नागपूर -दिशा सालियान च्या संशयास्पद मृत्यूची पुन्हा चौकशी करावी, अशी मागणी आमदार नीतेश राणे आणि भरत गोगावले यांनी केली.या प्रकरणावरून आज विधानसभेत जोरदार गोंधळ झाला. सत्ताधाऱ्यांनीच हा प्रश्न उपस्थित करून आज गुरुवारी सभागृहात जोरदार गदारोळ केला. त्यामुळे विधानसभेचे कामकाज दोनदा तहकूब करावे लागले.
मुख्यमंत्री एकनाथ शिंदे यांच्या भूखंड वाटपाचा मुद्दा महाविकास आघाडीने काढला. त्यानंतर आता शिंदे गट आणि भाजपने सुशांतसिंह राजपूत मृत्यू प्रकरण आणि दिशा सालियान मृत्यू प्रकरणाचा मुद्दा उपस्थित केलाय. आमदार नीतेश राणे यांनी आज सकाळी सभागृहाबाहेर या प्रकरणाच्या चौकशीची मागणी केली.सुशांतसिंह प्रकरणी आदित्य ठाकरे यांची नार्को टेस्ट करावी. सुशातसिंह आत्महत्येची फाइल पुन्हा ओपन करावी. या प्रकरणी 8 जून रोजी काय झाले? या प्रकरणाचा तपास अधिकारी दोनवेळा का बदलला? सीसीटीव्ही का गायब झाले? व्हिजिटर बुकचे त्या दोन दिवसांची पाने का फाडली? या प्रश्नांची उत्तरे समोर येण्याची गरज राणे यांनी व्यक्त केली.
विधानसभेतही आमदार नीतेश राणे आणि भरत गोगावले यांनी सुशांतसिंह राजपूत मृत्यू प्रकरण आणि दिशा सालियान मृत्यू प्रकरणावर प्रश्न उपस्थित केले. दिशा सालियानची केस मुंबई पोलिसांकडे आहे. आता मुख्यमंत्र्यांनी ती फाइल पुन्हा ओपन करावी. त्या रात्री नेमके काय घडले. तिथे कोण मंत्री उपस्थित होता. या प्रकरणात तपास अधिकारी का बदलला. या मृत्यू प्रकरणाची चौकशी करावी, अशी मागणी केली.
दिशा सालियानचा पोस्टमॉर्टेम रिपोर्ट समोर न येणे हे प्रकरण गंभीर आहे. त्यामुळे या प्रकरणाची चौकशी मुंबई पोलिसांनी करावी, अशी मागणी गोगावले आणि नीतेश राणे यांनी केली. दिशा सालियानाचा मृत्यू झाला त्या रात्री तिथे कोणता मंत्री उपस्थित होता, याची चौकशी करावी, अशी मागणी भाजप आणि शिंदे गटाच्या आमदारांनी विधानसभेत केली. याप्रकरणावरून विधानसभेचे कामकाज तहकूब करण्यात आले.