२१ व्या शतकामध्ये विकसनशील राष्ट्राच्या प्रगतीमध्ये शिक्षण फार मोठी भूमिका बजावत आहे. उच्च तंत्रशिक्षणाचे ज्ञान देशाच्या विकासामध्ये महत्वाची भूमिका बजावू शकते, म्हणून विद्यार्थ्यासाठी तांत्रिक शिक्षण गरजेचे आहे. जागतिक स्तरावरील उच्च व गुणवत्तापूर्ण शिक्षणासाठी आजच्या शिक्षण व्यवस्थेमध्ये अमुलाग्र बदल होत आहेत. विद्यार्थ्यांना रोजगाराच्या नव्या संधी उपलब्ध व्हाव्यात. औद्योगिक क्षेत्राची कुशल मनुष्यबाळाची गरज पूर्ण व्हावी यासाठी अखिल भारतीय तंत्र शिक्षण परिषदेने स्कील इंडिया या उपक्रमांतर्गत विद्यार्थ्यांना बारावी नंतर बॅचलर ऑफ व्होकेशनल कोर्स हा एक उत्तम पर्याय उपलब्ध करून दिला आहे. कोरोनानंतर शिक्षणपद्धती, अभ्यासक्रम, नोकरीच्या संधी, रोजगाराच्या संधी या मध्ये अमुलाग्र बदल होणार आहेत. या पार्श्वभूमीवर बाजार पेठेची गरज ओळखून रोजगाराभिमुख अभ्यासक्रमाचे शिक्षण घेणे केव्हाही फायदेशीर होणार आहे. ह्या विचाराने हा लेख लिहिण्याचा प्रयत्न आहे. सध्यस्थितीमध्ये विविध क्षेत्रात अद्यावत तंत्रज्ञानासाठी हार्डवेअर व त्यामध्ये वापरात असलेले सॉफ्टवेअर आणि मानवी बुद्धिमत्तेच्या पलीकडे जाऊन सध्यस्थितीत होत असलेले बदल व भविष्यात अपेक्षित असणारे बदल यांच्याशी सांगड घालून रेफ्रिजरेशन ॲड एअर कंडीशनिंग, ऑटोमोबाईल सर्विसिंग, इलेक्ट्रोनिक प्रोडक्टस डिझाईन, सॉफ्टवेअर डेव्हलपमेंट सारखे व्होकेशनल कोर्स विद्यार्थ्यांना नवी दिशा देणारे आहेत. विद्यार्थ्याला या कालावधीमध्ये शिक्षण घेत असताना प्रत्यक्ष कंपनीमध्ये जाऊन प्रात्यक्षिक करण्याची संधी उपलब्ध होईल. हा कोर्स करीत असताना विद्यार्थ्याला आठवड्यातील चार दिवस प्रत्यक्ष इंडस्ट्रीमध्ये प्रशिक्षणासाठी इंट्रन्सशिप करण्याची संधी उपलब्ध होणार आहे. यामुळे विद्यार्थ्याला विषयाचे सैद्धांतिक व प्रात्यक्षिक ज्ञान मिळाल्यामुळे शिक्षणा बरोबर प्रत्यक्ष कामाचा देखील अनुभव येणार आहे. या कोर्सचे प्रशिक्षण घेतल्यामुळे विद्यार्थ्यांना नोकरीच्या संधी बरोबर स्वतःचा व्यवसाय सुरु करून उद्योजक होण्याची संधी उपलब्ध होणार आहे. मोठी स्वप्ने बघून भविष्यकाळ घडत नसतो तर आजचा योग्य निर्णयाने भविष्यकाळ उज्वल घडू शकतो. अशी माहिती डॉ. एन. बी. पासलकर, माजी संचालक, तंत्रशिक्षण महाराष्ट्र राज्य, सदस्य, महाविद्यालय विकास समिती, अनंतराव पवार कॉलेज ऑफ इंजिनिअरिंग ॲड रिसर्च, पर्वती, पुणे यांनी दिली.