धनकवडी-कात्रजमध्ये निवडणुकीच्या पदयात्रांची रोजंदारी माणशी ७०० रुपये
पुणे-निवडणूक प्रचाराच्या पदयात्रेत चांगली गर्दी दिसून प्रभाव पाडण्यासाठी उमेदवारांकडून मजूर कट्टय़ावरील मजुरांचा वापर केला जाऊ लागल्याने धनकवडी कात्रजमध्ये मजूर मिळेनासे झाले आहेत . रविवारी सुटीच्या दिवशी या मजुरांना प्रचारासाठी चांगलीच मागणी आली होती.. मजुरांना सहाशे ते सातशे रुपयांपर्यंतची रक्कम उमेदवारांकडून मिळत असल्याने मजुरी सोडून अनेक मजूर पदयात्रांच्या रोजंदारीत दाखल झाले आहेत.मात्र यामध्ये ठेकेदारी सुरु झाली आहे . एकत्रीत परुष-महिला मजूर नेणारे म्होरके कम ठेकेदार प्रत्येक व्यक्तीमागे १०० रुपये ते २०० रुपये मध्ये मारत आहेत. अशा पद्धतीने ठेकेदार बनलेल्या महिला -पुरुषांच्या घरात रोज नोटांचा पाऊसच जणू प्रचाराच्या रणधुमाळी तून सुरु झाला आहे .
महापालिका निवडणूक प्रचाराचा अवधी अवघ्या सात दिवसावर आल्याने निवडणुकीचे वातावरण तापू लागले आहे. आता शेवटचे सहा दिवस उरले आहेत पदयात्रा, कोपरा सभेने शहर ढवळून निघत आहे. पदयात्रा किंवा सभेला लोकांची गर्दी दिसावी यासाठी उमेदवारांकडून मजुरांचा वापर केला जात आहे. गर्दी कमी दिसली तर उमेदवाराचा प्रभाव कमी आहे असे वाटू नये यासाठी प्रत्येक उमेदवाराकडून गर्दीसाठी मजूर रोजंदारीवर लावला जातो आहे.
