मंत्री रविंद्र चव्हाण यांचे हस्ते प्रशस्तीपत्रक प्रदान
मुंबई/पुणे दि. १ डिसेंबर – अन्न धान्य वितरण कार्यालय पुणे व सोलापूर या दोन कार्यालयांनी १०० टक्के युनिट वाईज आधार सिडींग कामकाज पूर्ण करून राज्यात प्रथम स्थान मिळविल्याबद्दल अन्न नागरी पुरवठा व ग्राहक संरक्षण मंत्री रविंद्र चव्हाण यांनी आज पुणे व सोलापूर शहर परिमंडळ अधिका-यांचा प्रमाणपत्र प्रदान करुन गौरव केला.
पुणे विभागातील अन्न धान्य वितरण अधिकारी श्रीमती सुरेखा माने व पुणे शहर सर्व परिमंडळ अधिकारी तसेच सोलापूर विभागातील अन्न धान्य वितरण अधिकारी सोलापूर सुमित शिंदे यांचा मंत्री रविंद्र चव्हाण यांच्या हस्ते प्रशस्तीपत्रक प्रदान करुन सत्कार करण्यात आला.
पुणे विभागाने ज्या पद्धतीने पुढाकार घेऊन आधार सिडींगच्या कामकाजात आघाडी घेतलेली आहे त्याच धर्तीवर राज्यातील इतर विभागांनी देखील सदर कामकाज १०० टक्के तातडीने पूर्ण करावे असे आवाहन मंत्री चव्हाण यांनी केले.
याप्रसंगी पुणे विभागाचे उपायुक्त पुरवठा डॉ. त्रिगुण कुलकर्णी उपस्थित होते. यावेळी पुणे विभागात सध्या सुरु असलेल्या पीएम वाणी या उपक्रमाची माहितीही मंत्री चव्हाण यांना देण्यात आली.तसेच विभागातील रास्त भाव दुकानदार यांच्या आर्थिक उत्पन्नवाढीसाठी विभागात ज्या विविध उपाययोजना राबविण्यात येत आहेत याची माहितीही डॉ. कुलकर्णी यांनी दिली. रास्त भाव दुकानदार यांना वारंवार येणाऱ्या Epos मशीनच्या अडचणीसंदर्भातही लवकरच मार्ग काढण्यात येईल असे आश्वासन मंत्री चव्हाण यांनी दिले.