ओतुर – दि. ३१
अंगारकी चतुर्थी निमित्त अष्टविनायकातील श्री क्षेत्र लेण्याद्री येथे गिरिजात्मजचे दर्शन घेण्यासाठी भाविकांनी गर्दी केली होती. जवळपास ८० ते ९० हजार भाविक भक्तांनी श्रीं च्या दर्शनाचा लाभ घेतला. लेण्याद्री परिसरास यात्रेचे स्वरूप प्राप्त झाले होते.
पहाटे ४ वाजता देवस्थान ट्रस्टचे उपाध्यक्ष कैलास लोखंडे यांच्या हस्ते श्रींचा अभिषेक व महाआरती करण्यात आली. यावेळी देवस्थानचे अध्यक्ष गोविंद मेहेर, सेक्रेटरी शंकर ताम्हाणे, खजिनदार सदाशिव ताम्हाणे, विश्वस्त प्रभाकर जाधव, काशीनाथ लोखंडे, जयवंत डोके, जितेंद्र बिडवई, संजय ढेकणे, भगवान हांडे व कर्मचारी तसेच भाविक उपस्थित होते. श्री गिरिजात्मजाच्या मूर्तीस व मंदिरात आकर्षक फुलांची सजावट करण्यात आली होती. सकाळी ६ वाजता व दुपारी १२ वाजता महाआरती करण्यात आली. देवस्थान ट्रस्टचे भाविकांना विविध सेवा पुरविण्यात आल्या. सायंकाळी मंदिरात श्री मुक्ताई भजनी मंडळ, शिवेची वाडी यांचे भजन झाले.
रात्री ९.४० वाजता चंद्रोदयाच्या वेळी श्रींची महाआरती होणार असुन त्यानंतर महाप्रसादाचे आयोजन करण्यात आले आहे. दिवसभरात विविध धार्मिक कार्यक्रमांचे आयोजन करण्यात आले होते. भाविकांनी सकाळी व सायंकाळी गर्दी केली होती. दिवसभरात विविध क्षेत्रातील मान्यवर तसेच जुन्नर व जुन्नर परिसरातुन व पुणे, नगर , मुंबई, ठाणे, नाशिक येथून भाविक श्रीं च्या दर्शनासाठी येत होते. अशी माहिती देवस्थानचे अध्यक्ष गोविंद मेहेर व सेक्रेटरी शंकर ताम्हाणे यांनी दिली.
