अजित पवारांसह नवनिर्वाचित मंत्र्यांनी शरद पवारांची भेट घेतली
मुंबई- उपमुख्यमंत्री अजित पवार यांनी आज राष्ट्रवादी काँग्रेसच्या नवनिर्वाचित मंत्र्यांसह शरद पवार यांची आज वाय.बी. चव्हाण सेंटरमध्ये जाऊन अचानक भेट घेतली. जवळपास पाऊन तास चर्चा झाल्यानंतर हे सर्व नेते बाहेर पडले. पण यात शरद पवारांनी मौन बाळगल्याचे समोर आले आहे. दरम्यान, बंडानंतर प्रथमच शरद पवारांच्या भेटीला गेल्यानंतर काही राष्ट्रवादीचे ज्येष्ठ नेते छगन भुजबळ यांनी थेट पवारांचे पाय धरत विठ्ठला सांभाळून घे रे आम्हाला, अशी विनवणी केली. त्यानंतर सर्वच नेते पवारांच्या पाया पडले. या सर्व घटनेची इनसाइट स्टोरी आता माध्यमांसमोर आली आहे.
अजित पवारांसह नवनिर्वाचित मंत्र्यांनी शरद पवारांची भेट घेतली. यावेळी सर्वच नऊ मंत्र्यांनी शरद पवार यांचे आशिर्वाद घेतले. शरद पवारांना वाय.बी. चव्हाण सेंटरवर अजित पवारांचा गट भेटला. यावेळी छगन भुजबळ पवारांच्या समोर आले आणि विठ्ठला सांभाळून घे रे आम्हाला, असं म्हणत थेट पवारांच्या पाया पडले. त्यानंतर जवळपास सर्वच नेत्यांनी पवारांच्या पाया पडत हात जोडत आम्हाला माफ करा आणि आम्हाला आशीर्वाद द्या, अशी भूमिका मांडत विनंती केली.
तासभर झाली चर्चा, पवारांचे मात्र मौन
विठ्ठला सांभाळून घे रे असे उद्गार काढत छगन भुजबळ शरद पवारांच्या पाया पडले. याभेटी दरम्यान जवळपास सर्वच मंत्र्यांनी शरद पवारांच्या पाया पडत हात जोडले. मंत्री आणि शरद पवार यांच्यामध्ये जवळपास तासभर चर्चा झाल्याचे समजतेय. यात सुनील तटकरे, प्रफुल्ल पटेल, छगन भुजबळ, दिलीप वळसे-पाटील, हसन मुश्रीफ, आदिती तटकरे, धनंजय मुंडे, संजय बनसोडे आदींचा सहभाग होता. ही माहिती मिळताच जयंत पाटील आणि जितेंद्र आव्हाड देखीलही तातडीने वाय. बी. चव्हाण सेंटरवर दाखल झाले. मला सुप्रिया सुळेंचा फोन आला म्हणून मी लवकर निघालोय. शरद पवारांनी बोलवलंय, लवकर या असं मला सांगितलं, अशी प्रतिक्रिया जयंत पाटील यांनी माध्यमांशी दिली.
शरद पवार आमचे दैवत : प्रफुल्ल पटेल
शरद पवार यांच्यासोबतच्या भेटीनंतर राष्ट्रवादी काँग्रेसचे कार्यकारी अध्यक्ष प्रफुल्ल पटेल यांनी माध्यमांशी संवाद साधला आणि भेटीविषयी माहिती दिली. प्रफुल्ल पटेल म्हणाले की, आम्हा सर्वांचे दैवत आदरणीय शरद पवार यांची आज भेट घेतली. त्यांचे आशीर्वाद घेण्यासाठी भेट घेतली. शरद पवार हे बैठकीच्या निमित्ताने यशवंतराव चव्हाण सेंटरमध्ये असल्याचं समजलं. त्यामुळे वेळ न मागता आम्ही इथे आलो आणि त्यांच्या पाया पडून आशीर्वाद घेतला. राष्ट्रवादी काँग्रेस एकसंध कसा राहिल याचाही विचार करुन त्यांनी येत्या काही दिवसात मार्गदर्शन करावा अशी विनंती केली. शरद पवारांनी कोणतीही प्रतिक्रिया दिली नाही. त्यांनी आमचं म्हणणं शांतपणे ऐकून घेतले आहे.
शरद पवार काय निर्णय घेणार?
अजित पवार गटातल्या मंत्र्यांनी आज अचानक शरद पवार यांची भेट घेतली. या नेत्यांनी एक तास शरद पवार यांच्याशी चर्चा केली. मात्र, या भेटीत शरद पवार यांनी आमच्याशी काहीच भाष्य केलं नसल्याचं प्रफुल्ल पटेल यांनीच सांगितले आहे. त्यामुळे शरद पवार यावर काय निर्णय घेणार हे येत्या काळातच समजणार आहे.
अजित पवार आणि नेत्यांनी शरद पवार यांची वेळ घेतली नव्हती. अजित पवारांनी मात्र, अचानक भेट घेत शरद पवारांची भेट घेत दिलगिरी व्यक्त केली. तर मार्ग काढण्याची काढावा म्हणत पक्ष एकसंध ठेवण्याची विनंती केली. यावर शरद पवारांनी काहीच प्रतिक्रिया दिली नाही, असे राष्ट्रवादी काँग्रेसचे प्रदेशाध्यक्ष जयंत पाटील यांनी स्पष्ट केले आहे.
दरम्यान जयंत पाटील म्हणाले की, विरोधी पक्षातील जो पक्षाचे सर्वात जास्त आमदार असतात त्याच पक्षाचा विरोधी पक्षनेता असतो, आमच्यासोबत जवळपास 19 आमदार आहेत. तर कागदावर आमचा पक्ष मोठा असला तरीसुद्धा आमच्यातील 9 आमदारांनी सत्तेत सहभागी होत मंत्रीपदाची शपथ घेतल्याने आता ज्यांच्याकडे सर्वांत जास्त आमदार असतील त्यांचा विरोधी पक्षनेता होईल.
जयंत पाटील म्हणाले की, विधिमंडळामध्ये विरोधी पक्षनेते अंबादास दानवे यांच्या दालनात विरोधकांची बैठक सुरू होती, त्यावेळी खासदार सुप्रिया सुळेंनी मला फोन केला. यावेळी अजित पवारांसोबत शपथ घेतलेले सर्व मंत्री व नेते भेटायला आले होते. अजित पवार गटाने त्यांनी घेतलेल्या भूमिकेवर दिलगिरी व्यक्त केली. तर यातून काही तरी मार्ग दाखवा अशी विनंती केली. मात्र, शरद पवारांनी यावर काहीच प्रतिक्रिया व्यक्त केली नाही. आम्ही सत्तेला पाठिंबा दिला नसल्याने विधानसभा अध्यक्ष बसण्याची व्यवस्था करतील असे मत राष्ट्रवादी काँग्रेसचे प्रदेशाध्यक्ष जयंत पाटील यांनी व्यक्त केले आहे.
जितेंद्र आव्हाड म्हणाले की, विरोधी पक्ष म्हणून आम्ही व्हीप बजावणार असून तो सर्व आमदारांनी पाळायला पाहिजे असे मत जितेंद्र आव्हाड यांनी अजित पवार यांच्या मंत्र्यांनी शरद पवार यांची भेट घेतली यानंतर राश्ट्रवादी काँग्रेसचे मुख्य प्रतोद जितेंद्र आव्हाड यांनी हे वक्तव्य केले आहे.
