पुणे- अरण्येश्वर येथील एकता मंडळाच्या वतीने स्थानिक नागरिकांच्या हितार्थ “एकता सायकल स्वारी” ह्या मोफत सायकल वापर सामाजिक उपक्रमाचा लोकार्पण सोहळा उत्साहात संपन्न झाला.
“एकता सायकल स्वारी” हा अनोखा व लोकपयोगी मोफत सायकल वापराचा सामाजिक उपक्रम पार पडला. या उपक्रमाचे लोकार्पण स्थानिक कार्यक्षम नगरसेविका सौ. अश्र्विनी कदम व नितीन कदम यांच्या प्रमुख उपस्थितीत व हस्ते संपन्न झाला. यावेळी शिरीष शहा व मिलिंद तांबोळी हे ही उपस्थित होते आणि हा उपक्रम प्रत्यक्षात आणण्यासाठी या दोघांचे विशेष सहकार्य लाभले.
उदघाटन प्रसंगी बोलताना नितीन कदम यांनी मंडळाच्या आजवरच्या कार्याचे कौतुक केले. सर्वांना महत्त्वपूर्ण मार्गदर्शन करताना मंडळातील नागरिकांनी आवर्जून सायकलचा वापर करावा आणि एकता मंडळाच्या कार्यकर्त्यांच्या या संकल्पनेचे समाजातील इतर घटकांनी नक्की अनुकरण करावे असे आव्हान केले. विशेषतः प्रत्येक सोसायटीच्या सभासदांनी आपल्या नागरिकांसाठी १ ते २ सायकल सोसायटीत उपलब्ध करून देऊन आसपासच्या छोट्या छोट्या कामांकरिता सायकलचा वापर सुरू करावा असा विचार मांडला.तसेच मंडळाच्या वतीने मंडळाचे जेष्ठ मार्गदर्शक व सल्लागार दादा बोडके यांचा ७४ वा वाढदिवस साजरा करण्यात आला. यावेळी दादांतर्फे सर्वांसाठी अल्पोपहार आयोजित करण्यात आला होता.
हा उपक्रम सुरू करण्याचे मुख्य कारण म्हणजे आजच्या दैनंदिन जीवनात महागाई झपाट्याने वाढत असताना प्रत्येकजण इंधन वाहनांना प्राधान्य देत आहे. त्यातच कोरोना महामारी नंतर पेट्रोल, डिझेल व सर्वच इंधनाचे भाव गगनाला भिडले आहेत. अशा अनेक महत्त्वपूर्ण गोष्टींचा विचार करत एकता मंडळाच्या वतीने ‘करूयात सायकलचा वापर, होईल पर्यावरण संरक्षणाचा जागर…!’ ह्या ब्रीदवाक्याची घोषणा करत स्थानिक नागरिकांच्या हितार्थ एक अनोखा व लोकपयोगी असा “एकता सायकल स्वारी” हा सामाजिक उपक्रम सुरू करण्यात आला आहे. एक काळ होता की, पुणे शहराला सायकलचे शहर म्हणून ओळखले जायचे पण आजच्या घडीला हे चित्र अदृश्य झाल्यासारखे दिसते. यामुळे एकता कार्यकर्त्यांच्या प्रभावी संकल्पनेतून नागरिकांसाठी मोफत सायकल्स उपलब्ध करून देऊन सर्वांना पर्यावरण संरक्षण, इंधन बचत, शारीरिक गुणवत्ता वाढ व इतर अनेक फायदे समजण्यासाठी छोटासा प्रयत्न केला आहे. या सामाजिक उपक्रमातून अनेकजण सायकलचा नक्कीच वापर करून या उपक्रमाचे स्वागत करतील असा विश्वास सर्वांना आहे.