पुणे- प्रलंबित मागण्यांसंदर्भात शासनाच्या वतीने सातत्याने होत असलेल्या चालढकलीच्या निषेधार्थ राज्यातील राजपत्रित अधिकारी 7 ऑगस्ट पासून तीन दिवस संपावरजाणार असून पुणे जिल्हयातील दहा हजार अधिकारी सहभागी होणार असल्याची माहिती पुणे जिल्हा महाराष्ट्र राज्य, राजपत्रित अधिकारी महासंघाचे अध्यक्ष एन.पी.मित्रगोत्री तसेच पुणे जिल्हा समन्वय समितीचे सरचिटणीस इंजि. विनायक लहाडे यांनी दिली.
याबाबत अधिक असे की, सातत्याने व अभ्यासपूर्वक निवेदने पाठवून, तसेच मुख्यमंत्री व मुख्य सचिव यांच्याबरोबर झालेल्या अनेक बैठकीत आग्रही मागणी केल्यानंतरही सातवा वेतन आयोग लांबतच आहे, महागाई भत्ता वेळेवर मिळत नाही, महागाई भत्त्याची थकबाकी वाढतच आहे. 45 मिनिटे अधिक काम करण्याची तयारी दर्शवून देखील केंद्र शासनाच्या धर्तीवर तसेच आठ राज्यात लागू असलेल्या पाच दिवसांच्या आठवडयाची मागणी मान्य होत नाही, केंद्रात व 23 राज्यात सेवानिवृत्तीचे वय 60 वर्षे असतांना (दोन राज्यात तर 62 वर्षे), तसेच आपल्याच राज्यात काही संवर्गांना 62-65 वय असताना, राज्य शासकीय सेवानिवृत्तीचे वय 58 वर्षे हेच ठेवले आहे. सेवाभरतीसाठी वय 38 व 43 वर्षे असतांना सेवानिवृत्तीच्या वयात वाढ होत नाही, हा विरोधाभास आहे, रिक्त पदे जवळपास दोन लाखांपर्यंत आहेत आणि विविध मार्गांनी खाजगी भरती मात्र सुरु आहे. अशावेळी गप्प राहून अन्याय सहन करणे थांबवले पाहिजे. “अन्याय करणा-यांपेक्षा अन्याय सहन करणारे अधिक दोषी असतात’’ दमबाजी मारहाण करणा-या लोकप्रतिधिींचे प्रतिनिधीत्व रद्द करण्याची संबंधित कायदयात तरतूद झाली पाहिजे. “गणपती / दिवाळी या सणासुदीस 7 वा वेतन आयोग मिळणार’’ या शासनाकडून होणा-या फसव्या व दिशाभूल करणा-या घोषणा निराधार आहेत, याबाबत महासंघाची पूर्ण खात्री पटली आहे.
या सर्व पार्श्वभूमीवर, सातवा वेतन आयोग व अन्य प्रलंबित मागण्यांसंदर्भात शासनाच्या वतीने सातत्याने होत असलेल्या चालढकलीच्या निषेधार्थ आंदोलन करणे क्रमप्राप्त झाले आहे. आंदोलनाबाबत चर्चाविनिमय करुन ठोस निर्णय घेण्यासाठी अधिकारी महासंघाने 31 जुलै पूर्वी चर्चेस बोलवावे असे आवाहन मुख्यमंत्री यांना केले होते मात्र शासनाने त्यास प्रतिसाद दिला नाही. कार्यकारिणीची बैठक दि. 2 ऑगस्ट 2018 रोजी संपन्न झाली. या बैठकीमध्ये, शासनाच्या वेळकाढू धोरणाबाबत सर्व संघटनांच्या पदाधिका-यांनी तीव्र नाराजी व्यक्त करुन तीन दिवस संप करण्याबाबत आग्रही भूमिका घेतली. त्या अनुषंगाने, 72 राजपत्रित अधिकारी संघटनांच्या महासंघाने एकमताने दि. 7 ऑगस्ट ते 9 ऑगस्ट 2018 या तीन दिवसांच्या संपाचा निर्णय घेतला आहे. सर्व अधिका-यांना संपात सहभागी व्हावे, असे आवाहनही पुणे जिल्हा महाराष्ट्र राज्य, राजपत्रित अधिकारी महासंघाचे अध्यक्ष एन.पी.मित्रगोत्री तसेच पुणे जिल्हा समन्वय समितीचे सरचिटणीस इंजि. विनायक लहाडे यांनी केले आहे.
