मतदानात जाणीवपूर्वक दिरंगाई सुरू:पहाटेचे 5 वाजले तरी मतदान करा, अधिकाऱ्यांना सोडू नका, उद्धव ठाकरे यांचे मतदारांना आवाहन
मुंबई-मुंबईतील मतदान केंद्रावर सकाळपासून सावळा गोंधळ उडाल्याने नागरिक संतापलेले पाहायला मिळाले. त्यानंतर आता शिवसेना ठाकरे गटाचे नेते उद्धव ठाकरे यांनी तातडीने पत्रकार परिषद घेऊन निवडणूक आयोगावर जोरदार हल्लाबोल केला आहे. निवडणूक आयोगाकडून जाणीवपूर्वक मतदानासाठी विलंब केला जात असल्याचा आरोप त्यांनी केला. तर मुंबईतील मतदारांनी मतदान झाल्याशिवाय केंद्रावरील अधिकाऱ्यांना सोडू नका, असे आवाहन त्यांनी केले.
उद्धव ठाकरे म्हणाले की, निवडणूक आयोग हा भाजपची चाकरी करत असून ज्या ठिकाणी आम्हाला चांगली लीड मिळू शकते, त्या ठिकाणी जाणीवपूर्वक मतदारांना त्रास दिला जात असल्याचा घटना समोर आल्या आहेत. परंतु माझे मतदारांना आवाहन राहील की, नागरिकांनी सहा वाजेपर्यंत मतदान केंद्रात जावं, त्यानंतर रात्री किती वाजू द्या, तुमचा मतदानाचा हक्क बजवावा, तोपर्यंत केंद्रातील अधिकाऱ्यांना सोडू नका, तुमचा मतदानाचा हक्क बजवावा.
उद्धव ठाकरे म्हणाले की, महाराष्ट्रातील मतदानाचा शेवटचा टप्पा आज तासाभरात संपतो आहे. मतदान आयोगाकडून आवाहन केले जाते. परंतु निवडणूक आयोग पक्षपातीपणा करत असल्याचे दिसत आहेत. मतदान आयोगाच्या तथाकथीत प्रतिनिधी दिरंगाई करत आहेत. ज्येष्ठ मतदार आहेत यांना मोठा त्रास झालेला आहे. कुठलिही सुविधा करण्यात आलेली नाही. रांगा लावून उभे असलेले मतदारांना विनाकारण त्रास देण्याचे काम केले जात आहे.
उद्धव ठाकरे म्हणाले की, जी कुठलिही केंद्र आहे, ज्या ठिकाणी दिरंगाई केली जात असेल तर त्याची नोंद करा, तर पोलिंग ऑफिसरचे नाव लिहून घ्या, जेणेकरून त्यांच्याविरोधात आपल्या सर्वांना न्यायालयात दाद मागता येईल. भाजपच्या व निवडणूक आयोगाच्या या डावाला मतदारांनी बळी पडू नये, असे आवाहन देखील ठाकरे यांनी केले.
उद्धव ठाकरे म्हणाले की, पराभवाच्या भितीने भाजप पछाडलेले आहे. ‘मतदान करा, मतदान करा’ असे निवडणूक आयोग सांगते. मग लोक उतरले तर निरुत्साही तेथील यंत्रणा पाहून लोक कंटाळून बाहेर पडत आहेत. निवडणूक आयोग काय बसल्याजागी राजयोग पणा दाखवत आहे का, असा सवाल देखील त्यांनी केला.
विलंब लागत आहे, त्याला क्षमा करता येत नाही. निवडणूक आयोग भाजपची चाकरी करत आहे का, असा प्रश्न देखील उपस्थित होत आहे. जिकडे शिवसेनेला मत पडत आहेत, त्या ठिकाणी जाणीवपूर्वक विलंब केला जात असल्याचा आरोप देखील उद्धव ठाकरे यांनी केला.
