पुणे: पुण्यातील काँग्रेस भवनची तोडफोड करण्यात आल्याची घटना दुर्देवी आहे. मात्र कार्यालयाची तोडफोड करणारे माझे कार्यकर्ते नाहीत. या घटनेशी माझा काहीही संबंध नाही, असं सांगत काँग्रेसचे नाराज आमदार संग्राम थोपटे यांनी हातवर केले आहेत. तर थोपटे यांची नाराजी दूर झाल्याचा दावा काँग्रेसचे प्रदेशाध्यक्ष बाळासाहेब थोरात यांनी व्यक्त केला आहे.
मंत्रिमंडळ विस्तारानंतर मंत्रिपद न मिळाल्याने काँग्रेस आमदार संग्राम थोपटे नाराज असल्याची जोरदार चर्चा होती. त्यात कालच पुण्यातील काँग्रेस भवनची काही लोकांनी तोडफोड केल्यानंतर थोपटे यांच्या कार्यकर्त्यांनीच ही तोडफोड केल्याची जोरदार चर्चा सुरू होती. मात्र आज बाळासाहेब थोरात यांच्याशी चर्चा केल्यानंतर थोपटे यांनी ते कार्यकर्ते माझे नाहीत असा दावा केला आहे. त्यामुळे काँग्रेस भवनवर हल्ला करणारे कोण होते? असा प्रश्न चर्चेला जात आहे. काँग्रेस भवनची तोडफोड करणारे आमचेच कार्यकर्ते होते की नाही? हे स्पष्ट नाही. माझ्या कार्यकर्त्यांचा या प्रकरणाशी काहीही संबंध नाही. तरीही या प्रकरणाची आम्ही गंभीर चौकशी करणार आहोत, असं थोपटे म्हणाले.
काँग्रेस पक्षश्रेष्ठी जो निर्णय घेईल तो आम्ही अंतिम मानतो. मंत्रिमंडळ विस्ताराबाबत पक्षश्रेष्ठीने पक्षाला योग्य वाटेल असाच निर्णय घेतला आहे, असं सांगतानाच पुण्यातील काँग्रेस जीवंत ठेवण्यासाठी पुण्याला एखादं मंत्रिपद मिळायला हवं होतं, अशी अपेक्षाही त्यांनी व्यक्त केली. काल पुण्यात जो प्रकार घडला तो दुर्देवी होता. पक्षाला शोभा देणारी ही घटना नाही. गुंडगिरी आणि चुकीच्या प्रकराला काँग्रेसमध्ये थारा नसल्याचंही त्यांनी स्पष्ट करत या घटनेचा निषेध नोंदवला. दरम्यान, थोपटे यांची नाराजी दूर झाली असून तोडफोड प्रकरणाची चौकशी करण्यात येणार असल्याचं बाळासाहेब थोरात यांनी सांगितलं.
