रुग्णाचे समाधान वैद्यकीय क्षेत्राच्या केंद्रस्थानी यावे : डॉ.राजीव येरवडेकर

पुणे:होमिओपॅथी तज्ञ दिवंगत डॉ. महेंद्र प्रसाद महापात्र यांनी लिहिलेल्या ‘द इसेन्स ऑफ होमिओपॅथी मटेरिया मेडिका’ या पुस्तकाचे प्रकाशन   सिंबायोसिस इंटरनॅशनल डीम्ड युनिव्हर्सिटीच्या फॅकल्टी ऑफ मेडिकल अँड हेल्थ  सायन्सेसचे प्रोहोस्ट (प्रमुख) डॉ.राजीव येरवडेकर  यांच्याहस्ते झाले.
हा प्रकाशन समारंभ सिंबायोसिस इंस्टिट्यूट ऑफ मॅनेजमेंट स्टडीज (रेंज हिल्स, खडकी) येथील प्रेक्षागृहात झाला.भारती विद्यापीठ होमिओपॅथिक मेडिकल कॉलेजच्या विभागप्रमुख डॉ.मृणाल नेर्लेकर,धोंडूमामा साठे होमिओपॅथिक मेडिकल कॉलेजच्या प्राचार्य डॉ.मनीषा सोळंकी ,प्रा.वर्षा गोरे, डॉ. अर्चना जाधव यांची प्रमुख उपस्थिती या कार्यक्रमाला होती.महापात्र कुटुंबियांच्या वतीने या कार्यक्रमाचे आयोजन करण्यात आले . डॉ. महेंद्र प्रसाद महापात्र यांच्या कन्या डॉ.रीना लेंका यांनी स्वागत केले.
डॉ. राजीव येरवडेकर म्हणाले,’ डॉ महापात्र यांचे संशोधन सर्वांसमोर येण्याचे काम महत्त्वपूर्ण आहे. पन्नास वर्षांपूर्वीच्या ठेवा त्यामुळे जगा समोर आला आहे.जुने संशोधन नव्या समस्यांवर उपयोगी पडू शकते. हल्ली सगळीकडे गुगल हे डॉक्टर सारखे वापरले जात असताना पुस्तकातील ज्ञान विसरता कामा नये. प्रत्येकाच्या प्रकृतीनुसार उपचाराचा विचार होमिओपॅथीमधे आहे. हा दृष्टिकोन पुढे आला पाहिजे. रुग्णांवर उपचाराचा सर्वंकष एकात्मिक असा दृष्टिकोन ठेवला पाहिजे. रूग्णाप्रती सहानुभुती असणे महत्वाचे आहे. वैद्यकीय क्षेत्राचा विचार करताना रुग्ण हाच केंद्रस्थानी असला पाहिजे.रुग्णांचा फायदा होणे आणि त्यांच्या प्रकृतीला आराम पडणे हाच कोणत्याही उपचार पद्धती चा हेतू असला पाहिजे. ‘
डॉ.मनीषा सोळंकी म्हणाल्या,’ होमिओपॅथी उपचारपध्दतीवरील हे पुस्तक संदर्भ साहित्य म्हणून उपयोगी पडेल. रुग्णाला वैयक्तिक सल्ला यातून मिळेल. होमिओपॅथी विद्यार्थ्यांना, आणि शैक्षणिक संस्थांना या पुस्तकातील ज्ञान  उपयोगी ठरणार आहे.डॉ. महापात्र यांच्या अनुभवसिद्ध लेखन सर्वांना प्रकाश दाखवत राहील. मानसिक स्वास्थ जपण्याचा प्रयत्न होमिओपॅथी उपचारपध्दतीतून होतो, हा एकात्मिक दृष्टीकोण दिशादर्शक आहे.
डॉ. मृणाल नेर्लेकर म्हणाल्या, ‘ शरीरात ज्या पेशींमध्ये रोग पसरला आहे, तिथेच उपचार करण्याचे कौशल्य होमिओपॅथी मध्ये आहे. हे कौशल्य अद्ययावत होत राहिले पाहिजे.
५० वर्षांपूर्वीच्या लेखनाला लाभले पुस्तक रुप
५० वर्षांपूर्वी लिहिलेले हे पुस्तक  विविध होमिओपॅथिक औषधांच्या सखोल आणि व्यापक विश्लेषणाबद्दल आहे. हेच पुस्तक या कार्यक्रमाद्वारे नव्या स्वरूपात  आले आहे.यात होमिओपॅथिक पदार्थांच्या चिकित्सीय गुणधर्मांवर प्रकाश टाकला आहे, त्यांच्या दैनंदिन वैद्यकीय सरावातील व्यावहारिक अनुप्रयोगांवर लक्ष केंद्रित केले आहे. डॉ. महापात्र यांनी पारंपारिक होमिओपॅथिक ज्ञान आधुनिक वैज्ञानिक संकल्पनांसोबत  एकत्रित केले आहे, ज्यामुळे हे पुस्तक चिकित्सक आणि विद्यार्थ्यांसाठी अमूल्य संदर्भ साहित्य  ठरते.
दिवंगत डॉ. महेंद्र प्रसाद महापात्र हे एक नामवंत होमिओपॅथी तज्ञ आणि चिकित्सक म्हणून प्रसिद्ध होते. ते तीन दशकांहून अधिक काळापासून होमिओपॅथीची प्रॅक्टिस करत होते  आणि त्यांच्या सखोल ज्ञान व नाविन्यपूर्ण उपचार पद्धतींसाठी प्रसिद्ध होते.डॉ. महापात्र यांचे  अनेक संशोधन लेख आणि लेख प्रतिष्ठेच्या  जर्नल्स मध्ये प्रकाशित झाले आहेत. होमिओपॅथिक औषधशास्त्राच्या प्रगतीसाठी  त्यांना अनेक पुरस्कारांनी गौरविले गेले. हे पुस्तक त्यांच्या विस्तृत अनुभव आणि अभ्यासाचे  फलित आहे.