गुरू ठाकूर, ओमकार मंगेश दत्त, मंदार चोळकर, वरूण लिखाते यांनी लिहिली आहेत. येत्या २६ जून रोजी हा सिनेमा प्रेक्षकांच्या भेटीस येतो आहे.