नांदेड -बीडच्या सरपंच हत्याकांडातील प्रमुख आरोपी सुदर्शन घुले यांना आर्थिक मदत करणाऱ्या एका डॉक्टरला त्याच्या वकील पत्नीसह विशेष तपास पथकाने नांदेड येथून अटक केली आहे. या अटकसत्रामुळे संतोष देशमुख हत्याकांडाच्या तपासाला चांगलाच वेग आला आहे.
संतोष देशमुख हत्या प्रकरणात आता मोठ्या घडामोडी घडत आहेत. बीड पोलिसांनी पुण्यातून या प्रकरणातील मुख्य आरोपी सुदर्शन घुले याच्यासह सुधीर सांगळेला अटक केली. त्यानंतर आता एसआयटीने नांदेड येथून सुदर्शन घुले याला अटक करणाऱ्या एका डॉक्टरला त्याच्या वकील पत्नीसह अटक केली आहे. पोलिसांच्या माहितीनुसार, संभाजी वायबसे असे आरोपी डॉक्टरचे नाव आहे. संतोष देशमुख यांच्या हत्येच्या दिवशी वायबसे यांनी सुदर्शन घुलेशी संपर्क साधला होता. विशेषतः त्यानेच आरोपींना पळून जाण्यात मदत केली होती. एवढेच नाही तर आरोपींना पळून जाण्यासाठी त्यानेच पैसे पुरवल्याचा आरोप आहे.
बीड पोलिसांनी वायबसे दाम्पत्याला शुक्रवारी रात्री उशिरा नांदेड येथून ताब्यात घेतले. त्यानंतर लगेच त्यांच्या चौकशीला सुरुवात केली. त्यातून सुदर्शन घुले व सुधीर सांगळेच्या पुण्यातील वास्तव्याची माहिती मिळाल्याचा दावा सूत्रांनी केला आहे.
दुसरीकडे, संतोष देशमुख हत्याकांडाचा तपास करणाऱ्या एसआयटीने शनिवारी पहाटे सुदर्शन घुले व त्याचा सहकारी सुधीर सांगळे याला अटक केली आहे. या दोघांना सध्या पुण्याहून बीडला आणले जात आहे. बीडचे पोलिसि अधीक्षक नवनीत कॉवत एका पत्रकार परिषदेद्वारे या कारवाईची विस्तृत माहिती देणार आहेत.
सुदर्शन घुले व सुधीर सांगळेसह पोलिसांनी सिद्धार्थ सोनवणे नामक अन्य एका संशयिताला मुंबईतून ताब्यात घेतले आहे. संतोष देशमुख यांच्या हत्येच्या दिवशी सिद्धार्थ सोनवणे बीडमध्ये होता. त्यानंच संतोष देशमुख यांच्या लोकेशनची माहिती मारेकऱ्यांना दिल्याचा आरोप आहे. दरम्यान, या प्रकरणातील मुख्य आरोपी सुदर्शन घुले आता पोलिसांच्या हाती लागल्यामुळे या संपूर्ण प्रकरणाचा आता उलगडा होण्याची शक्यता आहे.
