मुंबई- ‘खरी शिवसेना कुणाची?’ या ऐतिहासिक प्रश्नावर उद्या म्हणजेच बुधवारी 8 ऑक्टोबर रोजी सर्वोच्च न्यायालयात निर्णायक सुनावणी पार पडणार आहे. गेली तीन वर्षे चालत असलेल्या या वादावर अखेर उद्या न्या. सूर्यकांत यांच्या खंडपीठासमोर अंतिम युक्तिवाद होणार असून, त्यानंतर न्यायालय आपला निकाल राखून ठेवेल किंवा तत्काळ जाहीर करेल हे पहावे लागणार आहे. या सुनावणीकडे केवळ महाराष्ट्रच नव्हे, तर संपूर्ण देशाचे लक्ष लागले आहे.
उद्धव ठाकरे आणि एकनाथ शिंदे या दोन गटांमध्ये शिवसेनेच्या नाव आणि पारंपरिक ‘धनुष्यबाण’ चिन्हावरून सुरू असलेला वाद गेली तीन वर्षे सर्वोच्च न्यायालयात न्यायप्रविष्ट आहे. शिवसेनेत 2022 मध्ये मोठी बंडखोरी झाली होती. त्यानंतर फेब्रुवारी 2023 मध्ये निवडणूक आयोगाने एकनाथ शिंदे यांच्या नेतृत्वातील गटाला शिवसेना हे नाव व धनुष्यबाण हे चिन्ह दिले होते. निवडणूक आयोगाच्या या आदेशांना उद्धव ठाकरे यांनी आव्हान दिले होते. या प्रकरणात अनेक प्राथमिक सुनावण्या झाल्या असून, उद्या होणारी सुनावणी ही अंतिम टप्प्यातील निर्णायक कार्यवाही मानली जात आहे. न्यायालयात दोन्ही बाजूंकडून सविस्तर युक्तिवाद पूर्ण झाले असून, उद्या निकाल लागण्याची शक्यता आहे.
या सुनावणीच्या पार्श्वभूमीवर वकील असीम सरोदे यांनी मोदी आणि शिंदे यांच्यावर अप्रत्यक्ष टीका केली आहे. शिवसेना धनुष्यबाण चिन्हाबाबत उद्या अंतिम सुनावणी घेणार असे सर्वोच्च न्यायालयाने जाहीर केले आहे. दिनांक 8 ऑक्टोबरला न्यायाधीश सूर्यकांत नक्की सुनावणी घेतील अशी अपेक्षा आहे. इकडे पंतप्रधान नरेंद्र मोदी बांधून तयार नसलेल्या विमानतळाचे नवी मुंबईत दिखाऊ उद्घाटन करणार आणि त्याचवेळी संविधानासोबत अनैतिकता करून सत्तेच्या हवेत असलेल्या एकनाथ शिंदे यांचे विमान सर्वोच्च न्यायालय जमिनीवर पाडणार का? लवकरच कळेल असा खोचक टोला त्यांनी लगावला आहे.
दरम्यान, उद्धव ठाकरे गटाने जुलै महिन्यातच न्यायालयात याचिका दाखल करून “शिवसेना नाव आणि चिन्हाच्या वादावर लवकर निर्णय द्या” अशी मागणी केली होती. त्यावर त्यावर 14 जुलैला सुप्रीम कोर्टात सुनावणी पार पडली. ही सुनावणी करताना न्या. सूर्यकांत, न्या. बागची यांच्या खंडपीठाने मुख्य याचिकेवर सुनावणी करणे योग्य राहील असं सांगत ऑगस्टमध्ये यावर सुनावणी घेऊ असे स्पष्ट केले होते. मात्र राष्ट्रपती-राज्यपाल वादातील खटल्यामुळे ही सुनावणी लांबणीवर पडली. आता उद्या आता न्यायमूर्ती सूर्यकांत आणि न्यायमूर्ती बागची यांच्या खंडपीठासमोर हा खटला अंतिम निर्णयासाठी येत आहे.
