शालेय विद्यार्थी प्रवास योजना या अभिनव उपक्रमाच्या मार्गदर्शक पुस्तिकेचे महापालिका आयुक्त विक्रम कुमार यांच्या हस्ते प्रकाशन
पुणे -विद्यार्थ्यांना खाजगी वाहनांपेक्षा कितीतरी पटीने सार्वजनिक वाहतूक आणि सायकल कशी सर्वाधिक उत्तम आणि सोयीस्कर ठरेल यासाठी प्रशासनाने उपक्रम राबवावे असे आवाहन महापालिका आयुक्त विक्रम कुमार यांनी येथे केले.
महानगरपालिका पथ विभागाने मागील वर्षी शालेय विद्यार्थी प्रवास योजना हा अभिनव उपक्रम हाती घेतला होता. विद्यार्थ्यांना शाळेत व परत घरी सुरक्षित व स्वतंत्र पणे प्रवास करता यावा यासाठी ही योजना राबविली गेली. त्याच्या पहिल्या टप्यात ३ विद्यार्थी प्राधान्य झोन निवडण्यात आले व तेथील प्रत्येकी ३ अश्या ९ शाळांच्या रस्त्यांवर ही योजना प्रायोगिक पद्धतीने राबविली गेली. खराडी झोन मध्ये EON ज्ञानांकुर शाळा, राजाभाऊ पठारे शाळा व PDEA शाळा , पर्वती झोन मध्ये राजीव गांधी विद्यालय , मुक्तांगण शाळा व सिटी प्राइड शाळा व डेक्कन झोनमधील गरवारे प्रशाला, पंडित आगाशे शाळा व सिम्बोयसीस विद्यालय या शाळांचे प्राचार्य उपस्थित होते व त्यांनी प्रमाणपत्र स्विकारले, पुढील टप्यात प्रायोगिक शाळांभोवती कायमस्वरूपी उपाय करण्यासाठी व त्या स्वरूपाचे उपाय शहरातील इतर शाळां भोवती करण्या साठी एक मार्गदर्शक पुस्तिका आज महापालिका आयुक्त विक्रम कुमार यांच्या हस्ते प्रकाशित करण्यात आली. याप्रसंगी अतिरिक्त महापालिका आयुक्त (वि) श्री. विकास ढाकणे व अतिरिक्त महापालिका आयुक्त (इ)श्री. कुणाल खेमनार , पथ विभागाचे मुख्य अभियंता व्ही जी कुलकर्णी , अधीक्षक अभियंता साहेबराव दांडगे, वाहतुक नियोजक निखिल मिजार हे उपस्थित होते.
शाळांचे प्राचार्य, या योजनेत काम करणारे ३ विजेते व महापालिकेला मदत करणार्या् स्वयंसेवी संस्थांचे प्रतिनिधी देखील उपस्थित होते. या योजनेत पुढे जास्तीत जास्तं विद्यार्थी कसे स्वतंत्रपणे सार्वजनिक वाहतुक व सायकलने प्रवास करतील या साठी शाळांनी सहभाग घ्यावा व अश्याच अभिनव पद्धतीने विद्यार्थ्यांना स्वतंत्र पणे खासगी वाहन विरहित प्रवास करण्यासाठी उपक्रम राबवावे असे आवाहन महापालिका आयुक्त विक्रम कुमार यांनी यावेळी केले.
