पुणे -इंदापूरची जागा राष्ट्रवादी लढवणार की काँग्रेसला सोडली जाणार? यासंदर्भात अद्याप कोणताही निर्णय झालेला नाही, असे असतानाच हर्षवर्धन पाटील यांनी बुधवारी राष्ट्रवादी व पवार कुटुंबीयांवर आरोप केले. हे आरोप आमच्यासाठी धक्कादायक आहेत, असे स्पष्टीकरण खासदार सुप्रिया सुळे यांनी केले. ज्येष्ठ नेते छगन भुजबळ हे आजही राष्ट्रवादी काँग्रेसमध्येच आहेत, आणि यापुढेही राहतील, असा विश्वासही खा. सुळे यांनी व्यक्त केला.
सुप्रिया सुळे यांच्या खासदार निधीतून खडकवासला विधानसभा मतदारसंघातील विविध प्रभागातील कचरा गोळा करण्यासाठी तीन घंटागाड्या उपलब्ध करून देण्यात आल्या आहेत.या गाड्यांचे लोकार्पण गुरुवारी महापालिकेसमोर करण्यात आले. यावेळी त्या पत्रकारांशी बोलत होत्या.
त्या म्हणाल्या, की काँग्रेस आणि राष्ट्रवादीमध्ये जागा वाटप संबंधी चर्चा सुरू आहे. काही जागांचा तिढा सुटला असून इंदापूरच्या जागेसंदर्भात अद्याप कसलेही बोलणे झालेले नाही. या जागेचा निर्णय होणे बाकी असताना हर्षवर्धन पाटील यांनी केलेले आरोप धक्कादायक आहेत. हर्षवर्धन पाटील यांच्याशी मी स्वतः कालपासून संपर्क करत आहे, मात्र त्यांचा फोन बंद लागत आहे. एका जबाबदार व्यक्तीकडे मी निरोप पाठवला आहे. त्यांच्याशी संपर्क होईल, अशी मला अपेक्षा आहे, असेही त्या म्हणाल्या.
जे लोक राष्ट्रवादी सोडून जात आहेत, त्यांची कारणे पक्षावर किंवा पवार कुटुंबीयांवर नाराजी, अशी नाहीत. कारखाना, बँक, ईडीची चौकशी, अशा प्रकारची आहेत. जे कोणी जात आहेत, त्यांनी राष्ट्रवादी काँग्रेससाठी काहीना काही योगदान दिले आहे. त्यामुळे मी त्यांचा द्वेष न करता त्यांना शुभेच्छा देते.
नुकताच भाजपमध्ये प्रवेश केलेल्या एका नेत्याच्या वडिलांना भाजपने प्रवेश नाकारल्याचे ऐकायला मिळाले. वडिलांचा अवमान झालेला असतानाही हे नेते भाजपमध्ये गेले. चाळीस चाळीस वर्ष एका पक्षात राहिलेल्या आणि विचारांशी बांधील असलेल्या ज्येष्ठ नेत्यांना मुलांसाठी मानहानी पत्करावी लागते, हे दुर्दैव आहे. असेही त्या म्हणाल्या.