पुणे : संवाद पुणे आणि अ.भा. मराठी बालकुमार साहित्य संस्थेतर्फे बालदिनानिमित्त ‘बालदिन दिवाळी’चे आयोजन करण्यात आले आहे. गमतीजमती, बालकविता, नृत्य, गप्पा, गोष्टी आदी कार्यक्रमाने हा बालदिन रंगणार आहे. हा कार्यक्रम येत्या शनिवारी (14 नोव्हेबर) दुपारी 12.30 वाजता पुणे श्रमिक पत्रकार संघात पार पडणार आहे. अशी माहिती संवाद पुणेचे सुनील महाजन यांनी दिली.
प्रमुख पाहुणे म्हणून महापौर मुरलीधर मोहोळ उपस्थित असणार आहेत. चारूहास पंडित, डॉ. संगीता बर्वे, राजीव तांबे मुलांशी संवाद साधणार आहेत. कार्यक्रमाची संकल्पना आणि निर्मिती सुनील महाजन यांची आहे, तर नृत्य दिग्दर्शन निकिता मोघे यांनी केले आहे. भार्गवी ईटकर, शौर्या थोरवे, आराध्या जराड हे बालकलाकार आपली कला सादर करणार आहेत. यावेळी संस्कृती प्रतिष्ठानतर्फे पडद्यामागच्या तंत्रज्ञांच्या मुलांना शैक्षणिक साहित्याचे वाटप करण्यात येणार आहे. हा कार्यक्रम निमंत्रित बालक व पालकांसाठी आहे. कार्यक्रमात सुरक्षित अंतर पाळले जाणार आहे. तसेच मास्कचा वापर केला जाणार असल्याचेही महाजन यांनी सांगितले.