मुंबई उत्तर मध्य लोकसभा मतदारसंघातून उज्ज्वल निकम यांना भाजपची उमेदवारी जाहीर

मुंबई: भाजपने मुंबई उत्तर मध्य लोकसभा मतदारसंघातून विद्यमान खासदार पूनम महाजन यांचा पत्ता कट केला आहे. भाजपने या मतदारसंघातून उज्ज्वल निकम यांना उमेदवारी जाहीर केली आहे. या मतदारसंघातून महाविकास आघाडीकडून वर्षा गायकवाड यांना उमेदवारी देण्यात आली आहे. त्यामुळे उत्तर मध्य मुंबईत वर्षा गायकवाड विरुद्ध उज्ज्वल निकम अशी लढत पाहायला मिळणार आहे.महाविकास आघाडीकडून दोनच दिवसांपूर्वी काँग्रेसच्या वर्षा गायकवाड यांना उत्तर मध्य लोकसभा मतदारसंघातून उमेदवारी जाहीर करण्यात आली होती. त्यामुळे भाजप वर्षा गायकवाड यांच्याविरोधात कोणाला उमेदवारी देते याची उत्सुकता होती. विद्यमान खासदार पूनम महाजन यांना पुन्हा संधी दिली जाते की नव्या चेहऱ्याला संधी दिली जाते याबाबत चर्चा सुरू असताना आशिष शेलार यांचे नाव देखील समोर आले होते. दरम्यान, कालच उद्धव ठाकरे यांनी वर्षा गायकवाड यांना निवडून आणण्यासाठी पूर्ण ताकद लावणार असल्याचे म्हटले होते.अनेक वर्ष विशेष सरकारी वकील म्हणून काम पाहणाऱ्या निकम यांच्या नावाची चर्चा गेल्या काही दिवसांपासून सुरू होती. कायदेपंडित अशी ओळख असलेल्या उज्ज्वल निकम यांनी देशातील अनेक महत्त्वाच्या खटल्यात काम केले आहे. ज्यात १९९३ साली मुंबईत झालेल्या साखळी बॉम्बस्फोट खटल्यासह मुंबईवर झालेला २६/११ दहशतवादी हल्ला, खैरलांजी,पुण्यातील राठी हत्याकांड , सोनई येथील दलित अत्याचाराच्या खटल्यांमध्ये निकम यांनी महत्त्वाची कामगिरी पार पाडली होती.