पुणे: प्रामुख्याने पर्यावरण रक्षणासाठी तसेच वीजग्राहकांसाठी वार्षिक 120 रुपयांची बचत करणाऱ्या ‘गो-ग्रीन’ योजनेला मोठा प्रतिसाद मिळत असून पुणे परिमंडलात आतापर्यंत 15,970 वीजग्राहक या योजनेत सहभागी झाले आहेत.
दरम्यान, गेल्या तीन महिन्यांत 6915 वीजग्राहकांनी गो-ग्रीनच्या माध्यमातून वीजबिलासाठी छापील कागदाऐवजी ‘ई-मेल’चा पर्याय निवडला आहे. यासोबतच महावितरणकडे मोबाईल क्रमांकाची नोंदणी केल्यानंतर वीजबिलासह इतर विविध माहितीचा ‘एसएमएस’ वीजग्राहकांना निशुल्क दिला जात आहे.
महावितरणने छापील कागदाऐवजी ‘ई-मेल’चा पर्याय निवडल्यास वीजग्राहकांना 1 डिसेंबर 2018 पासून प्रतिबिलात 10 रुपये सवलत जाहीर केली आहे. पर्यावरणपुरक या योजनेमुळे वीजग्राहकांचे देखील वार्षिक 120 रुपयांची बचत होणार आहे. याशिवाय वीजबिल दरमहा ‘ई-मेल’ तसेच ‘एसएमएस’द्वारे मिळणार असल्याने ते लगेचच ऑनलाईनद्वारे भरण्याची सोय उपलब्ध होत आहे. ज्या वीजग्राहकांना छापील वीजबिलांची गरज भासल्यास त्यांना ईमेलद्वारे प्राप्त बिल किंवा महावितरणच्या www.mahadiscom.in या अधिकृत संकेतस्थळावर असलेले वीजबिल डाऊनलोड व प्रिंट करण्याची सोय आहे. विशेष म्हणजे ही वीजबिले मूळ स्वरुपात उपलब्ध आहेत व ते रंगीत स्वरुपात देखील प्रिंट केले जाऊ शकते.
पुणे परिमंडलातील मार्च अखेरपर्यंत 9055 वीजग्राहकांनी ‘गो-ग्रीन’ योजनेत सहभाग नोंदविला होता. त्यानंतर तीन महिन्यांत या योजनेत सहभागी झालेल्या वीजग्राहकांची संख्या 15970 वर गेली आहे. यामध्ये पुणे शहरात 8959, पिंपरी चिंचवड शहरात 4531 आणि मुळशी, मावळ, खेड, आंबेगाव, जुन्नर, वेल्हे तालुक्यातील 2480 वीजग्राहकांनी वीजबिलासाठी छापील कागदाऐवजी ‘ई-मेल’ व ‘एसएमएस’ला पसंती दिली आहे.
पुणे परिमंडलात सुमारे 27 लाख 49 हजार वीजग्राहकांना ‘एसएमएस’ द्वारे बिलाची रक्कम, देय दिनांक आदींचा तपशील, दरमहा वीजबिलाचा व वीजबिल भरण्याच्या मुदतीचा तपशील, मीटर रिडींग घेण्याची तारीख व कालावधी, मीटर रिडींग घेतल्याची तारीख व एकूण युनिटचा वापर आदींसह विविध स्वरुपाची माहिती निशुल्क दिली जात आहे. यासोबतच वीजबिलासाठी ग्राहकांनी छापील कागदाऐवजी ईमेलचा पर्याय निवडल्यास त्यांचा पर्यावरण रक्षणासाठी हातभार लागणार आहे व वीजबिलात दरवर्षी 120 रुपयांची बचत होणार आहे. तसेच वीजबिलांचे सॉफ्टकॉपीमध्ये जतन करणे सोयीचे होणार आहे. ‘गो-ग्रीन’चा पर्याय निवडण्यासाठी वीजग्राहकांनी वीजबिलावरील गो-ग्रीन क्रमांकाची नोंदणी महावितरणच्या मोबाईल अॅपद्वारे किंवा महावितरणच्या संकेतस्थळाच्या https://billing.mahadiscom.in/gogreen.php लिंकवर उपलब्थ आहे. वीजग्राहकांनी महावितरणच्या गो-ग्रीन योजनेचा जास्तीत जास्त लाभ घ्यावा, असे आवाहन महावितरणकडून करण्यात आले आहे.