मुंबई : शिवसेनेचे खासदार आणि नेते संजय राऊत यांना १४ दिवसांची न्यायालयीन कोठडी सुनावण्यात आली आहे. मुंबईतील पत्रा चाळ येथील जमीन घोटाळाप्रकरणी राऊत यांना २२ ऑगस्टपर्यंत कोठडी सुनावण्यात आली आहे.संजय राऊत हे ईडीच्या कोठडीत होती. त्यांची ईडी कोठडी आज संपत होती. आज त्यांना कोर्टात हजर करण्यात आले. यावेळी ईडीने राऊत यांची पुन्हा कोठडी मागितली. पण राऊत यांच्या वकिलाने ईडी कोठडीविरोधा युक्तिवाद केला. हा युक्तिवाद विचारात घेत कोर्टाने संजय राऊत यांना न्यायालायीन कोठडी सुनावली. कोर्टाने राऊत यांना २२ ऑगस्टपर्यंत म्हणजे १४ दिवसांची न्यायालयीन कोठडी सुनावली आहे. यामुळे संजय राऊत यांचा कोठडीतील मुक्काम आणखी १४ दिवसांनी वाढला आहे.
राऊत यांचा दादरमधील फ्लॅट सील
ईडीने रविवारी राऊत यांचा दादरमधील फ्लॅट सील केला होता. पत्रा चाळ जमीन घोटाळ्याच्या पैशातून संजय राऊत यांनी हा फ्लॅट खरेदी केल्याचा आरोप आहे. आतापर्यंत 11 कोटींची मालमत्ता जप्त करण्यात आली आहे.
एवढी केली संपत्ती जप्त
हे प्रकरण मुंबईतील गोरेगाव परिसरातील पत्राचाळशी संबंधित आहे. हा महाराष्ट्र गृहनिर्माण आणि क्षेत्र विकास प्राधिकरणाचा भूखंड आहे. सुमारे 1034 कोटींचा घोटाळा झाल्याचा आरोप आहे. या प्रकरणात संजय राऊत यांची 9 कोटी आणि राऊत यांची पत्नी वर्षा यांची 2 कोटी रुपयांची मालमत्ता जप्त करण्यात आली आहे.
काही भाग बिल्डरांना विकला
रिअल इस्टेट व्यावसायिक प्रवीण राऊत यांनी पत्रा चाळमध्ये राहणाऱ्या लोकांची फसवणूक केल्याचा आरोप आहे. एका बांधकाम कंपनीला या भूखंडावर 3000 फ्लॅट बांधण्याचे काम मिळाले. त्यापैकी ६७२ सदनिका येथे पूर्वीपासून राहणाऱ्या रहिवाशांना देण्यात येणार होत्या. उर्वरित रक्कम म्हाडा आणि त्या कंपनीला द्यायची होती, परंतु 2011 मध्ये या मोठ्या भूखंडाचा काही भाग इतर बिल्डरांना विकण्यात आला.
पीएमसी बँक घोटाळ्याच्या तपासात उघडकीस आले प्रकरण
2020 मध्ये महाराष्ट्रात उघड झालेल्या पीएमसी बँक घोटाळ्याची चौकशी सुरू असतानाच प्रवीण राऊत यांच्या बांधकाम कंपनीचे नाव समोर आले. त्यानंतर बिल्डरच्या पत्नीच्या बँक खात्यातून संजय राऊत यांची पत्नी वर्षा राऊत यांना 55 लाख रुपयांचे कर्ज दिल्याची माहिती मिळाली. या पैशातून संजय राऊत यांनी दादरमध्ये फ्लॅट खरेदी केल्याचा आरोप आहे.