ठाणे- या देवी सर्वभूतेषु शक्ति रूपेण संस्थिता। नमस्तस्यै नमस्तस्यै नमस्तस्यै नमो नम:॥ असा मंत्रोच्चार करत मुख्यमंत्री एकनाथ शिंदे काल टेंभीनाका मित्र नवरात्रोत्सव मंडळाच्या आई जगदंबेची आगमन मिरवणुकीत सहभागी झाले . यावेळी खासदार डॉ. श्रीकांत शिंदे, खासदार नरेश म्हस्के, माजी आमदार रवींद्र फाटक, ठाणे विधानसभा प्रमुख हेमंत पवार, माजी नगरसेवक सुधीर कोकाटे, विकास रेपाळे तसेच जय अंबे माता सार्वजनिक नवरात्रोत्सव मंडळाचे पदाधिकारी व कार्यकर्ते आणि नागरिक मोठ्या संख्येने उपस्थित होते.
या संदर्भात CM शिंदे यांनी सांगितले ,’शारदीय नवरात्रोत्सवानिमित्त गुरुवर्य धर्मवीर स्वर्गीय आनंद दिघे साहेबांच्या प्रेरणेतून सुरु करण्यात आलेल्या टेंभीनाका येथील जय अंबे माँ सार्वजनिक धर्मदाय संस्था टेंभीनाका मित्र नवरात्रोत्सव मंडळाच्या आई जगदंबेची आगमन मिरवणूक मोठ्या उत्साहात आणि आनंदात पार पडली. सर्वप्रथम अंबे मातेचे मनोभावे पूजन करून त्यानंतर तिची भव्य मिरवणूक काढण्यात आली. यावेळी स्वर्गीय दिघे साहेबांच्या परंपरेनुसार ढोल ताशा पथक, वारकरी, गोंधळी, वाघ्या मुरळी, कोळीनृत्य अशी वेगवेगळी कलापथके या मिरवणुकीत सहभागी झाली होती. अंबे मातेचा यळकोट करत त्यांच्यासोबत या मिरवणुकीत सहभागी झालो.यावेळी स्थानिक नागरिकांनी जागोजागी अंबे मातेवर फुलांचा वर्षाव करत देवीचे स्वागत तसेच नागरिकांच्या या उत्साहात सहभागी होऊन लहान मुले आणि ज्येष्ठ नागरिकांना भेटून त्यांच्यासोबत फोटो काढले तसेच महिला भगिनी आणि लाडक्या बहिणींना जागोजागी मला राख्या बांधल्या. तसेच दरवर्षीप्रमाणे ठाणे पोलिसांनी देवीचा रथ ओढत देवीचे जल्लोषात स्वागत केले. मोठया उत्साहात आणि अंबे मातेच्या जयघोषात ही मिरवणूक कळवा येथून टेंभीनाक्यापर्यंत काढण्यात आली.