पुणे: शासकीय वाहनाची तोडफोड केल्याप्रकरणी महाराष्ट्र नवनिर्माण सेनेचे महापालिकेतील गटनेते वसंत मोरे यांच्यावर आज शिवाजीनगर पोलिस ठाण्यात गुन्हा दाखल करण्यात आला . सार्वजनिक संपत्तीचे नुकसान आणि बेकायदेशीर जमाव केल्याच्या कलमांनुसार हा गुन्हा दाखल करून त्यांना पोलिस ठाण्यात बोलावून अटक करून न्यायालयात नेणयात आले .यावेळी त्यांच्यावतीने ऍड. गणेश म्हस्के आणि ऍड. सतीश कांबळे यांनी युक्तिवाद करीत जामीन देण्याची मागणी केली. त्यानुसार प्रथमवर्ग न्यायदंडाधिकारी जानवी केळकर यांनी त्यांना जामीन मंजूर केला आहे.
कोरोना रुग्णाच्या मृत्यूनंतर त्याला अंत्यसंस्काराला घेऊन जाण्यासाठी वेळेत रुग्णवाहिका न मिळाल्याने मोरे यांनी सोमवारी महापालिका उपायुक्त नितीन उदास यांच्या शासकीय गाडीच्या काचा फोडल्या होत्या. फेसबुक वर हा प्रकार लाइव्ह करत जाहिर पणे त्यांनी दहशत निर्माण करण्याचा प्रयत्न केला.घोले रस्ता क्षेत्रीय कार्यालयाच्या आवारात हा सर्व प्रकार घडला होता. उदास हे मराठी बहुजन समाजातील कारकुन पदापासुन उपायुक्त पदावर पोहोचलेले अपंग असलेले अधिकारी आहेत. मोरे हे स्वतः महापालिकेतील गटनेते आहेत. आयुक्त विक्रम कुमार, महापौर मोहोळ यांच्या समोर आता ते याच विषयावर आंदोलन करतील असा महापालिकेतील अधिकारी वर्गाचा अंदाज आहे. मात्र या प्रकरणी शिवाजीनगर पोलिस ठाण्याच्या पोलिस निरीक्षक (गुन्हे) मनीषा झेंडे यांनी फिर्याद दिली आहे.